یانە گردین چەم وستەی سەرو کتیٛبو”چرا بیٛ شعوری”

چەم وستەی سەرو کتیٛبو”چرا بیٛ شعوری”

46


مەزانوو چەمتا وستەن سەروو کتیبوو«چرا بی شعوری». نویستەو«خاویر کرمنت»ی؟ ئی کتیبە کە هوٙرگیٛڵیانەو سەروو زوانی فارسی، کەلاوە جە قسە و باسا کە روانە چی لا و چەولاوە و لاو ئیٛدٚی و ئەویەو مەیاوەرەو پەی گردٚکەسی. پەڕا جە نوٙعوو بنیادٚمەکا کە هەنمیٛ لاو یوٙترینیەرە. وەختاریٛو موانیشەو سەرەت ماسوٙ. وەڵیٛ گردٚ چیٛویٛوی مشیوٙ بزانمیٛ کە بیٛ شعووریچ پیٛسەو گردٚوو نەوەشیاتەری نوٙعیٛو نەوەشیا و دەرمانیچ کریوٙ! با بڕیٛو جە باس و باتووروو ئاکتیبیە پەی ئاگاداری گردٚیما وزمیٛ وەروو چەما:
1) بیٛ شعووری حەد و مەرزش پەی نیا. متاوو ماموٙساییٛوو مەدٚرەسەی بوٙ یا زاروٙڵیٛوی گوٙلانە. متاوو پیاییٛوی دەوڵەمەن بوٙ یا ژەنیٛوە زەریفە.
2) یوٙ جە ڕاکا ئەشناسای بیٛ شعوورا ئانەنە کە ئادٚیٛ ویٛشا فرە گەورە موانا و مزانا. ئادٚی نە مزانا و نە قبووڵیچ کەرا کە بیٛ شعووریٛنیٛ.
3) بیٛ شعووریٛ جە روٙ ئەوەڵیەو بیٛ شعووریٛ جە ئەدٚای پیٛدٚا نەبییٛنیٛ، بەڵکووم خەڵکی یاردٚی داینیٛ تا بییٛنیٛ بیٛ شعووریٛ! ئەدٚا و تاتەی، ماموٙساو مەدٚرەسەی، واڵە و برای، هەسوورەو هەسوورەسانی، کارمەندٚا ئیدارەی و…
4) بنیادٚمی بیٛ شعوور هەمیشە و داییٛم حەز کەروو کە زوورش سەروو سەرەو خەڵکیەو بوٙ.
5) بنیادٚمی بیٛ شعوور حەز نمەکەروٙ موٙشکڵیٛ کوٙمەڵگای حەل و فەسڵیٛ با و ئادٚ هەمیشە ئینا شوٙنەو ئانەیەو کە تەقسیرباریٛو بیٛزوٙوە و گردٚوو خەتاکا بنیوٙ ملوو ئادٚی. دیارا ئادٚ هەر گیز ویٛش بە تاوان بار نمەزانوٙ.
6) بیٛ شعووریٛ باوڕشا ئانەنە کە خەڵکی تەر پەی ئانەیە وەش کریان کە هەرمانەکا ئادٚیشا بەروٙ ڕاوە.
7) جە هەرمانا خەڵکیەنە دەخاڵەت کەرا و تاواوپەنەشا کریوٙ ئاژاولیٛ منیاوە و خەڵکی مدٚا گژیٛ یوٙترینیەرە.
8) ئەر هەرمانیٛوە دەی ملوو بیٛ شعووریەرە ئەجوٙش ئیهانەتش پەنە کریان. چوون ئادٚ پاسە فیٛر بیەن کە کەس حەقش نیا هەرمانە دٚوٙ ملوو ئادٚیەرە و تەنیا ئادٚا کە حەقش هەن هەرمانە دوٙ ملوو خەڵکی تەریەرە!
9) بیٛ شعووریٛ فیٛریٛ بییٛنیٛ کە هەمیشە جە دەسوو دەوروو بەریەکاشاوە گلەمەندٚیٛ و تەڵەبکاریٛ با.
10) پاسە رابیتەشا چەنی دەور و بەریەکا تەنزیم کەرا کە کەس داواو هیچیشا وەنە نەکەروٙ!
11) بیٛ شعووریٛ جە گردٚ کەسی سوٙئیستیفادٚە کەرا، بەڵام کەس مەتاوو چادٚیشا سوٙئیستیفادٚە کەروٙ، مەگەر بنیادٚمیٛوی بیٛ شعوورتەر جە ویٛشا!
12) بیٛ شعووریٛ هەرگیز جە کەلیمیٛ«خواهیٛشی»ئیستیفادٚە نمەکەرا، بەڵکووم هەمیشە بە ئەمرە قسیٛ کەرا.
13) قسیٛشا هەمیشە چزدارەنە.
14) ئادٚیٛ وەششا میٛ کە هەرمانەو خەڵکی بە نامیٛ ئادٚیشاوە تەمامە بوٙ.
15) بیٛ شعووریٛ هەرگیزای هەرگیز ویٛشا پیٛسەو خەڵکی ئاسایی حەساب نمەکەرا و بە نوٙعیٛو ویٛشا سەرتەر مزانا.
16) ئادٚیٛ مشیوٙ ئیتمینان پیٛدٚا کەرا کە خەڵکانی تەر خاس خاس مزانا کە ماشینەکەو ئادٚیشا جە هنوو هامساکاشا عال تەرا!
17) بە چاپلووسی و زوان چەربی تەڵاش کەرا کە رتبیٛوی بەرزتەر و پوٙسیٛوی عالتەر جە دەوڵەتەنە بدەس بارا.
18) دەور و بەروو ویٛشا پەڕ کەرا جە بنیادٚمە چاپلووس و زوان چەربا کە غەر چینەیە چیٛویٛو تەر مەزانا.
19) هەمیشە بە زاڕوٙڵاشا ماچا:هوٙشتا بوٙ کە وەزیفەی ئەسڵیتا سەربەرزکەردٚەی ئیٛمەن!
20) بیٛ شعووریٛ ئینکار کەردٚەیشا فرە وەش مسیوٙ و ئینکار کەردٚەی بە هوٙنەریٛوی بەرز مزانا.
21) واردٚەی حەقوو خەڵکی و کڵاو نیای سەرەشا بە شوٙجاعەت و زرنگی مزانا.
22) ئادٚیٛ بە ویٛشا باوڕشا هەن کە هەرگیز سەهوە نمەکەرا و هیچ موٙشکڵ و ئیرادٚ و نوٙقسانییٛوشا نیا.
23) ئادٚیٛ ماچا مشیوٙ گردٚ کەس و گردٚ چیٛویٛو دەس دوٙ دەسوو یوٙترینیەو تا ئیٛمە وەشما بوٙ. دەلیلیٛوە نییٛنە ئیٛمە گول ویارمیٛش!
24) ئادٚی بنیادٚمە خول و ول و سەفیٛکا کەرا بە بەردٚیٛ ویٛشا. و هەمیشە چینەیە توٙقا کە بنیادٚمیٛوی جە ویٛشا بیٛ شعوورتەر ئی بەردٚا چیٛروو چنگیٛشانە بەرباروٙ.
25) حەز کەرا خەوڵک وەرشا تەرسوٙ. ئادٚیٛ تەرسیٛ و ئیٛحترامی یوٙ مزانا.
26) بیٛ شعووریٛ ئەپی چیٛوا فرە هەمیەت مدٚا(کەسایەتی ویٛشا، یاگە و پاگەو ویٛشا، ماڵ و سەروەتوو ویٛشا، مقاموو ویٛشا، ماشینوو ویٛشا، سەوادٚوو ویٛشا ئەگەر سەوادٚداریٛ با، پەیلواو ویٛشا، ….)
27) ئادٚیٛ بڕیٛو چیٛویٛ ماچا کە ئاچیٛوە مەنزوورشا نیا، واتە و کردٚەوەشا یوٙ نیا. پیٛچیٛنیٛ.
28) ئادٚیٛ ماچا هەرچی ئیٛمە وەش مسیوٙ و هەر چی ئیٛمە ماچمیٛ و هەرچی ئیٛمە مزانمیٛ و هرچی ئیٛمە….تەنیا ئانە درووسا.
29) بیٛ شعووریٛ ئەگەر کەسیٛوی جە ویٛشا وەشحاڵ تەر، موەفەق تەر، و ژیرتەر وینا، بەخیٛڵیش وەنە بەرا و تەڵاش کەرا کە لاو ئیٛدٚی و ئەویەو خرابناش.
30) هەرچن زاهیٛرشا ئارام مرمانوٙ بەڵام دەروونشا دایمە قوڵیٛ هوٙرشانوٙ پەی ئاژاوە وسەی دلی یانەو خەڵکی.
31) بیٛ شعووریٛ ماروو چیٛروو پووشا و ئاوەو چیٛروو سمەرا و ژیٛڵەو چیٛروو بووڵیٛنیٛ، بەڕاسی ئەگەر بیٛ شعوور نەبی هوٙرسەو نیشتەی چەنیشا زەحمەتا.!
32) خاستەرین ڕا پەی ئانەیە بیٛ شعوری نەوینی و رابیتەت نەبوٙ چەنیش، دووری گرتەیا چەنەش.
وەلی فەتاحی
99/3/6

 

 hewraman
Load More In گردین

وەڵامێک بنووسە

پۆستی ئەلکترۆنیکەت بڵاو ناکرێتەوە . خانە پێویستەکان دەستنیشانکراون بە *

بابەتو دماتەری

فەتە و کوٙنفرانس

فەتە و کوٙنفرانس -سلام بچەها صبحتان بخیر. -سلام ئاقای موٙعەلیٛم سوٙبحیٛ شوٙما هەم بخەیر. -…