یانە گردین ئازاڎی نمەڎەیمیٛ و ئازاڎیما گەرەکا

ئازاڎی نمەڎەیمیٛ و ئازاڎیما گەرەکا

74

ئازادٚی نمەدٚەیمیٛ و ئازادٚیما گەرەکا!
ئەچی ڕوانە مەتڵەبیٛوی کوٙڵم جە تاقمیٛوەنە واناوە کە گوایا مشیوٙم ئازادٚی مەحدوود بوٙ، ئنا بنیادٚمەکیٛ وەرگەو ئازادٚی نمەگیٛرا و چانەیچەنە کە ئەگەر ئازادٚی فرە بوٙ، فرەوخەڵکی بە ڕووت و قووتی بزیوٙرە و سەرەو یوٙترینی بوەراوە و لەمەو یوٙی بدڕان!
گیٛڵناوە وەختاریٛو فرعوونی نامی میسری«ئاخناموون» مەردٚ و یاگیٛ ویٛش داش بە«ئاخناتوون»ی کوٙریش، دنیاو سیستموو ئاغا و بەردٚەی دووچاروو بوومەلەرزەی بی و قوٙمیاش وەنە. فرعوونی کوٙڕ پیٛسەو تاتەی ویریٛ نەکەریٛوە و باورش چامنە بیٛ کە دەلیلیٛوە نییٛنە تا بەردٚیٛ فریٛ و فراوانیٛش بانیٛ و جەنابیشا سواروو تەختی ڕەوانی بکەرا و بگیٛڵناش ئی گەڕەک و ئەو گەڕەکەرە، دەلیلیٛوە نییٛنە تا ئەڕبابیٛ زڵم و زوٙر بکەران ئەو بەردٚا و ئازار و ئەزەیەتشان بدٚان. ئادٚ واچیٛ چی مشیوٙ کەنیزیٛ و بەردٚیٛ حەقوو شوو کەردٚەی و ژەن ئاردٚەیشان نەبوٙ؟ ئادٚ تا ڕادیٛو و ئادٚیچ ئەچا سەردەمەنە وینگاش ئانە بیٛ کە پەنەواز نیا بەردٚە کە هام نوٙعوو بنیادٚمی ئازادٚیا، تا ئاخروو عەمریش بەردٚە مانوٙوە. بە ڵام دویٛ جەماعەتیٛ بە تووڕەیەو موٙخالفیٛ ئیٛ باوڕوو فرعوونیە بیٛنیٛ. دەسیٛوشا ساحیب بەردٚەکیٛ بیٛنیٛ کە نەمەنەی بەردٚەی وەراوەر وینیٛنیٛ چەنی هوٙرمەڕیای و تەمام بیەی دەم و دەسگاو ویٛشا. دیارا ئادٚیٛ جە سیٛوەروو سیستمی بەردٚەداریەنە ماڵ و سەروەتشا گەشەش کەردٚەبیٛ و مل نەنامنیٛنیٛ پەی کەسی و رەنگا تا ڕادیٛو حەقشا دریوٙ پەنە کە ئادٚیچیٛ پیٛسەو ماباقی قوٙرەتدارا حازریٛ نەبیٛنیٛ کوٙرسی قوٙرەتی بازا جیا کە کوٙرسی قوٙرەتوو ئادٚیشایچ بەردٚەکیٛ و کەنیزەکیٛشا بیٛنیٛ. ئەی ئەو جەماعەتەکە، کامیٛ بیٛنیٛ؟ ئا بەردٚە بەسە زوان و بیٛ دەسەڵات و بیٛ ویر و هوٙشیٛ بیٛنیٛ کە واچیٛنیٛ: ئەگەر ئیٛمە بەردٚیٛ نەبیمیٛ ئاوراییٛ لاسما میٛ و مرمیٛ. ئەگەر بەردٚیٛ نەبیمیٛ ئەی کیٛ ساحیبما بوٙ و کیٛ چەمچیٛو چاشتیما دوٙ پەنە. یاگیٛ وتەیما چکوٙ بوٙ و کیٛ بەرگ و لیباسما پەی بسانوٙ. بەڕاسی سەتحەو تەوقعوو بەردٚەی ئەچینەیە زیاتەریچ نمەتاووٙ بوٙ. درویٛشا نەدٚاینە کە یوٙ ئەچا چیٛوە سەختا ئانەنە کە بە بنیادٚمیٛوی کەم ویری فامنی کە توٙ متاوی بەردٚەو کەسی نەبی و ئازادٚی هنوو کەسیٛوی خاسی و تایبەتی نیا تا دوٙش بە توٙ. توٙ متاوی ئازادٚ بی، بەڵام ویٛت ڕووت و قووت نەکەریەو، توٙ متاوی ئازادٚ بی بەڵام حوٙرمەت پەی وەراوەریت بنیەیەرە، توٙ متاوی ئازادٚ بی، بە بیٛ ئانەیە ئازادٚی خەڵکی تەری قوٙرخ بکەری. دیارا ئازادٚیچ پیٛسەو ماباقی چیٛوای تەری شوٙنکەوتەو یاسایا، کە ئەگەر یاسا نەبوٙ ئازادٚی مانا و مەفهوومیٛوش نیەن. ئازادٚی کاڵاییٛوەی فیزیکی کەسایەتییٛوی تایبەتی نیەن تا بە مەیلوو ویٛش بدوٙش بە یوٙی و جە یوٙتەری بسانوٙشەو. مشیوٙ بتاومیٛ ریٛک و پیٛک جە ئازادٚی لەزەت بەرمیٛ و ئازادٚی ئیٛمە نە بوٙ بە وەرپەنگوو ئازادٚی خەڵکانی تەری. مماریٛسەو ئازادٚی دای بە دەوروو بەریەکا و چیٛردەسەکا و ئازادٚی داوا کەردٚەی جە قوٙرەت دارا و سەردەسەکاما متاووٙ هەنگامیٛوە گوٙلانیٛ بوٙ پەی دلیٛ دنیاو وەشوو یانەو ئازادٚی.
وەلی فەتاحی
99/5/27

 hewraman
Load More In گردین

وەڵامێک بنووسە

پۆستی ئەلکترۆنیکەت بڵاو ناکرێتەوە . خانە پێویستەکان دەستنیشانکراون بە *

بابەتو دماتەری

    دماگیٛرو”نە”ی       ئەگەر سەرنجەو زوانو گوٙران- هەورامی بڎەیمیٛ مەوینمیٛ، …