یانە هەواڵیٛ ئاخرش «فەتە» بە چاپ یاوا

ئاخرش «فەتە» بە چاپ یاوا

103

ئاخرش «فەتە» بە چاپ یاوا

تەنزە جە مانای مەجازیەنە یانیٛ تەشەرە. ئیجا بڕیٛو وەختیٛ ئی تەشەریٛ بە خەرەزوٙ شانیا و بڕیٛو جاریٛچ دالیٛو مەکی یام شیرینیشا چەنیا! ئەگەر بابەتوو وەڵینی بوٙ کووکە خیٛزیوٙ و کەسی وەشش جا جوٙرە تانەو تەشەریە نمیٛ و فرەتەر جە کوٙمەڵگاو سنەتیەنە و مابەینوو خەڵکی عەوامیەنە باوا. وە ئەگر جە بابەتی دوەمینی بوٙ ڕەنگا بڕیٛوی وەششا نیٛ چوون قوٙرەتشا وەر پرسیارا بەڵام بە پیٛچەوانەو بڕیٛو تەریٛ کە ژماریچشا فرە فرەتەرا، نە تەنیا حەزش پەنە کەرا بەڵکووم دانەیچ شانا تا فرەتر باس و باتوور کریوٙ.

سەرینا و وەڵینا هەر بیەن و هەر هەن کە ماچا فڵانە کەس تەشەر شانا. بە تەشەرەو قسیٛ کەروٙ. ئا کەم تەشەریٛ شانە، بە خودٚا برا قسە سوٙڵا و…ئانەنە کە تەشەرە بە دەمواچ عەمریٛوی توول و دریژش هەن. جاری چامنە بیەن کە تەشەریٛوە قەتڵیٛوەش خیٛزناینە. هیچ کەس وەشش نامان تەشەرەش بدٚانە. بەڵام ئا چیٛوە کە مەرام و باس و ئیٛمەن تەشەرە پەی وەش کەردٚەی و ئیٛسلاحیا، نە پەی ویٛران کەردٚەی. ئینە بە زوانی فارسی پەنەش ماچان:«تەنز».

تەنز چەنی هەجوی فەرقش هەن. هەجو یا لاقرتییٛ و ڕیٛشخەندٚ، پەی مەسخەرەکەردٚەی و ماڕای خەڵکی بکارش مارا. هەجو هەدەفش دروس کەردٚەی نیا. بەڵام بە پیٛچەوانە هەدەف جە تەنزیٛ نە لاقرتی کەردٚەیا و نە بە مەسخەرە گیٛرتەی کەسین، بەڵکووم پەی ڕیٛک و ڕاس کەردٚەی ناڕاسیەکا کوٙمەڵگای چەنەش بەهرە هوٙرگیٛرا. جە تەنزەنە فرە بە زەریفی و بە وردٚی گیر و گرفت و نوٙقسانیەکیٛ کوٙمەڵگای بە زوانیٛوی شیرین باس و باتوور کریا، هەم خوەش چەنیا و هەم تاسف. پاڵوو ئی خوەیەنە هەقیٛقەتیٛوی تاڵ ویٛش شارتەنەو. تەنزە ئینسانەکا جە قووڵی مسیبەتەکا کوٙمەڵگای، های و هووشیار کەروٙوە…..

تەنز ئەوەڵ جار بە شیٛعرە واتیٛنەشا و کەم کەم بە نەسریچ واچیاینە، جە ئاروٙنە تەنزە فرەکەم بە زوانوو شیٛعریٛ منویسا.«روم»و«یونان»پیٛسەو ماباقی کەلتوورەکای تەری یاگیٛ ژیوای تەنزیٛ بییٛنیٛ.

ڕەنگا «عبید زاکانی»تاتەو تەنزیٛ بوٙ جە زوانی فارسیەنە کە بە شیٛعرە واتەکیٛش بەیانش کەردٚیٛنیٛ.«علی اکبر دهخدا»بە زوانوو نەسری جە روٙنامەو«صوراصرافیل»یەنە «چرند و پرند»ش وەڵا کەردەو. هەر ئەچی زەمانەنە بیٛ کە «ایرج میرزا»بە زوانوو شیٛعریٛ دەسش کەردٚ بە تەنز نویسەی. جە تەنز نویسەکا ئی ئاخریچە متاومیٛ جە«کیومرث صابری فومنی»(گل آقا)،«ابوالقاسم حالت»،سیدابراهیم نبوی»و…نامیٛ بەرمیٛ.

جە زوانی هەورامیەنە، ممکینا بەعزیٛو شیٛعریٛ بە تایبەت شیٛعریٛ فوٙلکلوٙریٛ واچیایبا کە ڕەنگ و بوٙو تەنزیٛشا پەوە دیار بوٙ بەڵام بە ڕەسمی و بە زوانوو نەسری(پەخشان) تا ئیسە ئاساریٛوی مەکتووبی تەنزی جە هەورامانەنە نەنویسیان و ڕەنگا مەجموعە داستانە تەنزەکیٛ «فەتە»ی ئەوەڵینیٛ با، کە مەیا خزمەتتا.

«فەتە» بە زوانیٛوی سادٚەی هەورامیانە و بە تەنزە دەور و بەری و تەنانەت ئیدارە حکوومیەکا مدٚوٙ وەرو پرسیاریٛ و ئاچیٛویٛ کە خەڵکانی تەر ڕوودەرباییٛسیش چەنە کەرا، ئادٚ بە بیٛ ڕوودەر باییٛسی وزوٙش وەرو چەماما.

کتیبوو فەتە(1)سەروو ئەرکوو سندٚوٙقوو«واران»ی جە شاروو پاوەیەنە کە هەدەفش یاوەری دای بە نووسەرەکا هەورامانیا چاپ کریا و ڕەوانەو بازاری بی. شمەیچ ئەگەر دڵتا پەووە بی متاودیٛ پەی تەهیەو ئی کتیبیە کە شامڵوو 48 داستانیٛ تەنزیٛن بە جەنابوو کاک ئیبراهیمی شەمسی وەرپرسوو موٙئەسسەو فەرهەنگی، هوٙنەری شنەو هەورامانی ئەپی شمارەیە 09902144787 پیٛوەندٚی فەرماودیٛ.

وەلی فەتاحی نویسەروو کتیبوو فەتە(1)

99/6/4

 hewraman
Load More In هەواڵیٛ

وەڵامێک بنووسە

پۆستی ئەلکترۆنیکەت بڵاو ناکرێتەوە . خانە پێویستەکان دەستنیشانکراون بە *

بابەتو دماتەری

    دماگیٛرو”نە”ی       ئەگەر سەرنجەو زوانو گوٙران- هەورامی بڎەیمیٛ مەوینمیٛ، …