یانە ئەدەب و هونەر دەی بوەرە گوشتو ئاسکیٛ

دەی بوەرە گوشتو ئاسکیٛ

54

دەی بوەرە گوشتو ئاسکیٛ

شەویٛوە سەردەو ئاخرو پاییزی بیٛ. رۆی وەڵینو ئا شەویٛ، سەردار و شانازەی ژەنیش، ئامیٛبیٛنیٛ زەماوندە پەی “برلینی”. شارەکەو ویٛشا “لایپزیگ” دوە سەعاتیٛو جە برلینی دورتەر بیٛ. سەعات دۆرو ١٢ شەویٛ بیٛ زەماوندەکیٛ تەمامیا و میٛمانەکیٛ یوەیوەی لویٛوە روەو یانەی. سەرەڕاو خۆڵکەو دۆس و برادەری سەردار و شانازە قەرارشا دا پا شەوەنە گیٛڵاوە پەی شارەکەو ویٛشا. سەردار ٥٠ ساڵیٛش پەڕ کەردەبیٛوە و یانەنە بیٛ کار بیٛ. شانازەیچ دۆرو ٤٥ ساڵاش بیٛ و کاریٛوی عالش شرکەتیٛوەنە دەس کۆتەبیٛ. نزیک بە ١٠ ساڵیٛو بیٛ جە هەورامانۆ ئامیٛبیٛنیٛ ئاڵمانیا. ساحیٛبو دویٛ کوڕە گۆرا بییٛبیٛنیٛ کە؛ یانەشا چەنی ئادیشا، جیا بیٛ. سەردار کوت و شەڵواریٛوش کەردەبیٛنە، فرە جە ویٛش گۆرەتەر بیٛ. سەرو ئی کوت و شەڵواریە شانازیٛ جەنگیٛوش چەنی کەردەبی. وەلیٛم شانازە دەسیٛو جلیٛ ویٛمانیٛش کەردیٛبیٛنیٛنە کە فرە زەریفیٛ و وەشپەنەکۆتیٛبیٛنیٛ. خواحافیٛزیشا کەرد و سواریٛ ماشینەکەیشا بییٛ و چمیٛرە روەو شارەکەو ویشا.

کوچیٛو یەواش لوە سەردار هەوا فرە سەردا جادەکە یەخش کەردەن.

من قانونی ملو شاناز. جادە ٧٠ بۆ، ٧١یٛچ مەلو. ئیتر ئی وەڵاتە گرد چیٛوش سەرو حەسابیا. من ئەجۆم ئەگەر خەڵک ئا خەت و نیشانیٛ کە چی وەڵاتەنە نرییٛنیٛرە، خاس بەراشا ڕاوە، هیچ کەس چی جادە وەشا ئاڵمانیەنە، توشو قۆمیای خرابی مەبۆ. سەرنجم دان زیاتەر جە ئاڵمانیەکا، ئانە خارجیەکیٛنیٛ جەریمە کریا و ماشینەکیٛشا هۆرویٛڵیا.

تەنیا ئانە نیا سەردار فرە چیٛویٛ وردیٛ هەنیٛ دلیٛ شفوریەنە موهیٛمیٛنیٛ، وەلیٛم کەم کەس هەن گۆششا دۆ پەنە. ئیسە با چی باسیە ویەرمیٛ. ئەریٛ پیاکە تۆ سەرو میٛزەکەو ویٛماوە هۆرسیۆ، ئیتر نامایۆ بزانی ئی ژەنیٛتە چیٛشش سەر ئاما و چیٛشش وارد و چیٛشش کەرد!.

ئۆۆۆۆ خواڵەوەی! ژەنەکیٛم تەنیا کۆتیٛبیٛرە و دەمش لکابیٛ پەی قسیٛویٛ و کەس نەبیٛ قسیٛش چەنی کەرۆ!ههههه. خاس دەسو ویٛت وست وەڵیٛ. کورە من دویٛ جاریٛ ئامانیٛ پەی لایت، ئاندە مەشغوڵەو قسا بیٛنیٛ هەر منت ویرەنە نەبیٛنیٛ.

ههههههه دەی سەردار چیٛش کەرو ئیتر، ناشوکری خوای نەبۆ ساڵیٛو یا دویٛ ساڵیٛ جاریٛو زەماوندیٛوە کریۆ. هەر پاسە تۆ لوای لا رەفیٛقەکات، منیچ کۆتا ملو جەمیٛویەرە کە ماویٛو بیٛ نەدییٛبیٛنیٛم.

چەمتۆ بیٛنیٛ قلییٛنیۆ و ویٛت وزیٛنی دمارە.

وەڵڵا سەردار چن وەشم بیەن، یەریٛ ئاندە خەفەتیٛم واردیٛنیٛ.

خەفەتیٛ چیٛشیٛ؟ کەشتیت غەرق بیەبیٛ؟!

کورە با لەمەو ویٛم نەدڕو! سەراحیلیٛت دیە! خۆ تا نزیکەش نەکۆتاوە، نەژناسامۆ. ئینە چیشا ئی خەڵکە پاسە کەرۆ بە ویٛش، ویٛش هەزار جۆریٛ فارۆ. ئیسە کوچیٛو قەی مەکەرۆ نەک پا جۆرە خەڵک نەژناسۆشۆ، نامبارک یاخوا ویٛشا کەردەن بە وەیوڵیٛ.

ئەریٛ ژەنەکیٛ تۆ لاو ویٛشۆ دە ساڵیٛن ئینای ئۆروپانە. ئەسڵەن بە تۆ چیٛش، تۆ چی ویٛت تیٛکەڵو ژیوای خەڵکی کەری. خەڵک لاشەو ویٛشا و هەقو ویٛشا هەرچیش پەنە کەرۆ. وەڵڵا دەسیٛش وەشیٛبا. زەریفە بییٛبیٛ. ئافەرین پەی سەلیٛقەیش. داریٛوی ناقڵۆکار ئەگەر هەرمانەی خاسەش سەرۆ کەری، دیمەکیٛوە زەریفەش چەنە بەر ماری!.

ئۆۆۆۆ یانەو خوای ویٛران بۆ، دەی پانیٛ ماچی زەریف؟!. ئەسڵەن پیا جەماعەت چەمیٛتا لنگاوەقوچ وینا!.

بەڵیٛ نا ماچی شمە فرە تەمامیٛندیٛ؟!

تۆ جاریٛو هۆشو ویٛت بۆت. ئاگام چەنە بیٛ دویٛ جاریٛ وەخت بیٛ جە جادەکەی ترازیەی. هیچ چیٛویٛوت واردەنۆ؟!

چیو چیشی شاناز؛ من چەنی مامۆسا عەلی و جەماعەتی نیشتەبیٛنیٛرە. بە دەمو قساوە جار جاریٛو قوڵمیٛو بیرە کەریٛنیٛ دەمم. ئیتر ئانە کەی بە واردەی حەساب کریۆ. ئەسڵەن مزانیٛ چیٛشا، من نەک تەنیا ویٛم، هەر کەس بیٛ قانونییٛ کەرۆ چی وەڵاتەنە، ئەگەر دەسەڵاتم بۆ سەرەش پان کەروۆ!. قانون قانونا، مشیۆ بەریش ڕاوە.

خاسا جاریٛو بیٛ دەنگ بە، بزانو کیٛن تەلەفون کەرۆ. ئەلەو ئەلەو ماوەش گیان وەشەنی، وەڵڵا هەڵای ئینایمیٛ ڕانە و نەیاویٛنمیٛ یانە. سەرداریچ خاسا سڵامتا کەرۆ. ئییٛ ماچۆ بە چن؟!. هەدوە چەمەکەیم کەرۆ!؟ یانی ٢٥٠٠ ئیٛرویٛ پەی هەردوەلای؟ دەی فرە خاسا وەختەکەم پەی گیٛرە قوربانەت بو.

چەمیٛ چیٛشی و وەختو چیٛشی شاناز!؟

هیچ سەردار؛ ئانە واتم با ئی وەرو چەمامە کوچیٛو لابەرو تا فرە نەبیەن!

ئییٛ پەی خەڵکی عەیبا و پەی جەنابیت بیٛ عەیب!! هههههه

دەی ئیتر تۆیچ سەردار، خەڵک ملۆ گردو لاشەیەش تاشۆ، ئیسە من کوچیٛو ئی وەرو چەمامە لابەرو خرابا؟!

ناوڵڵا کیٛ واتەن خرابا!ههههه

سەردار زو زو دەس ئاریٛ قژیٛشەرە و چەمیٛ گولانیٛ کەریٛوە ئۆ جادەکەی. تەمیٛوە فریٛ جادەکەش گرتەبیٛرە و شەوەکیٛش ئاندەیتەر تاریکە کەردیٛبیٛ. ناخەڵافیٛوەنە چیٛویٛو کۆت وەرو چەماش! داش قەاخو جادەکەی.

وای وای چیٛش کەری سەردار؟ هۆشت بۆ! بدیە وەرو دەمیت! یا حەزرەتو غۆسی! یا ئەڵڵا! یا سلتانی ساق! ئیلای گیٛرە، ئانە ئا زرمە چیٛش بیٛ؟!

مەزانو شاناز، خۆ شیٛتت کەردا ئاندە دوی! با وەزمیٛرە بزانمیٛ چیٛش قۆمیان!.

ئینا سەردار ماڵانت ئاسکیٛوەرە خوا گیٛرۆت. واتیم پەنە هۆشو ویٛت بۆت. گیانکەنشت کەرۆ!. دەی خۆ من دیەم تۆ چەنی نەدیە؟ چی ستۆپت نەکەرد؟. چیٛشت واردەن خۆ تۆ قۆڵت دا وەختو شفوری هیچ نەوەری. یانەت ویٛران بۆ وەخت بیٛ سەرەما بوەری!.

ئیسە تۆ من مەحکەمە مەکەرە جیای پۆلیسی شاناز!. تازە چیٛوەکە بیەن ئیسە چیٛشما پەنە کریۆ. ئەریٛ تۆ بزانی، کاردیما نیەنە ماشینەکەنە؟ با سەرەش بڕو تا مردارە نەبییٛنۆ!

کورە سەردار باسو چیٛشی کەری. پەی خاترەو خوای، پۆلیس بزانۆما پەنە، ئاڵمانەنە بەرما کەرا. خۆ تۆ لاو ویٛشۆ نامبارک پیاو قانونیەنی!.

ئیسە خۆ من پیام نەکوشتەن شاناز! ئاسکیٛوەنە جیای ئانەیە چی بیابانەنە وەرگیٛ بوەراش، با من بوەروش. ئینە کەی بیٛ قانونیا؟. شاناز تۆ مەزانی گوشتەکەش چن لەزەتیا.!

شەوە درنگە بیٛ. سەردار ماشینەکەش قەراخو جادەکەیەنە مدرنابیٛ. لای ڕاسو ماشینەکەی قپیابیٛ و لوابیٛ دلیٛرە. شۆقو چراوەو ماشینەکا کە پاڵشانە رەدیٛ بیٛنیٛ، جادەکەش رۆشن کەردەبیٛ. ئاسکەکیٛ وەرو ماشینەکەیەنە کۆتیٛبیٛ و هەڵای لەقەفڕیٛ کەریٛ.

سەردار بە بیٛ ئانەیە گۆش دۆ بە هاوار و دادو شانازیٛ، نەما قاچیٛو ئاسکەکیٛ و فڕەش دانە پەشتەو ماشینەکەی. وەختیٛو هەنگامش نیا و ئاماوە دلیٛ ماشینەکەی، قاچیٛش پیٛچیٛ گنیٛنیٛ. شانازە وەرو ماشینەکەیەنە نیشتیٛبیٛرە و هەردوە دەسەش هۆرسپارنیٛبیٛنیٛ ئیلا و ئۆلا رومەتیشەرە. ئاسکەکیٛ هەڵای مردارە نەبییٛبیٛوە و دەنگو زرمە زرمو ملیش وەختیٛو کویٛش شیشیٛ ماشینەکەیەرە، ئەژنەوییٛ.

نزیک بە سەعاتیٛوشا مەنەبیٛ بیاواوە شارەکەو ویٛشا. چراوەو بەنزینو ماشینەکەی دەمیٛوبیٛ گیسییٛبیٛنە و بەنزینش چەنە نەمەنەبیٛ.

شانازە بۆنەو قپیای لییٛو ماشینەکەیۆ، خەمی گرتیٛبیٛرە و دڵەورکیٛ ئاسکە زیندەکیٛچ پەریٛشانە کەردیٛبیٛ. بەڵام سەرەڕاو گردچیٛوی، ئاگاش جە وەزعەکیٛ بیٛ. بە بیٛ ئانەیە روە کەرۆنە سەرداری شویش واتش:

پی نیمەشەوەنە ئەگەر بەنزینما چەنە بڕیۆ، چیٛش کەرمیٛ. بەنزینخانیٛو ئینا وەرو ڕیٛمانە لادە ئاگە.”

سەردار بە دیەی عەلامەتو بەنزینخانەکەی، لاشدا و نزیکو پۆمپو بەنزینەکەی کۆتۆ. وەنەش تیٛک شیەبیٛ نەزانیٛ بەرەو بەنزینو ماشینەکەیشا ئینا لا چەپیۆ یا ڕاسو. چا وەختەنە ماشینیٛو دماشاوە بۆقیٛوش داوەنە. ژەن و پییٛوی پیریٛ ئاڵمانییٛش چەنە بیٛنیٛ. شۆقو چراوەو ماشینەکەیشا دابیٛشەنە دلیٛ ماشینەکەو سەرداری. چەمیٛ ئاسکەکیٛ پیٛسە دویٛ “ئیٛرەقولا” گڕیٛنیٛ و ژەن و پیاکە وڕیٛش بییٛبیٛنیٛ پۆرە و پیٛوەرە قسیٛ کەریٛنیٛ.

شانازە بە دیەی ئا وەزعیٛ، بە توڕەییۆ روەش کەردەنە سەرداری و واتش:

لوە زەڕو بەنزینەکەی دە و هەر چیٛگە ترازیایمیٛ ئا ئاسکیٛ وەرە دە با بلۆ.”

سەردار بە بیٛ ئانەیە جوابیٛو دۆوە، لوا دلیٛ. چن نەفەریٛو وەڵیٛشەنە بیٛنیٛ. تا زەڕو بەنزینەکەیش دا، دە دەییٛقیٛوش پۆوە شی.

هەردویٛ بە پەلە سواریٛ ماشینەکەیشا بییٛ. چا وەختەنە گەرەکشا بیٛ قایشەکیٛشا بینا و گنا ڕا، ماشینیٛو پۆلیسی بە چراوەی کەویٛوە ویٛش کەرد دلیٛ بەنزینخانەکەیەرە.

سەردار رەنگەش چەنە نەمەنیٛبیٛ. بە شانازیٛش وات:

واچە شوەکەم زوانی ئاڵمانی مەزانۆ! تۆ قسیٛشا چەنی کەرە.”

ماشینو پۆلیسەکا پاڵو ماشینەکەو سەرداریەنە مدرا و ژەن و پییٛوی جوانیٛ و باڵابەرزیٛ بە جلیٛ فرمییٛوە تەماشیٛو شمارەو ماشینەکەیشا کەرد و نزیکیٛشا بییٛوە.

پیاکە ئاما وەرۆ پەی لا سەرداری و ژەنەکیٛچ لوا پەی پەشتەو ماشینەکەی. وەختیٛو بەرەو دماو ماشینەکەیش کەردۆ، ئاسکەکیٛ بە چەمیٛ زەریٛڵیٛوە دیاش پۆرە. چن کەسیٛتەر جەمیٛ بییٛ دۆرو ماشینەکەی. پۆلیسە ژەنەکیٛ باوشیش ئاردە ئاسکەکیٛرە و بەردەش پەی دلیٛ ماشینەکەو ویٛشا.

پۆلیسەکەیتەر دەسش کەرد پەرس و جواب چەنی سەرداری و شانازیٛ.

شەوەتا وەش؛ بیٛزەحمەت ئیجازەکەیت بەربارە. ئادەی فو کەرە پا دەزگاو ئاڵکۆڵ سەنجیەرە، خاس نەفەسە هۆرکیٛشە و ئیجا دلیٛ دەزگاکەیەنە دەشۆ بەر.

ئایایای !!! خۆ پاسە دیارا فولیچەنی، دەزگاکە سوری سور نیشانە مدۆ!!!

سەردار دەمش گۆ نەگیٛریٛ قسیٛ کەرۆ. بە شانازیٛش وات:

شاناز ئینە ئی کابرا باسو چیٛشی کەرۆ، من تەنیا بیریٛوم واردەن و هیچیٛتەر، ئیتر ئی فلتە فلتشە چیٛشا؟!.”

شانازە خاس زانیٛ سەردار درویٛ مدۆ. خەجاڵەتییٛنە گردو رومەتیش سور بیەبیٛوە. واتش:

جنابو پۆلیسی ئیٛمە زەماوندیٛوەنە بییٛنمیٛ. شوەکەم ماچۆ تەنیا بیریٛوش واردەن!.

ئەهها،،، ئینە چ بیریٛوا کە ئەڵکوڵەکەش ٤٥ دەرەجەن!!.

ئا ئاسکە زیندیٛ ماشینەکەتانە چیٛش کەرۆ؟

سەردار پەشۆکیابیٛ و وەختیٛو قسیٛ کەریٛ، دەمشەنە کەف پڕیٛ پیلا و پۆلارە!.

شاناز واچش پەنە ئی ئاسکیٛ کۆتە وەرو ماشینەکەیما، مردارە نەبیۆ! ئیتر بەزەییما ئاماوە پۆرەشەرە و واتما با ئیٛشەو لا ئیٛمۆ بۆ نەکای وەرگیٛ بوەراش، تا سەحبیٛ زو بەرمیٛش پەی بیمارستانی.

پۆلیسەکە زەردە خویٛوش کەرد و واتش:

فرە خاسا حەیوان دۆسیٛندیٛ و دڵسۆزی کەردیٛ پەی حەیواناتی. بەڵام ئانە وەزیفەو شمە نیا ئا کاریە کەردیٛ. ئیٛمە مشیۆ بەرمیٛش و دەیمیٛش پا یاگا کە مسئولیٛ ئی هەرمانیٛنیٛ.

بیٛ زەحمەت هەردویتا وەزدیٛرە ماشینەکەنە. خانم ئەگەر جەنابت ئیجازەو شفوریت هەن متاودیٛ ئیسە ماشینەکەی بەردیٛوە یانە. ئەگەر نا، بە تاکسی متادیٛ بلدیٛوە. شوەکەت چی ساتۆ، ئیجازەکەش جە دەس دان. چاولایش ئیتر دەسو منەنە نیا. ئانە دادگان کە حوکمو دەرەجەو ئەڵکۆڵەکەی و ئاسکەکیٛ مدۆ. شەوەتا وەش..

وەختیٛو سەردار و شانازە لویٛنە دلیٛ تاکسیەکەی، ژەن و پیا پیەرەکە دورۆ ئاگاشا جە وەزعەکیٛ بیەبیٛ. بە روەی وەشۆ نزیکیٛشا کۆتیٛوە و پیاکە روەش کەردەنە سەرداری و واتش:

خەفەت مەوەرە! هەم ئاسکەکیٛ نەجاتش بی و هەمیچ ویٛت و ژەنەکیٛت. سەر و وەزعەتەنە دیارا فرە مانیانی. پیا مەبۆ بە مانیایی شفوری کەرۆ!!

ڕەزا بەهمەنی

 dotnet
Load More In ئەدەب و هونەر

وەڵامێک بنووسە

پۆستی ئەلکترۆنیکەت بڵاو ناکرێتەوە . خانە پێویستەکان دەستنیشانکراون بە *

بابەتو دماتەری

هەجو دلیٛ شیٛعرەکانو شیٛخ ڕەزای تاڵەبانینە

شیکاری ئەدەبین سەرو شیٛعرەکانو شیٛخ ڕەزاو تاڵەبانی، بە قەڵەم و ئەندیٛشەو ئەسحەد هەورامی، ب…