یانە هەورامانی بشناسدیٛ یادٚش بەرز بوٙ ماموٙسا قادریان

یادٚش بەرز بوٙ ماموٙسا قادریان

15

یادٚش بەرز بوٙ ماموٙسا قادریان

ئا معەلیٛمە کە ئوٙمیٛدٚش دانی پەنە

بە واستەو جەنگ و جەڵەبەیەو، ساڵیٛو مەدٚرەسەم ئاسەبیٛ جیا و ساڵەی وەڵینەیچش مەدٚرەسە نیمە و نیمە چڵ و تەق و لەق لوابیٛ ڕاوە، ئا ساڵە وەڵینیٛ، بڕیٛو جە معەلیٛمەکاما «کرماشان» ییٛ بیٛنیٛ و وەرو تەرسیٛ «نەوسودٚ» ەشا ئاسیٛبیٛ جیا و لوایبیٛنیٛوە پەی کرماشانی، ئانە بیٛ کە دەرس و مەدٚرەسەو ئاساڵەیە کە منیچ کەڵاسو ئەوەڵو دەبیرسانی بیٛنیٛ، بە ڕیٛک و پیٛکی نەلا ڕاوە، ئاخرو ساڵیٛوە ئیٛمتیٛحانیٛوی گوٙترەی و هاکەزاییما گیٛریا چەنە و مەدٚرەسە تەعتیٛڵ بی. بە بیٛ تفاق و بە سەوادٚیٛوی نوٙقسان و بە بنەڕەتیٛوی زاییٛفەو، جە ئابانو ساڵەو 1360 جە دەبیرسانو شوٙهەداو «پاوە» یەنە جە کەڵاسو دوەمو دەبیرسانی جە ڕشتەو علومی تەجرەبیەنە نامنویسم کەردٚ. چی ئابان؟ ئەی چی مهر نا؟ ئاخوٙر ئیٛمە ساڵ ئەوەڵما جە نەوسودٚەنە وانابیٛ و بە بیٛ ئانەیە هیچ مەدرەکیٛو دەسماوە بوٙ ڕوەما نیایبیٛ شارەکا ئیٛرانی و مەدرەکیٛ ئا یاگا کە بییٛبیٛنیٛ بە میٛدٚانو جەنگی گردٚ سوٙتیٛبیٛنیٛ و جە بەین لوایبیٛنیٛ. هەر کەس ئیٛدیٛعاش کەردٚایا کە ساڵەی وەڵینە کەڵاسو ئاندٚەیە بیەن، ئیٛمتیٛحانو ئا کەڵاسیشە چەنە گیٛریٛنیٛوە و ئەگەر پەیشا بەر کەوتەبیایا کە ڕاس ماچوٙ، قبوڵش کەریٛنیٛ و بەریٛنیٛش کەڵاسیٛوی سەرتەر. ئانە بیٛ کە منیچ واتەبیٛم کەڵاسو ئەوەڵو دەبیرسانیم جە نەوسودٚەنە وانان و دمای ئانەیە کە ئیٛمتیٛحانی(ورودی) ئا کەڵاسیشا جە مهر مانگەنە چەنە گیٛرتاوە، قبوڵشا کەردٚا و جە ئابانەنە پیٛسەو مسیاریٛوٙ کەڵاسو دوەمو دەبیرسانی لوانی دەبیرسانو شوٙهەداو هەشتو ئابانو پاوەی و دەسم کەردٚ بە دەرس وانی. با مدٚروٙ کە وەزعەو ئابوری یانەیما چندٚ خرابە بیٛ و بەڕاسی محتاجیٛ شامەو شەویٛ بیٛنمیٛ و ها زمسان خەریک بیٛ ئای ئیٛ و بەرگو هەژاری کە نەبیٛش، دڕیای دڕییٛ! ساڵیٛو تەرک تەحسیٛڵ و مانگیٛو دیٛر لوای سەرو کەلاسی و پایەی زاییٛف و وانای ڕشتەو تەجرەبی بەڕاسی پەیم فرە سەخت و قوٙرس بیٛ و دڵگرانیش پەی وەش کەردٚە بیٛنیٛ. نە ماموٙساکا ئەژناسیٛنیٛ و نە دانش ئاموزەکا. بارو سەر بارا چون کەڵاسو ئیٛمەنە کناچیٛچ بیٛنیٛ(دەبیرسانی کناچانە ڕشتەو تەجرەبیش نەبیٛ) قوٙرسی فرەتەر کەوتەبیٛ سەرو شانام. سرگ و سەرگەردٚان و بیٛچارە و تەنیا و ڕەش و ڕوت و غەریب و نەدار، ویٛم گم کەرەدٚە بیٛ، نەزانیٛنیٛ ئەو کیٛ پەنا بەرو و چیٛش بوانو و چیٛش کەرو. ئەجی تەختەو سەرو ئاویٛنا، هەر چی ماموٙساییٛ دەرس دیٛنیٛ من ئەجیٛ وەزیم پەی مژمارا، دیارا ئەچی بار و دوٙخەنە ئەگەر یوٙ بیٛ پیٛوایتەو دەس دوٙ چیٛرو باڵاتەو تا ڕاس بیەو هەرمانیٛوە گەوریٛت پەی کەروٙ. شیمی و ڕیاضی و فیزیک و زیست شناسی و هندسە و….پیا پڕوکنیٛ بیٛنیٛ. ماموٙساو شیمی ئا ساڵەیمە ماموٙسا «عارف قادریان» بیٛ کە فرە زو دەرکش کەردٚا و بە موٙدٚارا کەردٚەی چەنیم نە تەنیا جە دەرسەکەو ویٛشەنە بەڵکوم بە ئەنە یاونای ماباقی معەلیٛمەکا کە چەمشا چەومەو بوٙ، کوٙمەکیٛوی وەرچەمش پەنە کەردٚا و ئوٙمیٛدٚیٛوی تەمامش پەنە دانی. ڕویٛو گوٙشەو حەیاتەو مەدٚرەسەکەیەنە کزم کەردٚەبیٛ و چوٙکڵیٛ دیٛنیٛ زەمین، تومەز مەکەرە ئادٚ پەنجەرەو دەفتەریەنە تەماشەم کەروٙ، مدٚیەو یو نەما باڵم، توٙقانی، لام کەردٚەو مدٚیەو جەنابو ماموٙسا قادریانیا، ماچوٙ خەفەت نەوەری، دیارا توٙ چیٛویٛوت سەرە بوٙوە، بەڵام شەرایتی پاسشە کەردٚەن کە توٙ سەختت وەنە ویەروٙ، نگران نەبی هەر چومنەت کەردٚەن ئیٛساڵ بەربشە(قبوڵ) بە، شکەم نیٛنە ساڵیٛوتەر جە فرەو ئی مسیارا خاستەرەنی. قسەکاش ئوٙمیٛدٚ دانی پەنە و دڵگەرمتەر جە چا وەڵی دەسم کەردٚ بە حەول و تەقالا. جەنابو ماموٙسای جە چەمدٚاری کەردٚەیم غافڵ نەبیٛ و جە کەڵاسو دەرسو ویٛشەنە تەوەجوٙی فرەتەرم پەنە کەریٛ. هەر چندٚە من هەرگیٛز جە شیمیەنە نەتاوام فرە موەفەق بو، بەڵام بوٙنەو ئی معەلیٛمە نەرم و نیانیمەو و بوٙنەو ئا گردٚ موٙبەتاوە کە ئەچا سەردەمەنە پەنەش کەردٚا هەر شیمیم وەش سیا. پەی هەمیشەی خاترەش جە دڵمەنە زیندٚەن، یادٚش بەخەیر بوٙ. بەڕاسی:

مرد نکو نام نمیرد هرگز

مرده آنست که نامش به نکویی نبرند

وەلی فەتاحی – روانسر

99/12/3

 hewraman
Load More In هەورامانی بشناسدیٛ

وەڵامێک بنووسە

پۆستی ئەلکترۆنیکەت بڵاو ناکرێتەوە . خانە پێویستەکان دەستنیشانکراون بە *

بابەتو دماتەری

شوشمیٛ و نەوسوڎە تا روانسەر چەنی کاک ولی فتاحی نویسەر و محقق

شوشمیٛ و نەوسوڎە تا روانسەر چەنی کاک ولی فتاحی نویسەر و محقق ▫️سلام پەی ڕوحو کاک ولی فتاحی…