یانە ئەدەب و هونەر “تەتە” توٙ شاهیٛد٘!!

“تەتە” توٙ شاهیٛد٘!!

269

“تەتە” توٙ شاهیٛد٘!!

شاهوٙ: ئای تەتە …!! ئاخ هەسوون …!! دەرد٘ گەناو …!!

تەتە توٙ شاهیٛد٘، هەسوون توٙ قازی

زاڵم بە ناهەق کەرد٘ تیرەند٘ازی!!

ئای … ئای … ئای …!!

(توٙ خود٘ا گیانەکەم) هەر وەختیٛ مەرد٘ا (ئاخ دەلیل …..!!) وزدیٛموٙ لارە (ئاخ لەیل ….!!)

(جا گیانەکەم …!!) با زوٙخاوەکیٛم (گیان ئازیز ….!!) بەیا کریارە (گیان ئاخ لەیل…!!)

یاد٘ش بە خەیر، ئەوسا نازاریٛ دامانتانە چنوور و سوورەهەراڵە و بوٙژانە دەسکەنە کەریٛنیٛ و وەرواە نوٙشیٛنیٛ و شەڕەبەق کەریٛنیٛ.

بەڵام ئەی ئیسە چیٛش؟ ئاخور شمە و ئی گرد٘ خەفەتیٛ چیٛش؟

تف ڕوەت سیاوە چەرخ! دەک بەند٘ەرت هوٙرپیٛچیوٙ زەمانە!!

دەک چەواشوٙ بی چەرخ و زەمانە

دید٘ەو نازارات کەرد٘ەن نیشانە!!!

سیروان: شاهوٙ واز بارە دڵم پەڕ بی، خوٙ دەنگیچت تەمام وەشا! براڵە گیان ئانە چی ئاند٘ە کەیلەنی؟

لا بەرە برا، ئاند٘ە ژیوەو ویٛت تاڵە مەکەرە، سەوای سەفەرما ئینا وەرەنە. قەد٘یمی فەرماوان وەختیٛ سەفەرتا وەرەنە بی، مەبوٙ نەقڵانە و نفووسەی خرابە دەیدیٛ؛ چوون ئاخرش خەیر نیا!

ئەی نەژنیەنت ماچوٙ:

هەرچی وەرینان کەرد٘ەن ئیٛختیار

بیٛ ئەسەر نیەن، با بوٙت ئیٛعتیٛبار

شاهوٙ: سیروان، زامیٛم مەکولنەوە!

دەس مەد٘ە وە زام ماران گەستەکەم

با نەکولیوٙوە پەتروٙک بەستەکەم!!!

 سیروان، وەشڵەیم بە ئەوسای، نەک جاریٛ، بەڵکوو هەزاران جاریٛ؛ وەس نیا نانیٛ گەد٘ایەما دەس گنیٛ و بیٛ خەم و ورکە وەریٛنمیٛش و دڵما ڕەحەت بیٛ!

وەس نیا وەختیٛ تاتەم ساحبەنە یانەنە زییٛرە، ئەد٘ام بیٛ خەمە بیٛ و زانیٛ ویٛرەگا پامان و زامان گیٛڵوٙوە یانەو ویٛرەگای و یانە ئاوەد٘انیش گنوٙناوە!

پا خود٘ا کە گرد٘یما هاوارش وەنە کەرمیٛ، ساحبەنە وەختیٛ گەرەکما یانەنە بزیەورە، چیمەنە و ئا دوە تڵفە بەسەزوانە ئند٘ە زەریٛڵ مد٘یا شوٙنیمەرە، خەریکا هەم پەی ویٛم، هەم پەی ئاد٘یشا، دڵم بوٙ کەباب؛ چوون سوور مزانوو خەمشانە لوایم بوٙ، بەڵام ئامایم نەبوٙ!

هەتیم پەی ژەنیٛ هیچ جە هەتیمباری و هیٛوەرژەن کوٙشی خرابتەر و گولتەر نیا، بەڵام دەس بیٛ دەسەڵاتا و چارما ناچارا؛ ئند٘ا کوٙڵ کیٛشتەیچ نەبی کسم!

ویرتا وەختیٛ زمسان تەمامییٛ و مانەگەزیٛ باوشا نەمەنیٛ، دەمی وەهار تاتەما یوٙ هیتیٛ باتیٛما پەی ئەسانیٛ؟

سیروان: ئەی چەنی ویرم نیا؟ وەشڵەیم پا وەختیە!

ویرتا وەختیٛ زمسانەنە گوند٘ەڵانی کەریٛنمیٛ، دەسیٛما کروٙڵییٛنمیٛ و ویٛما داریٛنمیٛ لوولەسوٙبەو بانارە و ویٛما گەرم کەریٛنمیٛوە؟

شاهوٙ: ئانە ئیٛمە حەوت هەشت مانگیٛ کەش و لیٛژ و تەوەنا و تەوەنشا پەنە کەریٛنمیٛ تا چیٛرشا ساف بوٙ و زمسانەنە بە دڵوو ویٛما خشکیلیٛشا پەنە کەرمیٛ!!

هەرگیز نمیٛوە عەمری ویەرد٘ە

مەحاڵەن ئامای دوٙسی بار کەرد٘ە!!

خود٘ا خود٘اما بیٛ زمسان زوو بەیوٙ و بە دڵوو ویٛما خزیلکیٛ کەرمیٛ. وەختیٛ جە زمسانی تیٛریٛ بیٛنمیٛ، خود٘ا خود٘اما بیٛ وەهار بەیوٙ و جە وەشیەکاش سەرمەسیٛ بیمیٛ!

ئیٛتر با هامن و میٛوەی ڕەنگا و ڕەنگش و پایز و خەزانی زەرد٘ش مرد٘ا! وەللاهی ئیسە جە گرد٘ چیٛوی و گرد٘ کەسی بیٛزارەنا. جە زمسانی و وەرویٛش، جە وەهاری و گوڵ و گوڵزاری و کریڵە وەرویش، جە هامنی و میٛوەی ڕەنگا و ڕەنگیش، جە پایزی و خەزانی زەرد٘یش! ئینە زمسان و پایزا، ڕویٛ نا ڕویٛ هەواڵیٛ گولیٛ مژنەوی. هەر کوٙڵبەریٛ داماگیٛنیٛ گنا کەمین، تا نا کوشیا، تا نا ڕەقیٛ باوە، تا نا گنا زاخەرە و با چیٛروو وەرویٛوە و وەهاریٛ جا میٛزیاوە!

ئینە وەهاریچا زاتم نیا بیٛ خەم بلوو کەشەنە. تەرسوو بلوو پاو خاڵ خاڵ و کریٛڵە وەرویٛ و لاشەو کوڵبەریٛ بە کوٙڵەکەو پایز و زمسانیشوٙ، بزیوٙ دیارم …! ئەی پار وەهارت ویر نیا لالوٙ حەمە جەنازەو کوڕە جوانەکەیش چاڵە وەروەکەنە ئیٛستەبیٛوە و هەر پایزیٛ بیەبیٛ چیٛروو ورویٛوە؟

هەرچی شەویٛنە مارووش وەروو خیاڵی، خەریکا شیٛت و هار بوو!

چوار پەنج مانگیٛ چیٛروو وەرو و دەمەینە مەنەیوٙ، چند٘ سخڵەتا؟!

ڕاسی ئی تاوان و غەدریٛ بە چە زوانیٛ تاوی بەیانشا کەری؟!

 من ئەجوٙم ئەگەر مەولەوی و بیٛسارانی و سەیدی و فەخروٙلعولەمای و وەلی دیٛوانەی و شیٛخ مسەفاو تەختەی و مەللا هەسەنوو دزڵییٛ و ئەحمەد٘ بەگوو کوٙماسی و عەودوللا بەگوو هەورامانی … و سەد٘ ئاند٘ەتەریچ سەرشا با – پا گرد٘ ناسک خیاڵیوە – باریوە و زیند٘یٛشا کەریوە، مەتاوا وەسفوو ئی غەدر و تاوانا کەرا!

ئی تاوان و غەدریٛ مەگەر تەنیا دەمە و بوٙران، کریٛڵە وەرو و دڵوٙپە ون، گروٙڵیە و لوولەو تفەنگی، تریشکە تەوەن و بن زەرد٘، چەمی زەریٛڵ و هەناسەی تاسیا، شەوەی سەرد٘ە و کزەو وای، کوٙڵ و وەریٛسە، هاوار و داد٘ی بیٛ فریا، لاشەی بیا و دەسی کرژووڵ، هەرس و هەناسەی کاڵ و خود٘ای بیٛ باک تاووٙ بەیانشا کەروٙ، خود٘ای بیٛ باک!!!

سیروان: شاهوٙ وەسیٛشا و جەرگت کەرد٘ا کەباب! خوٙ نیمە شەوا، با بلوە، مشیوٙم ساحبیٛ زوو بلمیٛ.

جا ساحبیٛ بوٙ شوٙنیم، هیچت ویر نەشوٙ.

شاهوٙ و سیروان گرد٘ شەویٛ وەڵیٛ ئانەینە بووسا، کەل و پەلوو کوٙڵبەری و توٙشەو ڕیٛشا ئاماد٘ە کەریٛنیٛ، جا سەرە نییٛنیٛوە.

شاهوٙ پیٛسە گرد٘ جاریٛ و چەنی سەعاتەی ویٛکارەی زەنگد٘ارە سەروو واد٘ەی زڕیوٙوە، چەنی وانای ئەوەڵ کەرەشیٛڵوو ساحبی، پەراویٛزوو چەماش کریاوە.

گورج و گوٙڵ ویٛش ئاماد٘ە کەرد٘، ئیجا لوا سەروو دوە کوٙرپەکەیش و سەروو ویٛ زیارەتوو کپە سوور و سنجەکاش کەرد٘یٛ.

شاهوٙ تا تاسیٛش مەڕیا جە دوە فریشتڵەکەیش، “چیمەنە”ی خیٛزانەش پیٛسە گرد٘ جاریٛ کاسەو ئاوە ڕوٙشنەکیٛش دەسوٙ بیٛ تا وەختیٛ شاهوٙ یانەنە زیارە، کەروٙش شوٙنیشەرە.

ئاخور ئاوی ڕوٙشناییش ئینا شوٙنیوە.  شاهوٙ دەسش کەرد٘ ملوو چیمەنیٛ و تەویٛڵەش ماچە کەرد٘ە و یانەنە زیارە. چیمەنەیچ ئاوەکیٛش کەرد٘ە شوٙنیشەرە و ماچوٙ خود٘ا هاگاد٘ارت بوٙ. 

شاهوٙ دیا پەی هەسارەکەو سەروو تەختی سانی، هەرچند٘ ئاسمان ساماڵ بیٛ و هەسارەکە وەش دروٙشییٛوە، بەڵام ئەگەر تفت هوٙرداریٛ ئاسمان، دەم و دەس بییٛ!

ئاد٘یٛ پینەی ئامیٛ بیٛنیٛره و ئەگەر تووشوو قوٙرت و وەربەسیتەری نامایەنیٛ، ڕازییٛ و شوکرانەوجاریٛ بیٛنیٛ!

شاهوٙ لوا شوٙنەو سیروانی، سیروان دلیٛبەرەنە چەمەڕاو شاهوٙی بیٛ.

سڵام و سەواخەیروو یوٙترینیشا کەرد٘ و پیٛسە گرد٘ ساحبیٛ ڕاکیٛ هەمیشەیشا گیٛرتەنە وەر.

یاویٛ دەوروو ماسراچی، سەرکەلیٛ ئاسوٙشا دا. چاگە نماو ساحبیشا وانا و یوٙ قەباڵیٛ هەنگوین و ڕوەنشا وارد٘ و دوٙلکیٛ ئاویشا کەرد٘ە شوٙنیشەرە.

هەوا وەرە وەرە ڕوٙشن بی. وەختیٛ پا نییٛنیٛ سەروو وەروەکیٛ، وەروەکیٛ چیٛروو پەیاشانە خرچەش ئیٛ و واچیٛنی ئیسە چیٛروو پاڵەیەکاشا فیل مد٘وٙ!

کاریٛ ویٛشا پوٙژنابیٛرە، تەنیا نەختیٛ وڵەو چەماشا پیٛوییٛ!

گەرمی هەڵمەو هەناسەیشا سەروو دەماخەکاشارە دابیٛش بەر و کوتە بەیسیٛ حەند٘وو دەم و لووتیشانە پیٛسە وەرچەمیلا دیاریشا دابیٛ!

وەختیٛ بڕشا دا سەرەکوویە تند٘ەکە، ئەجیٛ هەنگامەکیٛشا قورستەریٛ بییٛوە! گجار چند٘ هەنگامیٛ ئیٛنیٛوە دمارە!

وەختیٛ یاویٛ لای سەری گەناویٛ، چیٛویٛ پیٛسە کارەوانەو مروٙچەی یا پوٙلوو قازی قوڵنگی کە دایم چەمیٛشا عاد٘ەتشا بیٛ پەنەش، سەروو چەرمای وەروەکیٛوە کەوت سارا!

ڕزوو کوٙڵبەرا سەروو وەروەکیٛرە پیٛسە تەزبیٛحە بیٛ ئیماما، پیٛکیابیٛوە و ئا کەل و ملشا دابیٛنە وەر!

شاهوٙ: سیروان بد٘یە پەی گناویٛ بزانە چە حەشاماتیٛ کەوتەن ڕا؟

سیروان: شاهوٙ گیان دەی چیٛش واچوو؟ خوٙ ئینە ئەوەڵ جار نیا وینمیٛشا، خوڵە سەرەو ئاد٘یشارە پەی لەشوو ئیٛمە، ئند٘ا چلیٛ زمسانی و تەته، ئاد٘یچ چی کەوەو بەیانینە؟

تەتە ڕوەت سیاوە! ئەوسا زمسانەنە دووراوەندوور کیٛ تاویٛ بد٘یوٙ پەیت؟

شاهوٙ: سیروان گیان دنیانە و ڕوٙزگارا! ئانە سەد٘ دانە ڕیش چەمیٛشا چەنەنیٛ و ئەشیا ئیسە پاڵوو سوٙبەینە ئیسراحەتشا کەرد٘یٛ!

سیروان: خود٘ا بەریش سەروو هەقی شاهوٙ!

قەد٘ی سەعات دوە سەعاتیٛ دەموو قساوە ڕاشا بڕیە. ورە وەرە ڕوٙجیار قەپەش کەرد٘ە سینەو وەروەکیٛرە، بەڵام وەروەکیٛ کەکیٛ میٛمانەش نەبیٛ؛ چوون جە تاوەو سەرد٘ایوٙ کرژووڵەش کەرد٘ەبیٛ و ویٛش ئارد٘ەبیٛوە یوٙ!

دویٛ قەد٘پاڵیٛتەرشا بڕییٛ، یاویٛ سەروو دد٘انە تەوەنیٛ، وەرش مایەی (ماهەی) هەزار بە هەزارە بیٛ.   

شاهوٙ: سیروان با پیشیٛ دەیمیٛ و نەختیٛ تف و مەژگە وەرمیٛ.

سیروان: وەللا جە تف و مەژگەیچ وەڕەسەنا!

شاهوٙ: وەللا ناهەقت نیا، ئەوسا تف و مەژگە پاڵوو سوٙبەینە و سەروو ئیسراحەتی ورییٛ، بەڵام ئیٛسە چیٛش؟

سیروان: شاهوٙ زانی ئیٛگە کوٙگەن؟

شاهوٙ: ئەی چەنی مەزانوو؟ ئیٛگە هەر ئا یاگیٛنە کە دویٛ یەریٛ مانگیٛ چەیوەڵتەر دوە براڵە نوٙهاڵە بەسەزوانەکە “ئازاد” و “فەرهاد” دەمەی پەنگنیٛ و ڕاشا هەڵیٛ کەرد٘ە و ڕەقیٛ بییٛوە!

سیروان: شاهوٙ ویرم شی پەنەت واچوو، شەویٛ وەختیٛ لوانیٛوە، کوٙساڵانی تەلەفوون پەی کەرد٘ا!

شاهوٙ: دەی، دەی، چیٛشش وات؟

سیروان: ماچوٙ ئی ویٛرەگا دەوروو شوٙشمیٛ خود٘ا نەشناسیٛ دەسڕیٛژشا کەرد٘ەن کوٙڵبەرا!

شاهوٙ: دەی، دەی، کەس کوشیان؟

سیروان: ماچوٙ دویٛ کوشیەنیٛ و دە پانزە کەسیٛچ پیکیەنیٛ و پیٛکیەکیٛ حاڵشا فەتووتا!

شاهوٙ: نەواتش کوٙگەییٛنیٛ؟

سیروان: ماچوٙ یوٙشا دشەیا و دویٛ زاڕوٙڵیٛش هەنیٛ؛ یوٙشا حەوت مانگیٛشا و ئەویچشا یەریٛ ساڵیٛ!

شاهوٙ: ئەی ئەوشا؟

سیروان: ماچوٙ ژیواریا و تازە سەروازیش تەمامنان و ئینە ئەوەڵ جارشا ملوٙ پەی کوٙڵی!

شاهوٙ: ئی ژیواروو ویٛما؟

سیروان: ئەریٛ، جا ماچوٙ کوڕ بیەن؟!

شاهوٙ: ئای تاڵانی سیاوم! سیروان بد٘یە پەی هەزارانی، ئا گرد٘ ماشینیٛ چیٛشیٛنیٛ کەڕەسووڵیشا بەستیٛنە شوٙنەو یوٙترینیوە؟

توٙ واچی جەنازەو ئا کوڕیشا ئارد٘ە بوٙوە؟

سیروان: مەزانوو شاهوٙ. ئانەی مەشوٙ پی دەم و دەسیە دابوٙشاوە! چی خوٙ نابەڵەد٘ نیەنی …!

شاهوٙ: با نەختیٛ ماتڵ کەرمیٛ و نزیکیٛ ژالانەی باوە و بزانمیٛ چیٛشا؟

سیروان: هەتیم یا گوٙشیٛم زرنگیاوە، یا دەنگوو گوٙرانیاشا مەیوٙ!

شاهوٙ: ئا توٙ یەواش … وەللا سیروان ڕاس ماچی. ئەی ئا چیٛوە سوور و زەرد٘یٛ چیٛشیٛنیٛ تەموو ماشینەکاوە کوٙیەنیٛرە؟

سیروان: ئیسە زانام شاهوٙ، ڕەویٛڵوو ماشیناو ئانیشانە کە گەرەکشانە بلا پەی مەجلیٛسی و داد٘وو خەڵکی پەرسا و یاونا …!

شاهوٙ: ئای تاتەڕوٙ، تاتەی مەرد٘ەم تاتەڕوٙ!! دەی ئانیٛ چووزانا ئیسە من و توٙ حاڵ و گوزەرانما چیٛشا و چی پی کەوەو بەیانیە ئی کەل و ملما دانەنە وەر؟ ئینەن ماچا:

“دەسیٛ وەزوەزانشان، دەسیٛ شەوی تارشان!”

بەڵام ئیشەللا، ئیشەللا و تەوەکەل پا خود٘ایە

“ئانیٛ وەزوەزانشان، مەیوٙ شەوی تارشان!!”

کورە سیروان گیان چە واد٘یە کەوتەنی، ئەی نەواتەنشا: “تیٛر کەی جە ئاورای هاگاشا؟!”

سیروان: ئای ڕەحمەت واروٙ قەبرەو قەد٘یمی و ئینە ئینەنە ماچوٙ:

یوٙ وڵکیٛش میٛشا و یوٙ کوڵکیٛ! شاهوٙ: کورە سیروان داخە ئینا چاگەنە ماچا بڕیٛشا کەرگە توٙپیٛ گیٛڵنا دەگا و دەگا و یانە و یانە و گەرەکشانە پاسە خەڵکی داماگی و ئاورای خەڵەتنا!

سیروان: ئای شاهوٙ یانەی تاڵان کریام، ماچوٙ بڕیٛتەرشا زەڕ مد٘ا بە نانەواخانەکا و نانی مفتە مد٘ا بە خەڵکی و پی جوٙرە کڵاوە منیا سەرەو خەڵکی!

شاهوٙ: کورە داخە ئانینە ساڵا ئیٛنیٛ و تاویٛنیٛ دویٛ فڵتە فڵتیٛ و چوار درویٛ بد٘ا، بەڵام ماچوٙ ئیجارە چا فڵتە فڵتیچە کەوتیٛنیٛ!!

سیروان: دەی ناهەقشا نیا مەتاوا، زانی چی؟ چوون یا بە فیٛڵ و تەڵەکە مەدرەکشا گیٛرتەن، یا یاگیٛوە پیٛسە دانشگاو “سیٛ ڕاو نیٛنە” دەرزشا وانان!!

شاهوٙ: سیروان دەی بوٙ هەنگڵیٛت نەماسا، یاروٙ هەتیمە تەمەڵەکەو توٙفلەی کە ساڵیٛ بە دویٛ ساڵیٛ جا تەمامنیٛ و خود٘ا خود٘اما بیٛ کوٙیوٙز نەبوٙ، ئیٛسە سەی سەرەو پژمەو توٙپەکیٛ زەمانوو جەنگیوە، سەرەش ئارد٘ەن دلیٛ سەرا و کارەوانیٛ وزوٙ ڕا!

سیروان: شاهوٙ خوٙ توٙ ویٛت خاس مشناسیم و هەرگیز تەڵاق مەوزوو، بەڵام هەر یەرە تەڵاقەم کەوتە بوٙ و هیچ مەللا و شیٛخ و مەشایخیٛ وەشش نەکەروٙوە، ئینە گەورەتەرین هەتک و بیٛ ئیٛحتیٛرامی ئەوەڵ بە ئاوەز و شعووروو خەڵکیا، جا شوٙنیشەرە بە ئینسانیەتی!

شاهوٙ: هەتیم ئینیٛ خەڵکیٛ بە هەر و گاو مزانا و پەڕچینیٛ فرە فرە قایم بوٙ ڕوەو خەڵکینە، ئەجوٙشا ئی گرد٘ خەڵکە گاو و گوٙرەکەن، بەڵام پاسەیچ نیا و گرد٘ کەس بەشوو ویٛش چیٛو مزانوٙ و مزانوٙ چیٛش بە چیٛشا و پەی چیٛشی ملا؟!

سیروان: من هیچی نەکوشتەنا و مەزانوو ئی خەڵکە چیٛشش وەنە قوٙمیان پیٛسە کەروٙ؟ خوٙ هەڵای ونەکیٛ پایزی پاکە نەبییٛنەوە و هەڵمیش هورزوٙ! ئەی ئی ساز و دهوٙڵ و زەماوند٘ە چیٛشا وستەنشا ڕا؟!

شاهوٙ: های … های …! سیروان دەسم مەد٘ەنە و ئیٛمە کەی وەرگەو ئی خەفەتا گیٛرمیٛ؟ هەتیم ماچوٙ دەمەنیە پیسەکیٛ چینی (کروٙنا) هەر زوو یاویٛنە ئیٛگە، بەڵام جاریٛ نانوەرەژنش پوٙ کەرا و نمازا کەس بزانوٙ تا …!

مەر خود٘ا ویٛش ڕەحمما پەنە کەروٙ!

سیروان: شاهوٙ سەرەشا کویٛ …. بابەو خاس تا خرابیشا، پا هوٙرگیٛرە و با بلمیٛ سەردەموو بەد٘بەختی ویٛماوە. تا سەروو سیپەی، هەڵای ڕای فریٛما مەنیٛنە. بەش زوو بڕ دەیمیٛ و کوٙڵما پەی بوٙ!

شاهوٙ و سیروان دلیٛ ئا وەرو و کەل و مل و ڕا هەڵەت و سەختیٛرە کە مەگەر خود٘ا ویٛش بزانوٙ چند٘ ستەمە و سخڵەتەنە، دمانیمەڕوٙ بڕشا دا سەروو سیپەی و کوٙڵشا جە ساحیب کوٙڵی گیٛرت و بیٛ ئانەی وچانی بد٘ا، ئەواگیٛڵیٛ بییٛوە؛ چوون چی سەر، هەم سەرەکوویش فرەتەر بیٛ، هەم کوٙڵ و بارشا قورس بیٛ!

شاهوٙ و سیروان بە دویٛ کوٙڵیٛ قورسیٛوە چەنی بڕیٛتەر کوٙڵبەرا کەوتیٛ ڕا. هارەق تەویٛڵەشارە پیٛسە پلووریٛ چکیٛرە!

تەنیا مەگەر خود٘ا و کوٙڵبەر بزانا ئی هەرمانیٛ چند٘ سەختە و سخڵەتەنە؟! ئەگەر بە کفر نەبوٙ، گیٛرە خود٘ایچ نەزانوٙ؛ چوون هیچ وەخت پی ڕیٛرە کوٙڵش هوٙر نەگیٛرتەن!!

ئاد٘یٛ جیا جە سەختی و سخڵەتوو ڕیٛ، دایم دڵەتەپیٛ ئانەیشا بیٛ نەگنا کەمین و تەقەشا وەنە نەکەرا!

دەمی مەغریب بڕشا دا سەروو کەلی، نەختیٛ فەریٛحە کەوتە دڵشا؛ چوون ئیٛتر چاو لای فرە لیٛژ و سەرەکووی نەبیٛ!

شاهوٙ: سیروان یەواش، بە زاتوو خود٘ای ورنگە ورنگیٛ کەوت گوٙشم، هەتیم نەکەوتیٛ بیمیٛ کەمین؟!

سیروان: توٙ واچی؟ بە یەک ڕەنگی خود٘ای قەسەم دڵم خەبەرش دابیٛ!

شاهوٙ: دەی تەگبیرما چیٛشا؟

سیروان: وەللا ئینیٛ ڕەحم نەلان جاڕەشارە و تەرسوو تەقەما وەنە کەرا و سەر و ماڵوٙ بلمیٛ!

شاهوٙ: ئای سیروان باوکەڕوٙ، یاوە فریایموٙ، پیٛکیانیٛ!

چەمت ڕوٙی خراب نەوینوٙ و نەبوٙ نسیبوو گاوروو سەروو کوٙی، چا تەنگوو مەغریبینە سیروان و شاهوٙ هەر ئاند٘ە دنیاشا دیە و دریە وەروو فیشەکا و هاوار و داد٘شا هورست!

شاهوٙ و سیروان پیٛسە سەرقافڵەی کەوتیٛ بیٛنیٛ وەڵیٛ کوٙڵبەرا و خەیلیٛ وەڵیٛنە بیٛنیٛ. چا تاریک و لیٛڵەنە وەیوەڵانی کەوتە دلیٛ کوٙڵبەرا و پەرەم پەرەمیٛ بییٛ!

ئا شەوە، ئا کوٙڵبەرە داماگیٛ، ئەی چەنی ڕوٙشا کەرد٘ە بوٙوە، مەگەر خود٘ا ویٛش بزانوٙ، ویٛش؟!

سەعات دوە سەعاتیٛ شوٙنەو تەقەکەیرە، واعزە نەختیٛ ئارامە بیەوە و ئا کوٙڵبەریٛ کە نەکەوتیٛ بیٛنیٛ دامی، پا شەویٛ و پا دەمە و بوٙرانە کەوتیٛوە ڕا و نیمەشەو بڕشا دا گەناوە.

سیروان و شاهوٙ شوٙن و قوڵاخشا نەبیٛ و دڵەتەپیٛ و ختوورە کەوت دلیٛ کوٙڵبەرا. خەبەر یاواوە دەگا و چاگەیچ نەبیٛنیٛ!

موبایلەکیٛچشا کوشیەبیٛنیٛوە، دەگا کەوتە وەیوەڵانی، بەڵام کەس دەسەڵاتوو هیچیش نەبیٛ!

ساحبیٛ توٙپوو ئا دەگایا جما کەشماڵ شوٙنیشارە.

سیروان هەرچند٘ کەم تا فرە دەمەی پوٙژنابیٛرە، بەڵام قەد٘ی سەد٘ گەزا وەروو ڕاکیٛنە کەوتەبیٛ پاڵوو تەوەنیٛ و بە کوٙڵەکەیشوٙ نوونیابیٛوە!!

مەگیرە دویٛ فیشەکی کەوتیٛنیٛ گیانگاش و ئا بەسەزوانە تا ئاگە بڕش کەرد٘ەن و گیانی شیرینش ئەسپاران! بەڵام شوٙن و قوڵاخوو شاهوٙی نەبیٛ.

ئا ڕوە تا ویٛرەگا ئا گرد٘وو کەشیشا کەم و ویٛچن کەرد٘ شوٙنیشەرە و شوٙنەمایش نەبیە. نە شوٙنەو ونیٛش بیە، نە لاشەیش؛ چوون شەودەمە و بوٙران شەویٛ گیٛجنابیٛش و شوٙنەماو هیچیش ناستیٛ بیٛ!

چند٘ ڕویٛتەر سەروو یوٙی خەڵکوو گرد٘وو ئا دەگایا کەشماڵشا کەرد٘ شوٙنیشەرە، بەڵام ئیسەیچ و ئیسەیچ شوٙن و قوڵاخش نەبی و نەبی!

سیروان بە جوانەمەرگی و بە هەناسە سەرد٘ی و ڕاو تیکیٛ نانینە، سەرەش نیاوە و ئەسپەرد٘ەو خاکی کریا و چەمەڕایی و کزە و قرچەو دەروونی مەن پەی کەس و کاروو شاهوٙی کروٙڵی و خەڵکوو دەگایەکاو دەور و بەری!!

شش مانگیٛ چەمەڕایی، شش مانگیٛ دڵەتەپیٛ، شش مانگیٛ هەرسەو چەما، شش مانگیٛ تەم نەبڕیەی و مەیل کوٙنە نەکەرد٘ەی، شش مانگیٛ ئاخ و داخ، شش مانگیٛ هەناسە سەرد٘ی، شش مانگیٛ هەناسیٛ کاڵیٛ و چەمیٛ زەریٛڵیٛ، شش مانگیٛ ….

ئاخرش دلیٛڕاسەو وەهاری، کابریٛوە کەشەوان ڕاش گنوٙ کووبەریٛوە و مد٘یوٙ بن تەوەنیٛنە و دەموو کریٛڵە وەرویٛنە، کوٙڵ و وەریٛسیٛ دیارا! وەختیٛ ملوٙ سەرش مد٘یوٙ کابریٛوە ئینا چیٛروو کوٙڵەکەینە و کەوتەن ڕوەرە!

وەختیٛ ملوٙ سەرش و مد٘وٙش پی دیم و پەودیمەرە، مدیوٙ بنەو ڕانیش بە بیبینەکەیش بینیان و دلیٛ دڵقیٛوەنە نەختیٛ تف و مەژگە چەنی موبایلەکەیش بەینوو دەساشەنە ڕەقوٙڵەشا بەستەن!!

سوبحان ئەمینی، هانەگەرمڵە

٣، ۲، ۱۳۹۸ کوٙچی ڕوٙجیاری، شاروو مەریوان

 hewraman
  • ئەوەڵ شەو

    ئەوەڵ شەو دریٛژەو بەشو دووەمی چەنی بەشو ئاخری. حەمە وەیوە ماروٙ یانە! جە بەشو ئەوڵیەنە وات…
  • ئەوەڵ شەو

    ئەوەڵ شەو حمەڕەزا بەهمەنی ئازیزا؛ ئی داستانو حەمەیە دلیٛ کوٙمەڵگاو هەورامانیەنە روەش داینە…
  • من می گویم «انف» تو نگو «انف»

    من می گویم «انف» تو نگو «انف» وەلی فەتاحی ئیجازە ئاقەی موٙعلیٛم. وەشڵەی ڕاس ماچا ڕویٛو موٙ…
Load More In ئەدەب و هونەر

وەڵامێک بنووسە

پۆستی ئەلکترۆنیکەت بڵاو ناکرێتەوە . خانە پێویستەکان دەستنیشانکراون بە *

بابەتو دماتەری

شوشمیٛ و نەوسوڎە تا روانسەر چەنی کاک ولی فتاحی نویسەر و محقق

شوشمیٛ و نەوسوڎە تا روانسەر چەنی کاک ولی فتاحی نویسەر و محقق ▫️سلام پەی ڕوحو کاک ولی فتاحی…