یانە ویەردە و هەورامانی نەوروٙز و نەوریٛزانە

نەوروٙز و نەوریٛزانە

57

نەوروٙز و نەوریٛزانە

ئەوسا دەگا وەشەکیٛ بیٛسارانی نزیک بە وەهاری بە ئامای نەوروٙزی ڕەنگ و بوی تازە گیٛریٛ.

حەفتیە وەڵیٛ نەوروٙزی گرم و قاڵ گنیٛ دلیٛ مەحاڵەکا و خەڵکیچ بە گەرم و گوڕی لویٛنیٛ پیوەی وەهاری.

وەهارو و نەوروٙزوو ئیٛمە جیاواز بیٛ، بڕیٛیو ڕەسمیٛ وەشیٛما بیٛنیٛ کە هیچ وەخت ویر و مەژگمانە نمەلا.

چن ڕویٛش مەنیٛ بە نەوروٙزی زاڕوٙڵیٛ وەشی گنیٛ دڵشا و سات شماری ئامای وەهاری و نەوروٙزانەی وەقرەشا بڕیٛ. یوٙ چا هەرمانە وەشا بریشتەی گەنما و مەژگەی بیٛ پەی نەوریٛزانەی. ئاخر و ئوخروو زمسانیٛ بوەو گەنمە بریٛژیایا کوڵانا گیٛریٛ، گەنمە گیٛڵانیٛ وەرئاویٛ پاک کریایی و شوریایی و تەڕ و تەمیٛسیٛ چەنی مەژگەی و ساج و هیٛزمیٛ پاڵوو ئایٛرگای و سەرتەنووری و یام بانجیٛڵەی.

زاروٙڵیٛچ کوٙ بیٛنیٛوە دەور و بەروو ئەدٚایشا تا ئەوەڵ دەوروو گەنما بریٛژیایا ئارام و قەرارشا بڕییٛ، ئایٛر و ئارگای گنیٛ زەردە گڕ و ساج نرییٛ سەروو دیٛسپای و گەنمیٛ کرییٛنیٛ دلیٛ ساجی بە چزەچز هەڵمی سەروو گەنما گیٛریٛ و وردە وردە وشکیٛ بیٛنیٛوە. داخی ساجی ئەمانوو گەنما بڕیٛ و   هوٙرتەقیٛنیٛ و گنیٛنیٛرە زاڕوٙڵیٛچ بە پژگیایی گەنما کەیف کەریٛنیٛ دەس کەریٛنیٛ قل و بلوو و خوەی و شادٚیشا وەشی وزیٛ دڵوو ئەدٚا و تاتە زەحمەت کیٛشەکاشا. پی حەدٚە ئاوەڵ جار گەنمیٛ هاڵی کریایانیٛ، هیچ زاڕوٙڵیٛوە نەپەرسیٛوە پەی داخی گەنما، دەس کیٛشیٛنیٛ هەر یوٙ بەشوو ویٛشا بەریٛنیٛ. گردوو کەسی ساجوو گەنمیٛش نەبیٛنیٛ، لویٛنیٛ ئەگەر یوٙ بیایانیٛش نەختیٛو لاشاوە وازیٛنیٛ و ساجیچ دەسەودەس کەریٛنیٛ تا کاروو گردی ڕیک کەوتایا، وەخت پاسە بیٛ ئا ساجە دە یانیٛ کەریٛ ئینجا گنیٛوە دەسوو ساحیٛویش.

ئەدٚاو یانەی بە زەحمەتیٛوی فرە ئی تفاقا چەنی چن چیٛوا تەری پیٛسەو سنجەیا و وەزا و تفا و بڕیٛو میٛوە وشکا تەری ئامادٚەش کەریٛ. ئاخر ڕوٙ زمسانیٛ زاڕوٙڵیٛ جلیٛ تازیٛ کەریٛنیٛ وەر و  کوٙ بیٛنیٛوە و بەرەو بەرە گیٛڵیٛنیٛ پەی نەوریٛزانی تەقەتەق، تەقە دیٛنیٛ بەرا و بەدەنگی بەرز هاواریٛ کەریٛنیٛ و پیروٙزبایی ساڵەی تازیٛ واچیٛنیٛ بە ساحیٛو یانەی و نەوریٛزانەو ویٛشا گیٛریٛنیٛ دمایی جەموە کەردەو نوریٛزانەی نزیک بە ویٛرەگای هەر یوٙ قەرەفتیٛڵیٛوە بە جلە کوٙنا پیٛچیٛنیٛوە و هەوا تاریکش کەردایا گەورە و وردی سەروو بانا گیٛریٛنیٛ و قەرەفتیٛڵەی گیسنیٛنیٛوەنە و زمسانی ڕوانە کەریٛنیٛ و جەژنە گیٛریٛنیٛ پەی ئامای وەهاری..

ڕوٙی دماینش لویٛنیٛ پەی دلیٛ باخا و جە دارە وەزە بەرزەکا بە وەریٛسیٛوە گەوریٛ و هیٛقمە کە بە دەسوو خاتوونە دەس ڕەنگینەکاو دەگای گیٛرییٛوە حەیلەکانیٛ هوٙرە وزیٛنیٛ و یوٙ یوە نیشیٛنیٛ حەیلیٛ و وەشی و شادٚی ویٛشا کەریٛنیٛ. دلیٛ دەگای پەڕ بیٛ جە میٛمانا. هەر یوٙ یاگیٛوە ئیٛنیٛوە، یوٙ زەماوننە کەریٛ و یوٙ میٛمانیٛ ڕوانە کەریٛ و یوٙ پەی کەشی لویٛ. هەر یوٙ بە جوٙریە ویٛش سەرقاڵ کەریٛ. تا ڕوٙ سیٛنزەی دەگا شلوقی و وەشی ویٛش بیٛش. وەشڵەی پا کات و ساتا وەشی و شادٚی ئا ڕوٙوە ویەردانە کە یادٚشا هەتا هەتایین زیهنمانە یاگیٛش گیٛرتیٛنە و نمەلوٙ.

شەریفی (ئەسرا هەورامی)

 dotnet
Load More In ویەردە و هەورامانی

وەڵامێک بنووسە

پۆستی ئەلکترۆنیکەت بڵاو ناکرێتەوە . خانە پێویستەکان دەستنیشانکراون بە *

بابەتو دماتەری

تازەتەرین بەرویرو نویسای د. ناجح گوڵپی جە ئایندێوی نزیکنە چاپ و پەخش مەبوٙنەوە

تازەتەرین بەرویرو نویسای د. ناجح گوڵپی جە ئایندێوی نزیکنە چاپ و پەخش مەبوٙنەوە کتیٛبو (مان…