یانە ئەدەب و هونەر خودٚا جە سولتان مەحمودٚی گەورەتەرا

خودٚا جە سولتان مەحمودٚی گەورەتەرا

136

 خودٚا جە سولتان مەحمودٚی گەورەتەرا

زەمانو پادشاهی سولتان مەحمودٚی ( ۳۸۸ – ٤۲۱ هـ . ق) ، ئەرەنیەرو حکومەتو غەزنەوی، دویٛ سواڵکەریٛ بیٛنیٛ کە وەرو بەرەو قەسرەکیٛشەنە  سواڵە کەریٛنیٛ، یوٙ چی سواڵکەرا فرە زوانلوسی شای و دەرباریەکاش کەریٛ و دایمە خەریکو تاریف دایشا بیٛ و حەر چندٚ پی بوٙنە جە قەسرەنە هەمیشە نان و واردٚەمەنیش پەی ئاریٛنیٛ و جار و باریچ  زەڕیچش دیٛنیٛ پەنە بەڵام سواڵکەری دوەم ژیوایش بە سەختی ویەریٛ. سواڵکەری ئەوەڵ هەمیشە بە سواڵکەری دوەمی واچیٛ توٙیچ پیٛسە من جە شای و دەرباریەکا زوانلوسی و تاریفیٛشا کەرە تا زەڕ و نانت بدٚا بەڵام ئەو واچیٛ ڕزق ئینا دەسو خودٚاینە، سولتان مەحمودٚ چکارەن ؟

ئی قسیٛ یاوا گوٙشو سولتانی و بە توڕەیی تەمامۆ واتش مادٚام کە پیٛسنەن کاریٛوە کەرو کە سواڵکەری ئەوەڵ پوڵ دار بوٙ تا گەدٚایی نەکەروٙ و سواڵکەری دوەم بزانوٙ کە گردٚو دەسوراو سولتانی ملا ڕاوە و سولتان مەحمودٚ گردٚ کارەن .

سولتان بە چاشتکەرەکاش ئەمرەش کەردٚە کە قەلێوە ( بوقلەمون) گەورە وەش کەرا و دلیٛ لەمیٛش پەڕ کەرا تڵا و سکیٛ. سولتان بە یوٙ جە نگابەنەکاش دەسورش دا کە بەروٙش پەی سواڵکەری ئەوەڵی و واچوٙ کە ئینە خەڵاتی تایبەتو پادٚشاین .

سواڵکەری ئەوەڵ ئا ڕوە نان و واردٚەمەنی فرەش واردٚەبیٛ و نەتاواش قەلەکەی وەروٙ، تەماشەو ئەویش کەردٚ و دیش کە فرە مانیا و ئاورا دیارا، پەنەش وات: من ئی قەلیە بە یەک سکە ورەشو بە توٙ بەڵام سواڵکەری دوەم ئا ڕوٙیچە هیچ زەڕیٛوەش پیٛدٚا نەکەردٚەبیٛ. سواڵکەری ئەوەڵ دڵش سوٙت و هەر پاسە قەلەکەش دا پەنە .

سواڵکەری دوەم وەختیٛ کە ئەوەڵ تیکەش واردٚ و چەمش کەوت بە سکە و زەڕەی دلیٛ لەمەو قەلەکەینە، کەلوپەلەکەش جەم کەردٚ و جە ئەوی خودٚاحافیٛزیش کەردٚ و لوا.

سەوای کە سولتان ئاما و چەمش کەوت بە سواڵکەری ئەوەڵی کە هەڵای ئینا وەرو بەرەو قەسریٛنە و گەدٚایی کەروٙ فرە سەرسام مەن و چەنەش پەرسا:  مەگەر هیٛزی قەلەکە نەیاوا دەست ؟

ئادٚییچ واتش: بەڵیٛ قوربان یاوا دەسم بەڵام چون تیٛر بیٛنا دام بە ئەو سواڵکەرەکەی.

سولتان توڕە بی و دەسورش دا کە فەڵاقەش کەرا و سەدٚ جار واچوٙ خودٚا ڕزق یاونوٙ، سولتان مەحمودٚ چکارەن .

هوٙرگیٛڵنای:  ڕەحمان ڕەحمانزادە

 hewraman
  • گوٙرانیەی هەورامیە، پاپ، ڕەپ

    گوٙرانیەی هەورامیە، پاپ، ڕەپ ئاخر و ئوٙخرو ساڵەو شەسی بیٛ کە بڕیٛو ئازیزیٛ جە شارەو تەشریف…
  • سیٛڵت و گوٙران

    سیٛڵت و گوٙران نویسەر:مەحمود قادری ماریو بارگاس یوسا ڕوٙمان نویسی گەورە ئەچی ئاخرانوە ڕوٙم…
  • چنوریٛ

      چنوریٛ  ئە ی بووڵاوە بڎە ی سە رە تە رە کناچیٛ، ئە ی زە ل پیمی یاخوڎا، ئە من وی…
Load More In ئەدەب و هونەر

وەڵامێک بنووسە

پۆستی ئەلکترۆنیکەت بڵاو ناکرێتەوە . خانە پێویستەکان دەستنیشانکراون بە *

بابەتو دماتەری

ئەژمارە و پیمانە و ئەنڎازە؛ کە جاران هەوراماننە بەکارئاومێنیٛ

ئەژمارە و پیمانە و ئەنڎازە؛ کە جاران هەوراماننە بەکارئاومێنیٛ  پیمانە و ئەندازە و ژما…