یانە ئەدەب و هونەر گوٙرانیەی هەورامیە، پاپ، ڕەپ

گوٙرانیەی هەورامیە، پاپ، ڕەپ

77

گوٙرانیەی هەورامیە، پاپ، ڕەپ

ئاخر و ئوٙخرو ساڵەو شەسی بیٛ کە بڕیٛو ئازیزیٛ جە شارەو تەشریفشا ئاوردٚە بیٛ پەی یانەیما، بییٛ بەمیٛمانیٛما و شەویٛ لاماوە مەنیٛوە. زمسان بیٛ و هەوا تا ڕادیٛو سەردٚ و ئیٛمەیچ سوٙبەی هەمەدٚان کارما نیابیٛرە. ئانەنە ئی سوٙبیٛ کەم و زیادٚ کەرا، هەرچندٚە سەری ویٛرەگا گەرم و وەش بیەبیٛ، بەڵام چەوسەرقەتریٛ نەوتەکیٛش کەمیٛ باوە وسەردٚشا بوٙ. توومەز مەکەرە، کە فرەش کەرا، گەرما،  کە کەمش کەراوە یانەکە سەردٚ بوٙوە. ساحبیٛ دمای نان و چای واردٚەی، یوٙشا ماچوٙ: نمەلوە هەتا سوٙبیٛوی کاربراتوٙریتا پەی نەسانوو، ئینە چیٛشا ئی هەمەدٚان کارە، چی دویٛش نمەدٚەی چوٙری، ئیٛشەو ڕەقیٛ بییٛنمیٛوە. بەڵام هەم من و هەم ژەنەکیٛچ قبوڵما نەکەردٚ، نە وەرو ئانەیە کە گرانا و زەڕما نیا، وەرو ئانەیە کە ئیٛمە بە هەمەدٚانکاری فیٛریٛ بییٛبیٛنمیٛ و ئەجیٛما ئەگەر هەمەدٚان کار نەبوٙ گڕما گنوٙ وەنە! چوون مەرحومو بابایم واتەبیٛ سوٙبە یانیٛ هەمەدٚان کار کە دەعەلادینیٛ و دە سوٙبیٛ هیٛزمینیٛ میٛژوٙ. دیارا بابایم ئا سوٙبەشە چەنی سوٙبەی هیٛزمینی بەراوردٚ کەردٚەبیٛ، نە چەنی سوٙبەی کاربراتوٙری. مەعلوما، ئەگەر بابام ئیسە مەنەبیایا، واچیٛ: پەکەیج و ڕادیاتوریٛتا پەی چیٛشی کە سوٙبەی کاربراتوٙری دە دانیٛ ئەچی پەکەیجا ئیٛژاییش هەن!
ڕەنگا عادٚەتیٛوی وەش نەبوٙ کە تەنیا ڕای وەڵینە و تەجرەبە کریای و سوک و ئاسانە بەڕاییٛوە عالە و دروٙسە بزانمیٛ. هەمیشە ڕەحەت تەرین ڕا، خاستەرین ڕا نییٛنە. گردٚیما مزانمیٛ وەختاریٛو جەنابوو «نیما یوشیج»ی ئاما و شیٛعرەی تازیٛش ئاوردٚە غەیر جە ویٛش هیچ کەس ڕازی ئەپا وەزعیٛ نەبیٛ، تەنانەت کلاسیک واچەکیٛ بییٛ بە مدەعییٛش. بەڵام ئاروٙ چیٛش؟ فارس واتەنی:«معما چون حل شود آسان گردد.»
جە ئا ساڵانە کە ئیٛسلاح تەڵەبەکیٛ ئیٛرانی کەوتیٛبیٛنیٛ سەر و خەری ویٛشا «محمد جواد حجتی کرمانی» بابەتیٛوش جە ڕوٙنامیٛوەنە بە نامیٛ«از دوش حمام تا ماهواره»ی نویسە بیٛ، ئەپی مەحتەوایەو کە ئانە چی ئیٛمە هەر چیٛویٛوی تازە میٛ دلیٛ ژیوایما، گوٙرج و گوٙڵ دژایەتیش چەنی کەرمیٛ و هاواریٛما هوٙرزا و گنمیٛ دادٚ و بیٛدادٚ. تا چندٚ ساڵیٛ چەی وەڵتەر فرەو ئا ئازیزا کە ویٛشا بە موٙئمنی ڕاسەقینە زانیٛنیٛ، موٙخالفیٛ سەر سەختیٛ ماوارەی بیٛنیٛ و تەنانەت بڕیٛوشا ئا یانیٛ کە ماوارەشا چەنە بیٛ نەلیٛنیٛش وەنە! واچیٛنیٛ با گوٙناباریٛ نەبیمیٛ. بەڵام ئاروٙ چیٛش؟ ئایا ئاروٙهەر ئانیٛ ویٛشا دەیان کاناڵیٛ ماوارەییشا نییٛنیٛ کە چەنەشا تەبلیٛغ کەرا؟
وەختاریٛو«میرزا حسن رشدیه»ی مەدٚرەسەش ئاوردٚ ئیٛران کیٛ بیٛ کە موٙخالیفەتش چەنی نەکەروٙ، بەدٚبەخت زاتش نەبیٛ بە ڕیٛک و پیٛکی ویٛش وزوٙ سارا. ئاروٙ چیٛش؟ لالوٙ حەمە ماچوٙ: وەختاریٛو مەدٚرەسەشا ئاوردٚ پەی شوٙشمیٛ دەسەڵات دارەکیٛ وەختی، زاڕوٙڵەکاشا نەکیانیٛنیٛ مەدٚرەسە و تەنیا هەژارەکیٛ کە دەسەڵاتشا نەبیٛ کیانیٛنیٛشا!! ئەی ئاروٙ چیٛش؟ ئایا بە پیٛچەوانە نیا؟
هەر پاسە متاومیٛ ڕەوایەتیٛ فریٛ و فراوانیٛ بارمیٛوە. با دالیٛو سەخت نە گیٛرمیٛ و مەولانا واتەنی:«هەرچە می خواهد دل تنگت بگوی» فرەو چیٛوا بیٛنیٛ کە تا هیزی قەباحەتشا بیٛ بەڵام ئاروٙ شانازیشا پەوە کریٛوٙ!
ئەچی ڕوانە بنیادٚمیٛو ئامان و گوٙرانیوەی هەورامیەش بە شیٛوازوو پاپی واتیٛنە و خەریکا قوٙرسایی کەروٙ سەرو شانەو هەورامی زوانەکاوە. چی؟ ڕەنگا فرەش وەرو ئانەیە نەبوٙ کە چی ئی گوٙرانییٛشە هەر پیٛسەو چاوەڵی و عەینو سیاوچەمانەی یا چەپڵا و وردٚە بەزما نەواتیٛنە. نا. من ئەجوٙم تازەگەریەکش پیٛسەو پاپ واچیٛوی هەورامی یاگیٛ ڕیٛز و حوٙرمەتیەنە و بەڕاسی مەرحەباش وەنە بوٙ، تازەگەریش کەردٚەن. بەڵام ئەگەر جە هوٙرچنیای شیٛعرەکاشەنە فرەتەر دیٛقەتش کەردٚایا، خاستەر بیٛ. ئەگەر درویٛم نەدٚای بوٙ گلەیی و بناشتو ئازیزا فرەتەر سەرو ئی بەشەیە بوٙ. ڕەنگا ئازیزیٛ چانەیە مەتەرسیشا بوٙ کە خوای نەخواسە نەوەک مسداقو ئینە بوٙ:« ئەگەر می خواهی کسی را خراب کنی از او بد دفاع کن.» من پیٛسەو تاکە کەسی موٙخالفو ئی چیٛوەیا نیەنا و باوڕم ئانەنە:«نفی دیگران دلیلی بر اثبات ما نیست.» و تازەگەری بە هەرمانیٛوە خرابە نمەزانوو، چوون ئەگەر تازەگەری نەبوٙ ئەی ئی گردٚ چیٛوە تازیٛ چەنی وەشیٛ بییٛنیٛ؟
وەلی فەتاحی
23/2/1399

 hewraman
  • سیٛڵت و گوٙران

    سیٛڵت و گوٙران نویسەر:مەحمود قادری ماریو بارگاس یوسا ڕوٙمان نویسی گەورە ئەچی ئاخرانوە ڕوٙم…
  • خودٚا جە سولتان مەحمودٚی گەورەتەرا

    ‍  خودٚا جە سولتان مەحمودٚی گەورەتەرا زەمانو پادشاهی سولتان مەحمودٚی ( ۳۸۸ – ٤۲…
  • چنوریٛ

      چنوریٛ  ئە ی بووڵاوە بڎە ی سە رە تە رە کناچیٛ، ئە ی زە ل پیمی یاخوڎا، ئە من وی…
Load More In ئەدەب و هونەر

وەڵامێک بنووسە

پۆستی ئەلکترۆنیکەت بڵاو ناکرێتەوە . خانە پێویستەکان دەستنیشانکراون بە *

بابەتو دماتەری

ئەژمارە و پیمانە و ئەنڎازە؛ کە جاران هەوراماننە بەکارئاومێنیٛ

ئەژمارە و پیمانە و ئەنڎازە؛ کە جاران هەوراماننە بەکارئاومێنیٛ  پیمانە و ئەندازە و ژما…