یانە ئەدەب و هونەر شالیارو چریکه‌وانان

شالیارو چریکه‌وانان

122

شالیارو چریکه‌وانان

داریوش ڕه‌حمانی

ئه‌ئینه‌شه‌ دیاره‌ن، فره‌ وه‌رته‌ر‌ ئه‌چانه‌ینه‌ شاگوڵه‌‌ جه‌ ئه‌دای ببوٙنه‌ ئیٛڵ و خیٛڵشان په‌ی هه‌میشه‌ی گه‌رمیان و کویٛستانشان پیٛچنابیه‌نوه. ده‌ور و به‌رو هانه‌و میرزاینه‌ که‌ یوٙوه‌مین قه‌ده‌مگان تا هه‌وارگه‌و باوامورادی بارگه‌ و بنه‌شان‌ مه‌وزان‌. یانه‌ مه‌که‌رانیٛوه‌. چه‌نیو یانه‌و یوٙ جه‌ باوانانو شالیاری که‌ په‌شتاو په‌شتیٛشان و که‌ڵه‌سه‌وار ئه‌چا دوٙڵ و چه‌مه‌نه‌ به‌ کشت و کاڵ، باخداریی و ده‌سینه‌سازیی گوٙزه‌را‌نشان به‌رده‌بیه‌ن سه‌ر مه‌بانه‌ هامجوٙگه، هامبڕ و هامسا زه‌مین. ناڕوٙشنه‌ن وه‌لیٛمکه‌تیٛ به‌پاو ئا نیشانانه‌ دلیٛو یادگایانه، وات و که‌لام و دیوانو گه‌وران‌ و پیرانینه‌‌ پاریٛزیان و واچیانه‌وه‌ به‌زمگاو باوامورادی و چه‌مه‌کانو ده‌ور و به‌ریش وه‌ر جه‌ ئه‌ئا ده‌ره‌ ڕوٙزگارانیچه و‌ په‌ی فره‌ته‌ر ئه‌و چه‌ند سه‌د‌ ساڵان گلیٛرگاو جه‌رگه‌و یاران و عه‌وداڵانی بییه‌ن و نه‌زه‌رگاو خاسان. سه‌ر پیران واته‌نی هه‌ر ده‌م،‌ پوٙل پوٙل گه‌لو یاران و نازداران و تاخیٛت ئه‌غیاران و نه‌یاران‌، په‌ی ده‌خیل، حاجه‌ت و یاوای به‌ واده‌و مورادی و یامکه‌تیٛ په‌ی په‌نای، وه‌شیی و نیشاتیی که‌رده‌بیه‌نشانوه‌‌ سه‌ر.

شاگوڵه‌ و شالیار هه‌ر دویٛشان مانگه‌و که‌ڵاخه‌زانینه و به‌ فاسڵه‌و یه‌ریٛ حه‌فتانوه مه‌یانه‌‌‌‌ دونیا. سه‌ریٛو جه‌ یانه‌باوانانو شالیاری ویه‌رو که‌لام‌ و چریکناینه‌‌ میراس و ده‌نگیٛوشان هه‌ن و ساحیٛب دیوان‌ و داییٛره‌‌. پیٛسه‌و باوی، دمایین لاپه‌لانو دیوانو مه‌ولاو گیانانه‌‌ ڕوٙزاو هه‌ر دویٛشان مه‌نویسانه‌‌. شاگوڵه‌ بیست و دویٛ ڕویٛ وردیته‌ره‌نه‌. وه‌رو هاوماڵیشانوه‌‌ ده‌ورانو زاڕوٙڵه‌یینه‌ پیٛوه‌ره‌ گه‌وریٛ‌ مه‌بان. ئه‌نده‌ پیٛوه‌ره‌ بیه‌نیٛنه‌ و یوٙترینیشان گه‌ره‌ک مه‌بوٙنه‌‌ ئه‌گه‌ر یوٙی نه‌شناسایانیٛش ئه‌جییٛش ئا دوه،‌ واڵه‌ و براڵه و زاڕوانو یه‌ک یانه‌ینیٛ‌‌. دور و نزیک، بیٛ ته‌وفیر وه‌شڵه‌یی شاگوڵیٛ بیٛویٛنه مه‌زانان و مه‌لاونان‌. به‌ ڕه‌حمه‌ت ببوٙنه‌ دمایین ساته‌کانو ژیوایشه‌نه ئه‌من ویٛم ده‌مو سدیٛقو ئاغه‌ ساڵه‌یوه‌ ئه‌ژنه‌ویم‌ عه‌مرشه‌نه زاڕوٙڵه‌ی وه‌شڵه‌ی ئه‌پاسنه‌شه‌ نه‌دیه‌بییه‌ن. هه‌ر به ‌نوٙهاڵیی، جوانخاسیی و شوٙره‌ شاگوڵیٛ فره‌و که‌سانیش وه‌یلان و ئاواره‌و‌ ئا چه‌م و دوٙڵیه‌ که‌رده ‌بییه‌ن: وه‌رزیه‌ر، کونه‌ به‌کوٙڵ، باخه‌وان، ته‌سبیٛح به‌ده‌س، ئه‌ڵوات و په‌تاڵپا تا ئاغه‌وات، سه‌یزاده‌، شیخزاده‌ و هه‌رپاسه‌ فره‌و‌ ده‌سان و که‌سانی نه‌شناسیا و دوره‌ دیار و مه‌نزڵ، گردی‌ ویٛشان مه‌که‌رد و که‌رده‌ بییه‌ن که‌شه‌وان، گوٙرانیواچ، گیاوکه‌ن، شوانه، ئاو‌ئاوه‌ر، هیٛزمکه‌ن و چوٙدار تاکه‌تیٛ ئه‌پا بوٙنه‌وه‌ ڕاس و قه‌ساله‌ین بلانیٛنه‌ په‌ی هانه‌ و هه‌واران و به‌زمگاو باوامورادی و به‌ ڕاویاریچ بییه‌ن چه‌میٛوشان بگنوٙنه‌ تازه‌ نه‌مامیٛ. تازه‌ نه‌مامه‌ به‌بیٛ دڵه‌له‌‌رزای و چه‌مدارایو نزیکان و باواناش ئیتر نمه‌یاروٙنه‌ یانه‌نه‌ بزیه‌ونیٛره‌ و هانه‌ و هه‌وار بکه‌روٙنه‌ و یامکه‌تیٛ په‌ی گه‌له‌ له‌وه‌ڕنای بلوٙنه‌وه‌‌ تا له‌وه‌ڕگاگانو ده‌ره‌و هه‌ناران و قه‌راخه‌کانو ‌سیروانی. به‌ به‌راورد ئا زه‌مانه‌ به‌ینو دوانزه‌‌ تا سینزه‌‌ ساڵه‌ییش بییه‌ن. ئه‌چا سه‌ر و به‌ینه‌نه‌ شاگوڵه‌ و شالیار وه‌رانوه‌ر به‌ یوٙترینی دڵشان مه‌واڕیوٙنه‌. ده‌مو لالوٙژه‌ن‌ که‌نجانه‌ی پاڵه‌نگانییٛوه‌‌ ئه‌ژنه‌ویم چه‌پوانه‌و باوو دماته‌راوه‌ ده‌سپه‌نه‌نه‌‌ ئاده‌‌‌ فره‌ته‌ر حه‌زش ئه‌و‌ ئادی بییه‌ن. گوایا ده‌نگوه‌شیو شالیاری بیٛویٛنه‌ بییه‌ن و جیا ئه‌و شاگوڵیٛ‌ فره‌و که‌سان ئه‌زره‌ته‌مه‌ند ‌و ئاواته‌وازو چریکنایش‌ و هه‌ناسه‌یش. مقوٙ مقوٙ مه‌پیٛچیوٙنه‌‌ چه‌مه‌که‌ی و کویٛستانانو ده‌ور و به‌ریشه‌ره‌. که‌سب و کارو شه‌وانه‌و فره‌ینه‌و خه‌ڵکیی دور و نزیکی مه‌بوٙنه‌ کوڵه‌گیٛرته‌ی، چه‌ناکه‌دای، دوای و ئه‌وه‌لاونایو به‌زمگاو باوامورادی‌. یانه‌باوانانو شالیاری دالیٛو دیٛرته‌ر و شوٙنه‌و فره‌و که‌ساره‌‌‌ مه‌چڵه‌کیانیٛره‌. ده‌سپه‌نه‌نه‌ گه‌مه‌ش مه‌گیٛران و خدیٛ و ڕه‌ویه‌و جوانانو گردو ڕوٙزگاران. هه‌که‌ خودا ڕوٙ مه‌که‌روٙنه‌وه و چه‌م مه‌که‌رانیٛنه‌وه‌ چه‌مه‌که‌ ڕاو ڕاوانی نمه‌بوٙنیٛنه‌‌‌وه‌ و به‌نده‌نش مه‌لوٙنه‌ به‌س و هه‌وارگه‌ و ژیوگاکه‌ مه‌کریه‌ونه‌‌ ڕه‌په‌ڵگا و چیٛرپا‌. ویه‌رو گه‌ردونینه‌‌ کاره‌ڕاهاتیٛ فریٛشان ئاماینیٛ مله‌ره‌ به‌ڵام دیارده‌ی ئه‌پاسنه تا ئه‌ئا حاجه‌ته و ئه‌پاجوٙره،‌ وه‌رینه‌ش نه‌بیه‌ن‌. که‌س نه‌دیه‌بیه‌نش به‌ چه‌م، نه‌ژنه‌وته‌نش به‌ گوٙش و ناما‌نشه‌نه‌‌ ئه‌و یادگا، خامه‌ و ده‌فته‌ر. وه‌ره‌ وه‌ره‌ چیٛوانیٛو مه‌ژنه‌وان‌ و مه‌وینان که‌ نه ‌ته‌نیا شالیار به‌ڵکوم گه‌ورایچشان چه‌نه‌شان مه‌مانانیٛوه‌. به‌ ویانان جوٙراوجوٙر مه‌کوٙشان شالیاری دور بوزانیٛنه‌وه. مه‌دانیٛنه‌‌ ڕاگه‌لش. غه‌ریبیٛو ئادیٛشان و بنجداریی و ئابڕو ویٛشان مه‌نمانان‌ و وه‌رانوه‌ر مه‌که‌ران‌. به‌ پیمانه‌و ویه‌رده‌ی دیامانو ئایه‌نده‌ی مه‌گیٛران‌‌ وه‌رچه‌م و مه‌ینه‌ت و نادیاریو ڕای و ڕیٛوازی. جه‌رگه‌و خه‌یرئه‌ندیٛشان ڕه‌ویه‌و پیرانی و چریکه‌و هانایاشان ماوه‌رانیٛنه‌وه‌ ئه‌و یادیش و یادیشان. که‌لام و ده‌خیل مه‌وانان‌ و مه‌گیٛرانه‌وه‌. سه‌رئه‌نجامه‌نه‌ چیوه‌که‌ی به‌ خاس نمه‌وینان‌. تاکه‌تیٛ مه‌ینه‌ هه‌ر ده‌م ژیوانو ویه‌رده‌ی‌ وه‌رانوه‌ر‌ به‌ دیارده‌ی نوٙبه‌ر‌، ڕاکیٛش و نه‌شناسیاو زه‌مانه‌ی‌ نکوڵیی ماوه‌روٙن‌‌. کیٛشمانکیٛشو وت و ویرانه‌ و دڵانه‌، ئاما و لوای ئه‌راگیٛڵان و بیٛ مورادانه‌‌ شاگوڵه‌ فره‌ته‌ر ئه‌و گرد که‌سی‌ شالیاری مه‌دیٛونوٙنه‌. ئادیچ ماریفه‌ت، هانا و هاوارانو ڕاو ته‌ریٛقه‌تو‌ بییه‌ی و مه‌نده‌یشان مه‌نیوٙن‌ لاوه و مه‌وزوٙشان په‌شته‌و گوٙشان. لاشیپانی مه‌گیٛروٙن‌‌ و به‌ره‌که‌شان و پامدری و ئیسته‌ره‌م که‌‌ ئه‌چی دونیاینه‌ ته‌نیا شاگوڵه‌م گه‌ره‌که‌نه‌‌ و‌ هیچیٛوته‌ر. نمه‌لان‌ چیرو باریش. دڵوه‌، دڵو که‌سی ڕازیی نمه‌بوٙنه‌ و یامکه‌تیٛ ده‌سیکه‌م که‌س زاتش نمه‌بوٙنه به‌ ئاشکرایی‌‌ ڕازیی بنمانوٙن‌‌. ئه‌وه‌لاڵیای، ئه‌وه‌لاونای‌ و هه‌ڕه‌شان توه‌ و پیته‌ نمه‌دانیٛوه‌. په‌وکه‌تیٛ هه‌رزه‌کار قینی هوٙرمه‌گیٛروٙنه‌ و چه‌نیو جه‌مو هامتیراش به‌ واده‌و حه‌فت ساڵان چه‌مه‌که‌ی جیا مازوٙنه‌‌ و ڕوه‌ مه‌نیوٙنه‌ ئه‌و شاره‌زورو غه‌ریوی.

فره‌ دماته‌روه‌ ئیٛمه‌ که‌ جار و بار‌ ڕامان مه‌که‌وته ئه‌و‌ هانه‌ و هه‌وارو باوامورادی ئه‌ئا هه‌وارگه‌ و به‌زمگا، ئه‌و به‌زم و ره‌زم که‌وته بیٛنه‌‌ و بیٛ قریوه‌ و هاژه‌. به‌ راویاری نه‌بوٙن‌ ئیتر که‌س ڕاش نمه‌و‌سته‌نه‌. هه‌رد و هه‌ویٛڵ، که‌پر و که‌ویٛڵو هه‌واران تیٛک و مه‌کان و ڕه‌نگه‌و ویرانه‌یشان نیشته‌بیٛ وه‌نه‌. جه‌ دماپاکه‌و ئه‌ئا باخ و ڕه‌زانه‌ هه‌که‌ باسشان مه‌که‌رد زیاره‌تانیٛو، چل په‌نجا بنیٛ تایلیٛ، حه‌فت بنیٛ که‌که‌وی و تاقه‌ وه‌نیٛوه‌ مه‌ندیٛبیٛنیٛوه‌‌ و قمیٛوه‌‌[گوٙله‌] چوڕ ئاوه‌ و ئیتر قاڕه‌که‌ر ده‌نگ، جوڵه‌ و خشه‌ش نمه‌ئاما. پاسشانه‌ مه‌وات گوایا موٙڵگاو هه‌رزه‌کارانو ئه‌وساو باوامورادی واڕیاینه‌وه‌‌ په‌ی دیارانیٛوته‌ری. ئه‌من ویٛم به ‌حاڵ ویرم مه‌ینه و نمه‌ینه‌. ویرمه‌ن لالوٙ حمه‌که‌ریمو ناسپه‌ریییٛ دلیٛو باخه‌ گه‌وره‌و ڕاو هه‌جیجیانو وه‌ڵاتینه‌‌ و بیٛخه‌و وه‌زه‌ قاڵاویٛنه،‌ ده‌مه‌ سه‌بیله‌که‌ش مه‌نیا ئه‌ولاو ده‌میش و چه‌میٛو‌ش کیٛل مه‌که‌رد ئه‌و ها‌نه‌‌ ژه‌ره‌ژان و ده‌سیٛوش مه‌کیٛشا ڕوه‌ توڵه‌ڕاکیٛ هامنه‌ڕای و که‌لو نوری و ئه‌پیلاشه‌ره‌ په‌ی کوڕیمریه‌می و به‌نده‌نی و مه‌که‌وت ئه‌ها ئه‌ها و ئه‌ئوگه‌ و ئه‌ئوگه‌ و گه‌رمه‌و واتانیشه‌ره‌‌‌: شاگوڵه‌ ڕوه‌ هه‌ر گوٙگه‌ مه‌شوٙنه‌‌ شالیار ده‌ور و به‌رو نیشتگایش مه‌که‌روٙنه‌ یاگیٛو‌ خولیایش و حه‌شارگاو ژیوایش. په‌ی گه‌رده‌و پاڵایاش و هه‌ناسه‌و ده‌میش و وینایو کوٙڵیت و که‌لاوه‌و یانه‌یشان، کوٙ‌ به‌ کوٙ و دوٙڵ به‌ دوٙڵ و شار‌ و ناشارش مه‌که‌رد تاکه‌تیٛ تیره‌و دیده‌ش و گه‌رده‌و ئاما و لوایش بکه‌روٙ کڵه‌و چه‌ماش، تام نوٙشایش، گه‌ڵاو پوٙشایش، ئامیان و چه‌مه‌و دڵ و ژیوایش. هه‌رچی چیٛوشه‌ن ئه‌و‌ ویر به‌رده‌بیٛنه‌وه‌. ئانه‌ش جه‌ ده‌س‌ ئامابیٛنه‌ که‌رده‌ بیٛنه‌ش و مه‌که‌ردش په‌یش و مه‌که‌ردشان په‌نه‌. سه‌ره‌ره‌ و واره‌ره‌ و ڕاس و چه‌په‌ره‌ یانه ‌و موٙڵکو ویٛشانش که‌رده‌ بیٛنه چاڵه‌ کوٙنیٛو هامقه‌تاران و هامبه‌زمانیش‌. کوٙش گیٛرته‌بیٛنه‌ ملو باواناشه‌ر و ده‌ور و به‌ریشه‌ره‌. نه‌ قه‌وڵو که‌سیش مه‌که‌رد و نه‌ که‌سیچ مه‌ویاراش بده‌ونه ڕاگه‌ڵش و وه‌رانوه‌رش‌. دونیاش شاگوڵه‌ بیٛنه‌ و چه‌مه‌و ئاواتان و یانه‌و بییه‌یش. به‌ شانازیوه بانگه‌وازش مه‌که‌رد تازه‌ بییه‌نان شالیارو شاگوڵیم. ئه‌پی گردیچوه‌ که‌س نه‌زانیٛنه ئاده‌ چیٛشش ئینان مه‌یل و مه‌رامه‌نه‌، کام بنه‌ و وارگه‌ و که‌ژاوه‌ش هه‌ن خییاڵه‌نه‌ و دیار نه‌بیٛنه‌ وه‌فا، مه‌یل، ده‌نگ و سوٙزو تازه‌لاویو ئادیش مه‌مانوٙنه‌‌‌ لاوه. ئاخر، یار و نه‌یار، چه‌پ و ڕاس و دماپاکه‌و هه‌رزه‌کارانو عه‌شیره‌تی و گردو ئه‌راگیٛڵه‌کانو باوامورادی کوٙڵیته‌و ڕاویٛشان بینایبیٛنه‌ په‌یش. که‌م که‌س بیٛنه‌ حازر نه‌بوٙنه‌ گیانو ویٛش نه‌نیه‌ونیٛره‌‌ په‌یش. ده‌مه‌و ویٛرگان په‌ولاوه‌ که‌س نمه‌و‌یارش یانه، هه‌وارگه، که‌پر و که‌ویٛڵشه‌نه‌ بزیه‌ونیٛره‌. ته‌رسدارته‌ر ئه‌و جنه‌کانو ده‌ره‌و په‌چه‌قووڵه‌ی، ته‌رسه‌ی تازیٛ گردو کویستانه‌که‌یش گیٛرته‌بیٛره‌. هه‌ر ئه‌نده‌ت مه‌زانا که‌ مه‌واتشان فڵانه‌ که‌لاوه، باخ، هه‌رد، مه‌ڕ، دوٙڵ و لاڕانه‌ فڵانه‌که‌سشان لوت و گوٙش که‌رده‌ن و ڕفانان. جه‌رگه‌و باوایان‌ تا ماوه‌ییٛ ده‌سه‌زران و ناباوه‌ڕانه‌ هه‌ک و گوبشان چنیا بییه‌ن. مات و بیٛده‌نگ عه‌ینو توه‌نه‌وڕای هه‌وارانی. جار جار جه‌مشان مه‌بینا و وه‌ویره‌ی تازیٛشان ریٛز و شوٙر مه‌که‌رده‌. ویر و ئاوه‌زشانه‌ دیارده‌ی تازه‌ نمه‌کوٙنجیه‌ونیٛنه و فام نه‌مکریوٙن‌‌. ده‌س به سینه‌ و‌ ده‌خیلیشان په‌ی مه‌نده‌بیٛنه‌وه‌ و ئادیچ جه‌مو ویٛشانه. ته‌نانه‌ت نمه‌یاران سه‌ردانو گوڵکوٙ ئازیزان و باوه‌ڕاشان بکه‌رانه‌. به‌ر و هامسایج چه‌مه‌که‌نه‌ بژیوشان دیماودیم مه‌کریوٙنه‌. هه‌ر ساڵ ئانه‌ ده‌خل و دانشانه‌ن مه‌بوٙنه‌ چیرپا په‌تاڵپایان و ڕاویاران‌. که‌س نمه‌په‌رموٙنه‌ ویٛشه‌ره‌ ده‌نگیٛو به‌رزوه‌ بکه‌روٙنه‌. شالیار و هه‌رزه‌کاراو ده‌وریش کلیٛوشان چه‌نیو کاکه‌ ئاغه‌برای مه‌گنان‌ چنگه‌پرچیٛ و زوٙره‌زمیٛ. کاکه‌ ئاغه‌برا مه‌ینه‌ ده‌مشه‌ره‌ کوڕه‌که‌م واز باره‌نه‌ و که‌م ویٛڵ ویٛڵ بخولیه‌نه‌وه‌ و به‌ره‌ڵڵای وه‌سشه‌ن. هیج که‌ ویٛت، ئابڕو یانه‌یتان و چه‌مه‌که‌یچتان به‌رده‌ن و قیزه‌و عاڵه‌میچتان شیٛوناینه‌وه‌. ده‌م و ده‌س‌ یوٙشان شه‌پڵاخییٛوه‌ مه‌گریسنوٙنه‌ بنه‌و ملیش و گوٙشیٛوش که‌ڕ مه‌که‌روٙنه‌. ئادیچ کافرمانیٛو مه‌که‌روٙ هوٙرگه‌شه‌ره و مه‌وزوٙنه‌ش گوٙشه‌و یانان‌. شالیار یوٙ جه‌ ماموه‌‌کاش دلیٛو خه‌ڵکه‌که‌ینه مه‌وینوٙنه‌وه‌ که‌‌ وسته‌نش سه‌ر و پاڵو کاکه‌ ئاغه‌برای.‌ شه‌ویٛشوه‌ یانه‌و ویٛشانه‌ و وه‌ره‌چه‌مانو گردیشانوه‌ خیٛڕ و نیشانشان په‌ی مه‌کیٛشوٙن‌ ئه‌گه‌ر جاریٛوته‌ر و باریٛوته‌ر که‌س جه‌باره‌و شاگوڵیٛوه‌ ڕاس و ناڕاس ده‌م بکه‌روٙنه‌وه‌، مه‌ده‌ونه‌ش بدانه‌ش سیٛداره و‌ قه‌ناره‌. سیٛنزه‌ ڕویٛ دماته‌ر جه‌ستی بیٛگیان و ئاڵوچیا به‌ سه‌رمیچو کاکه‌ ئاغه‌برایشان که‌ویٛڵه‌که‌شه‌نه‌ کیٛشان به‌ر‌. ده‌یان خانه‌وادیٛ چه‌مه‌که‌ی جیا مازان‌. یوٙ جه‌ لالوٙزایه‌کانو شالیاری حه‌یبه‌تیشا‌نه‌ ده‌سو ژه‌ن و زاڕوٙ‌کانیش مه‌گیٛروٙنه‌ و په‌ی هه‌میشه‌ی چه‌مه‌که‌نه‌ مه‌کوٙچیانه‌‌ و ئه‌ئیسه‌یچه‌ ئیسه‌یچه‌ که‌س نه‌زاناش و نمه‌زانوٙن‌‌ ڕوه‌ کام نادیاران کوٙچشان لوان و کام مه‌کان و گوٙڕ غه‌ر‌یب، ماواو و کیلشانه‌ن. گه‌وره‌ باوانان وه‌رانوه‌ر به‌ شالیاری و زوٙرو ڕوٙزگاری تاقه‌ت و وه‌رگه‌شان مه‌پڕچیه‌و‌نه‌ و به‌ ناچاری ڕه‌ویه‌و چه‌مکوٙریی، بیٛده‌نگیی و وه‌رچه‌م نه‌دارای و بیٛوه‌ری مه‌گیٛران شیٛوه و خدیٛ‌‌.

شالیار قه‌ومیی نزیک و دورمان بیٛنه‌. مه‌سکه‌نشان دورته‌ر ئه‌و دیاریمان. جیا ئه‌و گوٙشدای ناخه‌ڵافانه‌و زاڕوٙ‌ییم و لاوییم به‌ چفه‌ چفانو ده‌مان و بیٛخه‌و گوٙشان، فره‌ دماته‌ره‌وه‌ و یوٙوه‌م که‌ڕه‌ت غه‌ریوینه‌ بنه‌و داستانه‌و چه‌م و هه‌وارگه‌و باوامورادی واردش ئه‌و‌ مه‌ژگیم. که‌ ئامانیوه‌ مه‌حاڵه‌که‌ فره‌ته‌ر په‌رسام و لوانیره‌ په‌یش. به‌بیٛ په‌رس و‌ وشکنای و به‌پاو حه‌زاشانوه‌‌، هه‌رکه‌س په‌ی ویٛش چیٛویٛوش مه‌وات و لاییٛوه‌ش مه‌گیٛرت. که‌م که‌س و یانه‌ مه‌نده‌ بیٛنه‌‌‌ به‌ جوریٛو نه‌تلیایبان ئه‌پا داستانیٛوه‌ و وه‌رانوه‌رو یوٙترینیوه‌ نه‌مدرایبانوه‌‌. که‌س به‌ دروٙسی نمه‌زاناش ئا وه‌ریٛ ڕوه‌ کوٙسوه‌ لواینه‌ و مه‌لوٙنه‌. یه‌ک چیٛو ڕوٙشن بیٛنه‌: شاگوڵه‌ به‌ زوٙر دریایبیٛنه‌ شو به‌ که‌سیٛوته‌ری و دورته‌ره‌وه‌ که‌وتیٛبیٛنه. ئه‌راگیٛڵ و ئه‌راگیٛڵانیچ شوٙنیشه‌ره‌ هه‌ر ده‌م دیارگایوه‌نه مه‌که‌وتیٛنه‌ پاریٛز و کوٙڵیت.‌ یانه‌و شالیاریچ کوٙچشان شییه‌بیٛنه‌ ئه‌و قه‌راخو شاره‌ده‌گایه‌ی تازه‌سازی. واڵه‌کاش فره‌و‌ ڕایاشان گیٛرته‌بیٛنه‌ وه‌ر، شانه‌ و ده‌خیل تاکه‌تیٛ کریٛ کوٙره ‌و‌ به‌خته‌ی کروٙڵه‌و براڵه‌یشان وازه‌ ببوٙنه‌ و ئه‌چانه‌ زیاته‌ر ئیش و مان نه‌کیٛشوٙن‌ و سامانه‌ بگیٛروٙنه‌‌ و به‌ینه‌وه‌ دامان. ئانه‌ یاگیٛ، بارگا و ده‌خیل و به‌ره‌ بیٛنه،‌ شییه‌بیٛنیٛنه‌، وینابیٛشان، بینابیٛشان و ته‌قه‌شان دابیٛنه‌. باباشیٛخ نزیکته‌رین یاگیٛو هه‌میشه‌ییشان بیٛنه‌. دیٛده‌ هه‌مده‌میٛ په‌ی چه‌نده‌ ساڵان و سه‌ریوٙ ئاما و لوای باره‌گاو‌ حه‌زره‌تو وه‌یسیش مه‌که‌رد. سه‌رگوڵه‌یج‌ شه‌رته‌ش که‌ردیٛ بیٛنه‌ و تا چل جاریٛ به‌ پای په‌تی و ڕه‌نگیداره‌ره‌‌ لوایبیٛنه‌ تا کوٙسه‌و هه‌جیجی و ئه‌چاگه‌یچوه‌ تا پردیوه‌ر و ئاسانه‌ سوڵتانی و ئه‌ولاته‌رش میراوانو چه‌مچه‌ به‌شکه‌رانی و دمامه‌نزڵ وارگه‌و باخه‌کوٙنی. دڵدار زه‌مانش ئه‌و ویر شییه‌بیٛنه‌وه‌ و ده‌رباییست نه‌بیٛنه‌ و سه‌رو حه‌له‌سیٛو ویٛشه‌و‌‌. که‌ کا‌هیٛ مه‌که‌وت دیاری، فیی فیش مه‌ئامانه‌ به ‌ئا هه‌ره‌که‌ت و بڕیامانانه‌. سه‌ر و چیرو زوانیش شاگوڵه‌ بیٛنه‌ و شاکوڵه‌. پانه‌یچوه‌ که‌ په‌یش هه‌ر ده‌م گیانش مشته‌شه‌نه‌ بیٛنه،‌ که‌ مه‌په‌رسیا چه‌نه‌ش‌ جه‌‌باره‌شوه‌، که‌لامیٛوه‌ش نمه‌نیا ئه‌و دڵ و گوٙشو یوٙوی. ساڵان ‌و مانگان ئه‌گه‌ر ریٛک بکه‌وتایا دیداریٛو چه‌نیٛو بابه‌یش، دویٛ که‌لیمیٛ قسیٛشان نه‌بیٛنیٛنه‌ په‌ی یوٙی و پیٛوه‌ره‌ و‌ به‌ینشانه‌ هه‌میشه‌‌ واخوا‌ مه‌کریاوه‌‌: ئه‌ر شاگوڵه‌ په‌ی توٙنه‌ و تویچ په‌ی شاگوڵی ئیٛمه‌ ئه‌چی به‌ینه‌نه چه‌ش و یاگیٛمان چیٛش و کامیٛنه‌‌. وه‌ره‌ڕو بابه‌یشه‌نه‌ خاس تا خراب‌ مات و بیٛده‌نگ.‌ بابه‌ش هه‌ق و ناهه‌ق گردو ده‌ربه‌ده‌ری و یانه‌ویٛرانیشان مه‌به‌ردوه‌ سه‌رو ئادی و شوٙنکه‌‌وته‌یی شاکوڵیٛش و ئه‌رک، نه‌ئاوه‌زیایی و خه‌تاباریی ویٛش و باواناش ئه‌و ویر شییه‌بیٛنه‌وه‌‌. لالوٙژه‌ن زافه‌رانه‌ی ئه‌دایچش‌ ئا ده‌ره‌ روٙزگارانه،‌‌‌ شه‌وسوٙزان و روٙ ڕوان، گوٙش به‌ هه‌واڵ و چه‌م ئه‌و به‌روه‌، خه‌ڵوه‌ت خه‌رمانو خه‌مانو ویٛشه‌نه‌ سینه‌ش مه‌کوا و ده‌ربه‌ده‌ری و هیٛجرانو ئازیزانو ڕوٙزگاریش مه‌لاوناوه‌ و کزه‌و زامانیش هه‌ر ده‌م به‌ سوٙ.

عه‌ینو چاره‌نویسو گردو قوٙمارکه‌ران تا مه‌ویه‌رد ئاژه‌و ژیوای خاس نمه‌گیٛڵا چه‌نیشان. هه‌ر ڕوٙ گرفت و په‌ڵپیٛو مه‌که‌وت و مه‌ئاما‌ وه‌رو ڕایش و به‌ره‌گاو ژیوایشان. ئه‌چا دماییناشوه‌‌، شالیار فره‌ که‌م مه‌پیویا‌. تاکه‌تیٛ یه‌کسه‌ره‌ بنبڕو یانه‌ی کریا‌. نوزده‌ ساڵیٛ و حه‌فت مانگیٛ و چوار ڕویٛ که‌س به‌ دروٙسیی نمه‌زاناش هه‌ن چکوٙگه‌نه‌، چیٛشش سه‌رئامان و خیٛجڵیاو چیٛشین. مه‌واتشان شاگوڵه‌ی چڕیه‌ن و پیٛوه‌ره‌‌ به‌ریٛشیه‌نیٛنه‌ په‌ی ئه‌په‌ڕو دونیای. مه‌واتشان شوٙنه‌و ئا گرده‌ ساڵاره، ئاده‌ مه‌یلو ئادیش نه‌مه‌نده‌بیه‌ن لاوه‌ په‌وکه‌تیٛ سه‌ره‌و ویٛش هوٙرگیٛرته‌ن‌. مه‌واتشان نه‌یاران سه‌رو دڵداری کوشته‌نشان. مه‌واتشان مانیا بییه‌ن و تاقه‌تش وه‌رگه‌ش پرچیابیه‌ن و ده‌سش ئاستیٛنه‌ و ڕا و ڕوه‌و ئه‌وه‌گیٛڵایش نه‌بیه‌ن‌ و ویٛش گم که‌رده‌ن. مه‌واتشان ئامانه‌وه‌ دامان و دیاراو باپیرانی و که‌سانیٛو ڕاویاریی دیه‌نشان وه‌لیٛمکه‌تیٛ ویٛش نه‌وسته‌ن و نمه‌وزوٙنه‌ دیاری و نیشان. چه‌پوانه‌و وه‌رته‌ریوه‌ ئه‌چا وه‌خته‌نه‌ فره‌و مه‌ردومی گیروارده‌و زینده‌گیٛو ویٛشان بیٛنیٛنه و که‌مته‌ر شوٙنگیٛرو باسان. مه‌گه‌ر جار و بار مه‌تیلیٛوه‌ یا پیریٛوه‌و ڕوٙزگاری جه‌میٛو‌نه‌ حه‌کایه‌تو ویه‌رده‌ییٛویش بکورنایاو و ئیشاره‌تیه‌یچش بدایا ئه‌پا داستانیٛ و ئه‌وته‌ر ماجه‌رایاو باوامورادی. به‌ گردو حه‌زه‌یموه‌ خه‌ریک بیٛنه‌ شالیار به‌ته‌مامی ئه‌و‌ ویر ئه‌منیچ بشوٙنیٛوه‌. ته‌نیا یه‌ک جار ئه‌کسیه‌ی سیاو و چه‌رمه‌شم دیه‌بیٛنه‌. هه‌که‌ باسشان مه‌که‌رد دیارته‌رین ویٛناش چه‌م ‌سیاوه‌کاش بیٛنیٛنه‌ و ریشیه‌ی ته‌نک و نیٛشانیٛوه‌ زله و سوره‌‌ بیٛخه‌و گوٙشیی چه‌پیشوه. لالوٙژه‌ن زافه‌رانه‌، بیٛ جیاواز و دلیٛو گردو په‌رسه‌ دور و نزیکانه‌، هامده‌نگیٛو کوٙسکه‌وته‌کان و شیوه‌نکه‌ره‌کانیش مه‌گه‌رد و پاڵشانه‌ مه‌که‌وته‌ بارو خه‌مانو ویٛشه‌ره‌ و ته‌شک و دیمه‌نو ئازیزانی دور و نیزیکیش مه‌پیکناوه‌ و مه‌لاوناوه و ئادیچش فره‌ته‌ر، سوٙزدارته‌ر‌‌ و نیشاندارته‌ر. پیٛسه‌و فره‌و که‌سان ئیٛمه‌یچ لاوه‌وزیا ئه‌و زه‌مین و زه‌مانی و خه‌م و خمو ژیوای تاسنایبیٛنمیٛش. ئه‌ئیسه‌یچه‌ باوه‌ڕ که‌رده‌یش ئاسان نییه‌ن. ئانه که‌‌ کتوپڕی و ناواده‌، گوٙچان به‌ده‌ست و عه‌ینه‌ک ئه‌و چه‌م دلیٛراسه‌و شارو غه‌ریبانه بوه‌رینه‌ په‌نه‌ش. ئه‌رمانگاییٛوه‌نه ‌که‌ یاگیٛو چه‌ن وسته‌یره‌ی نه‌بیٛنه‌‌‌ مدرابیٛناره‌‌ ته‌ماشا. ده‌نگیٛو پاڵمه‌نه په‌رسیٛوه‌ش په‌رسا ئه‌و که‌سو چوه‌ره‌که‌ی و جوابی نه‌ش‌ گیٛرته‌وه‌. دیسان په‌رساش تاریخو… ئیجاره‌یچ داواچ نه‌ بیٛنه‌. موچرکیٛ ئاما جه‌سته‌مه‌ره‌‌. کیشیایم په‌ی ئاگه‌یه‌ بوٙنه‌ش شوٙنگیری ئا په‌رسانه‌ بیٛنه‌ و زووه‌لای فڕیاو مژنه‌یشان. لاوه‌ دییانیٛ په‌یش. کتیٛبیٛوش هوٙرگیٛرت. عه‌ینه‌‌که‌کاش لابه‌ردیٛنه‌ و چه‌نده‌ په‌لیٛش دایوه‌ و نیایشوه‌ ئه‌و چه‌مانیش. ویٛمانه‌ ئامانه‌ وه‌رچه‌م به‌ڵام مه‌غزم نه‌شیی سه‌رش‌. لوا و ئه‌منیچ وشک و ده‌مواز. گورج ئامانیوه‌ ده‌س و که‌وتانی شوٙنیش. خه‌یلیٛو گیڵا، پیلا و په‌ولاره‌. کیسه‌‌‌کا‌نو ده‌سیش خانایوه. یاوا هه‌یوانه‌ گه‌وره‌کیٛ. سه‌کو‌ وچانداکه‌ینه‌ نیشتانیه‌ر‌ه‌ چه‌مداریش. دماو چنده‌ ده‌ور و خولان ڕیٛک ئاما و نیشته‌ره‌ سه‌کوٙی وه‌رانوه‌رمه‌وه‌‌. سه‌ره‌ش وسته‌بیٛره‌ و گیجو ته‌ماشاو بارو کیسه‌کاش. وت و ویره‌و ئانه‌یه ئه‌ئی ڕومه‌ته‌‌ ئاشنا کیٛن و ئه‌چیگه‌نه‌ چیٛش مه‌که‌روٙن، ده‌سی ڕاسشه‌ره‌ ملش چه‌رخناوه‌ دماوه‌ و نیشانیٛوه‌ سوره‌ و زله‌ که‌وته‌ دیاری. چه‌مه‌ سیاوه‌کانش یاگیٛو شه‌کیشان ناسته‌وه‌. ویٛش بیٛنه‌. سه‌ر تا پاش واڕیا بیٛنه‌. موی سیاو نه‌مه‌نه‌بیٛ سه‌ره‌شوه‌. زاناش سه‌رنجم وسته‌ن‌ سه‌رش. که‌میٛو ئیلا و ئه‌ولاش که‌رد و هوٙرئیٛستوه. په‌له‌په‌ل و په‌ل و په‌تروٙ ڕوه‌ به‌ره‌و به‌ری لوا و زیاره‌. که‌وتانی‌ شوٙنیش. ڕاسه‌ خیابانه‌که‌نه‌ خه‌یلیٛو لوا. پیٛچناش دلیٛو کوٙڵانیٛ. ئه‌سپاییشوه‌‌ که‌رد و دیا دماوه‌. هه‌که‌ دییانیش مدراناره،‌ توندشوه‌ که‌رد. ڕه‌مانی شوٙنیشه‌ره و که‌وتانی وه‌رده‌مش. ویٛش دا پاڵو دیواره‌که‌یره‌. ده‌سیی چه‌پشم گیٛرت. جه‌سته‌ه‌ش مه‌له‌رزا‌. چیٛشت گه‌ره‌که‌نان چه‌نه‌ و کارت چیٛشه‌ن سه‌رموه‌. کیف و کیسه‌کانش که‌وتیٛره‌ و پژگیای. قیٛڕنام‌: کاکه‌ شالیار شالیار… ئه‌منه‌نان… کوڕه‌زاکه‌و ماموٙ کاکه‌ی. واقیٛش پڕای و وشک بینه‌. دیده‌ش وست دلیٛو دیده‌یم. هوٙشمه‌ن به‌ ده‌سی ڕاسش سوفت مه‌چه‌کش گیٛرتانیٛنه‌. باوه‌شیمان که‌رده‌ پیٛوه‌ره‌. کوٙڵانه‌کیٛنه‌ ئامایمیٛ جبه‌ر و لوایمیٛ چیرو داریٛونه‌ چوٙکمان دا. که‌یل ئه‌و‌ دڵپه‌ڕی که‌و‌ته‌بیٛنه‌ هه‌نسکه‌ هه‌نسک. خه‌یلیٛش پوه‌وشی و ئاماوه‌ ویٛشه‌ره‌. چه‌نیو چه‌نده‌ په‌رسان و وات و واچان ئاشنایی ویٛش و ماموٙ کاکه‌یش ئاورده‌وه‌ ئه‌و یاد و یادگا. نامیٛو ماموٙ کاکه‌ی دالیٛو ئارام و دڵنیاش که‌رده‌ بیٛوه‌. پانه‌یچوه‌ چه‌مه‌کانش ئارام و قه‌رارشان نه‌بیٛنه‌ و هه‌ر ئیلا و ئه‌ولاشان مه‌که‌رد. کاکه‌لیٛ گیان مه‌وه‌خشینه‌م. نمه‌تاووٙنه‌‌ ئه‌چیگه‌نه‌ بنیشونیٛره‌.

دامانه‌ و لوایمیٛنه‌ ڕوه‌و دامنه‌و به‌رزو شاری. دیارگایٛوه‌نه‌ چه‌ممان وست دلیٛو چه‌مانو شاری. نامابیٛنه‌وه‌ گوٙه و قسه‌ به‌بیٛ یه‌ک‌ و دو شوٙن و هه‌واو شاگوڵیٛم په‌رسا. ده‌سش به‌رد په‌ی گوٙچانه‌کیٛش هوٙربیٛزوٙنه‌وه.‌ ناستم. دیسان واوه‌یم که‌رد‌ه‌وه‌‌. کاکه‌لیٛ‌ گیان حه‌زم نماروٙنه ئه‌چا باره‌وه‌ چیٛویٛ بواچونه‌ و بژنه‌ونه‌. قسانیٛوش درکنای و په‌رتافنایٛ. جیا ئه‌و ده‌نگ و ڕه‌نگیش، به‌یان و که‌لامش واڕیا بیٛنه‌. ئه‌منیچ چیٛوانیٛو‌م چفنای گوٙشانشه‌ره‌‌. باوه‌ڕت ببوٙنه‌ نه‌زانانم و بی خه‌به‌ر‌نان. گیٛره‌ ئه‌پاسه‌ بوٙنه‌. واتم په‌نه‌ت ‌ماموٙ کاکه و یانه‌ش یاگیٛو باو‌‌انیمان بییه‌ن. فرینه‌و مه‌ردومی ئه‌نده‌ پیچیاینیٛنه‌‌ زینده‌گیشانوه ویٛچشان ئه‌و ویر شییه‌نوه تاکه‌تیٛ بیاووٙنه ئانه‌یه‌‌ ئه‌توٙ چیٛشت که‌رده‌ن و ئه‌ئیسه‌ هه‌نی چکوٙگه‌نه و خجڵیا به‌ چیٛشیوه‌. ده‌س له‌رزان‌ کیسڵه‌که‌شه‌نه‌ جگه‌ریٛوه‌ش پیٛچنا. هوٙشمه‌ن نیمه‌و ته‌ماکوه‌که‌یش مجیا زه‌مین. ئاواتم وینایت بییه‌ن. بیه‌بینینه‌‌‌ ورکه‌و شه‌و و ڕویم و خییاڵانو شه‌وبیٛداریم. جاریٛوشان غه‌ریوینه، غه‌ریوان‌‌ لاپه‌ناوه‌ و قه‌راخو باسانو ویٛشانوه‌‌ به‌ردشان نام و یادت. ئاوه‌خته‌ قه‌د و ئاوه‌ز و زاتو په‌رسایم نه‌بیٛنه‌. که‌ی و چه‌نی؟ بارو دڵ و مه‌ژگیم هاڵیوه‌ که‌رد و مجنام سه‌رو سینه‌یش و په‌رده‌و گوٙشانیش. بریٛقه‌و چه‌ماش دڵمشان وست ته‌په‌ ته‌پ. لوابیٛنه‌ ئه‌و دامه‌و خییاڵاش و ئه‌منیچ یارام و په‌رسام: کاکه‌ ئه‌ئی گرده‌ ساڵه چکوٙگه‌ بیه‌نینه‌؟ ئه‌چیگه‌نه‌ چیٛش مه‌که‌رینه‌؟ چه‌نیو کیٛ مه‌ژیوینه‌؟ سه‌ره‌ش وسته‌بیٛره‌‌ و ده‌سش ‌ڕیشه‌ ته‌نکه‌که‌یشه‌وه‌‌. حه‌کایه‌تش دور و دریٛژ و پیٛچاوپیٛچه‌ن و بوٙن فره‌. په‌ردوٙچو ویٛش موازوٙنه‌. که‌م که‌س هه‌ن تاقه‌تو ژنه‌وته‌و ئا ماجه‌رایشه‌ ببوٙنه‌. جار و بار په‌ی ویٛم مواچونه‌ هه‌رچیٛ چیٛوه‌ن سه‌ر‌ شییه‌ن و واڕیان و واز باره‌نه‌. جه‌لاو لالوٙ حمه‌که‌ریمیوه‌ فره‌ باستانم ژنه‌وته‌ن. نمه‌زانون‌ و وه‌رو ویٛمه‌‌وه‌ ماچونه‌، وه‌لیٛمکه‌تیٛ نمه‌شیایا گردو بار و به‌ریت بنیایا سه‌رشه‌وه. نمه‌شیایا ئه‌پاستانه‌ بکه‌ردایا. ئادیچ وه‌رانوه‌ر به‌ چیٛشیوه و کیٛوه‌‌. ئه‌ریٛ و‌ واتم زه‌مانه‌ کاژیش وستیٛنه وه‌لیٛمکه‌تیٛ تاک و تراکیچ بییه‌ن‌ هه‌ر هه‌نیٛنه‌ شوٙنگیرو ئه‌ئا باسانه‌ و ویه‌رده‌یش. تاقڵه‌ و قه‌تاره‌و زینده‌گی هه‌ڵای زڕه‌نگه‌ و زایه‌له‌شان به‌رزه‌ن. به‌زمگا و به‌زمان تازه‌ ئیناینیٛنه‌ ڕاوه‌. ئه‌گه‌ر یوٙ ببوٙنه‌ش قه‌یش چیٛشه‌ن باکه‌تیٛ ببوٙنه‌ چه‌مساقو ڕاو ڕاویارانی تازه‌ی. ئه‌ئینه‌ خوانو شمه‌ن. مه‌وازوٙنه‌ ده‌نگت بده‌ینه‌ نیشانه‌. سه‌خته‌ن. سه‌خته‌ن په‌یم. نمه‌ره‌جیوٙم ئه‌ئیسه‌یچه‌ هه‌لای چیٛویٛم بخیٛزیه‌ونه‌‌ چه‌نه. گیٛره‌ به‌ پاو وه‌رینیم دالیٛو ئاوه‌زیاته‌ر‌ بیه‌بو‌نه‌. فره‌ش مه‌نده‌ن. شمه هه‌رکه‌سیٛو نه‌بیٛندیٛنه‌. ئاسانه‌تان کوٙڵه‌کیٛ و هورگیٛرو تاریخو چه‌مه‌که‌ی. ئانه ‌که‌ تازه‌ لوان و ئامایش مه‌حاڵ مه‌شوٙنه‌. دروٙسه‌ن شییه‌ن وه‌لیٛم پاسه‌یچه‌ نییه‌ن توٙ ماچینه‌ش. ئه‌گه‌ر ده‌س و پای نه‌گنانیٛنه‌وه‌‌ جم و جوڵ و لیٛره‌ نه‌ینه‌وه‌ کار هیچ توه‌نیٛوه‌ نمه‌چنیوٙنیٛنوه‌‌‌‌ سه‌روه‌ توه‌نیٛوه‌ته‌ریٛوه‌‌. مه‌زانون چیٛش مواچینه‌‌. ئه‌ڵبه‌ته‌ گرد چیٛویچش که‌وته‌نه‌وه‌ سارایی و ئه‌وه‌شاریاش نه‌مه‌نده‌ن. تاویٛوه‌ بیٛنه‌ و ئاما، که‌وته‌مانه‌، ڕه‌منایمیٛش و به‌ردیمیٛش چه‌نیو ویٛش. گیٛره‌‌ دڵت له‌رزابوٙنه‌ و که‌وته‌بوٙنه‌ شه‌که‌. ئانه‌یه‌ بگیٛره‌ و بلوٙنه‌ تا ئه‌وپه‌ڕش. جه‌ ویٛت بواچه‌نه‌‌ کاکه‌لیٛ‌‌. نه‌. په‌ی که‌م که‌سی هه‌ن ئه‌ئینه‌ که‌وته‌بوٙنه‌وه‌ ڕاساییو ویٛش. بانه‌ناو که‌ردیش نه‌چاره‌ن و به‌ تاویٛوه‌ته‌ره‌و وارانی مه‌ڕه‌موٙنیٛوه‌. گیٛره‌ هه‌ڵای به‌ندو دڵیتان نه‌ترازیان چه‌نه‌ش‌‌. یام پاریٛز مه‌که‌ردیٛنه‌ و نمه‌په‌رمدیٛنه‌. بنیه‌یمیٛره‌ و بواچمیٛنه‌ ئه‌وسای و ئه‌وسایت شییه‌ن. ئه‌ئیسه‌ و باقیش په‌ی کیٛته‌ن و په‌ی که‌یته‌ن. په‌ی ویٛت و وجودیچت بییه‌ن مه‌شیوٙ ئا دیارده‌ ڕوٙشنوه‌ ببوٙنیٛنه‌‌. ڕاسه‌ن ته‌جروٙبه‌و دڵ و ئیحساسو توٙ و ڕاو توٙ ته‌نیا پیمانه‌و ژیوای نییه‌ن وه‌لیٛمکه‌تیٛ کیٛ مه‌زانوٙنه‌ چه‌وسه‌ر ئاژه‌که‌ چه‌نینه‌ن و زه‌مانه‌ چیٛشش مه‌یل و خییاڵه‌ن. ڕاسیی و ناڕاسیی، ڕا و گوٙشدارانو ویٛشان مه‌ئیٛزانیٛوه‌. ته‌نانه‌ت زینده‌به‌چاڵان و ویروه‌شیایایچ ماوه‌روٙنیٛوه ئه‌و‌ ویر و مه‌که‌رانیٛشانوه‌ ئه‌و‌ سه‌ر و به‌ر. لوا ویره‌ره‌ و ته‌ماشاو شاری. چه‌و‌لاته‌روه‌ ئاویم ئاورده و پیٛوه‌ره‌‌ وارده‌مانوه‌‌. شار فره‌ گه‌و‌ره‌ بییه‌ن و تا ئیسه‌ ئه‌چی دیارگاوه‌ نه‌دیه‌نم به‌ چه‌م. ده‌س و چه‌مشه‌ره‌ و ده‌مه‌و هه‌ناسه‌یشه‌ره‌ زانام په‌رماییش ئامانه‌نه‌ ئه‌و دڵ و پاریٛزش نیان‌ لاوه و ئه‌منیچ په‌رمیاته‌ر لاشه‌وه‌.‌ کاکه‌ قه‌رار بیٛنه‌ ده‌ورو شاگوڵیٛره‌ یانه‌و ئاواتان نه‌خشین بکه‌ردیٛنه‌‌ په‌ی چه‌م و مه‌حاڵه‌که‌یمان. چه‌مبڕیا ئه‌و شمه، بوٙنه‌و وه‌شی و خیٛزیاو شمه‌وه‌‌ فره‌و ‌کسان ویٛشان ئه‌راگیٛڵو شاران و ناشاران و هه‌واران و نادیارانی که‌رد. ئه‌گه‌ر پوشان و به‌تاڵپایانیچ نه‌گیٛرمیٛنه‌ وه‌رچه‌م هه‌ر مه‌زانمیٛنه‌ چه‌ دڵان، ئاوازداران و نازدارانیٛو میٛرگه‌وار ئاواتانه، هامنه‌ڕایان، له‌خامگیرانه‌(له‌غاوگیر) که‌وتیٛنه‌ و وزیاینه‌ ئه‌و گیانو یوٙوی و ته‌فر و تونای و په‌ره‌م په‌ره‌م کریای پیٛوه‌ره‌. شاگوڵ شاگوڵو ئه‌توٙ ئه‌ئیسه‌یچه‌ مه‌نده‌نوه‌ بڕیٛو خاترانه‌ و ده‌نگه‌گه‌ش هه‌ڵای ڕه‌وایه‌ت و حه‌کایه‌ته‌ن و زریکه‌ش مه‌ینه‌وه‌‌ گوٙش، کوٙنه‌ هه‌وارانه‌نه‌‌‌‌‌. ئاخر فره‌ بانگه‌وازت دابیٛنه‌ به‌بیٛ ئادیٛ ژیوایت مه‌حاڵه‌ن. یانی توٙ ئه‌ئیسه‌ مواچینه‌ دڵته‌نگ و ئاواته‌وازو ده‌سه‌ نازاره‌کاش، چه‌مه‌ عاله‌کاش و ئه‌تواره‌کانش و ده‌نگه‌ ناسکه‌که‌یش و ده‌مه‌و هه‌ناسه‌یش‌ نیه‌نینه‌ و نمه‌بینه‌‌. چه‌نی تاوات و مه‌تاوینه‌ ئه‌و‌ ویرش ببه‌رینه‌وه‌. کاکه‌لی گیان! عاڵه‌میٛ ‌واتان و په‌رسان په‌تروٙشان بینان‌ کاپوٙڵیه‌مه‌نه‌. ڕاس مواچینه‌. ساتیٛو نییه‌ن نه‌ینه‌وه‌ و نارونیٛشه‌وه‌ ئه‌و ویر و خییاڵ. ساتیٛو نییه‌ن وه‌رو چه‌مانیموه‌ لا بشوٙنیٛنه‌‌. پانه‌یچوه‌ زووه‌ن ده‌س و دڵم کیٛشان و ئازیان چه‌نه‌ش هه‌رچیٛو مه‌وینون‌ و مه‌ژنه‌وونه‌ بییه‌ن و مه‌بوٙنه‌ شیٛوه‌ش.‌ هه‌ر سات مه‌گنوٙنه‌وه‌ ویرو ئا تاوانه،‌‌ نزیکه‌ن بپڕچیه‌ونه‌ و نه‌ونه‌وه‌ ویٛمه‌ره‌. چه‌نی بواچونه. ژیوایم دونیاش بیٛنه‌ و په‌ڕ چه‌نه‌ش و هاڵیٛ جه‌ ویٛم و غه‌رق و گیٛجو یانه‌و حه‌زاش. هه‌رچه‌نده‌ دیٛر و ده‌ردین به‌ڵام ئاژه‌که‌‌ واڕیا و دونیاش جوریٛوته‌رش سه‌ر ئاما. تا ڕادیٛو که‌ خاس و ناخاس بیٛ دڵیو که‌سیش نمه‌که‌رد و مه‌گه‌ر جار و بار و ته‌نگانه‌شه‌نه‌‌ بکه‌وتایاوه‌‌ بارو ئیٛمه‌یچه‌‌ره.‌ هه‌رچیٛ فره‌ته‌ر لویٛنان ده‌مشه‌وه‌ فره‌ته‌ر دوره‌وه‌ مه‌که‌وته‌. نه‌تاویٛنان دڵ بکه‌نوٙنه‌ چه‌نه‌ش. جه‌سته‌ و گیان و ڕه‌گو حه‌یاتیم بینیایبیٛنیٛ‌ پوه‌شه‌و. ئه‌چا دمایناوه‌ په‌ی ساتیٛو ویٛنایش هه‌زاران ویانیٛش مه‌گیٛرتیٛ و مه‌ئاوردیٛنه‌وه‌ به‌ین. ویرمه‌ن دمایین چوڵیمانه‌‌ به‌بیٛ هیچ چه‌م له‌خشنایه‌ واتش‌ تازه‌ هه‌رچیٛ چیٛوه‌ن ته‌مامیان و دڵبینیاو یانه‌ی تازه‌یم بیه‌نان. ئه‌منیچ زامدار و هاڵیٛ و ئه‌رامه‌نده، باوه‌ڕ نه‌که‌رینان. هه‌ر ئیسته‌ره‌مم مه‌که‌رد و ئاده‌یچ بیٛده‌نگه‌ و ته‌ماشاو دورانی. چیٛشم بکه‌ردایا. بیه‌بیٛنان پوشو گه‌رده‌لولان. لاییٛوته‌رم ناسته‌بیٛوه‌ و نه‌مه‌نده‌بیٛنه‌وه‌ په‌یم. نمه‌زانینه‌ چه‌ شیوه‌نیٛو گیریا و کریا. به‌ زه‌جرکوشی ویه‌رنام. سات به‌ سات مه‌رده‌ و زینده‌ییم ته‌جروبه‌ مه‌که‌رد. تا ماوه‌ییٛ ساده‌دڵانه‌‌ شوٙنه‌و تاوانباری و تاوانبارانیوه‌ بیٛنان. قینیم هوٙرگیرتیٛبیٛنه‌ ئه‌و‌ که‌س و ناکه‌سیش.‌ هیدی ئاژه‌نه‌ ‌که‌ مه‌ئاوردموه‌ هوٙش و گوٙش، وه‌رته‌روه و‌ فره‌و جاران ئیشاره‌تو شییه‌یش دابیٛنه‌ و ئه‌نمانابیٛنه‌ و ئه‌منیچ به‌ حه‌زو دڵیم ئیشاره‌ته‌کانشم چه‌پ وانایبیٛنیٛوه. ئه‌چا ساته‌وه‌ چڵه‌کیانیره‌ و زانام خوانو دڵیشه‌نه‌ وزیاینان جبه‌ر و ڕام نمه‌بوٙنه‌وه‌ که‌‌ سه‌ره‌م واردش به‌ توه‌نه‌و دڵیش و ونی فیشقه‌ش که‌رد و ده‌س وناوڵین سه‌ره‌م نیاوه‌ سه‌رو خاکی پاکی و قاچانم کیٛشایره‌ و یاسینه‌و ویٛم وانا. دماته‌ر که‌وتوه‌‌ ڕوه‌ و سه‌رانتوٙ ئاده‌یج جه‌ من بیٛ تاوانته‌ره‌ بیه‌نه‌ و ئاڵویچیایم به‌ ڕوٙحو و گیانیشه‌ره‌، بوٙنه‌ی فره‌ته‌رش مه‌یل، ئه‌وه‌جه‌و و یاگه‌هاڵیانو ویٛم بییه‌ن نه‌ک بییه‌و ئادیٛ و ژیونایوه‌و بییه‌یش و بییه‌یم‌. گیرام به‌سه‌رئاماو ئه‌من تاڵته‌ر و قوڵته‌ر. هه‌رپاسه‌ که‌ واتم دماو لوایش و لوایم ئیشم دابیٛشه‌ره‌ ره‌قایی پیٛشه‌یم. مه‌عدوم واته‌نی: زاییفینه، جه‌سته‌م‌ گره‌وش جه‌ کای به‌رده‌بیٛنه‌وه‌. سه‌دان شه‌و‌ و ڕویٛ، بارسایی ته‌نیاییمه‌نه‌ ژه‌حرو ویه‌رده‌یم مه‌ژاواوه‌ و هوٙرمه‌ئاورده‌وه‌‌‌. که‌س یام ده‌سیٛویچم نمه‌ژناسا یامکه‌تیٛ نمه‌که‌وت وه‌ر و هه‌ویٛڵمه‌ره‌. نه‌یاریٛنان ویٛم بده‌ونه‌ دیاری و نیشانه‌و که‌سی و تاخیٛت ئه‌ئیسه‌یچه فره‌‌ که‌م. ئه‌ئا نه‌ژیوانه‌ که‌‌ په‌ی ئه‌من قوٙمیان واته‌ی و ڕه‌وایه‌تش وه‌ختش نامان. یه‌هه‌ر موازوٙنه‌ گوٙشدایش و نه‌پڕچیای. گیٛره‌ بزانینه‌ یانه‌یچمان ته‌فر و تونای بیه‌بینیٛنه‌ و هه‌ر یوٙشان سوچیٛوو ئه‌ئی عاڵه‌میه‌. ئه‌دا و بابه‌م ده‌ربه‌ده‌رینه‌ سه‌ره‌شان نیابیٛنه‌وه‌. قه‌وم و که‌س و کاری بازه‌نه‌وه‌.‌ دماو لوایش و لوایم واتم سه‌ره‌و ویٛم هوٙرمه‌گیٛرون و ئه‌پاجوٙره‌ هه‌رچیٛ چیٛوه‌ن ئه‌و‌ ویرم مه‌شوٙنیٛنه‌وه و که‌سچ نمه‌شناسوٙنه‌موه‌ تا قاڵم مه‌بڕیه‌ونه‌وه‌‌. بیٛ ئه‌وپه‌ڕین سات ئاواته‌و مه‌رگیم هانا و هاوار مه‌که‌رد و که‌رده‌ن. حه‌زم مه‌که‌رد تاڵ و کیٛشو وجودیم و جه‌سته‌یم و گردو ویر و خیاڵ و فکرام بواڕوٙنه و ویه‌رده‌و ویٛم ئه‌و ویر ببه‌رونه‌وه‌‌. په‌نام به‌رده‌ نادیاریه‌ی که‌ گردو دیارده‌کاش هیچ باریٛوه‌ره‌ نمه‌شیای ئه‌و بییه‌یم و ژیواو ویه‌رده‌یم. ته‌نیا ئاشنا و په‌ناو غه‌ریبیم ده‌نگم بیٛنه‌ که‌ جار  و بار مه‌که‌وت بارو سوٙزو خه‌مانیمه‌ره‌. پانه‌یچوه ویم دور وسته‌بیٛنه‌وه‌ ئه‌و هه‌ر چیٛویه‌ی ویٛمانه‌ و ئاشنای، به‌ جاران که‌ کتوپڕی دیارده‌یه‌ی ئاشنام مه‌وینا و مه‌ژنه‌وا گورج ده‌رونم مه‌واڕیا و ڕنگ و حاڵیٛوته‌رم مه‌نیشته‌نه‌. قومیاییٛو‌‌ ئاوردانیشه‌وه‌ ویٛمه‌ره‌. دوره‌ دیاره‌نه‌ و نزیکو نیشتگاکه‌یموه‌ دویٛ خانه‌وادیٛ شنیایبیٛنیٛنه‌ ئه‌و سه‌ر و به‌چکو یوٙترینی. که‌سیٛوه‌شان غه‌ریوانه‌ سوٙزه‌ش مه‌ئاما. کیٛجاوڵیٛوه‌‌ ئاما سه‌ره‌مه‌ره‌. هه‌که‌ فره‌ته‌ر ئاما‌نه‌ گوٙشم جوٙرو به‌یانیشان، دیم ئه‌و واتو ئا مه‌حاڵیه‌ نمه‌شوٙنیٛنه‌‌‌ و ویٛمانه‌ن په‌یم. دڵپه‌ڕیم که‌یلته‌ر بینه‌وه‌‌ و ده‌رونم هاناوی‌. هه‌که‌ لوانینه‌ لاشان و په‌رسام، بوٙنه‌و کوٙچیشان و بییه‌یشان ئه‌چا غه‌ریبینه هام لفو ده‌ربه‌ده‌ریو ویٛم بیه‌بیٛنه‌‌. دماو ڕاویٛژ و په‌رسانیه‌ی فره‌ی،‌ چه‌نیو خانه‌واده‌که‌ی دامه‌نه‌ و به‌ هه‌زاران چه‌رمه‌سری و حه‌فتاو دویٛ مانگیٛ سه‌ر و وار و ڕا پیمای، گیٛڵایمیٛوه‌ په‌ی دیارانو باپیرانی. په‌ی شوٙنکمکیٛ ڕوه‌م نیا ئه‌و دیاریٛو فره‌ دورته‌ر ئه‌و زیٛد باوانانی. خجڵیانی هه‌رمانیٛوه.‌ مه‌حه‌لیٛو یاگه‌ هه‌رمانه‌کیٛمان ئه‌رمه‌نینشینه‌ بیٛنه‌ و بژیوشان تایوه‌ت و سه‌یر و سه‌مه‌ره‌ و ئه‌منیچ غه‌رق ژیوایشان و ته‌جروبه‌و ژیوای چه‌نیشان. گردیی‌ قاپساز و ده‌سینه‌ساز و نیگارکیٛش. په‌ی یوٙوه‌م جاری ژیوایمه‌نه‌ بارو مه‌ینه‌تانیم نیابیٛنه‌ تاقڵه‌ و ته‌رواڵه‌و فه‌راموشیوه‌. تا دڵ بوازوٙنه‌ و ئاوه‌ز یاونیٛنه‌ ئامه‌ و لوای گلیٛرگا و یانانو بییه‌یشانم مه‌‌که‌رد. شوٙنه‌و حه‌فت ساڵ و نیم بژیویره‌‌ تاقه‌م تاق بیه‌بیٛنه‌ و به‌ گردو دڵبینیایموه‌‌ دامه‌نه‌ و ئامانیوه‌ په‌ی دیاری نزیکی و ئه‌ئیگه‌یه. فره‌ش به‌رد تا یاگیٛو ویٛم بیٛزو‌نه‌وه و بساکیه‌وره‌‌‌. به‌پاو ئه‌وسایم ئه‌ئیسه خاسته‌ره‌نان. دڵ و دونیام حاڵیٛوته‌رشان وینان و گیٛرته‌ن ئه‌و ویٛشان. که‌م و پاریٛزدار چه‌نیو ئه‌وه‌مه‌نانو یانه‌یمان و که‌س و کارو باوانان پرده‌و ئامه‌ و شویمان وراستیٛنه‌وه‌. جه‌لاو ئه‌منه‌نه‌ نمارانه‌ ڕوه‌ ویٛشان به‌ڵام هه‌رچیٛ چیٛوشانه‌ن ئه‌و ویر و هوٙشه‌ن. نمه‌زا‌ چه‌نی زانابیٛشان گیٛڵاینانوه. هه‌ژده‌ مانگیٛ دماو ئانه‌یه مه‌حه‌لیٛ‌ ئه‌رمه‌نی ئاواینه‌ گیٛڵانیوه‌، شوٙنیشان هوٙرکه‌رده‌بیٛنان. بابه‌م وه‌ڵیٛو کوٙچیشه‌نه‌ جه‌مو قه‌وم و که‌سانه‌‌‌ وه‌سیه‌ت مه‌که‌روٙن‌. یاوابیٛنه‌ لاو ئه‌من وسیه‌تنابیٛش ئه‌گه‌ر ده‌سش ئاست و کیٛڵاوه‌ دامان ئه‌ئی نامه‌شه‌ بیاوندیٛنه‌ ده‌س. ئه‌گه‌ریچ دڵنیای بییه‌یدیٛنه‌ خاک مه‌یلش بریه‌ن‌‌ واڵه ‌گه‌وره‌کیٛم وه‌سیه‌ته‌که‌ی به‌ دیل باوه‌روٙنه‌. بیس و هه‌شت مانگیٛ دماو ئه‌وه‌گیٛڵایم جه‌ ئه‌رمه‌نی ئاوانه‌ و دماو ئانه‌یه‌ واڵه‌زاکه‌م وینا و نامه‌که‌ش یاونانینه‌ ده‌س، ڕوه‌ زیٛدو ئاواتاو جوانیم که‌وتیمیٛنه‌ ڕا‌. نام و نیٛشانش دابیٛنه‌ چیرخانو یانه‌و باوانینه‌ و وه‌رده‌مو پابومه‌که‌یشه‌نه‌‌ ئوتاقلیٛو‌مان که‌رده‌نوه‌ و ته‌نیا چه‌نده‌ وڵ و ته‌شاوییٛ وردیییٛمان چه‌نه‌ ئاسته‌نوه‌ و به‌ره‌که‌یچش دیوار چنیا. ئامانه‌تو پاریٛزنایش مواخیٛزه‌ که‌رده ‌بیٛنه‌‌. کوٙره‌ ڕایانه‌ره‌‌ و به‌ پیاسه‌ چه‌نیو یانه‌و واڵیٛم و دویٛ که‌سانته‌ری شه‌وانه و‌ به‌بیٛ ئانه‌یه‌ یوٙ بزانوٙن‌ لوایمیٛوه‌ و تاریک و ڕوٙشن به‌بیٛ ئانه‌ی بوه‌رمیٛنه‌ ئه‌و‌ که‌سیه‌ی، گیڵایمیوه‌. به‌ پاو نیشانه‌کاش دلیٛو چوار هوٙمه‌ گه‌ورانه‌ عاله‌میٛو بنجنامه‌ و نویسیایمان وینایوه‌‌. فریٛشان پردوکیای و شیتاڵ شیتاڵ و خومریای. ئاوردیٛمانوه‌ په‌ی شاریٛ. بریٛوشانم ئه‌سپاراینیٛنه‌ ده‌سو که‌سانو ویٛشان. سینزه‌ مانگیٛ ته‌مام پیچیانی پوه‌شانوه و جیاوموه‌ که‌ردیٛ‌. ئه‌چی ئاژه‌ تایوه‌تمه‌نه‌ خجڵیاینان واتان و که‌لامانه‌ره‌. هه‌ر ڕوٙ چیٛویه‌ی تازه فام‌ و مه‌وینون‌. نه‌ ئیحساس هه‌ر به‌ ڕاسیی چه‌پوانه‌و باوانان زه‌وقم ده‌یم ئاسا چوٙڕه‌و ئاویٛش چه‌نه‌ چنیان. پانه‌یچوه،‌ جار جاریٛویچ چریکه و خامه‌م مه‌گنانیٛنه‌وه‌ دیم و باره‌ره‌ و هاز و هیٛزه‌ره‌. نه‌واتت چیٛش سه‌بوریتش دانوه‌؟ ئه‌پی گردوه‌ چه‌رمه‌سه‌ریاوه‌ چه‌نی تاوانت بمانینه‌وه‌ و هوبیٛزینه‌وه‌؟ باوه‌ڕ که‌رده‌یش سه‌خته‌ن. کام سه‌بوری و کام‌ مه‌نده‌ی و کام هوٙره‌ئیٛسته‌ی. سه‌بوریم نامان و نه‌دریانه‌وه. واتم که‌ مه‌نده‌یم به‌ مویٛو به‌ند بییه‌ن و گرد سات حه‌زو نه‌مه‌نده‌یم ئاواته. ماویٛو فره‌‌‌ خاویٛر و گیٛچ بیٛنان. یوٙوه‌م جاروه‌لای که‌ گیٛڵاینانوه‌ و ئه‌چا ساتانوه‌ که‌ په‌ته‌و بژیوو ئه‌وسایم لوٙبر که‌ردیٛنه‌ و چه‌م و گوٙشم کریاینیٛوه‌‌‌ و ده‌سانم وازیٛ بیه‌نیٛنه‌ خه‌ریکه‌نان پیسه‌و زاڕوٙڵیٛو ده‌ور و به‌ریم مه‌وینونه‌وه‌ و ده‌س و پا مه‌شانونه‌وه‌. ته‌نیایی ویٛمه‌نه و به‌ تایوه‌ت ئه‌رمه‌نی ئاوانه‌‌ په‌ردوچیی فره‌م‌ بییه‌ن. دانه‌ به‌ دانه‌و که‌رده‌وام ئاوردیٛنیٛوه‌ هوٙش و کاویٛژ و چه‌نیو بریٛو هامفه‌ردان وستیٛنیٛمان ڕاویٛژ و ریٛز و شوٙر. لاپه‌لانیٛم داینیٛوه‌ و ژاکناینیٛم و که‌ردیٛنم بوڵه‌. ڕاسه‌ن و واتم‌ مه‌نده‌یم به‌ موویٛو به‌ند بییه‌ن‌ وه‌لیٛ دیاردان و ده‌لیلان دیار و نادیار هانا و هه‌ناسه‌مشان ئاسته‌وه‌ و ئاسته‌نوه‌.

کامیشانه‌وه‌ بواچونه‌ په‌یت. چل مانگیٛ دماو ڕابه‌رده‌یم ئه‌و سه‌رو وه‌سیه‌ته‌که‌و بابه‌یم، ناشناس و نه‌ژناسیا به‌ هه‌زاران په‌رس و ته‌رس ڕام وسته‌نه‌‌وه ئه‌و‌‌ کوٙنه‌ هه‌وارن. بنه‌ڕاوه‌، سه‌ردانو به‌زمگاو جارانیمان و هانه‌و باوامورادیم که‌رد. تاقه‌ت پڕوکن بیٛنه‌ و ده‌ردین. خه‌یلیٛ چه‌مانم گیڵنای و تاسه‌ییم تاسناوه‌. ورد و به‌ تاقه‌ت، مه‌نزڵ به‌ مه‌نزڵ تا پام بڕش که‌رد ئی په‌ڕ تا ئه‌و په‌ڕو چه‌مه‌که‌ی و ده‌وروبه‌ریشم وشکنا و دام پایوه‌. تا هازیم بیٛنه‌ و یارام، بنج به‌ بنج و یه‌س به‌ یه‌سو چه‌م و دوٙڵه‌که‌یم ویارا. په‌ردوٙچ که‌م و تاسه‌ فره‌ و ته‌رسه‌، بیٛ ئه‌وپه‌ڕین. وه‌س بیٛنه‌ په‌یم و فره‌یچ. دمایین ساتانو ئه‌راگیٛڵیمه‌ن، وارگه‌یوه‌نه و کتوپڕی‌‌ واردم به‌ ده‌لیل و ئامیانو ژیوای دماته‌ریمان. چیٛشش سه‌ر مه‌ئاما ئه‌گه‌ر ئا ڕوه،‌ ئه‌پا ڕیٛوازه‌ره‌‌ نه‌بیایانان ڕاویار و ته‌نانه‌ت چنده‌ ساتی و یه‌ک قه‌مچیچ که‌م و زیاد یامکه‌تیٛ ئیلا و ئه‌ولا. چل شه‌ویٛ و ڕویٛ چه‌مه‌و بییه‌یشه‌نه‌‌‌ هاز و هانام چه‌شکه‌ و قوت و هیٛڵنجی دا‌. شه‌وه‌زه‌نگه‌و سه‌رگه‌ردانی و ته‌نیایینه‌ مانگه‌ش نیشانه‌ که‌رده‌. په‌رمای وه‌رانوه‌ریمان ئاما به‌ینه‌نه‌ و شیوکه‌ردو یاران و دیارانی. په‌ڕانپه‌ڕو چه‌م و دوٙڵه‌که‌یش خاس تا خراب یادگا و ده‌سه‌نه‌‌ و هاگاو به‌ڕ و به‌حریش ئه‌و گوٙش‌. له‌پوٙرته‌و پلتوٙکه‌کاش بییه‌یشان دیماودیم مه‌که‌رد. تا ئه‌ئا ساتانه‌ باری تاقه‌ت پڕوکنو ئه‌وسایم ئه‌و‌ کوٙڵ و هه‌ر ده‌م ئاماده‌ و ئاڵوچیاو دیارو نه‌بییه‌ی. دمایین شه‌ومه‌نزڵو چله‌یمانه‌‌، په‌ی یوٙوه‌م جاری له‌مه‌مانیٛم جه‌ مان که‌وته‌ و په‌ی دووه‌مین جاری دماو لوایش و لوایم به‌بیٛ وت و ویره‌ و وه‌رمان، وه‌رمم پوٙره‌ که‌وت. هه‌که‌ جیام ئاست په‌ی هه‌میشه‌ په‌نجه‌موٙر‌و ویٛش کوابیٛره‌‌. ماچینه‌ هه‌ر ئه‌ئیسه‌نه‌ که‌ ده‌نگش ده‌نگ مه‌دو‌نه‌وه ڕوٙح و گیانمه‌نه‌: کاکه‌‌ گیان. تاقه‌ت موازوٙنه و لیٛره‌‌. زه‌جراوی و زام به ‌سوٙن گیان و ئودیسه‌و ژیوای ئیژامه‌ند و ئامیانو بییه‌ی به‌ڵام ژه‌حر و ژه‌نگه‌و گیانی ماتڵو تام و چه‌شیٛوه‌ن. بدیه‌نه‌ ده‌ور و به‌ریت و گردو دیاردانیش‌. جه‌ ته‌شک و دلیٛنه‌شان تا بارسایی و بنه‌راییشان. تا ئه‌ئیسه‌ ئانه‌ که‌ تاقیوه‌ کریان و بییه‌ن باقیی، سه‌رانتوٙشوه‌ تا بنج و بیٛخه‌ش یه‌ک دیم و تام و ڕه‌وایه‌ته‌ن: ئه‌چی ژیوگانه‌ ‌قوٙتار و قاتی ساڵیانه‌ نه‌بوٙنه، فره‌ینه‌و ساتانه‌‌ فرینه ئه‌ئی ده‌ره‌ ڕوٙزگارانه‌‌‌ چه‌مه‌و ژیوایشان فیٛنک و په‌ڕئاو بییه‌ن و په‌ولایچشه‌ره‌ وه‌هم و خاویٛری، وشک و که‌م هاز و تین. ئه‌ئی وه‌ڵاته به‌ دریٛژایی و بارسایی بییه‌ی و باڵایشه‌نه‌ هه‌رمانه‌ و که‌لام بنچینه‌ش بییه‌ن و گوٙرانییٛچ سوٙزه‌و بژیویش. به‌بیٛ ئه‌و و حیکمه‌ت نییه‌ن‌ زوانه‌که‌ش که‌لامه‌ن و که‌لامیچش گوٙرانی. ماویٛو وه‌ر جه‌ دارو بییه‌ی دریٛخ کریا بییه‌ن‌ و پردئیوه‌رو تاریخینه‌ ئازیابیه‌نوه‌‌ وه‌لیٛمکه‌تیٛ هیچ سات بیٛ وه‌ج و خه‌ڵف نه‌مده‌نه‌نوه. ئه‌ر تاقه‌ت ببوٙنه‌ هانه‌واوه‌ واتان دیسانه‌وه‌ وه‌ر و وه‌چیٛ تازه‌شان مه‌گنوٙنیٛوه‌نه‌ و چه‌و‌سه‌ر مه‌یانیٛنه‌وه‌‌ سه‌ر و به‌ر. تازه‌ته‌رین تاڵانه‌و باخی به‌ ته‌مامی پاکه‌وه‌ نه‌بیه‌نه‌ و لیٛره‌، نه‌مام و قه‌ڵه‌می تازه‌ش نامانوه‌نه‌ و نه‌نریانوه‌نه‌‌‌. سه‌رته‌ڵته‌رین شیعره‌ نه‌واچیاینه و نوٙبه‌رته‌رین خامه‌و که‌لامی نه‌پیتیانوه‌. به‌فه‌ڕته‌رین چریکه‌ و لیریکاو بییه‌ی نامانه‌نه‌ ئه‌و‌ گه‌ڵوه‌، گوٙش و هوٙش و ڕازه‌ و داستانه‌و نه‌ژیوانیو ژیوایچمان نکوٙریاینه‌وه و نه‌گیٛڵیاینه‌وه‌‌.

قه‌وڵو دڵ و گیانی گیریا به‌ینه‌ یانه‌مان‌ و ئه‌منیچ بلونه‌‌وه بنار و دامانشان‌. شییه‌ی جه‌ لاش ئاره‌زومه‌ندی و شیوه‌نش وست ئه‌و گیانی. هه‌که‌ گیٛلانیوه‌ خاویٛر که‌وتانینه‌. حه‌فت مانگیٛ یاگیٛنه ‌موم نه‌له‌ریاوه‌. به‌ په‌ل و په‌تروٙ تامو ژیوایم مه‌چه‌شت و مه‌نوٙشا. هه‌که‌ که‌وتانیوه‌ هاز و هیٛز، جوڕییا و گوٙڕیا و چه‌نیو ویٛم و ده‌ور و به‌ریم، دلیٛو وت و ویره‌ینه‌. هه‌که‌ مه‌دام لاو خه‌ڵکیره‌‌ وه‌رو ویٛموه‌ و به‌ ده‌نگیی به‌رز قسیٛم مه‌که‌ردیٛ. فره‌و که‌سان به‌ تایوه‌ت به‌ر و هامساکامان هه‌نگوسه‌ په‌ی ئیشاره‌یمشان مه‌کیشا نیشانه، په‌ی ساداریم‌. ماخوٙلیان ئاسا، ترازو و مه‌یزانو شه‌و‌ و ڕوٙیم شیویا و پژگیا‌. به‌ ڕانمونیٛ و واتو چه‌نده‌ دوٙسان و ده‌لیلی تازه‌و ژیوای به‌ وه‌رچه‌مبیه‌و توٙشه‌و وه‌ڵیٛم و حه‌زو دڵیم، کلیٛوته‌ر و ئی گله‌‌ دیاری کریا و په‌رسان په‌رسان و که‌مته‌ر ته‌رسان، گوٙچان به‌ ده‌س لوانینه‌وه‌ په‌ی دیارگاو عه‌وداڵانی. تا قوه‌م ئاوردش و یارام جه‌ به‌سه‌ر نه‌کریایه‌کا، ئانه‌ حوجره‌ و خانه‌قا بیٛنه‌، ئانه‌ چه‌م و دوٙڵ بیٛنه‌، ئانه‌ که‌ڵه‌ک و‌ باخ و تاڵان بیٛنه‌، ئانه‌ یار و نه‌یار و مه‌زار و پیر و قه‌ده‌مگا بیٛنه‌، به‌ په‌ردوٙج، دڵوازانه و چه‌مواز‌ که‌ردیٛموه‌ سه‌ر و شوٙکرانه‌شانم ده‌س و دیم گیٛرت و فام و نما. فره‌و که‌سام وینای‌ و فره‌و ده‌نگام ئه‌ژنه‌وییٛوه‌‌. نه‌وه‌د و نوٙ ڕویٛ وچانیم نه‌گیٛرته‌. دمایین مه‌نزڵ و قه‌ده‌مگامه‌نه‌ نیابیٛمه‌ره‌ سه‌وایشه‌وه‌‌ بگیٛڵوٙنه‌وه‌‌. دامه‌نه‌ لوانی بلوٙنه‌ په‌ی وه‌رانوه‌ری تاکه‌تیٛ په‌ی دمایین جاری دیده‌ی په‌ر بکه‌رون‌‌ ئه‌و ته‌ماشاو به‌رزه‌ دیاری. نیمه‌و ڕاینه‌ بیٛنان دیم دوکه‌ڵیه‌ی فره، به‌رزته‌ر ئه‌و به‌رزایی داره‌ وه‌زه‌کان کیشیانه‌ره‌ ڕوه‌ ئاسمان. مدرانیره‌ و خه‌یلیٛ ته‌ماشام که‌رد. وه‌ستانیره‌ ده‌ره‌که‌ و دڵیٛو په‌رچیناره‌ و به‌ینو بیٛشه‌ی په‌ڕیره‌‌ لوانینه‌ ڕوه‌ شوٙنه‌ماو دوکه‌ڵه‌که‌ی. دوره‌وه‌ که‌سم نه‌وینا.‌ کوٙرسه‌که‌نه‌ هوٙروه‌ستانی و نزیکته‌روه‌ که‌وتانی‌. ئه‌چه‌ولاته‌رشوه‌ ‌ژه‌نیٛوه‌ فیٛس به‌سه‌ره‌ و سیاوپوٙشه‌م وینا. وه‌رده‌مو که‌ویٛڵو ئه‌ولاو هانه‌که‌ینه‌ و‌ چیرو سیٛوه‌رو وه‌زانه‌‌ نشتیٛبیٛره‌ پاو ئارگای. جار جار به ده‌سیٛوه‌ش له‌لوه‌ش مه‌جمنا و ته‌سبیٛحانو ته‌لیله‌یچ ئاڵوچیا په‌و ده‌سه‌که‌یشه‌وه‌. شه‌فتورو شییه‌و من‌ نشتیٛبیٛره‌. یاوانی لاش. مه‌تی گیان سلامه‌له‌یکم. جاریٛ دویٛ یه‌ریٛ… ده‌نگیٛو ناماوه‌‌. زاڕوٙڵیٛو مه‌مڵه‌ ئه‌و ده‌م دلیٛو له‌لوه‌کیٛنه‌ ده‌سیٛش مه‌شانای. به‌ خشه‌و پایایه‌ره‌ سه‌ره‌م چه‌رخناوه‌. ژه‌نیٛوه پانتوٙڵ ئه‌و پای، گژ و‌ گیواوی فره‌ش نیان ئه‌و شانه‌ و کوٙڵشوه‌ و به‌ردش و وستش سه‌رو کوٙگاو دوکه‌ڵه‌که‌ی. قرچه‌ قرچش که‌توه‌نه‌ و دو‌که‌ڵه‌که‌ مه‌رده‌ره‌. به‌ ویٛ ته‌کنای لاشکه‌ردوه و‌‌ وینانیش و مه‌نه‌ره و لوه‌ ئه‌ولاته‌روه‌ سه‌رپوٙشه‌که‌ش هوٙرگیٛرت و داشوه‌ سه‌ره‌شه‌ره‌. دادا گیان بوه‌خشتیٛنه‌ غه‌ریوه‌نان و ڕاکیٛم نمه‌پیٛکا و واتیچم بزانونه‌ ئه‌ئی دوکه‌ڵه‌ چیٛشه‌ن. چه‌نده‌ وه‌ختیٛ ده‌س ئازیابیٛنه‌ ئه‌چا وه‌رزو سه‌ریه‌ و بیه‌بیٛنه‌ ڕه‌په‌ڵگا په‌وکه‌تیٛ په‌ڕ بییه‌ن قه‌لداسه‌ و دڕه‌ی. ده‌س و پامان نه‌مه‌نده‌ن ده‌سشوه‌.‌ مه‌تیه‌م چاییش نیان سه‌ر و ئانه‌ ئه‌منیچ ئامانیوه‌. به‌بیٛ واتیٛوه‌ که‌م و زیاد‌ خوٙڵکه‌کیٛشم ده‌مشه‌وه‌ ڕفنا و ئه‌سته‌وه‌ و سه‌رو توه‌نیٛوه‌نه‌‌ نیشتانیره‌. ویٛناش ویٛناو ماجه‌میناش به‌رده‌وه‌نه‌ ئه‌و‌ دڵیم و حه‌سره‌ت و خییاڵانی دوری. چه‌و‌لاته‌روه‌ و لاو ساج و پنه‌کیٛنه‌ نانی فره‌ نریابیٛنه‌ سه‌رو یوٙوی و ژیٛڵه‌کیٛ هه‌ڵای ده‌مه‌ و تینو گه‌رمایش مه‌ئاما چوه‌وه‌‌. خه‌یر ته‌شریف باردیٛنه‌. واتم بلوٙنه‌ تا یاڵ و هاره‌گڵان و توه‌نه‌و باجیگڵاوی و واتشان ئه‌پیگه‌ره‌ وه‌شته‌ر‌ و فیٛنکته‌ره‌ن‌.‌‌ ڕاسشان واته‌ن. هانه‌ چه‌رمه‌ مه‌یشوره‌ن‌. ژنه‌وته‌نم. مه‌واچان ئاوه‌کیٛش حه‌یاته‌نه‌‌. مه‌تیلیٛ که‌ ڕوه‌ش په‌ولاره‌ بیٛنه‌ دیاوه‌ لاره‌ و ده‌سیٛوش به‌رزه‌وه‌ که‌رد. سه‌خت مه‌ژنه‌ووٙنیٛنه‌. شوم که‌رده‌ن یانه‌یشان ئه‌پاسنیٛنه‌. یاگیٛتان فره‌ وه‌شه‌نه‌. چه‌م و باخی سه‌وز و بیٛشه‌ی ڕه‌نگینتان هه‌ن. وه‌شه‌ن‌. ئه‌رکه‌که‌ش قوٙرسه‌ن. سه‌خته‌ن. وه‌هار مه‌بوٙنه‌وه‌‌ مه‌یمیٛنه ئه‌ئی باخ و هه‌وارگه‌‌ و تا په‌ڵه‌و پاییزی خه‌ریکو که‌ن و کوٙینمیٛ و ئاما و لوای و وار و چوه‌ری‌. جه‌سته‌مان شه‌که‌ت و هیٛلاک‌. پاڵشه‌نه‌ ڕوٙح و ڕه‌وانمان ڕه‌حه‌ته‌ن. هه‌نمیٛ یانه‌و و دیارو ویٛمانه‌ و لاو قه‌وم و که‌س و کاریمانوه‌. ڕوٙڵه گیان‌ چیٛشش گه‌ره‌که‌ن. ده‌مش به‌رد نزیکو گوٙشیشوه‌‌‌‌‌. خه‌یر ته‌شریف باردیٛنه‌ کاکه‌ گیان. وه‌نوٙزیٛوه‌م دا. دالیٛو ئه‌ئی گوٙشمه‌ سه‌نگینه‌ن. ئینه‌یچه‌ گوزه‌رانو ئیٛمه‌ن. ئه‌ئی یاگیٛ که‌ ئه‌توٙ مه‌وینینه‌ش وه‌ختو ویٛشه‌نه‌ ڕاو ڕاوانی نه‌بیٛنه‌وه‌‌. ده‌مه‌و ویٛره‌‌گان، دما هه‌رمانان، به‌ره‌ جه‌ژنان و بوٙنه‌ شادیان و هه‌ق و ناهه‌ق تا دڵ مه‌واستش قرمه‌و گوٙرانیا و له‌نجه‌و هوٙرپڕایش بیٛنه‌. نمه‌زا باسو به‌زمگاو باوامورادیت ژنه‌ته‌بوٙنه یا نه‌‌. به‌ پیاسه‌ تا لاو ئیٛمه‌ یه‌ک سه‌عات و نیم ڕانه‌. وه‌یشومیش ئیٛمه‌ و ئیگه‌یچشه گیٛرته‌ره‌. سوٙزمانیوه‌‌ بیه‌به‌‌ ئامیانو یانه‌ویٛرانی و شیٛونایو چه‌مه‌که‌یمان. پیٛسه‌و ئاوی چیای که‌رینه‌ جه‌سته‌ره‌‌، چیا بیانینه‌وه‌‌. فره‌ زو بیٛنه‌. هه‌رچی که‌سمانه‌ن ته‌فر و تونای بییٛ پیٛوه‌ره‌. باخ و باخاتمان سوچیای و به‌ره‌ڵڵا که‌ریای. یانه‌مانه ته‌نیا‌ ئه‌من و خودا‌ عه‌فو که‌رده‌که‌ مه‌نه‌یمیٛوه‌‌. گردی کوٙچشان لوا.‌ ئینه‌ چنده‌ ساڵیٛن بریٛوشان ڕوه‌شان که‌ردینه‌وه‌ چه‌مه‌که‌ی‌. نادیارانه‌نه‌ و پیلا و په‌ولاره‌ ژه‌ن و ژه‌نوازیشان که‌رده‌ن. له‌وز و ئه‌توارشان واڕیان. نمه‌رئه‌جیوت زه‌مانیٛو باوانشان ئه‌ئیگه‌یی و ئه‌چیگه‌نه‌ بییه‌ن. جه‌ یانزه‌ نوکه‌ر و کاره‌که‌ریٛ که‌ خوای ئاستیٛنیٛوه‌ په‌یمان دویٛشان نه‌بانه‌ که‌سشان ئه‌پی چه‌مه‌ره‌ نه‌مه‌نده‌نوه‌. ته‌نیا ئی کوڕمانه‌ ئامانه‌وه‌ لامان و دامان و ئه‌چیگه‌نه‌ ژه‌نیمان په‌ی واسته‌ن و کناچیٛوه‌یچمان ئه‌چیگه‌نه‌ داینه‌ به‌ شو. ده‌ربه‌ده‌ریچ سه‌خته‌ن. خودا ناروٙش ملو که‌سیره‌. ئه‌داشان بمروٙنه‌ په‌ی بیٛکه‌سیی و بیٛ باوانیشان. هیچکامشان ڕه‌نگ و ڕوٙ نه‌مه‌نده‌ن پوه‌شانوه‌. ئه‌وه‌ ساڵه‌ ئاما ده‌ممه‌ره‌ و ئینه‌مه‌ به‌ ژه‌نه‌و گوٙڕه‌ گه‌وره‌له‌یم وات و پیسه‌و ماری هوٙرئیٛسته‌وه‌ سه‌رو ده‌سان و ئاماوه‌ ده‌مه‌ره‌ په‌یم و ئانه‌ بشیه‌ و نه‌شیه‌ونه‌ که‌ردش په‌نه‌م. فره‌ نه‌یاویٛنانه ئه‌و له‌فز و که‌لامیش وه‌لیٛم دڵم گیٛرتش چیٛش مواچوٙنه و قسه‌کانش سوه‌شان داوه‌ دڵیم‌. ئا توه‌نی ئاماوه‌ ده‌نگ کوره‌که‌م نوکه‌ش چوه‌وه‌ ناما. ده‌ی ئیجا ئه‌گه‌ر ویٛمانیٛ بیایا ئه‌پاسشه‌‌ مه‌که‌رد. ئه‌چا ساوه‌لای ئیتر ناماینیٛوه‌ و بیلاته‌شبیی په‌ره‌که‌یچم وه‌رهه‌میٛوش زنیه‌نوه‌. یانه‌و ئا که‌سیه‌ ویٛران ببوٙنه‌ که‌ ئه‌پیٛسه‌ که‌له‌لا و یانه‌ویٛرانیٛش وستیمیٛره‌‌. وشک بیه‌بیٛنان.‌ بیٛ ده‌موه‌نه‌دایش پیاڵه‌ چایه‌که‌م هه‌ر پاسه‌ ئاسته‌بیٛنه‌وه و چه‌نده‌ جاریٛ تازه‌شانوه‌ که‌رد په‌یم‌. ئاما دڵمه‌ره‌ که‌ به‌ مه‌رگیج ده‌سبه‌رداره‌م نمه‌بوٙنه‌ و پاکاویم نمه‌ینه‌. ئانه‌ به‌سه‌رئامایم بینیٛنه‌ ئاوردیٛشه‌و‌ وه‌رو چه‌مانیم. جار جار خورپییٛنه‌ دڵم نه‌شناسابونه‌ش و ئه‌نقه‌س ده‌رونش هاڵیوه‌ نه‌که‌روٙنه‌وه‌‌. باس درییٛ ده‌م باسیوه‌ و قسیٛ مه‌پیکیایوه‌. لاره‌سیٛوه‌ریٛ ئامایوه‌ و تاریکناشه‌ره‌. مه‌زانام په‌یچیٛ به‌ڵام نه‌زانام چه‌نی لوا. به‌ گردو تیرایچوه‌ که‌ واردشان ئه‌و دڵیم حه‌زم نمه‌که‌رد هوربیٛزوٙنه‌وه‌ به‌ڵام نمه‌کریا ئه‌چانه‌ زیادته‌ر بمانوٙنه‌وه‌. پیٛچیٛم که‌ردیٛوه‌ و تاریکاییه‌نه‌ دام دلیٛو ده‌ره‌که‌یره‌ و بیٛشه‌که‌یره‌ و شوٙنه‌و ویٛمه‌ره‌ گیڵانیوه‌ دماوه‌. ویرمه‌ن وه‌ر ئه‌چانیه‌نه‌ بگنونه‌ ڕا مه‌تیلیٛ‌ ماچوٙنه دیڕوه‌خته‌ن و‌ لاو زیار‌ه‌تانکه‌یره‌ نه‌لینه‌وه‌ و ڕا وارینه‌کیٛره‌‌‌ بلینه‌وه‌‌ خاسته‌ره‌ن. هیچم نه‌وات و نه‌په‌رسام بوٙنه‌ش. ڕاییٛوه‌ باریکه‌ره‌ و چیرو دار و دره‌ختانی فه‌ره‌یره‌ لوانیوه‌ سه‌رو ئا ڕای که‌‌ دلیٛو زیاره‌ته‌کانه‌ مه‌ویه‌رده‌. دونیا کش و مات و تاق و هه‌قو که‌ڵکه‌ڵه‌وانان سامو تاریکایه‌که‌شان مه‌مارد. وه‌رته‌روه‌ و راویه‌ر چنده‌ جاریٛ لاو زیاره‌تانه‌که‌ینه‌‌ ویه‌رده‌بیٛنان و فره‌ته‌ر سه‌رنجه‌و تایله‌کام دابیٛنه‌. یاوانی نزیکو زیاره‌تانه‌که‌ی. دلیٛو توٙقه‌ڵه‌ تایله‌کانه‌ تاپوٙیه‌م وینا. خشه‌و پایاش‌ وشک مدرنانیشه‌ره‌‌. ده‌سماڵیه‌ی گه‌وره‌ سه‌ره‌شوه‌ بیٛنه‌. ئاما ڕوه‌موه‌. سه‌هوه‌م که‌رده‌. لوانی دماوه‌ و وه‌ر ئه‌چانه‌ینه‌ بقیٛرنونه‌ و هاوار، ئاماوه‌ ده‌نگ. خوٙ خه‌به‌رت هه‌ن دماو چه‌نده‌ ساڵان تازه‌یی هه‌مته‌ر چراوه‌کیٛشان ویناینه‌وه‌. هه‌نسکه‌ هه‌نسک‌ په‌رسام کام چراویٛ. کوڕو کیٛنی و چه‌نی نمه‌زانینه‌. خه‌ڵکو ئیگه‌یه‌ نییه‌نان، ڕاویاره‌نان و میٛمان. ئه‌ی خودا گیان. ڕاس ماچینه‌. به‌ گردو ته‌رسیٛشوه‌ و ته‌رسیٛموه مدرانیره‌ ده‌مشوه‌. تاریکاییه‌نه‌ ده‌سش کیٛشا: ئه‌ئی شه‌خسه‌ وارینه‌ مه‌زاره‌و پیرسایینین و ئه‌ئه‌و سه‌رینه‌یچه‌ که‌ هه‌ن دلیٛراسه‌و زیاره‌ته‌کانه‌ بارگاو حاجی شیخ ئیسمائیلی هه‌زار میٛردیین. گوایا زه‌مانو ویٛشه‌نه‌ و وه‌ختیٛو‌ مه‌حاڵو به‌رزه‌نجه‌ی جیا مازوٙنه‌‌ هیچگوٙکه‌نه‌ ڕاشان نه‌که‌رده‌بیه‌نوه‌ و هه‌که‌ ڕوه‌ مه‌که‌روٙنه‌ ئه‌ئیگه‌یه‌ خه‌ڵکه‌که‌ مه‌لان پیرایشوه‌ و په‌وکه‌تیٛ ئه‌چیگه‌نه‌ مه‌نه‌نوه و ژیوان و ئه‌چاساوه‌لای بییه‌ن خه‌یر و به‌ره‌که‌ت و‌ په‌شت و په‌ناو چه‌مه‌که‌یمان. ئه‌ئیسه‌یچه‌ دوره‌ دیارانوه‌ و گه‌رمیانوه‌ و به‌ تایوه‌ت مه‌حاڵو لوٙن و شایینی و تیله‌کویوه‌ مه‌یان په‌ی ئاسانیه‌ش و قیبله‌نماو ئاواتاشانه‌ن. دماو مه‌رگیش، زوته‌ر فره‌ و ئیسه‌ که‌م هه‌ر ساڵ چنده‌ جاریٛ و به‌ تایوه‌ت شه‌وانو جومعه‌ینه‌ چراویٛوه سه‌وزه‌‌ جه‌ سه‌رو پیرغه‌یبیوه‌ مه‌لوٙنه په‌ی‌ وه‌رانوه‌ری و ده‌ورو بلچه‌‌ گه‌وریٛ و مه‌ینه‌وه‌ روه‌ ئیده‌س و سه‌رو پیرسایینی‌ و ئه‌چاگه‌یچوه‌ مه‌لوٙنه‌ ڕوه‌‌ مه‌زار و گومیٛزیه‌کیٛ شیخیی و دلیٛو زیاره‌ته‌کاره‌ و تایله‌کانه‌ ده‌وریٛو مه‌ده‌ونیٛوه‌ و مه‌ینه‌وه‌ وه‌رو به‌ره‌کیٛشه‌نه‌ و چیرو نه‌ره‌ گه‌وره‌که‌ینه‌ مه‌کوشیه‌ونیٛوه‌. سه‌ره‌ سڕمه‌نه‌ی هه‌ن ئه‌چانه‌نه‌ گرد جار چراوه‌کیٛ پیرغه‌یبوه‌ مه‌لوٙنه‌ وه‌رانوه‌ و بلچه‌ گه‌وریٛ و مه‌ینه‌وه‌ ئیده‌س سه‌رو پیرسایین و مه‌لوٙنه‌‌ سه‌ر و باره‌گاو شیخی و ئه‌چاگه‌نه‌ مه‌کوشیه‌نیٛوه‌ و تا ئه‌ئیسه‌ که‌س چه‌پوانه‌ییش نه‌دیه‌ن. تازه‌گیج واتشان چراوه‌کیٛشان ویناینه‌وه. زوته‌ر ویٛم فره‌ دییه‌نه‌م و وه‌لیٛ چه‌مه‌کام که‌م حوکمیٛ بیه‌نینه‌ تاکه‌تیٛ‌ دوره‌وه‌ بوینونه‌ش و مه‌نیشوٙنه‌ دیارشه‌وه‌ و به‌شکه‌مه‌تیٛ نزیکوه‌ بوینونیٛشه‌وه‌. ئامانیوه‌ روه‌ یانه‌و وه‌رمیم. دماته‌ر که‌ په‌رساموه‌ په‌یش، که‌س نه‌شاناساشوه‌ به‌ڵام واتشان هه‌رکه‌س بییه‌ن ڕاسش واته‌ن و داستانه‌و ئا چراویٛ گردی مه‌زانانه‌ش و ڕاسیچه‌ن که‌‌ تازه‌گی ئامیٛنه‌وه‌. ئا شه‌وه‌ تا بنه‌ڕوٙ ویٛم تلناوه‌. ڕوٙحم ئاما و لواینه‌ په‌ڕا و په‌ڕو ژیوایمیش که‌ردوه‌ سه‌ر و دیاری. نه‌زانیٛنان سه‌ر چیٛشیشوه‌ بمدروٙنیٛوه‌. ئا ژیوگا، ئا دیدار و وات و واچانه‌‌ که‌ وینیای و ئامای به‌ینه‌نه ڕوٙحمشان دیٛونابیٛنه‌وه. بیگانه‌ و غه‌ریب نه‌بیٛنه و وه‌رته‌روه‌ عومریٛو‌ دیه‌بیٛنه‌م و بیه‌بیٛنه‌م چه‌نی وه‌لیٛم ته‌شکش په‌یم تازه‌. واته‌کانو مه‌تیلیٛ بیٛوچان گیانمه‌نه‌ واخوا مه‌کریایوه‌. دیارگاو ئه‌ئا سوٙحینه و دماته‌ریچشوه‌ هه‌ر ده‌م خه‌رمانو یادگایمه‌نه‌ ویر و خییاڵم که‌رده‌نوه‌ و ویٛچن و سه‌رنگ و ریٛز و شوٙر که‌ چیٛش بیٛنه‌، چه‌نین بیٛنه و په‌چیٛشی ئه‌پاسه‌ بینه. چوٙڕه‌و کوٙتاییشان هه‌میشه‌ یه‌ک نما: خاس و ناخاس، وه‌ش و ناوه‌ش گردو ڕوه‌دایانو ژیوای به‌ وردیکلانه‌ته‌رین واتان و هه‌نگامان ده‌سشان په‌نه‌ که‌ره‌ده‌ن. گاهه‌ن گه‌وره‌ته‌رین چڵه‌کیایره‌ و جوله‌ و جمه،‌ نه‌ به کوته‌ک‌ یام‌ پیکیه‌ی قوٙرس به‌ڵکوم به‌ پلتوٙکیٛوه، ده‌نگ و ده‌میٛوه، لیٛره‌و گیٛنایٛوه‌، له‌ره‌و دڵیٛوه و فڕه‌ ئاوه‌زیٛوه‌‌ و ترازنای هه‌نگامیٛوه‌ ده‌سش په‌نه‌ که‌رده‌ن.‌ دماو لوایش و لوایم ئه‌وپه‌ڕوٙ بیٛ هیوایینه ‌و ناچارینه، هه‌وارگه‌و ده‌لیلینه‌ و‌ به‌ پلتوٙکیٛوه‌ واردم ئه‌ئیسه‌یمه‌، ئه‌پینه‌یه و تلنانیش پوه‌وه‌‌ و که‌وتانیشه‌نه‌‌ و به‌ردانیش. مه‌کریا‌ نه‌وینایام و نه‌که‌وتایام یامکه‌تیٛ پیٛسه‌و وه‌رینیم ویناییٛوته‌ر و که‌وته‌ییٛوته‌ر. ئه‌وسا و ئه‌چو سارا‌ی دوره‌نه و ئاژه‌ی گه‌ره‌لولشه‌نه، به‌ کام پلتوٙک و‌ ئاوه‌ز و لیٛره‌ و چه‌نی یاوایانیٛنه‌ که‌لام ڕازه‌و زینده‌گیمان بییه‌ن، هه‌ن و مه‌بوٙنه‌‌.‌ ڕازیٛو که‌ هه‌ڵای ئه‌ئیسه‌یچه‌ په‌رده‌کانش و ته‌رزه‌کانش هه‌نیٛ چیرو هه‌ریٛزو روٙزگارینه و هوٙمانو چیرو پابوٙمانینه و فره‌یچشان خمریا و شیتاڵ شیتاڵ و شوٙن نادیار‌‌. هه‌که‌ مه‌ینه‌وه‌ ویر و کاویٛژ ئاوه‌خته‌‌ هه‌نگوٙسه‌و‌ ئیشاره‌و باوانان قوجیای بیٛنه‌ و مشته‌و ده‌سانیٛوته‌ر واز و پلتوٙکیشان مه‌شانا و تاوه‌شان ناواده‌ و هاکو واردش ته‌موه‌مانوه‌ و ئاوه‌زی بیٛ ئاوه‌زمانوه‌. ده‌سانیٛو ناویٛمانه‌ و نائاشنا به‌ که‌لام، ماریفه‌ت و ژیواری. گرد جاریچ و واوه‌ی، ئاخ و داخ واچان په‌ی به‌دبه‌ختی، یانه‌ویرانی و باوانویرانی.

سوٙحشوه‌ یانی فیٛنکایی‌ ڕوٙ دماو‌ دیدارو هانه‌ چه‌رمه‌ی و ماجه‌راو چراوه سه‌وزه‌کیٛ، زیانیره‌ ڕوه‌ هامنه‌ڕا‌ی تاکه‌تیٛ که‌لو نوریوه‌ بگیٛڵوٙنیٛوه‌. کیسڵه‌ ئه‌و کوٙڵ، گوٙچان به‌ ده‌ست و لاره‌ لاره‌، نسار و نسارم ویارنا. ده‌ره‌ ئه‌سپانه‌ره‌ هوٙروه‌ستانی قه‌ڵاگا و که‌ردموه‌ ئه‌و ده‌س و وه‌رده‌مو ده‌گا کوٙنیٛ په‌شته‌و ئاریانی و نزیکو چه‌مه‌هانه‌و پیرسکڵه‌ی. وه‌رته‌ر و گه‌رمه‌و به‌زماو باوامورادینه‌ پانه‌یچوه که‌‌ نزیکه‌ڕامان‌ بیه‌بیٛنه‌ په‌ی جاریٛویچ‌ نه‌لوابیٛنان نزیکشوه و سه‌رش‌. ماجه‌راو هیزیکه‌یم نه‌شیٛنه‌وه ئه‌و‌ هوٙش و گوٙش. قاقاو گه‌رمای دابیٛشه‌ره‌ و هاروبراڵوکانو بیٛخه‌و ته‌نگه‌سان ماته‌شان که‌وته‌بیٛنه‌ و ده‌نگو شیٛر شیٛڕان و زه‌رداویلان لوابیٛنه‌ ئاسمان. ڕاویه‌رمه‌نه‌ هه‌ر که‌سم وینا، پیر و جوان، وردی و گه‌وره‌ و به‌ تایوه‌ت ژه‌ن و زاڕو خجڵو که‌رد و کوٙشیی بیٛنیٛنه‌ و په‌شوکیاو هه‌رمانان. شوٙنه‌و جوگه‌له‌کیٛم گیٛرته‌ تا یاوانی سه‌رو چه‌مه‌که‌ی و‌ بنارو که‌مه‌ره ‌به‌رزه‌ڵان‌. جار جار ده‌نگو ژه‌ره‌ژانو به‌رزه‌ییه‌کان بیٛده‌نگی و سامداری ده‌ر و دوٙڵه‌که‌یشان مه‌مه‌رد و مه‌چڵه‌کناوه‌. وچانیٛوه‌م گیٛرته‌. ئاوه‌ورییٛ و جاموڵیٛوه‌ نریایبیٛنیٛره‌. جا‌موٙڵه‌‌‌ قوپیا و ڕوٙحین و وڵوڵینه‌که‌نه‌ که‌ سه‌رو هانه‌که‌یوه‌ نریابیٛره و به‌ به‌ندو مفه‌رکی بنیابیٛوه تاکه‌تیٛ‌ ئاوه‌کیٛ نه‌به‌روٙنه‌ش‌،‌‌ یانزه‌ جاموڵیٛ و نیم ئاویم وارده‌وه‌. په‌یچیٛشی نمه‌زا وه‌لیٛمکه‌تیٛ ده‌سم که‌رد ئاو وارده‌ی، ئه‌ژمارایم. ڕیٛک یانزه‌ جاموٙڵی و نیم ئاویم وارده‌وه‌. ویٛچم باوه‌ڕم نمه‌که‌رد ئه‌نده‌ ته‌ژنه‌ و یاگیٛو ئاو وارده‌یم ببوٙنه‌. سیوشکیٛ ویٛم بریی. چیاییش سوه‌ش داوه‌ ئه‌و به‌نگو دڵیم و که‌یل بینه‌وه.‌ لوانی ئه‌ولاو توه‌ن نماکیٛوه و چیرو دارو موفه‌ڕکه‌کاو پیرینه‌‌‌ نیشتانیره‌ و پاڵم داوه‌. واتم وه‌نوٙزیٛوه‌ مه‌ده‌ونه‌ و ده‌مه‌و ویٛره‌گان و فیٛنکایینه‌ مه‌گنوٙنیٛنه‌ ڕا. په‌شت ئه‌و قه‌فا، ڕوه‌ ئاسمان ته‌ماشاو موفه‌ڕکه‌ ڕه‌نگا و ڕه‌نگه‌کام مه‌که‌رد که‌ ئاڵوچیا و شوٙڕیایبیٛنیٛره‌ داره‌که‌وه‌ و دلیٛو گیجاوه‌ خییاڵانیشانه‌ و چاره‌نویسی سڕمه‌گوٙیانه‌ و که‌ڵه‌سه‌وار ‌و دوٙنادوٙنو پیرسکڵه‌ی و سه‌رهوٙردایش جه مه‌حه‌لیٛو گه‌ورانو پاوگوڵانینه‌ و‌‌ ڕفنایش و یه‌ره‌کڵه ‌چنیه‌ی په‌یش‌ به‌ تاوانه‌و‌ ناحه‌ق واته‌و ڕه‌وایه‌تو ڕوٙزگاریش و وسته‌یش دلیٛو گڕیی و توٙکڵوه‌ گیرته‌یش جه‌ وارو ده‌گاکوٙنی په‌شته‌و ئاریانینه‌ و زیایوه‌ هانه‌چه‌مه‌ی چیای چیرو یه‌ره‌کڵه‌و ئاوره‌که‌یشه‌نه‌ و نه‌سوٙچیاییش و هاوار و لاڵه‌ و زریکه ‌و شا هو شا‌ هو، هو یار هو یار واته‌و باوڕمه‌نداش‌ و شییه‌یش و کیشیایره‌یش ڕوه‌ که‌لو نوری و گه‌نجه‌ویه‌ی و نام واڕیایش به‌ شاهو و بییه‌یش به‌ پیرخیٛزر[خضر] و ژیوایش تیله‌کوٙنه‌ و شاهوٙانه‌نه‌‌‌ و ئاقیٛبه‌ت و دمایین ته‌شکو بییه‌یش، پیربنیامین، بارگا داڵه‌هوٙنه‌‌‌. نه‌زانام چه‌نی و که‌ی چه‌مانم نیاینیٛ یوٙ‌ره‌ و لوایٛبیٛنان وه‌رمه‌ره‌. به‌ چریکه‌و گوٙرانیاو ژه‌نیٛوه‌ نه‌شناسیا و ده‌نگوه‌شیٛ که‌ ئه‌چه‌و ده‌‌سه‌وه‌ و وارو چه‌مه‌و‌ پیریوه و سه‌رو هه‌ساره‌و بیکوٙڵیوه مه‌ئامانه ‌گوٙش‌‌، هایم بینه‌وه‌. سه‌ره‌م به‌رزه‌وه‌ که‌رد‌ قرمه‌و گوٙرانیا تیکه‌ڵ چه‌نیو هاژه‌و ئاویٛ و که‌لامیه‌ی ئاهوراییو یادگار پیر خیٛزرانو شاهوانینه‌، ده‌ره‌ هه‌له‌کانشان ئاورده‌نوه‌ ده‌نگ و هه‌له‌کیٛ:

[[…ناسته‌نش هه‌وای نه‌ وه‌هاران پیٛم

ته‌ماشای وه‌هار حاڵه‌ته‌که‌ی ویٛم

شه‌تاوم هووناو دیده‌ی په‌ڕ ده‌رده‌ن

نه‌سیمم شنوٙی هه‌ناسه‌ی سه‌رده‌ن

غونچه‌ی نه‌شکوفته‌م زامی کارییه‌ن

بوٙڵبوڵم ناڵه‌ی دڵ ئه‌وگارییه‌ن

تا واچی خه‌رمان خه‌م وه‌کوٙنانیٛ

وه‌ که‌یف ده‌ماخ دووری توٙنانیٛ

من ویٛم مه‌وینوون خاتر زیزه‌نان

مه‌حرووم بوٙی گوٙڵ رووی ئازیزه‌نان

مه‌کیانوٙ ره‌حمه‌ت حه‌سره‌ت وه‌ کوٙ کوٙ

ڕه‌حمه‌ت په‌ی جه‌ناب ده‌رد دووری توٙ

کووره‌ی ئاره‌زو جوٙش سه‌ختشه‌ن

ئای بی مه‌یل، ئاویٛ، ده‌خیل وه‌ختشه‌ن

ئاخر نه‌ک ئیمه‌یچ داخ نه‌ دڵینمیٛ

سوٙچیای ئایر چون توٙکڵیٛنمیٛ

توٙ په‌ی نیشته‌یمان، من په‌ی سه‌ودای توٙ

هه‌ر دوو بناڵین وه‌ گریه‌ و روٙ روٙ.]]

کنا له‌یله‌ هه‌ر چریکه‌ش مه‌ئاما که‌ وارته‌ر‌شه‌وه‌ ده‌نگیٛو‌‌ چڕیش: ئه‌هه‌وهه‌‌ووووووو شالیٛ‌ گیان! قوربانه‌و پایه‌کاش ببوٙنه‌. ڕوٙڵه‌که‌م به‌ گورتاو بلوٙ‌نه‌ په‌ی چه‌مه‌ی و ئاوی تازیٛ باوره‌وه‌ با نان و چایه‌که‌یمان وه‌ش که‌رمیٛنه‌. پیایمان هه‌نیٛ‌ و موٙڵوه‌ و کوٙما گه‌نمه‌کان مواڕانیٛوه په‌ی شاراو خه‌رمانه‌که‌ی و ئه‌ئیسه‌ن‌ چه‌نیو بابه‌یت‌ به‌یانیٛوه‌. هوٙرئیٛستانیوه‌ پای. گه‌رماو نیمه‌وڕوی و سوٙز و کزه‌و ده‌نگه‌که‌ی و که‌لامه‌که‌یش گڕشان وسته‌بیٛنانه‌. هانه‌چه‌مه‌که‌نه‌ ئاویٛوه‌م دا چوٙرچه‌میموه‌. چیای چیای. ئیجاره‌ به‌ ئاوه‌وه‌ریه‌که، ته‌نیا یه‌ک ئاوه‌وه‌ری ئاویم وارده‌وه‌. ماتڵم نه‌که‌رد‌. گوٙچانه‌کیٛم گیٛرته‌ ده‌سمه‌وه و کیسڵه‌که‌م وست ئه‌و‌ شان‌. دام سه‌رو‌کوه‌که‌ی‌ و ده‌ره‌که‌ره‌ که‌ردموه‌ ئه‌وده‌س په‌ی وارو ته‌وه‌نه‌ سیاویٛ و قه‌وپاڵه‌که‌ره‌ له‌قان له‌قان هوٙروه‌ستانینه‌ ڕوه‌و‌ که‌له‌و نوری. [[دماته‌روه‌ که‌ یاوانیوه‌ یانه‌ و له‌یه‌کم داوه‌، ئه‌چاوه‌خته‌وه‌لای یاوابیٛنان سه‌رو چه‌مه‌که‌ی و په‌شت ئه‌و قه‌فا چه‌مانم نیایبیٛنیٛوه‌ تا ئه‌ئا ساتانه‌ که‌ به‌ ده‌نگو کنا له‌یلیٛ هایم بینه‌وه‌ ڕیٛک یانزده‌ ڕویٛ و ده‌ شه‌ویٛ لاپاڵو ته‌وه‌ن نماکیٛنه‌ وه‌رمم پوٙره‌ که‌وته ‌بییه‌ن.]]

کاکه‌ڵی گیان! با ئه‌چینه‌ی‌ زیادته‌ر وه‌ختت نه‌گیٛرونه‌‌. وه‌کیٛڵو دوعا و سڵامیمان به‌نه‌‌‌. سڵامو وردی تا که‌وره‌و یانه‌و ماموٙ کاکه‌ی مه‌یاونون‌‌. نانه‌وه‌رو یانه‌یشان بییٛنمیٛنه‌ و ‌ئیسه‌یچه‌ به‌ باوانو ویٛمشان مه‌زانونه‌ و پاڵا هوٙرگیٛرو گردیشان‌‌. ئه‌گه‌ر عه‌مریٛ بمانوٙنه‌‌‌ په‌ردوچو ویٛشه‌نه‌ دیسان یوترینی مه‌وینمیٛنه‌وه‌. هه‌ر هه‌واو شاگوڵه‌یت مه‌په‌رسا و شوٙنه‌ماش. نه‌واچینه‌ و نه‌که‌رینه‌وه‌ وت و ویره‌ و خییاڵ. ئه‌وه‌شاریایش نییه‌ن و نه‌مه‌نده‌ن. به‌ گردو خه‌سار و لاساریانشوه‌‌، ئا سوٙز‌ و پیمه‌ که‌ په‌ی شاگوٙڵیٛ بیٛم و پیمیا و ساڵیان ساڵ شوٙنیشه‌وه‌ بیٛنان و ژیوایمانش دیماودیم و چیر و چوه‌ر و هه‌ڕین که‌رد پیٛوه‌ره‌، هه‌ڵای وجودمه‌نه‌ مه‌نده‌ن. شاگوڵه‌ سه‌روازکه‌ره‌و هانا‌ و هانه‌و گیانیم بیٛنه‌‌ نه‌ک سه‌رچه‌مه‌ش. شاگوڵه‌ و شاگوڵو وجودیم نه‌مه‌ردیٛنه و نه‌مه‌رده‌ن‌. ته‌رزان، خه‌ڵفان و وه‌چانی تازه‌شان زنیه‌نیٛوه‌. په‌ی هه‌ر که‌سیٛ ڕه‌نگانی تایوه‌تشان هه‌ن. ئه‌من ویٛم ئه‌گه‌ر بمانونه‌‌‌ و بتاوونه‌‌ نیانمه‌ره‌ ئیجاره‌ ببونه‌ شالیارو چریکه‌وانان!

ئازیزان به‌خه‌یر.

داریوٙش ڕه‌حمانی. مه‌ریوان.

خوردادو  1399 ک. ڕوٙجیاری

ژوئه‌نو 2020 میلادی

 hewraman
Load More In ئەدەب و هونەر

وەڵامێک بنووسە

پۆستی ئەلکترۆنیکەت بڵاو ناکرێتەوە . خانە پێویستەکان دەستنیشانکراون بە *

بابەتو دماتەری

یاگە پاو شیٛعریٛ نەویٛ هەورامییٛ

یاگە پاو شیٛعریٛ نەویٛ هەورامییٛ نمەزانو ئی شیٛعرە یانزە بەیتییٛتا جە «شامی کرماشانی» وانی…