یانە گردین مەسەلیٛ و ئیدیەمیٛ هەورامییٛ

مەسەلیٛ و ئیدیەمیٛ هەورامییٛ

26

مەلمیٛ لاو ماموٙسای سەلیٛقە وەشو هەورامانی و هانەگەرمڵەی، هەمزە کاکە وەیسی، هەکە کوٙمایوە مەسەلیٛ و ئیدیەمیٛ هەورامییٛش پەی نویستیٛنمیٛ و لەیەکش دێنیٛوە، پیٛوەرە مەوانمیٛشاوە و لەزەت جە فەرهەنگو هەورامانی مەبەرمیٛ.

مەسەلیٛ و ئیٛستیٛڵاحیٛ هەورامییٛ بەشو “ڕ”، “ز”، وە “ژ”

🔺ڕا بەختەو ویٛش مەبەرۉ(نمەبەرۉ).

🔸یانیٛ سەرش وەنە شیٛویان.

🔺ڕازەو مەشیٛنە.

🔸یانیٛ ئی قسیٛ ئەوە بڕیایشا نیا.

🔺ڕاشا زانان لا / ڕاشا زانیٛنە لا.

🔸یانیٛ فیٛریٛش پەنە بییٛنیٛ، سو ئیسیفاڎەش چەنە کەرا.

🔺ڕیٛزش ئینا دارۆ(داروە).

🔸یانیٛ چیٛو هەن دەسشەنە، دەسش پەڕا.

🔺ڕیٛزەرە پۉسوو ویٛت.

🔸یانیٛ تەریٛق بۆ، عەیبا، شوورەییا.

🔺ڕیٛزیٛ نەکەرا چیٛروو پەیات.

🔸یانیٛ نەخەڵەتنات.

🔺ڕوە دەی بە سواڵ کەریٛ بۉ ساحیب یانە.

🔸یانیٛ ڕوودار بۉ و بەهانیٛ فرەتەریٛ گیٛرۉ.

🔺ڕزق ئینا(هەن) لاو خوڎایۆ(خوڎایوە).

🔸یانیٛ کەس ئاوراییٛ مەمرۉ(نمەمرۉ).

🔺ڕسوا کەر/ ڕسواکەرە

🔸یانیٛ ئاوەروو بەر/ ئاوەڕوو بەرە

🔺ڕوو شکیٛن/ڕوو شکیٛنە

🔸یانیٛ تەریٛقەو کەر/تەریٛقەو کەرە، بیٛ پیٛچ و پەنا

🔺ڕواسە نەلیٛ وڵەرە هەژگیٛوەیچ بینیٛ(بەسیٛ) قلیچکەشەرە.

🔸یانیٛ کەسیٛوە یا چیٛویٛ زیاڎەو ویٛت بەری چەنی ویٛت پەی یاگیٛوە، هەکە با بایسوو عەزیەتی فرەتەری.

🔺ڕواسە یا مەبۉ پۆ، یا چوار دەس و پا بۉ پۆ.

🔸 یانیٛ وەختیٛ گیر ئاما ئیٛتر ئاخرشا.

🔺ڕووت و قووت

🔸یانیٛ کەسیٛ کە جلیٛش نیەنیٛ پۉرە. کەنایەیچا جە گەڎایی و کەم دەسی هەکە جە شەق و شڕی یانەینەو لیباسانە دیاری مڎۉ.

🔺ڕوەن فرە بۉ …..ش پەنە ناوا.

🔸 یانیٛ وەختیٛ چیٛویٛ فرە بۉ، بیٛ مانا کریۉ کار و حەرام گیٛڵۉ و خەسار مشۉ.

🔺ڕوەو نەبیەی سیاوە.

🔸بیٛزاری و گلەییٛنیٛ جە بیٛ دەسی.

🔺ڕەت وەڵانا(ڕەتم وەڵان).

🔸یانیٛ سەر جەنجاڵنا، پەرڎەچم نیا.

🔺ڕەحمیٛش تڵیسییٛنیٛ وە.

🔸بە کەنایە بە بنیاڎمی بیٛ ڕەحمی ماچا(مەواچان).

🔺ڕەنجی لاو(لافاو) بەرڎە

🔸یانیٛ زەحمەتیٛوە هەکە نەیاوابۉ سەمەر.

🔺ڕۉ بڕیۉ جە ڕۉخانە، قەوم خاسا تا بیٛگانە.

🔸یانیٛ قەوم هەر قەوما.

🔺ڕۉ مشۉ، قەزا مەشۉ(نمەشۉ).

🔸یانیٛ هەر چی نویسیابۉنە چارەو ئینسانی، یاوۉ لاش.

🔺ڕۉش بڕیاوە.

🔸 یانیٛ مەرڎ/مەرڎە.

🔺ڕۉت یاوا ئارۉ.

🔸یانیٛ وەشت پەی ناما وەرۆ(وەروە)،  ئیٛشتیبا جە ویٛت بیە، بیٛ شانس بیەی/بیٛ شانسە بیەی،…

🔺ڕۉشا.

🔸یانیٛ دەسەڵاتش هەن، وەششا.

🔺ڕۉشنای ڕۉی جە بنەڕۉوە دیارا.

🔸یایٛ وەشی و گولی وەزعیەتی، زەمانەی، چەرخی، یا خاسی و خرابی بنیاڎمی هەر جە ئەوەڵۆ مەعلووما.

🔺 ڕۉڵە وەروو دەموو ئەڎیٛنە(ئەڎاینە) هۉرگیٛرۉ.

🔸یانیٛ دزا/دزەنە.

🔺ڕیش کەنە بنیە سمیٛڵیٛوە.

🔸یانیٛ چی لاوە بەرە پەی ئەو لای، چەو لاوه بارە پەی ئی لای. کەنایە جە چیٛو نەزانایا و جە بنیاڎمی ڕژد و ڕەکیکی و دەس قونجیا.

🔺ڕیشش(سەرەش) بیەن قلیچکەو تووتەی.

🔸کەنایەن جە بنیاڎمی پیری ناباری هەکە حرمەتوو ڕیشی چەرمەیش یا سەرەی چەرمەیش  مەگیٛرۉ(نمە گیٛرۉ).

🔺ڕیشش(سەرەش) بیەن گوڎیٛ.

🔸کەنایەن جە بنیاڎمی پیری ماقووڵی و قابلیەت داری.

❗️گوڎیٛ: پەمە، وڕە، لۉکە

🔺ڕەپ بی/ ڕەپە بیە.

🔸یانیٛ مەرڎ/مەرڎە. بە حاڵەتوو بیٛ ئیٛحتیٛرامی و بیٛ نەزاکەتی بە کەسیٛ ماچا هەکە عال نەبیەبۉ./عالە نەبییٛبۉ.

🔺زاڵم زەواڵش پەی پیٛڎا بۉ.

🔸یانیٛ زاڵم بە دەسو یۉ تەری زاڵم تەر جە ویٛش، لا مشۉ.

🔺زامیٛم مەکولنۆ.

🔸یانیٛ دەسم مەڎەنە، وازم چنە/چەنە بارە.

🔺زروەو تایفەی

🔸یانیٛ یۉ هەکە ویٛش بە ژیر منیۉرە و لاو گەورە تەرانە جە ویٛش، دەس کەرۉ بە قسە کەرڎەی و نەزەر دای.

🔺زل و زەلام/زلە و زەلامە

🔸بە بنیاڎمی هەیکەڵی و چوار شانەی ماچا(مەواچان).

🔺زمسانش ئارڎەن(وەهارش ئارڎەن، هامنش ئارڎەن، پایزش ئارڎەن).

🔸بە کەسیٛ ماچا هەکە زووتەر لیباسیٛ ئا فەسڵیە کەرۉنە.

🔺زوان دریٛژی مەچڕۉ نەڎامەت،

زوان بازەم سەرەم سڵامەت

🔸یانیٛ بیٛ مانا قسە کەرڎەی و فرە دوای بنیاڎمی توشو دەرڎیسەری کەرۉ.

🔺زوانم سویان/ سویا.

🔸یانیٛ ئیٛنڎە قسیٛم کەرڎیٛنیٛ ئیٛتر مانیانا/مانییٛنا.

🔺زوانم کولا.

🔸یانیٛ مەیاروو/مەتاوو هیچ واچوو.

🔺زەڕ پیٛسەنە چڵکوو دەسی.

🔸یانیٛ زوو خەرج کریۉ.

🔺زەڕ دەو، مەڵڵا مزگینە هۉر پڕنوو.

🔸یانیٛ بە زەڕ گرڎ هەرمانیٛ تاوی کەری. چ خاسە، چ خرابە

🔺زەرڎاوەی زەرڎۆ مەمرڎۉ(نمەمرڎۉ).

🔸یانی فرە تەماحیا/تەماحیەنە. فرە جووڵیۉ.

❗️زەرڎاوە: تشاوەو هەڵووچا یا شیٛڵانا، دلیٛ ڕوەن و پیازینە هیٛڵە وەش کەرا، چاڎمای کەراش دلیٛ ئا چاشتیٛ هەکە نەخۉشەر یا نوەینیٛ چەنی هەڵووچا یا شیٛڵانا چەنی زەرڎەچۉی.

🔺زەرڎە مەیماخ

🔸یانیٛ بنیاڎمی بیٛ ڕەنگ و بۉ(حاڵەتوو تەوهینی)

🔺زەرڎەی گەڵباخی

🔸 ئیٛڎیچ هەر یانیٛ بنیاڎمی بیٛ ڕەنگ و بۉ

🔺زەرڎە لۉ پڕان، سیاو لۉ کەنا(مەکەنان).

🔸یانیٛ چەم پۉشی کەرڎەی جە چیٛوی عالی و ڕازی بیەی بە چیٛوی خرابی

(نرسیدن بە اهداف عالی و تن دادن بە اهداف متوسط)

🔺زەڵم و تانجەرۉ باوە یۉ!!!!

🔸یانیٛ دویٛ بنیاڎمیٛ چەتوونیٛ پیٛوەڕە هەرمانە کەرا!!!!!

🔺زەماونڎەو جنا!!!

🔸یانیٛ وەزعیەتی بیٛ سەر و بن هەکە هیچش سەروو هیچیۆ نیا و گر چیٛو تیٛکە و لیٛکەن.

🔺زەنگوو ملوو کتەکیٛن.

🔸یانیٛ ئی هەرمانیٛ کەس مەتاوۉ(نمەتاوۉ) پۉڕنۉش و ساختەش بارۉ.

🔺زەنگەن هارەش کەرڎەن!!!!

🔸 یانیٛ ئا سەروەت و سامانشە هینوو ڕەنجوو سەروو شاناش نیا. یا دزین یا ئیرسا.

🔺زیت و قیت

🔸یانیٛ

بنیاڎمی زرک و زینڎە و لەش ساق

🔺زینگانی بیە و نەبیەیش هەن.

🔸یانیٛ ژیوای وەشی و گولیش هەن.

🔺زینڎەی سەرەی میراسش کەرا.

🔸یانیٛ هەڵای نەمەرڎەن خەریکیٛنیٛ ماڵەکەیش بەش کەرا.

🔺ژان کەرڎەی

🔸یانیٛ ئیٛشی فرە هەکە سۉی مڎۉ دڵوو بنیاڎمی.

🔹دلیٛ وەرویٛنە قاچیٛم ئنڎە چییٛ ژانیشا کەرڎە.

🔺ژوژویچ ڕۉڵەو ویٛش پەسینۉ.

🔸یانیٛ گر کەس زاڕوڵەو ویٛش وەشش مسیۉ. ژوژو زاڕوڵەکەیش لاونۉ  ماچۉ ڕۉڵە ساف و سۉڵەکەم.

🔺ژەنیت مرۉ ژەنەویٛت ئینا(هەنە) یانەنە.

🔸یانیٛ پییٛوە کە ژەنیش مرۉ، واڵیٛ ژەنەکیٛش مارۉ سەروو یانەکەی.

❗️ژەنەوا: واڵیٛ ژەنیٛ

🔺ژەرەژەی فرە دوە بەڵا مارۉ ملو ویٛشەرە.

🔸یانیٛ بنیاڎمی دەم شڕ و فرە ڕیٛس هەکە قسیٛ دەمشەنە مەمرڎۉ(نمەمرڎۉ)، ویٛش گیرۉڎەو فرە دوایش کەرۉ.

🔺ژەنەو یانەی

🔸یانیٛ ژەنی ژیرە هەکە بە ژیری ویٛش یانەی بەرۉ ڕاوە.

🔺ژەنی تەمەڵە پایزیٛنە کەریٛ کەرۉ.

🔸یانیٛ ژەنی تەمەڵە دایمە هەرمانیٛش گناوە دما، وەخت و واڎەنە مەپڕچنۉشا(نمەپڕچنۉشا).

🔺ژەنی درازە بەرەنە نمازە.

❗️چەنی ئیٛحتیٛرامی پەی وانەرە ئازیزا، من تەنیا مەسەلەکا نەقڵیٛ کەرو. ئیٛتر درۉ و ڕاسیشا گوناحو من نیا چونکە مەسەلیٛ هینیٛ عامینیٛ. سپاس

🔺ژەنی خنیٛڵە دایمە پەیش گیٛڵە.

❗️خنیٛڵ: باڵا کوڵ/ باڵا کوڵە

🔺ژەنی و یانە

🔸یانیٛ ئاوەڎانی یانەی ئینا(هەن) بە ژەنیٛوە.

🔺ژیرلەو مەریٛ

🔸بە تەشەرە و بە کەنایە بە بنیاڎمی هیچ نەزانی ماچا(مەواچان) هەکە ویٛش بە ژیر زانۉ(مزانۉ) بەڵام وەخیٛ هەرمانە کەرۉ، هەڕەش مڎۉ پۆ(پوە)؛ پیٛسەو پەت و مەتی.

🔺ژیریٛ هەرمانە کەرا(مەکەرا)، شیٛتیٛ تەماشە کەرا(مەکەرا).

🔸بنیاڎمی تەمەڵ و چەنە ناماشا چەنی شیٛتی یۉ زانان.

 ✍️حەمزە کاکە وەیسی ٩٩/٨/٢٩

 hewraman
Load More In گردین

وەڵامێک بنووسە

پۆستی ئەلکترۆنیکەت بڵاو ناکرێتەوە . خانە پێویستەکان دەستنیشانکراون بە *

بابەتو دماتەری

یاگە پاو شیٛعریٛ نەویٛ هەورامییٛ

یاگە پاو شیٛعریٛ نەویٛ هەورامییٛ نمەزانو ئی شیٛعرە یانزە بەیتییٛتا جە «شامی کرماشانی» وانی…