یانە پەیلوای پەخشانوو هەورامی ڕوەو کوٙگە ملوٙ و پەی دوٙڵەمەندکەردەیش چیٛش کەرمیٛ؟

پەخشانوو هەورامی ڕوەو کوٙگە ملوٙ و پەی دوٙڵەمەندکەردەیش چیٛش کەرمیٛ؟

49

پەخشانوو هەورامی ڕوەو کوٙگە ملوٙ و پەی دوٙڵەمەندکەردەیش چیٛش کەرمیٛ؟

نویسه‌ر: عادڵ محەمەدپوور

پیٛچەوانەو نویسەرا زوانەکاتەری کە سەروو زەوقیٛ پیشەیی و تاکی منویسا، ئیٛمەی هورامی بڕیٛما تەنیا ورکەو خزمەت بە زوان و فەرهەنگەکەیما هەن تا پیشەیی نویستەی. پیجوٙرە نویستەکیٛما جە فرەو چیٛوانە هەم یاگیٛ باییٛخیٛنیٛ و هەم یاگیٛ خەساری.

چاگەنە کە ورکەو خزمەتی قسیٛ کەروٙ چیٛویٛ پیروٙزا، ئینە حەزیٛ تاکین و ئەگەر گراڵیٛش بوٙ نویستەی و بوٙ بە فەرایەندیٛ پیشەیی، بیٛ گومان بوٙ بە حەزیٛ کوٙیی و جە تاکوە فاڕیوٙوە پەی ئیرادیٛوە یوٙگیٛرتەی جەمعی و پیٛسە ونیٛ دلیٛ دەمارەکامانە پیشقە کەروٙ و بوٙ زامنیٛ پەی ژیوای فەرهەنگی-هوویەتی-ڕوٙشنویریما.

ئیسە فەزاییٛ گردگیر دلیٛ چینوو قەڵەم بەدەسانە خوٙڵقیان، بە ڕەغبەت هەر یوٙ جە حەنناییٛ خزمەت کەرمیٛ بە زوان، ئەدەب و ڕوٙشنویری هورامانی. بەڵام ئایا گرد نویستەییٛ کە نموودیٛوی خزمەتکەرانەش گیٛرتەن ویٛ و ڕازیکەردەییٛن پەی مەیلی تاکی، پاڵشنە تاووٙ خزمەتیٛ دەرەتانی و دەدواردەی دما زەمانی کەروٙ بە زوانی و دیاردە فیزیکی و ڕوٙشنویریەکاش و پیٛسە دەقیٛ کارا جە ئارشیوو کتیٛبخانەکانە مەنوٙوە و بوٙ بە سەرچەمەییٛ هەم  پەی نەسڵی تەحسیٛڵکەردەو ئایندەی و هەم بیەبوٙ هوٙکاریٛ پیٛوەندیکار چنی زوانەکایتەری و ڕاش پەی تەعامولی فکری و فەرهەنگی ئامادە کەردیٛ بوٙ؟

ئەگەر جوابوو ئی پەرسیٛ ئەریٛنی بوٙ، ئانا ئا هەرمانیٛ کە ئیسە جە هورامانوو ئیٛمەنە کریا، ویەریٛ درووس و ڕاگەییٛ ژیرانە و عیلمیش گیٛرتەن و ئیدامەدایش زەروور و حەیاتین.

پەی من ئی چالاکیە هەم دڵوەشکەرا و هەم خوسرانخیٛز. چاگەنە دڵوەشکەرا کە ئیرادەییٛ خوڵقیان دلیٛ جوانەکانە و نیازش بە تەمهیداتیٛ و پاڵپەشتیٛ فکری و کرداری هەن کە ئی هاناویٛ ڕانموونیٛ با وشک نەکەرا و مجیانە دلیٛ ڕوٙخانەو ڕوٙشنویری ڕوٙی. چاگەنە بە خوسرانش زانوو کە بەریانوو ویٛما

بە ڕوەو زەراعەتوو ئەویتەری بەسمیٛ و بیمیٛ پەنگاویٛ تەنیا…  چی دوٙخیٛنە دیارا ڕوەو کوٙگە ملمیٛ…

ئننا ئەشوٙم بەنگاو ویریما کەرمیٛ و ئاراستەو نویستەیما فاڕمیٛ و بە ویر و بەرنامەییٛتەر  بلمیٛنە دلیٛ فەزاو نویستەی. بیٛ ئانەی گومانە وزوو سەروو ئی هەرمانیٛ، بڕوام هەنە کە بیٛ یەکوو دوو، ورکە گردیما پیسە هەدەفی سەرەکی ئانەنە کە نویسمیٛ کە چنی زوانەکەیما زیندە و کارا کارا کەرمیٛ.

تەنیا سوٙز و عەواتیٛفی تاکی کاریگەر نیا، پەی قووڵ کەردەیوٙ نویستەی و فەنی کەردەی نەسریٛ و مەنیوٙ نیشانەکاش پەی ئایندەی،  جە پاڵوو ئینەینە چن ڕاکاریٛ ئەشوٙ گیٛرمیٛ وەر و چیٛروو هەزینە ڕوٙحی و مەعنویەکایچشنە، تاقەت بارمیٛ.

1) جە هەنگامەی ئەوەڵنە، چنی داکوٙکیما سەروو شناس و هوویەتی، چنی تەحەوٙڵاتوو فەرهەنگی، کوٙمەڵایەتی و فکری دنیاو بەری ئەشوٙ یوٙگیٛرمیٛوە.

2) پەی ئینەی نیازما بە پردیٛ ئیٛرتیٛباتی هەن کە تاومیٛ دەسەڵاتی زوانی و ڕوٙشنویری ویٛما یاونمیٛ ئەویتەری.  دیارا ئەرکوو ئی هەرمانیٛ گنوٙ سەروو شانەو نویستەی. نویستەیچ جوٙراوجوٙریٛنیٛ: شیکاری و پەیجوٙری ئەدەبی، فەرهەنگی، گلیٛرگەیی، هونەری، فەلسەفی، تاریخی و جە گردی موهیٛمتەر نەقد و نەزەر و… جوٙرەکا ئەدەبیاتی داستانی بە تایبەت ڕوٙمان بە زوانیٛ سادە و…

3) یوٙتەر جە نموودوو نویستەی بە هورامی، کاری ڕوٙنامەیی و ڕیٛسانەیین کە میٛکانیزمیٛن پەی ویٛناو دەسەڵاتیٛ پیٛوەندیکەری ئەریٛنی. نویستەی ستوونی فەرهەنگی، کوٙمەڵایەتی  و ئەدەبی؛ بە شیٛوازیٛ سادە، زوانیٛ  بەڕوٙ  کە تاووٙ فازی ئیٛرتباتی ئیٛمە هیٛقم کەروٙ و بوٙ بە تەوەریٛ پەی وەردەنگسازی و…

4) خەساریٛ هەیکەڵیتەر کە ئاروٙ ڕوٙ دلیٛ فەزاو نویستەی و جووڵەی ئەدەبی و ویری ئیٛمەنە هەن و پیٛسە موٙریانەییٛ کروٙچوٙمارە نەبیەی وانەر و وەردەنگین. بیٛ ڕوودەربایسی، وانەروو نویستەکاما تەنیا ویٛمانمیٛ، ویٛما نویسمیٛ و ویٛما وانمیٛوە. دەی نەسر و شیٛعرە و…چنی تروٙق کەروٙ؟

5) پەی ململانیٛ چنی ئی خەسارەتیە ئەشوٙ فەرهەنگسازی کریوٙ، بازنەو نویستەکا وەروەڵا کریوٙ، با تەنیا وانەری هورامیما نەبوٙ، نویستەکا کیٛشمیٛنە دلیٛ فەزاییٛ بەرینتەری و ئەویتەری، تەرجمە تاووٙ نەقشش بوٙ بەڵام نە تەرجومەی لەفزی تەرجومەییٛ ئازاد، پیٛسە ئاردەینەو دەقیٛتەری.

6) سەرەنویسی(پەتیکەردەی زوانی) چنی ئانەی ڕەسەنایەتی پاریٛزنوٙ، تاووٙ خەساریٛچ بوٙ پەی زوانی، خەلاقیەت و زایایی زوانی مرنوٙ. ئەشوٙم زوان چنی ڕوٙحوو تەحەوڵی فیٛکری و ڕوٙشنویری ڕوٙی جووڵەکەروٙ ئننا…

7) چنی بە ڕوٙکەردەی و ئەشوٙم چنی پاشاگەردنی ڕازوان و ڕانویسی تاکی گژیەیمیٛ و هەوڵدەیمیٛ چی ویەرەنە سەروو کوٙدنگییٛ فرەلایەنەی عیٛلمی و تەوسیفی، میٛتوٙدیٛ یەکدەس و تەنفیزی و حوکمی ئیجرا کەرمیٛ و…

8) گردکەس تاووٙ ڕاچاریٛ ویٛزوٙوە بەڵام موهیٛم ئانەن ئیرادەییٛ زاڵی کریاوەی سەردەمیانە پاڵشنە بوٙ پەی بە کردە بەراوردەیش. پیجوٙرە بوٙ دیار گنوٙ کە نویستەما جە ئایندەنە ڕوەش کوٙگەوە نییٛنە…

ئینیٛ جە وینگاو منوٙ باقیٛ ڕاکاریٛ کوللییٛ بیٛنیٛ کە وەرەچمگیٛرتەیشا تاووٙ شوٙنگاو نەسریٛما جە ئایندەنە دیار کەروٙ.

* ئی باسە سەروو داواکاری کاک ئیبراهیم شەمس نویسیان

17/11/95

 hewraman
Load More In پەیلوای

وەڵامێک بنووسە

پۆستی ئەلکترۆنیکەت بڵاو ناکرێتەوە . خانە پێویستەکان دەستنیشانکراون بە *

بابەتو دماتەری

ئەژمارە و پیمانە و ئەنڎازە؛ کە جاران هەوراماننە بەکارئاومێنیٛ

ئەژمارە و پیمانە و ئەنڎازە؛ کە جاران هەوراماننە بەکارئاومێنیٛ  پیمانە و ئەندازە و ژما…