یانە هەورامانی بشناسدیٛ چند٘ موٙچیارییٛ نەختیٛ جە حەزرەتوو “زەردەشتی”

چند٘ موٙچیارییٛ نەختیٛ جە حەزرەتوو “زەردەشتی”

111

چند٘ موٙچیارییٛ نەختیٛ جە حەزرەتوو “زەردەشتی”

ئی فەرمایشە ڕەنگین و شیرینە سەروو پوٙسوو ئاسکیٛوە نویسیان. حەزرەتوو “زەردەشتی” جە دمایین ڕوٙنە کە گەرەکشا هەورامانی بازوٙ جیا و بلوٙ ڕوو بە وەرکەوتوو وەڵاتوو ئیٛرانی، خەڵکوو هەورامانی و دەور و بەری گلیٛر کەروٙوە و پی جوٙرە موٙچیاریشا کەروٙ:

ئەی خەڵکی ئەهوورایی (پاک و بیٛگەرد٘)! خاس گوٙش گیٛردیٛ بزاندیٛ چیٛش ماچوو. داواتا وەنە کەروو ئی موٙچیاریا کەردیٛ ئاویٛزەو گوٙشیتا و واچدیٛشا پانیشایچە کە ئیسە نیەنیٛ هەویٛڵەنە.

  • هەرچی گیاندار ئینا سەرزەمینەنە، چ زیند٘ە، چ مەرد٘ە گرد٘ مەخلوٙقیٛ ئەهوورا مەزداینیٛ. هەرکەس گەرەکش بوٙ یاگیٛ ویٛشەنە جموٙوە یا هەناسە بد٘وٙ، سەرش واجبا ئەهوورا مەزدای یاد٘ کەروٙ.
  • ڕزق و ڕوٙزی جە ئەهوورا مەزدای داوا کەردیٛ تا ڕزقی پاک و حەراڵتا پەنە بەخشوٙ؛ چوون تەنیا ویٛش ڕزق و ڕوٙزیدەرا.
  • دار و درەخت مەبڕدیٛ، چوون ئاد٘یچیٛ پیٛسە شمە گیانشا هەن. ئەگەر دار و درەخت نەبوٙ، ئیٛمەیچ مەتاومیٛ ژیومیٛ. هەرکەس بیٛ مەڵامەت درەختیٛوە سەوز بڕوٙ، ئەگەر جیایش چوار نەمامیٛ نەنیوٙوە تا لانی کەم یوٙشا سەوز بوٙ، پیٛسەنە ئینسانیٛوەش کوشتە بوٙ و قیامەتەنە سزاو ئا کرد٘ەوەیشە بە چەم وینوٙوە.
  • ڕزق و ڕوٙزی (ئاڵفجاڕوو) ئاژەڵی بیٛ زوانی ئایر مەد٘ەیدیٛ (مەسوٙچندیٛ)؛ چوون ئەهوورا مەزدا چی هەرمانە نەپوٙڕیٛ بیٛزارا و پەی ئانیشا کە ئی هەرمانیٛ کەرا، ئایروو جەحەننەمی تاو مد٘وٙ.
  • بیٛ ڕیا و بیٛ فڕ و فیٛڵ ژیودیٛ. ئەهوورا مەزدا وەشش جە ئینسانی ڕیاکاری و فیٛڵاوی نمیٛ و چەنەش وەش مەبوٙ. ڕاساڵ و بیٛ فڕ و فیٛڵ ژیودیٛ.
  • بیٛ مانا و گوٙترەی وەختتا خەسار مەد٘ەیدیٛ و بەتاڵ مەنیشدیٛرە. هەر هەرمان و کاریٛ وەروو دەسینە بی، کەردیٛش؛ ئند٘ا نەوەشی و ویٛ وارد٘ەی بەرەکەتا گیٛروٙ. وەختیٛ دەستا دا هەرمانەوە تەنیا پەشتی بە ئەهوورا مەزدای بیندیٛ و چاد٘ی داواو مەوانەتی و یارد٘ی کەردیٛ.
  • بیٛ ئیزن و هەر ویٛتاوە مەکەردیٛ بەرەو خەڵکیرە؛ چوون گاهەز ژەنەو ئا یانەیە جلیٛش نەبا پوٙرە. جە غەزەبوو ئەهوورا مەزدای تەرسدیٛ. ئەهوورا مەزدا ئیٛشکچی و چەمد٘اری کەروو هورست و نیشتیتانە. جە مەزدای شەرم کەردیٛ. ئاد٘ دین و دوامان ئینسانی بیٛ شەرم و حەیاش گەرەک نیا؛ چوون ئاد٘ شمەش سەروو شەرم و حەیا و حرمەتی وەشیٛ کەرد٘یٛندیٛ. حەیاو ویٛتا مەنیەیدیٛ چیٛروو پەیاتا.
  • شمە جە تاوانە ورد٘یەکاو یوٙترینی چەمپوٙشی کەردیٛ و ویەردیٛ. مەزدا پی هەرمانیٛتا کەیفشا. وەشڵەی پا کەسیە مەزدای وەشحاڵ و ڕازی کەروٙ. ئاد٘یچ جە تاوانە ورد٘یەکاتا ویەروٙ، بەڵام پا شەرتە ئەوەخواشا نەکەردیٛوە.
  • مەزدا ژەنی بیٛ حەیا و حرمەتەش گەرەکە نیەنە. ژەنیٛ کە چەنی پیایش بیٛ حەیا بوٙ و پەنانە خیانەتش پەنە کەروٙ، حرمەتوو مەزدایش ماڕان و ئایروو جەحەننەمی چەمەڕاشا و یاگیٛش سامد٘ارەنە.
  • ئا کناچیٛ کە حرمەت و ئاوەڕوو ویٛشا مد٘ا وارە و ئا ئەمانەته کە مەزدای پەنە بەخشیٛنیٛ و مشیٛوٙم بسپاراش بە شوەکاشا، ئەگەر ئا حرمەتیە ماڕا، حرمەتوو مەزدایشا ماڕان و بە ئاد٘ی خیانەتشا کەرد٘ەن. پەو بارەکەیچەرە ئا کناچیٛ کە حرمەتوو ویٛشا پاریٛزنان و ئەمانەتوو مەزدای یاونا دەسوو میٛرد٘ەکاشا، ئەسیٛح یاگیٛشا بەهەشتوو ئەهوورا مەزداینە. ئاد٘یٛ چراویٛ ڕوٙشنە ئینا تەختوو تەویٛڵیٛشاوە و سوٙسوٙ گڕای گڕوٙ. بەهەشتییٛ گرد٘ مد٘یاشا پوٙرە و ئافەرینوو مەزدایشا پیٛشکەش کەرا. من جە شمە واڵە ئازیزەکام داوا کەروو جە گرد٘ ئینسانیٛ شەیتان سفەتی ویٛتا پاریٛزندیٛ تا سەربەرزیٛ دنیا و قیامەتی بیدیٛ. درویٛ مەد٘ەیدیٛ و دروٙزنیٛ مەبیدیٛ؛ چوون درویٛ ئینسانش پەنە سووک بوٙ. مەزدا گرد٘ کەسش سەروو ڕاسی خەلق کەرد٘ەن. ویٛتا سووک و بیٛ قیمەت مەکەردیٛ.
  • هەجگیز چەنی ئەد٘ا و تاتەیتا درویٛ مەد٘ەیدیٛ؛ چوون پیٛسەنە چەنی مەزدای درویٛ دەیدیٛ. شمە بەینوو یەریٛ کەسانە وەشیٛ بییٛندیٛ: ئەوەڵ مەزدا جا دماوە ئەد٘ا و تاتە. چەنی ئەد٘ا و تاتەیتا ناگوٙشگیریٛ مەبیدیٛ و بیٛ ئەمریشا مەکەردیٛ؛ چوون ئەهوورا مەزدا حەز مەکەروٙ حەند٘او ئەد٘ا و تاتەیتانە خرابیٛ بیدیٛ. ئەگەر ئەد٘ا و تاتەتا خراب بوٙ و جە ڕای ڕاسیٛ لا بد٘وٙ پەیتا هەن ڕانموونیشا کەردیٛ، بەڵام مشیوٙم بە نەرم و نیانی و مەبوٙ خرابەشا واچدیٛ؛ ئیٛتر چاولایش بازدیٛ پەی ئەهوورا مەزدای. ئەگەر زاڕوٙڵە لاش واست و خرابیا ئەد٘ا و تاتە مشیوٙم ڕانموونیش کەروٙ؛ چوون ئاد٘یٛ خاستەر مزانا خاس و خراب کاما و چیٛشا. شمە ئەی ئەد٘ا و تاتەی دڵسوٙزەکا “تف” مەکەردیٛ دلیٛ چەماو زاڕوٙڵەکاتا؛ چوون مەزدا جیایش ئایر وەر مد٘وٙنە دلیٛ چەماتا. زاڕوٙڵەکاتا فیٛریٛ ڕەفتە خرابا مەکەردیٛ؛ چوون ئاخر و عاقیبەتش خاس نیا و گوناحش گنوٙ گەرد٘ەنتا. هەرپاسە زاڕوٙڵەکاتا فیٛریٛ دژماندای مەکەردیٛ؛ چوون ئاخرش خاس نیا و تاوانوو ئاد٘یچی گنوٙ گەرد٘ەنتا.
  • جە ژیوای و گوزەرانتانە مەبیدیٛ سەربار ملوو خەڵکیوە. نانوو تەمەڵی مەوەردیٛ. یارد٘ی ئا کەسا کە ژیوایشانە هوٙرمەڕیا دەیدیٛ تا مەزدا یارد٘یدەرتا بوٙ. هوٙشتا جە فەقیر و هەژاری بوٙ و دەسگروٙیٛشا کەردیٛ، چوون گاهەز شمەیچ گندیٛ حاڵ و ڕوٙزگاروو ئاد٘یشارە. مەزدا حەز بە هەرمان و کرد٘ەوەی عالی کەروٙ. جە هەرمان و کار و تەقەللا پەی ژیواینە بیٛ خەم و خیاڵیٛ مەبیدیٛ. ئاژەڵداری کەردیٛ، گەنم و یەو و گرد٘ جوٙرە دەغڵ و دانیٛ شاندیٛ و بەرهەم باردیٛ؛ چوون نانیٛوە پاک و حەراڵا. هەرکەس نانی پاک و حەراڵ وەروٙ عەمرش دریٛژا. هەرکەس نانی حەرام و ناپاک وەروٙ، کوٙتا عەمرا و دایم نەوەشا و جە قاپی ئەهوورا مەزداینە سەرەرە وستە و خەجاڵەتبارا. هەقوو کەسی مەوەردیٛ و پاشیٛل مەکەردیٛ؛ چوون تا ئا ڕوە مەندیٛ ویژدانتا ناڕەحەتا. بیٛ وەفا مەبیدی و پەیمانی مەماڕدیٛ؛ چوون مەزدا قینیش میٛ جە ئینسانی بیٛ شەرت و بەقای. ئەگەر چەنی ئەهوورا مەزدای پەیمانی ماڕدیٛ، پیٛسەنە شیشیٛ عەمروو ویٛتا ماڕدیٛ.
  • بە پاو هیٛز و توانایتا چیٛو هوٙرگیٛردیٛ، ئەگەر چانەی زیاتەر هوٙرگیٛردیٛ، مازیتا مەڕیوٙ. بەرزە پڕیٛ مەبیدیٛ؛ چوون جە ئاسمانەنە باڵیٛتا مەڕیا و پەی هەمیشەی نابوود٘یٛ بیدیٛ.
  • هانە چەمەکا پەی ئاژەڵی لینی و کوٙیەی ئاوەد٘انیٛ کەردیٛوە.
  • پەنەتا ماچوو تەمەڵیٛ و بیٛ لەشیٛ مەبیدیٛ. هەر نانیٛ شەرافەتش پاڵەنە بوٙ، لوٙدیٛ شوٙنیشەرە تا بە مراد٘وو دڵیتا بیاودیٛ. درەختوو سەمەری بنیەیدیٛ، هەرچند٘ نەیاووٙ بە ویٛتا، بەڵام هیچ قەید٘ مەکەروٙ؛ چوون پەی خەڵکیتەری قازانجش هەن و ئەهوورا مەزدا ئی هەرمانیٛشە فرە پەنە وەشەنە.
  •  زوو زوو ویٛتا شوٙردیٛ تا نەوەشیٛ نەگندیٛ و نەوەشی نەمەنوٙ دلیٛتانە.
  • وەختوو وارد٘ەینە شوکرانەوجاریٛ مەزدای بیدیٛ تا هەمدیسان بە ڕەحمەتوو ویٛش کەروٙتاوە سەر.
  • وەختیٛ تیٛرتا وارد٘، دەسیٛ هوٙرداردیٛ و سپاسوو ئەهوورا مەزدای کەردیٛ؛ چوون ویٛش ڕزق و ڕوٙزی دەرا.
  • قین و غەرەز دڵ و دەروونتانە لا بەردیٛ؛ چوون قین و غەرەز ئینسانی زوو پیر کەروٙ و فەوتنوٙ.
  • بەخیٛڵیٛ مەبیدیٛ و چەمتا جە ماڵوو خەڵکی نەبوٙ. زاندیٛ چی؟ چوون پیٛسەنە چەنی ئەهوورا مەزدای وەرەنگاریٛ بیدیٛوە.
  • لکەکوٙریٛ ژیوای خەڵکی کەردیٛوە تا مەزدا لکەکوٙریٛ ژیوایتا کەروٙوە.
  • بە ئاوی چیە ویٛتا شوٙردیٛ تا دایم پوٙستا گەش و ناسک بوٙ.
  • ژەنی هوٙششا بوٙ خیانەت نەکەرا بە شوەکاشا. ژەنیٛ کە خیانەت کەروٙ بە میٛرد٘ەکەیش، خیانەتش بە مەزدای کەرد٘ەن.
  • پیاکیٛچ بژنەوا، خیانەت نەکەرا بە ژەنەکاشا. ژەنیتەرە نارا ملوو ژەنەکیٛشارە، مەگەر ژەنەکیٛشا ڕازیە بوٙ. ژەنی مشیوٙم ئیٛختیاروو شوویشەنە بوٙ. پیایچ مشیوٙم چەنی ژەنەو ویٛش بوٙ، نەک ژەنە یوٙتەری؛ چوون مەزدا هەجگیز چی هەرمانە ناماقووڵیٛ وەش مەبوٙ. ژەنی و پیا مشیوٙم  حرمەتوو یوٙترینی گیٛرا و مەزدا ئی هەرمانیٛشە لاوە فرە وەشەنە.
  • کناچەکاتا بە زوٙر مەد٘ەیدیٛ شوو، بەڵکوو بە مەیلوو ویٛشا دەیدیٛشا شوو تا جەنگ و جڵەبە نەبوٙ بەینشانە و چەنی شوەکاشا ژیوایە بیٛ قڕە و مشەشا بوٙ.
  • سوبحان ئەمینی  ، ۲، ۱۳۹۰ کوٙچی ڕوٙجیاری
 hewraman
Load More In هەورامانی بشناسدیٛ

وەڵامێک بنووسە

پۆستی ئەلکترۆنیکەت بڵاو ناکرێتەوە . خانە پێویستەکان دەستنیشانکراون بە *

بابەتو دماتەری

ئەلوەدا، شیٛخی ڕیشەدار جە شیٛخەکانو ھوٙرامانی

ئەلوەدا، شیٛخی ڕیشەدار جە شیٛخەکانو ھوٙرامانی بوٙنەو کوٙچی دمایی کاکە باقی شەفیٛعی،شاعیٛر،…