هەناسە

114

هەناسە

دامنەت یانەباوانمەن، زەمان به‌لاتوه‌ بییەن بە چیٛوێو بەڵاجەوی، سوٙح و ویٛرەگەت تیٛک شیەنەنە و پەی ئیٛستەیوەو ساتێ مەشیوٙم خه‌یلێ بگیٛڵینه‌ و بفکریەینە، وەڵاموٙ ئانەیە ئیگە،کوٙگەن و یانەو کیٛن، دژوارەن پەیت و تەنانەت نمەزانی ئەوراتەن یام تیٛرەنی.

ماچان فرەش پەنە نمەشوٙن که‌ ئیتر نمەشناسیمانوه‌ و به‌لاتوه‌ مەبیٛمیٛ ناموٙتەرین ناموٙکان، نازارە ناسکەکیٛو حەفتا ساڵیٛ چیٛوەڵته‌ری. دنیات دنیایە سەیرەن و ماناش چیٛویٛو سەمەرەن. خوٙ ژنەفتەبیٛم ویر ئه‌گه‌ر هەرمانە نەکەروٙ پەی مەژگی، ئوٙمەت ڕاحەتتەرەن بەڵام توٙ وستت ڕووه‌ پاسە نییەن. هەنی دلیٛو جیاوەکەرده‌ی و سه‌نجنای ئەبەدیینە و خراو جوٙریٛو گیرت واردەن.

مامالە نازارەکیٛ، توٙ حەقتەن، بەشکەردەیو ڕوٙی بە سوٙح و ویٛرگە هەرمانەو ویٛ به‌ژیر زانەکانەن، ئانە کە چکوٙگه‌وە وه‌ر بگنوٙنه‌‌ و چکوٙگه‌نه‌ بنیشوٙنه‌وه‌‌ کوٙگه‌ش وه‌رچه‌م و ئیٛژاداره‌ن؟ خەتاو توٙ نیەنە، ئاخر ئی گرد نامە جیاوازانه‌ و ئەوه‌لکنایشان بە ڕوٙجیاریوە کەی مەمانوٙن مەژگەنە؟

مەژگو توٙ پەڕەن چیٛویٛ وەشیٛ، توٙ هوٙرگیٛڵاینیوە پەی زەماوەنده‌کیٛو من، تاریفیٛ شوەکەیم مەدەینه‌وە و ئاواتەو عاقیبەت بە خەیریم پەی مەوازینه‌، مەگیٛڵی شوٙنەو یانەو زەمایرە و مەچفنی گوٙشانمارە کە یەکەم جارەن ئاماینیٛ و حورمەتشان زیاتەر بگیٛرمیٛ.

شا جوانەکیٛم، ئەر تیٛکت شیەنەنە ئینە یانه‌و ویٛتەن یا یانه‌و یوٙتەری، ئاخر کەی خەتاو توٙنە؟ کیٛ تا ئیسە بییەن بە ساحیٛبو یانەی پەی هەتا هەتایی؟ توٙ ئینەتە زانان و ڕەنگە ئەزەڵوە ئامێنی و ئەبەدیەیچەنی، ئیٛمە چه‌پیٛنمیٛ. ئیٛمە سەرتاپا لاریٛنمیٛ باوانە خاسەکەیٛم، توٙ حەقتەن و گرد چیٛویەت ڕاسەن، ئانە کە نەوەشەن مەژگو ناکه‌سان کە ژیریەکات نمەوینان و ماچان ئالزایمرتەن، ئادیٛنیٛ خەرەفیاینیٛ.

به‌ڵام گیانیٛ گیان، دوکتورەکان ماچان دمایین پلیٛو ئەوەوەستەیره‌و ویریت ئانەن که‌ هاز و هیٛزت که‌م مه‌بوٙنیٛوه‌ و ته‌نانه‌ت ویرت نمه‌مانوٙن لاو نان قوتدایتوه‌، پانەیە تاقیەموە مەکەرە ئه‌دالیٛ گیان، وەرگە نمەگیٛروٙ هەناسەکیٛم، تکات وەنە مەکەرو نان قوتدایت هوٙش نەشوٙنیٛوه‌. بمانە لامەنە هەناسەکیٛم، مەلاڵیەوتەنە و مەگنونە ملو پایانتەرە، ده‌ی با نەزانی کەیەن و چکوٙنی و کیٛنا بەڵام دڵم بە بیەیت وەشەن ڕوٙحەکیٛم، تکانە لامەنە بمانە، قه‌یچش نییەن گرد چیٛوت هوٙش بشوٙنیٛوه‌ بەڵام هەناسەکیٛم، تکانە هەناسه‌ کیٛشایت هوٙش نەشوٙنیٛوه‌…

نەرمین ڕەحمەتی

 hewraman
Load More In ئەدەب و هونەر

وەڵامێک بنووسە

پۆستی ئەلکترۆنیکەت بڵاو ناکرێتەوە . خانە پێویستەکان دەستنیشانکراون بە *

بابەتو دماتەری

فەتە و کوٙنفرانس

فەتە و کوٙنفرانس -سلام بچەها صبحتان بخیر. -سلام ئاقای موٙعەلیٛم سوٙبحیٛ شوٙما هەم بخەیر. -…