یانە گردین ئەیزەن بوەو ڕەگەز پەرسی

ئەیزەن بوەو ڕەگەز پەرسی

112

ئەیزەن بوەو ڕەگەز پەرسی

فرەیچ قەدٚیمی نیا بەڵام ئەوەڵین دەورەو فوتباڵوو جامی جەهانی کە جە «ئوٙروٙگوٙئە» جە ساڵەو 1930یەنە لوا ڕاوە، تەنیا چوار کیٛشوریٛ جە ئروپاوە لوای بیٛنیٛ پەی ئامریکای لاتینی تا چەنی نوٙ کیٛشوەراتەری ئەچا قاڕەنە جە جامی جەهانیەنە شیٛرکەت کەرا. دیارا هیچکام ئەچی کشوەرا وەڵتەر هوٙرنەچنیای بیٛنیٛ و هەرکام کە ئازاو فدراسیوٙنو جەهانی فووتباڵی بیٛنیٛ تاویٛنیٛ ئەچی مسابیٛقەنە حزوورشا بوٙ. سەرجەم تەنیا سیٛنزە وەڵاتیٛ حازریٛ بییٛبیٛنیٛ. یوٙ ئەچا چوار کیٛشوەرە ئروپایە کە بە سواری کەشتی لوای تا ئەچا مسابیٛقەنە بەشداری کەروٙ«فەرانسە» بیٛ. دمای 90 ساڵا هیزی شەوە تیمیٛوی فەرانسەی و تیمیٛوی ترکیەی بازیشا بیٛ!

ئەریٛ، هیزی شەویٛ جاموو باشگاکا ئروپای گەمەشا بیٛ. بڕیٛوشا بەردٚشا و بڕیٛویچ بریای و ئەجوٙم یوٙ دویٛویچشا بەرابەریٛ بییٛ. بەڵام یوٙ ئەچا گەما نیمە چڵ کریا و ئیدامەش نەدٚریا. یاگیٛ سەرەنجیەنە کە چی گەمەو بەینو«پاری سن ژرمن»ی فەرانسی و« باشاک شهیر»ی ترکیەی مشیوٙ ئیٛشەو تیٛکرار بوٙوە؟ داوەری چوارەم بە داوەرو دلیٛ زەمینی ماچوٙ: «کارتی سوور بدٚە بە ئا مربیە سیاو پوٙسەیە » داوەریچ ئازا گوٙرج و گوڵ بە مرەبی ڕەنگ سیاوی کارتش دا و مرەبی ئیٛخراج کریا. ئەچی حەیس و بەیسەنە کە دەیەقەو ویسو بازی بیٛ، گەمەکەریٛکیٛ تیمو باشاک شهیرو ترکیەی بە بەهانیٛ ئینەیە کە جەنابو داوەری فەرماوان کارت دە بە ئا مرەبیە سیاو پوٙسەیە و بە کار بەردٚەی ئی جوٙرە کەلیما ئیٛهانەتا و ویری ڕەگەز پرسانە زیندٚە کەروٙوە، زەمینو فوتباڵیشا ئاس جیا و زیایرە و بازیشا نیمەچڵ کەردٚ. ئینە تا ئەویٛگە ڕەنگا چیٛویٛوی تەبیٛعی بیە بوٙ و جارای تەریچ جە لایانو تیمای تەریچەو ئەواخوا بیەنەو یاگی تەعاجبی نییٛنە، بەڵام ئینە کە تیمو پاری سن ژرمنی چ زەمینش ئاس جیا و واتشا ئیٛمەیچ حازریٛ نییٛنمیٛ گەمە کەرمیٛ چوون ئەچی گەمەنە کەلیمیٛ ڕەگەز پرسانیٛ ئاماینیٛ دەمو داوەریەنە، یاگیٛ نە تەنیا تەعاجبی بەڵکوم یاگیٛ سەرەنجو تەحلیلی تایبەتیا. سەرپرسەکیٛ پاری سن ژرمنی تاویٛنیٛ زەمینی تەرک نەکەرا و تەنانەت جە قانونو یەریٛ بە هیچی گەمەکەی بە مەنفەعەتو ویٛشا تەمامنا، بەڵام ئی هەرمانیٛشا بە شانازی نەزانا و ئادٚیچیٛ زەمینشا ئاس جیا و ئەچی بەردٚە بیٛ زەحمەتەیە دەسیٛشا شوٙرتیٛ تا دەرسو گەورەیی و فەزیلەتیشا دا بوٙ بە فرەو ئانیشا کە گردٚ چیٛویٛوی تەنیا جە بەردٚەی ویٛشانە وینا، بە تایبەت بە تیمو ترکیەی!! ئانە بیٛ کە یوفای ئیٛعلامش کەردٚ ئیٛشەو گەمەکەشا ئەواخوا بوٙوە. بەڕاسی یاگیٛ من جە موٙباریٛزە چەنی ڕەگەز پرسی ئینا چکوٙوە؟

وەلی فەتاحی  99/9/19

 hewraman
Load More In گردین

وەڵامێک بنووسە

پۆستی ئەلکترۆنیکەت بڵاو ناکرێتەوە . خانە پێویستەکان دەستنیشانکراون بە *

بابەتو دماتەری

شوشمیٛ و نەوسوڎە تا روانسەر چەنی کاک ولی فتاحی نویسەر و محقق

شوشمیٛ و نەوسوڎە تا روانسەر چەنی کاک ولی فتاحی نویسەر و محقق ▫️سلام پەی ڕوحو کاک ولی فتاحی…