یانە هەورامانی بشناسدیٛ شاعر؛ جەواد- فیٛراق

شاعر؛ جەواد- فیٛراق

170

وەڵاوگاو هەورامانی ئیجارە ملوٙنە خزمەتو شاعریٛوی تەرو هەورامانی، با دەمو ویٛشەو بژنەومیٛش و بوینمیٛش

بە نامیٛ وەشڪەرو ئەشقی

نامیٛم جەواد ــ حەمزە ئەژناسیا بە (فیٛراق) ئەڐا بیەو ساڵەو ۱۳٥۳یٛ کوٙچی

جە شارە دەگاو پایگەلانی سەر بە ژاوەروٙ

ساڵەو ۱۳٥۹ی کوٙچی وانای بنەڕەتیم دەس پەنە کەردەن هەرتا ئەوەڵوو دەبیرستانی جە شاروو سوٙڵاوای سەر بە مەریوانی .

هەر بە زاڕوٙڵەی دەنگم وەشبیٛ و بە دزەو بە ئاشکرا گوٙرانییٛ واچیٛنیٛ و حوٙرمەتیە عالم بیٛ پەی ماموٙسا ئوٙسمانی و ماموٙسا جەمیلی. هەر پاسە جە دەگاو ویٛمانە جاڕوو دەنگوەشیم زڕیا .

چوون وەرزوو هامنی وانگاما بەینییٛ، کیاستاشا حوٙجرەو فەقیەتی پەی قوٙرئان وانای، حوٙجرەو مزگینە جە لاو ماموٙسا مەڵا مەعروٙفی مەردوٙخی و خوٙڐا عەفوو کەردە میرزا محەممەڐ ئەحمەدیانیوە دماو یەریٛ هامنارە تاوام سی جزمەو قوٙرئانی بە حوٙنجی خەتم کەروٙ و باشتەرین قاری قوٙرئانی بیٛنیٛ جە مەنتەقەو سوٙڵاواینە .

ئەشق و ئەلاقە بە گوٙرانی هەورامی و وەنەو ئەدەبیاتی جە وەشکەردەو قافیەو ڕەدیفینە و هەر پاسە دیوانوو ماموٙسا بیٛسارانی بی بە سەبەبوو ئانەی کە هەر عان جە گوٙرانی واتەینە ئەگەر دمایین بەیتم ویر شیایا فی‌البداهە بەیتیٛوەش پەی سازنیٛنیٛ . ئەواهەم ئی خاڵا منشا

بەردا ڕووبە شیٛعر نویستەی .

کوٙڵان و بازارەنە هەرچیەم کەفتایا وەرچەم دڵوو ویٛمەنە شیٛعریەش پەی وەشکەریٛنا . وردە وردە تا ساڵەو ۱۳٨۲ی کوٙچی تەسادفیەم کەرد و پام میٛڕیا و

کەفتا یانە .

بیٛکاری و تەنیایی و خەم و خەفەت ئەواجەم ڕوەشا کەردانە و بە جد دەسم کەرد بە شیٛعر نویستەی. تا ساڵەو ۱۳٨۵ی کوٙچی جانشتەو یانەی بیٛنا و دوویٛ دەفتەریٛ شیٛعریٛم نویستیٛبنیٛ ، وەختاریٛ ئی شیٛعرامە وانایٛوە جە شیٛعرە وەڵینەکام قیزیم شیویاوە و گردیم سوٙچنایٛ .

هەرتا ئیٛنترنت و فەزای مەجازی ڕەخسیا و ئاشنایم چنی شاعیٛرا و نووسەرا و ئوٙستادا وستەرە و ئاوەخت زانام کە فرەو جە شیٛعر و نویسیایەکام جە قافیەو ئارایەی ئەدەبی و ساختاری مەلەنگنا و

سەرباروو گردی هەورامی نویسیەم هەڵەن .

 بە ڕاویٛژ و ڕاموونەو ئوٙستادی ئازیزیم کاک عەبدوڵڵا حەبیبی جە فەزای مەجازینە  تاوام نویسیای زوانی ئەڐاییم ـ هەورامی ـ فیٛر بوو و هەڵەو شیٛعرە وەڵینەکام لابەروو .

تا ئاروٙ ڕوٙ تاوانم جە یەریٛ بەشیٛنە شیٛعری کلاسیک و شیٛعرەی تازیٛ هەورامی و پەخشانەنە خزمەت کەروو بە زوانی ئەڐایم ، وە هەر چن حیچ وەخت

ویٛم بە شاعیٛر نەزانان و نمەزانوو .

نەزیک بە چووار دەفتەرە شیٛعریٛم هەنیٛ و خەریکوو بە چاپ یاوناو یوٙ جە دەفتەرە شیٛعرەکامەنا شیٛعرەی تازیٛ بە نامی ویری تەسک . ئیشەڵڵا بتاو بیاونووش دەسوو وینەرە ئازیزەکام .

جە شیٛعری کلاسیکەنە ماموٙسا بیٛسارانی و م مەولەوی و م سەیدی و خانای قوٙبادی و ،،،،،،،،، ؟ هیچشا ناستەنوە پەی شاعیٛروو ئاروٙ ڕوٙی کە واچوٙ ئی بەرهەمە دەغڵش بە کسیوە نیا و مڵکوو ویٛما ئانەیچ بی بە باعیس کە من ڕەوتوو شیٛعریم کیٛشا ڕووبە شیٛعری تازەی هەورامی ، شیٛعری کلاسیک ڕوٙح و ڕەوانم نیاونیٛ بە ئارامش سەبووریم پەنە نەبەخشیٛ پەوکای ڕەوتوو شیٛعری تازیٛم گرت دەسەو بە واقیٛع ڕوٙحم ئیٛرزا مەکەروٙ و میاونوٙم بە سەبووری

ئیسەیچ بە جدیەت خەریکوو نویسیەی شیٛعری تازەینا .

بابەت و فرەو جە شیٛعرەکام دەرد و ڕەنج و کوٙمەڵگاین هەر ئانەیچ بی باعیس کە تا ئاروٙ ڕوٙ نەتاوانم شیٛعرەکام بیاونوو چاپ.

چەنی حوٙرمەتیم پەی وانەری ئازیزی .

جەواد ــ حەمزە. فیٛـــــــراق ۲٦؍۳؍۱۳۹۹ کوٙچی ڕوٙجیاری

فەرماودیٛ چەنی چنڎە پارچە شیٛعرێ جەواد- فیٛراقی

شەوەزەنگەو زڵمی و جاهێڵینە
سەروو وەنەنەو داقوڵاخی و
تێخی لارەساویرە پڕایوە

تاریکستانوو ویریە بۆگەنی پەزێرەینە
زریکنات

گۆشێت
بە دەنگیە نەوەدڵوو کناچەیی
زڕیاێ

نەهات بڕیا و
پێچەنەو کەمانوو بێشکێت گووشا و
کەردیشا بە عەیبوو خێڵی!

قەفەسیە تەنگەزەربەنە
زەجر و ناهمێدٚی
کریا بە میراسوو تۆی بێمیراسی
هەرتا قژێت ئامای شانە

هەر ڕۆ خەت و نیشان
چەخماخێ کۆی وەروو چەمات

بێ بەزەیانە گۆچانێ مێڕیای و
ئاسن
لاشەش برێشت …. !

تەوەرداسێ فرێ
بە ونی ڕژیای
هەرتا چەم نەترووکنی

گۆل گۆل
هەرسی ونینێ و
هەناسێ کاڵێ و
حەسرەتێت خنیکنای
تا ئاوراییت
هەوێشخانەنە قووت دەی

نەمەردی!

هەڕاج کریای
بازاڕوو قەساسینە و
ژیوای و تاسە و وەشەویسیت
ترازیێ لارەسەنگێنە
بە درهەم و ڕیاڵ
کێشانە کریای

لووتەلایت
ونیش کەردی
حەراڵوو تێخی

بەردیە بێ خودٚا و
بێ وارس و میراس

نەمەردی!

کەوەیی میاچەمانی و
قەدٚەخەو ڕاو هەناسەیت
خەڵاتی هەزار چەم حیزا و
شل هۆنجەنا بێ!

سینە یەغدٚانوو زەجر و ئاخی
لاشە مانیا
ئەوەتۆسیا و مڵاشی کەفتە
نەمەردی!

چەم تەقای و
مەژگ بۆگەنێ
نەفاماشا ئامیانەنی
بێ تۆ جەهان مەعناش نیەنە
تۆ
هەناسەو ژیوایەنی و
جەوهەروو شەرافەتی.

نە خاکی شاردیوە
نە گڕی سۆچنای

سیروانی نەبەردی و
مەرگت کەرد دەسەمۆ
بۆغز و تاسەی نەخنیکنای

نەفاماشا غیرەت نمەمرۆ!

هەرتا
قاوو ئەدٚای بی سەبووریت
بۆغزش کەردی
لایە لایە!

وەشەویسی مڵک و خاکی
کۆسش وستی و
پەنجەو خمی
لەرزش کێشا قامەتەرە
مل نەکەفتی!

تاقەت تەقا
لەتەرەکێت کەردە تفەنگ
بابۆڵەکێت بیە خەشاب
بیەی
سەفیەخان
لەیلا قاسم
فاتە ڕەش
بی‌بی مریەم
کۆبانی
کوردەواری بە ونیت دەمیا
تا پەنجەی حیز
نیاوۆ پاڵدامنەت
تا بڕەو خاکیت نەواڕاوە.

وەرمینەکات چڵەکنایرە و
بیەی بە ڕازەو عاڵەما

پەلکەت بیەن
بە دڵەڕەپەو زله‌ هێزەکا
ڕیش سوورەکا بە ساموو تۆ
مەرگی واردێ.

خاتوونەکێ کوردەواری
بوومەلەرزە!

شەتڵەو غیرەتیت
کریا سونبوڵ
کاڵیا وەڵاتارە

قەڵەموو غیرەتیت
ڕەقەمیەتەر
جە تاریخیش هۆروەزنا و
کریای بە تەوقەو وەشەویسی

ئەوەچڵەکیاکا
قەفەسوو نەفامانە
باڵەفڕێ بیێ و
دەلاقەوە هۆرێفڕیای
پەرێ ماچوو میاچەمانیت!!

بەڵێ سه‌لەمنات
بە بۆگەن مەژگا
کە من
مەرگەنا
ژیوایەنا
گڕ و خاکەنا
من لافاوەو غیرەتینا
و
لزگوو
ڕۆجیاروو ژیواو دمایی

من قارەمانی گۆچ کەروو
پەنجەو منەن ئاڵای گێرۆ
ونەو منەنە پاو ئاڵاینە

من
ئافرەتەنا

ڕۆڵەو کوردی

من
ئەدٚانا!

جەواد – فراق

تەموورەی کۆچی ئازیزان سازەن
نۆتی ئەرغەنوون نەوای هەمڕازەن

ئاخ، چەنگ مەگێرۆ دڕەندان ئاسا
گاە نە جای قابێز، قاتڵوو هەناسا

هەر ویر سەڐ دەردی بێ‌مەڵهەم مارۆ
ئاخ و داخ و ڕۆ مەکەرۆ شارۆ

بە هەر هەناسە سەڐ حەسرەت خێزۆ
واش وەندار پێکۆ سەرتاپا ڕێزۆ

چەم، پێچی قەڐیم گۆزەرگا کەفتەن
گڕ و شۆڵەی تەن، چوون سۆتەی نەفتەن

پیر، سۆکنای جەزبەی ویری مۆریدەن
من، ویری یاران پیران پێم کەردەن

کۆڵانەو هۆشیم، گۆزەرگای خیاڵ
دڵ کۆنە خەرمان سیاساڵی تاڵ

سۆجدەگای عەبدیم، فەراق گم کەردەن
خم سۆرمە ئاسا گرد ئازام ڕەشتەن

ئەر هێجری یاران وەیتەور زۆر کەرۆ
تەن جە مەیخانە سەر بەر ماوەرۆ

وەرنە تا ئەبەد مەبوو ڕسوای خەم
تا ئەو سات بەرشۆ هەناسەم جە دەم

جەواد

زمسان زریکناش
زۆقم
هەنگامێش ڕەقوە کەردێ
باڵاو ڕۆحێش
کەفەن کێشا
چەمێش وراستێ
بە تاپۆرە
هەرتا
تاسە نەحەسیۆوە

خنجەرەو
برایەتی شاخی
کێلانە ترازیا
یەخێ نانیش دڕیەرە
و
جلوو ئاخیش
وراست کۆڵەرە

ئاخیەتەر و
خەمیەتەرش کارەنیا کەرد

سفرە وناڵین
بابۆڵێ
پەی بابۆڵێ پەلەقاژێ !.!.

لاقەراخ و شاریوە
زریکەو
ئەڐایەتەر
کۆڵبەریەتەر گۆچ مەکەرۆ
هەرتا تەتە و
ئاغەو ئاغا
بێ خەم کەرا
ڕاوەو نانی !!

جەواد فێــــــراق ۲٨؍۹؍۹٨

‍ (https://attach.fahares.com/9/h69Tq9Y8AiBGf7NS4FQw==) (زوانی باوام، هەورامیش ماچا)

🌹🌹🌹🌹

پەرسام ئەی باوا تایفەت کامەن؟
جە کام خێڵەنی، ڕۆمەن یا شامەن؟

وات: باوام فەرهەنگ باواگەورەم زوان
سجیل ئاوێستا ماواش هەورامان

واتش ئەدٚاو من حیاش نامێنە
جە شاروو ئاشتی و برایی ئامێنە

بابەش ئاوەزەن، وەشڕەفتار مامۆش
براش وەشکەلام، ڕاسواچیچ لالۆش

ئەدٚایە عالە دەسەڵاتدارە
زاڕۆ وەیکەرە ماقۆڵ کردارە

بۆنەو ئەدٚایمەو چڕیشا گۆشم
نامم بی فەرهەنگ نەشۆ جە هۆشم

واتش باوایچم نامێش زوانەن
پیری سەرقافڵەی ویەردەی دەورانەن

نە گەدٚا سێفەت، نە چەتە و ئەغیار
گەنج و سەرمایەش هەزاران خەروار

مڵک و سامانش جە حەد بەدەرەن
کاڵای مامەڵەش تڵا و گەوهەرەن

یانەو زاڕۆڵاش جیا وەشکەردەن
نێر و ماش پێوە نامێ نەبەردەن

بە بێ ئیشارەت حاڵیما کەرێ
نانی گەنمینی مڵکوو وێش وەرێ

ڕێک و پێک و ژیر کەرێ قسە و باس
واچێ جە باوایم بەردەنم میراس

هەر کەس ئامایا سەروو خەرمانیش
نەکەرێش بێبەش جە نان و خوانیش

نە لاڵ و نە شەل، نە کۆر و نە کز
نە سواڵکەر بێ، نە مۆحتاج و دز

جە هیچ هامسایەش قەرزش نەکەردەن
کاسە هامسایچش ڕایە نەواردەن

جلی کۆنەو خەڵکیش نەپۆشا نە تەن
فیزش بە کاڵای باڵای وێش بەردەن

شەقڵی پاش جە مڵک هیچ کەس نەکەفتەن
بە هاناوەو وێش، مڵکی وێش دەردەن

بەڵام جە مڵکش جای پاتە کەفتەن
جەردە و سواڵکەر جە دەغڵش بەردەن

ڕێزۆڵەو سفرەو کەسیش نەماشان
چوون نەجار پەی وێش گرد چێوش تاشان

نامدارش کەردەن، هەر کاڵاش تاشان
دزی جە واتەی لای باوام حاشان

یەغدٚان و یانەیش پەڕ جە ئەنتیکە
نان بە قەواڵە، نەکەرێ تیکە

ژیر و ئاوەزدار، وەشواچ و ڕاسواچ
قسێ شیکەرێ، خاستەر جە هەلاج

جە حەد بەدەر بێ، ڕاوێژی باوام
تا تاوام بە ددٚان تیکەی وێم ژاوام

ئادٚ کێشاش ڕەنج و شەونۆخنی شەوان
تا وەی تەور مڵکێ بە دەسم یاوان

مڵکی ڕەنگینش کەرد بە میراسم
بە ڕێسەی دەسش، جلم وراستم

گەورە وەسیەتش جە لای من ئینەن
لاساوی کەردەی فرە ناشیرینەن

با واچوو ڕۆڵە، لاساوی چێشەن
واژاوو خەڵکی پەی تۆ کاوێژەن

وەسیەتی باوام گرتەنم نە گۆش
مەسپارووش بە تۆ نەبۆت فەرامۆش

جەواد ــ فێــــــــــراق

وەرگی لینی حەزیم
کەفتەن پەلەقاژێ هاری
هاکا واز بۆ

دیاو لارەملیەکا و
بۆپڕووزوو هەناسە خامەکا
دڐانێش
چەخماخێ مەشانا

بێ‌قیمەتی هەناسەی و
کێشانەو شەرافەتی بە کێشەو حەزی !
گرتەو دەسوودیمی
بە هەرسی وەرپڕی و
بزەو خۆای
بە ئاویەو خەجاڵەتی
پەنجێ کێشۆ قەفەسەرە !

ڕەحم
بە ئێرزا مواڕاوە
یاسا
پەڕەن پەڕانتێزێ و
خەتێ سوورێ

منیچ
سەیاڐی بێڕۆزینا و
سماقەو بئ‌ئەندیشیم تەکیان
هەر ڕۆ ڕاوە مەکەروو
نەچیرم
حەوایرە بە تەیارە
جاڐەرە و مێڐانێرە
کرژوو تالیم دریاو مەحکەمەی
کیسەش
پەڕ جە فەننوو فێڵ

من
هەرەسگارە و لاپارە
توولەڕای کۆروە بیێرە
هەژار و پاتێ چەکێ

ڕاوەنە و ڕاوڕاوانی
چەمەڕا و چەمویار
شۆنپاشەرە
ئاڐ گرتەنش بێعانە
سێوەریچش نەێ قەرەوڵ
ئاورای بازۆم!

شانەم پەڕەن دەسنووسێ
شێخی و ساحێب ڕاوی (م)
ئیبنی حەجەر
کتێوی ڕمڵی و ڕۆچێ سەڐەقەی
بێ ئیفاقەن ڕاوەشەنە

جاروو بار مەێنە وەرمم
تا هارە ئاساوو دەمێ
چاگەیچ
مزە و بارمتەم چەنە وازۆ!
نمەگنۆ دامی
تازەم زانان
ئاڐەن ڕاوەو من کەرۆ

ئاڐ
ڕۆەو بەحرارە بە بەلەم
وەڵات بەوەڵات گێڵۆ
من
تۆەنەڕەقاو تەتەیرە
بە سواری گۆچانەکێم
گاە
هەناسەم کەرا بڕ
قۆڵاخی هاڵیم گێڵۆوە
ڕاو ڕاوانی و
ڕاوەو نانی
وەرگوو حەزیش هار کەردەنا !.!

جەواد ــ حەمزە
✍️ فێـــراق
۲۷وو پاژەرەژوو ۲۷۲۰ ی هەورامی

{ فێـــراق }Jawad, [16.06.20 05:29]
[Forwarded from …..]
ئیشششش
جە بۆساری بوەو هەناسەیت
تنیاینیوە مەحاڵەرە
کەی واز ماری ؟

ئاورایی شەکەت،
هەناسێ گرگر،
تاسوو قۆماروو ژیوای
جاڕەتەرە مەتلیۆ

تۆبە
لەفزش بە تێخت مەترەکۆ

شەوەزەنگەو بێ‌باوڕینە
بیەنی
زامنوو تلۆعوو باوڕی ..

وەرزیە تاڵ
گۆرزانینە و زۆرانەو ڕەگەزا
ئەستەم بژناسی
عەسڵ و فەرع
دڐانێ چەخماخ مەشانا

فێڵی
گاڵتەجاڕەو ئەسپیرە
فێروو یۆغرەی مەکەرا
و
تۆیچ هەراڵەت
کۆڵانەش ئاخنیەنە و
چەکت
بە بارووتوو ئازادی مەپژمۆ
تا
خڵەتیۆ چەم .

هەزار لیرێ ئۆسمانی
شەوەو قۆماریت دۆڕیاێ
هەرتا
ڕەگەز ڕەگش فڕیۆ و
تۆیچ
ئاسمانوە بیاوی بە کام …!

من و ویریە
پەزێرەی هەزار پینەیچ
هەرسات
شۆکری مارمێ ماوە
تا ڕێزۆڵێ
کەرمێ ئامیانوو کاکیلا …. !

جەواد
فێـــــــــراق ۲٨؍۱۰؍۹٨

 hewraman
Load More In هەورامانی بشناسدیٛ

وەڵامێک بنووسە

پۆستی ئەلکترۆنیکەت بڵاو ناکرێتەوە . خانە پێویستەکان دەستنیشانکراون بە *

بابەتو دماتەری

بە بوٙنەو ڕوٙ ئوٙروپایی فرەزوانی، ٢٦ مانگەو سیٛپتامبری

بە بوٙنەو ڕوٙ ئوٙروپایی فرەزوانی، ٢٦ مانگەو سیٛپتامبری ٢٦و مانگەو سیٛپتامبروو گرد ساڵیٛو ج…