یانە ئەدەب و هونەر فەتە و بەرنامەو “شاد”ی

فەتە و بەرنامەو “شاد”ی

29

فەتە و بەرنامەو “شاد”ی

ماموٙ عەبە، دەسیٛش وستیٛبیٛنیٛ پەشتیش و هەناکەبڕ کوٙڵانەوە ویٛش یاوناوە وەربەرەو یانەی. تاڵی ڕوٙزگاری زوٙرش جە قاچاش ئەسابیٛ و چن ساڵیٛ بیٛ کومیتەو ئیٛمدادی مەعاشش پەی بڕیەبیٛوە!

فەتە، بانجیٛڵه‌نه‌ دسیٛوەش هوٙربڕیەبیٛ و خەپلیٛوە سیاوە دەسشەو بیٛ و ئی دەس و ئەو دەس کەریٛ و واچیٛ:

ئانا دویٛش ئاردیٛ، ئانا بییٛ یەریٛ و …

حااااااااا… دەی دەەەەەەەی

لالوٙ عەبە کە هەناسەش ئەهوەن بیەبیٛوە، سەرەش هوٙربڕی و واتش:

فەتە، ئانە چەنی کیٛتا؟ چیٛش بییٛ دویٛ و یەریٛ؟ دەی دەی چیٛشیتا؟ زوٙرانی گیٛرا؟

فەتەی وات، تاتەگیان. کیفەکەو مەدرەسەیم پەی توٙ!

کەرەش یاگیٛ دەمنە و تەماکوٙکەیت.

چی چیٛش بیەن فەتە؟

کورە کروٙنا ئامان تاتە گیان، ئیتر کەس مەلوٙ مەدرەسە، گردٚکەس یانەو ویٛش بیەن مەدرەسە. واتەنشا پەنەما موبایل مەدرەسەش چەنەن و ئیتر کەس ئەوەجەش بە مەدرەسەی نیا. نامیٛ مەدرەسەکەیچما “شاد”ا.

دەی چنی کریوٙ فەتە؟!

ئەی موعەلیمەکەتا چەنی دەرس ماچوٙ پەنەتا؟

کورە تاتەگیان، ئادٚیچی موبایلش هەن و گردٚما گروٙنە پیٛوەرە دەرس وانمیٛ.

جا کەلاس چیٛشا؟ دنیا ئینا دلیٛ موٙبایلینە. جاریٛوەنە هەزاران کەسیٛ منویسا و واناوە.

موعەلیمەکەیچما یانەو ویٛشا ئانلاین چەنیما قسیٛ کەروٙ و وینمیٛش. ئانا نت زەعیفا، ئننا گەرەکما چەنەش پەرسو، بزانو تاو پیٛسە کەلاسی دەس بەرز کەروە و حەرچیم حاڵی نەبوٙ، چەنەش پەرسو؟

بە زات و سیفەتو خودٚای فەتە، ئاوەزم هوٙرگرتەن تا ئیسە قسیٛ چیٛمنیٛمە نەژنییٛنە.

 دەی تاتە گیان، گردٚو ئیٛرانی و نیمەو دنیای پیٛسە دەرس وانا.

تاتە، تاتە

چیٛشا فەتە؟ چیٛشااااااا….

ویریٛ چیٛویٛ کەروە.

ویرو چیٛشی فەتەگیان؟

تاتە گیان، من شیٛت و توٙ ژیر

پیٛسە بلوٙ وەرەو، ڕویٛو مەی کتیٛبیٛ مەمانا و گردٚو دنیای یانەو ویٛشانە و ئەپی خەپلیٛ دەرس وانا و ئینتیحان مدٚا.

مەبەروٙ یەریٛ ساڵیٛ تەر، منیچ بو موعەلیم و یانەنە قاچیٛ منیەوە سەرو قاچی و مەعاشو ویٛم هوٙرگیٛرو. شەرتە بوٙ ئەوەڵ مەعاشیم دەو کەواپانتوٙڵیٛوە خاس پەی توٙ و سەرتاپایچ کەرو پەی ئەدٚایم.

لالوٙ عەبە، دیا قەیافەو فەتەیرە و لاحەولە وەلاییٛوەش چیٛرو لچاوە وانا و گوٙچانەکیٛش کە بە دوەدەس هوٙرپیٛکنەیبیٛ پەشتیشرە، کەردٚەش بن پاسارو بەرەو بەریرە و بە چن تەکانیٛ بەرەکەش کەردەو و لواوە یانەرە…

شاروٙ

۹۹/۱۲/۱۱

 dotnet
Load More In ئەدەب و هونەر

وەڵامێک بنووسە

پۆستی ئەلکترۆنیکەت بڵاو ناکرێتەوە . خانە پێویستەکان دەستنیشانکراون بە *

بابەتو دماتەری

هەجو دلیٛ شیٛعرەکانو شیٛخ ڕەزای تاڵەبانینە

شیکاری ئەدەبین سەرو شیٛعرەکانو شیٛخ ڕەزاو تاڵەبانی، بە قەڵەم و ئەندیٛشەو ئەسحەد هەورامی، ب…