یانە ئەدەب و هونەر جەنگو دەڵقەکان

جەنگو دەڵقەکان

23

جەنگو دەڵقەکان

نویسەندە: میا کوتو

 هورگیٛڵنای بە فارسی: عرفان مجیب

بە گوٙرانی: سەعدوڵڵا خونخام (شەهریار)

ڕوٙیەشا دویٛ دانیٛ دەڵقەکیٛ پیٛوەرە بی بە جەنگشان. خەڵک لاپاڵشانە مەنیشت و بە تەماشا کەردەیشان ویٛشان سەرگەرم مەکەرد.

مەپەرساشان: «چیٛش بیەن؟»

 «چیٛوە نییەن. دویٛ دانیٛ دەڵقەکیٛ خەریکو بەحسیەنیٛ.»

مەگەر، مەکریا جدی بگیرنەشان؟ مەسخەرە بیٛنە. دویٛ دانیٛ هەرزیٛ پیٛوەرە چەنە چەنەشان بیٛ. قسیٛشان هیچ و پوچیٛ بیٛنیٛ و بەحسەکەشان هیچ و پوچ.ڕوٙیوە کامڵ ئەپی جوٙرە ویاریا.

سەوای دیسان دەسشان پەنە کەردوە.سەعیەشان ئانیٛ بیٛ کە جە وەرانوەرو هەنگەریوە کەم ناوەران. پاسە دیار بیٛنە کە بە هونەو هەنگەری تەژنیٛ ببان. بە هەر حاڵ خەڵکو کوجیەو و خیابانی ئەچی نمایشیە وەششان ئامابیٛ. دژمانانیٛوە کە واچیٛنشان پەنەو هەنگەری وردە وردەی، چزە داریٛ و ئاودارتەریٛ بییٛ. ڕاویاریٛچ پاسەشان مەزانا کە ئەئی جەنگە نمایشەن و پوڵە وردەشان مەوستەرە پەیشان.

بەڵام ڕوٙ یەروٙمی، دەڵقەکەکان دەسشان یاونا بە تن و تیٛژی، زو بە زو زەربەشان مەدا هەنگەریوە و لەقیٛشان مەشانان کە فرینەشان هەنگەریٛ نەپیٛکیٛنیٛ. زاڕویٛ زوبە زو گەرەکشان بیٛنە لاسایشان بکەرانوە، هەر کە دەس و پایشان پیٛوەرە لکەش واردایە ئەپی دوە ئەحمەقەیە خویٛنیٛ. کوڕەکان دڵشان وازیٛ بە پاو ئەئی سەرگەرمیە وەشەیوە جە خەجاڵەتو دەڵقەکەکانە بەر بەیان.

 «تاتە. کەمیٛوە پوڵە وردەم بدە پەنە، بوزونە واری پەیشان»

ڕوٙ چواری، جەنگ تنتەر بیوە، پەشتەو گریمو دەڵقەکەکانوە هونی ئیٛرە واری. بڕیٛوە جە زاڕوەکان تەرسیشان بیٛنە. هونیٛوە ڕاسیە بیٛ؟

 «ڕاسیە نیەنە. نەتەرسدیٛ.» ئەدا و تاتەکان زاڕوەکانشان دڵداری مەداوە.

لەق و مشتو دەڵقەکەکان بڕیٛو جاریٛ بە خەتارە مەلوا و مەماڵاشان ڕاویارەکانەرە. بەڵام چیٛویە موهیٛم نەبیٛنە و تەنیا خوەوە خەڵکی فرەتەر کەریٛنە. وردە وردەی خەڵکی فرەتەر مەئامای تەماشا.

 «ئەئیٛگە چە خەبەرەن؟»

خەبەریٛوە نەبیٛ. وردە حەسابیٛوە ڕەفیٛقانە! نەئیٛژیٛ جە هەنگەری جیاوشان بکەران. ویٛشان مەمانیانیٛ. تەنیا خەریکیٛ دەڵقەک بازی بیٛنیٛ.

ڕوٙ پەنجوٙمی. یوٙ جە دەڵقەکەکان ویٛش بە کوتەکیٛوە موسەلەح کەرد. جە حاڵیٛوە ڕوبە ئەو دەڵقەکەکەی هورشمش مەبەرد. زەربیٛوەش داوەنە و کڵاو گیسەکیٛش دڕیەش. ئەودانەکە قینیٛنە، کوتەکیٛوەش هور گیٛرت و توٙڵەو زربەکەیش سەرەشەنە ئەساوە. دەنگو کوتەکان کەوتەبیٛنیٛ دلیٛو دەنگ و هاواریشان. ئەچی بەینەنە زەربیٛوە واردش بە دانیٛوە جە تەماشاچیەکان  و کابرایٛوەش خلتانو بومی(زەمین)کەرد. عەجەب وەزعیٛوە شپرزە بیٛ! بەینو خەڵکینە دوە دەسەگی کەوتەبیٛرە. وردە وردەی دویٛ تایفیٛ جیاوازیٛ وەشیٛ بییٛ. تاقمە و دەسانیٛوە فرەتەریٛ کەوتیٛنە گیانو هەنگەری خەڵکیٛوە فرەتەر جە پای کەوتیٛ.

هەفتەی دوهەم، جە مەحلەکانو دەور و بەرینە کەوتەرە کە جەنگو دوە دەڵقەکەی غوٙغایوەش بەرز کەردەنوە. قەزییٛ کیٛشیا پەی مەیدانو شاری. خەڵکیٛ خیاڵشان مەکەرد چیٛوە مەزە دارەن. بڕیٛوە مەلوان پەی مەیدانی هەتاکو جە دروٙ و ڕاسی شایعەکان ئاگاداریٛ ببان. وەختیٛوە مەگیٛڵانیٛوە هەر یوٙ نوسخیٛوەش پەی ویٛش مەپیٛچا و تەحویٛڵو خەڵکیش مەدا.دوە دەستەگی ڕایی و نەزەریٛ جە مەحەلەکیٛنە فرەتەر و فەرەتر مەبیٛ. جە بڕیٛوە مەحەلەکانە کوتەک و کوتەک کاریهایوە کریایبیٛنیٛ.

بیسوٙمین ڕوٙنە. دەنگو تیر تەقنای جە شارەنە بەرزوە بی. کەس نەزانیٛ چکوٙگەوە مەتەقنانیٛ. فیشەکانیٛوە کە مەتاوی بواچی جە هەر یاگیٛوە شاریوە تەقیاینیٛ. خەڵکو شاری کە تەرسای بیٛنیٛ، ویٛشان موسەلەح کەرد. وردی تەرین هەرەکەت مەتاواش شەکەو خەڵکی تەریش هور بخیٛزنایە. تیرئەندازی خوڕەمش گیٛرتەبیٛ. سەرو خیابانیوە جەنازیٛ کەوتیٛبیٛنیٛ. تەرسی زاڵە بیە ملو شاریرە. ئاننەش پەنە نەشی کە لافاوو هوٙنیٛ کەوتەنە ڕا.

ئاڕوە سوبحش دوە دەڵقەکەکە هەر یوٙ کونجیٛونە نیشتیٛبیٛنیٛرە و جلە مەسخەرەکانشان وەتیٛ. مانیا و مەکەت تەماشاو هەنگەریشان مەکەرد. کەمیٛوە دماتەر، یاگیٛ ویٛشانە هور ئیٛستیٛوە و هەنگەرشان گیٛرتەنە باوشی و بە وینای پەرچەمانیٛوە کە دلیٛو شارینە پەخشوە بیبیٛنیٛ دەسشان کەرد بە خوەی. ئاوەخت دەسشان وستەنە دلیٛو دەسو هەنگەری و دەسشان کەرد بە جەم کەردەیوەو پوڵە وردەکان کە سەرو بومیوە بیٛنیٛ و جە حاڵیٛوە هەواسشان چاگەوە بیٛ کە پا نەنیان سەرو جەنازەکارە و ڕوبه شاریٛوە تەری کەوتیٛنە ڕا.

 dotnet
Load More In ئەدەب و هونەر

وەڵامێک بنووسە

پۆستی ئەلکترۆنیکەت بڵاو ناکرێتەوە . خانە پێویستەکان دەستنیشانکراون بە *

بابەتو دماتەری

هەجو دلیٛ شیٛعرەکانو شیٛخ ڕەزای تاڵەبانینە

شیکاری ئەدەبین سەرو شیٛعرەکانو شیٛخ ڕەزاو تاڵەبانی، بە قەڵەم و ئەندیٛشەو ئەسحەد هەورامی، ب…