یانە هەواڵیٛ باقی شەفیعی کوٙچی دماینش کەرد

باقی شەفیعی کوٙچی دماینش کەرد

134

باقی شەفیعی کوٙچی دماینش کەرد

ڕوٙو شەممەی 4/4/20202  باقی شەفیعی”سەیاڎ” شاعیرو فەرهەنگ دوٙسو هەورامانی جە شارو پاوەینە پەی دما جاری یانە ئاوایش جە دنیای کەردە،کە ماویٛوی چیٛوەڵ گرفتارو نەوەشی بی و وستش یاگیٛ. پی بوٙنەوە وەڵاوگاو هەورامانی پەرسەو ویٛش میاونوٙ بە بنەیانەو قەمو خویٛشیش و هونەر و فەرهەنگدوسانو هەورامانی.

کاکە باقی یانەوەی دویٛ کتیٛبە شیٛعران بە نامیٛ (هەوراگەو خاسان) کە شیٛعریٛ ویٛشنیٛ و ئەوی تەریچ هوٙرگیٛڵنای دوە بەیتەیکانو باباتاهیرین بەنامیٛ(هەوارگەو سەیادی)، یاگیٛ واتەین نامبریا خوٙندەوریش نەبیەن، چەنی موٙزەو  هەوارو هەورامانی کە ساڵەی وەڵیینە وەڵاوگاو هەورامانینە پەخش کریان،  کاکە باقی ساڵەو 1325 کوچی ڕوٙجیاری پاوەنە جە ئەڎابیەن، 1399 کوٙچی دمایینش کەردەن.

{{ڕا و ڕەسمو ئەوەکەردەی موٙزەو هەورامان ئەشناسای باقی شەفیعی بەنامیٛ “هەوراو هەورامانی” و ئەشناسنای و پەردەلادای سەرو کتیٛبو “هەوارگەو خاسان ” ی لوا ڕاوە. . ڕوٙدیار: پەنجشەمە 4/11/1397 ( 24/1/2019)، سات 14- 16.30.

کاک باقی شەفیعی، شاعیری ناسک خەیاڵو پاوەی، بە تەوانایی ویٛش دوەبەیتیەکیٛ  باباتاهیری هەمەدانیش تەرجەمەو زوانی هەورامی کەردیٛنیٛ، کاک باقی جە ماوەو پەنجا ساڵا تەمەنیشەنە، عەشقو پەیوەندییٛوە فرەش بیەن چەنی فەرهەنگ و فوٙلکلوٙر و میراس خەلکو ناوچەکەی و پاوەی، هەر ئی ئەشقیە پاسەش کەردەن کە چیٛرزەمینو یانەکەیش بکەروٙ بە موٙزیٛوە گەورە و جوان، هەرچی دەسکارو کەلوپەلی قەدیمی دەسەیاوەنە بیەبوٙ ئاردەنش چی موزەنە جە فوٙتیای پاریٛزنانش، ئی هەرمانە فەرهەنگییٛ و ئەرەنیای موٙزیٛوە فەرهەنگی و فوٙلکلوٙری سەرو خەرجی ویٛش بەردەنش راوە.}}.

ئیسەیچ پەرسەو سەرە وەشی ئەنجومەکانو هەورامانی و شاعیران و دوسانو کاکە باقی وزمیٛ وەرو چەمانو شمەی ئازیزی:

پەیاموو پەرسە و سەرەوەشی سەرجەم ئەنجوٙمەنە فەرهەنگی و ئەدەبیەکاو هەورامانی، بە بوٙنەو کوٙچی یەکجاری ئەدیب و شاعیٛری خەڵکی هەورمانی، ماموٙسا باقی شەفیٛعی

⚫️ هەواڵوو کوٙچی یەکجاری کاکە باقی شەفیٛعی، هوٙنەروان، ئەدیب و شاعیٛری خەڵکی هەورامانی، دڵوو گرد٘وو خەڵکی و بە تایبەت هوٙنیار و ئەدەب‌دوٙستەکاو هەورامانیش خەمبار کەرد.

کاکە باقی، گوٙڕەپانوو شیٛعر و ئەدەبوو هەورامانی و دلیٛ کوٙماو خەڵکیەنە نامیٛوە هوٙرکەوتیٛ و دیارە بیٛ. بزەو خوەی و ئاکاری ویٛمانە و خوڵکیٛ گەرمەش پەی مووزەخانەو فەرهەنگی و خەڵکینە‌ییش کە یانەو ویٛشەنە نیایبیٛشەرە، ئاوازەو گرد٘ کەسیٛوی بیٛ، کە ئاد٘ی ئژناسیٛ و ڕوٙح‌سووکی مانادارش لاشەوە سەلەمیابیٛ.

ئی هوٙنەروان و هوٙنیارە پایەبەرزە هەر جە زوەوە خەریکوو کار و باری فەرهەنگی بیٛ و یوٙ جە ئەرەمەرزنەراو فرەو گلیٛرگا ئەدەبی و هوٙنەری شاروو پاوەی و پاڵپشت و یاریدەرشا بیٛ. هەوارگاو ٫٫سەیاد٘٫٫ی کوٙ شیٛعرەکیٛشەنە و شمشاڵوو لاو قەد٘یش، ئەوەڕازنەروو فرەو کوڕ و کوٙمەڵە ئەدەبی و هوٙنەریەکاو مەحاڵەو هەورامانی بیەن.

⚫️ سەرجەم ئەنجوٙمەنە فەرهەنگی و ئەدەبیەکیٛ هەورامانی، بوٙنەو کوٙچی یەکجاری ئا هوٙنەروانە وەشەسیایەوە، ئەوپەڕوو خەم و پەژارەو ویٛشا ئاراستەو بنەماڵەو ئازیزوو ئا هوٙنەروانەیوە و سەرجەم خەڵکوو هەورامانی کەرا و یەزدانی بیٛویٛنەی داواکاریٛ چنەویەرد٘ەی و سوٙکنایی ڕوٙحی بەرزیشەنیٛ و ویٛشا خەموو جەدەسدایشەنە بەشدار مزانا.

 یاد٘ش بەرز و شکوٙدار

🔻 ئەرەمەرزیاو شنەو فەرهەنگوو هەورامانی

🔻ئەنجوٙمەنوو فەرهەنگی ئەدەبیو ڕوٙجیاری

🔻یانەو فەرهەنگ و ئەدەبوو بیٛسارانی هەورامانی

🔻ئەرەمەرزیاو ماموٙسا بیٛسارانی سنەی

🔻ئەنجوٙمەنوو ئەدەبی مەولەوی پاوەی

🔻موسسه‌ فرهنگی ادبیات پیشگامان هورام

 شوان موسا زادە هەواڵو کشچو دمایینو باقی شەفیعی(سەیاد)ی:

اِنَّا لِلّٰہِ وَاِنَّآ اِلَیْہِ رَاجِعُوْنَ

ئەوە گیٛڵاو گردیمان پەی لاو ئاڎیەن

کاک باقی موزەخانەکەش جیا ئاست و بی بە بەشیٛوە جە ویردەو شارو پاوەی و هوٙرامانی

🔹بیٛگوٙمان گردیٛمان مەلمیٛ بەڵام هەرکەسیٛوە مەلوٙ چیٛش جیا مازوٙ ئانەن کە نامیٛ خاس و هەرمانیٛ دەرد وەریٛ پەی هەمیشەی مەمانانیٛوە و ئا کەسیٛ مەوانیٛ بە، بەشیٛوە جە میٛژوو شارو دگاو ویٛشان.

🔸کاک باقی بە نوویستەو یەریٛ کتیٛوە هەر پاسەیچ موزەخانیٛوە فرە تیٛرو تەسەلی کەلەپووری نامیٛش چەنی شاری و چەنی هوٙرامانی مەمانوٙ.

🖤ئاخرین جار چەنەش فیلمیٛوە دیٛکوٙمیٛنتی نیم ساعەتیم چەنە گرتەن کە موٙنتاژ کریانو ئامادەو پەخشیەن و چاگانە جە دویٛ یەریٛ دەقیقیٛ باسو وەسیەت و ویٛش مەکەرو کە موزەخانەکش پەی کیٛ بوٙ دما ویٛش چیٛش کریوٙ …

🔸یاڎو ویرش هەر لامانوٙ بە گەورەیی مەمانوٙ

⬛️خوڎا بەخشوٙش و ماواش بەهەشت بوٙ

سەید ڕەحمان مەحمودی پەی مەرگو باقی شەفیعی

ڕاویار ، قەقبوٙ بە قەقبوٙ، یاوە دەروەن، چیٛڵ کڕا

سوٙزو شمشاڵیت بڏەی وەر با گوٙراڵیٛ هورپڕا

سیٛ ملەو سوٙحوو نەچیری بیٛ سەیاڏەن نەو وەهار

کەس نیەن هەفت تیروو شیٛعریٛ بووزوٙ لوولەو تاپڕا

توٙ بە شمشاڵوو وەهاری شەودەس و دامەت چنی

کیٛ دەین سەید و نەچیریٛ پیٛوە سەیاڏی چڕا ؟!

پەی هەڵەوجەی توٙ خەزانت وست وەڵیٛ پاییز، لوای

ئیسە کیٛ بوٙ پەی خەزانیت شینوو شیٛعریٛ بووزوٙ ڕا؟!

کەوتەنیٛ داموو زوانوو شیٛعرەکانت سەڏ ژەرەژ

جفت فجووق دەوریٛ مەڏانیٛ بق بە قەقبوٙ، هوٙر فڕا

باقیەن مووزەو خەیاڵیت، بیٛ خەیاڵش نەویەری

بیٛ کڵوٙمەن پەی وڵاتی، سوٙح تا کوو وەر پڕا

سەییٛڏ و سەیاڏ چەنی یوٙی شینوو شیٛعریٛ دا شەماڵ

ڕاو هەواری بیٛ سەیاڏەن، هەر تلیٛنیٛ، هەر خڕا

سەییٛڏ ڕەحمان مەحموودی

پیٛش کەش بە ڕوٙحوو ماموٙسا باقی شەفیٛعی

فەیسەڵ هیدایەتی پەی مەرگو باقی شەفیعی

دیسان تەم و خەم نشتەو دیاران
نەواو شمشاڵیٛ نمەی هەوران
شادٚ و گەش نیا هەواروو جاران
باربەنٚنیش کەردەن یوٙ تەر جە یاران
بەر و بووم دیسان بزمش وناران
ئەدەب ماتەمەن نەواری واران

ئەنجمەن ماتڵ مووزە ئیٛنتیٛزار
ئیٛرشاد ماتڵەن سەر باری دیار
مەحزوون جە تاران دیل و گرفتار
میرزا هاوارش هاوار هەی هاوار
پاپا ژەرەژان هەراڵەو داران
ئیٛساڵ نمیا بەر نەواری واران

کەی قەڵەم تاووٙ توٙ کەروٙوە یادٚ
کیٛ هەن بتاووٙ ویٛش کەروٙ سەیادٚ
شاعیٛری بەرزم ڕوٙحت شادٚی شادٚ
سەر بەرزو هوٙزی گەردەنت ئازادٚ
هەورامان مڵکش سەیادٚی داران
مەزاری تازیٛش نەواری واران

ئامادەکەردەیو وەڵاوگاو هەورامانی hewraman.net

 hewraman
Load More In هەواڵیٛ

وەڵامێک بنووسە

پۆستی ئەلکترۆنیکەت بڵاو ناکرێتەوە . خانە پێویستەکان دەستنیشانکراون بە *

بابەتو دماتەری

ئەژمارە و پیمانە و ئەنڎازە؛ کە جاران هەوراماننە بەکارئاومێنیٛ

ئەژمارە و پیمانە و ئەنڎازە؛ کە جاران هەوراماننە بەکارئاومێنیٛ  پیمانە و ئەندازە و ژما…