یانە ئەدەب و هونەر مەیە سیاوەکیٛ The black sheep

مەیە سیاوەکیٛ The black sheep

163

مەیە سیاوەکیٛ The black sheep

نوستەی: Italo Calvino

هوٙرگیٛڵنای جە ئینگلیزیوە پەی هەورامی: د. ناجح گوڵپی

 مەگیٛڵنانوە، وەڵاتێوە مەبوٙنە، گرد دزیٛ بانیٛ…

سەرویٛرەگاو گرد ڕوانیٛ هەکە دنیا تاریکنیٛرە، گرد کەس یانەو ویٛشنە زیێرە پەی دزی و یانە جیا ئازیٛنیٛ، هەر کەسێوە بڕێ کریٛڵیٛش پەنە بیٛنیٛ چەنی چراو فانوٙسیٛوە دەسییٛ، کریٛڵەکیٛ گرد قفڵیٛوە کەریٛنیٛ، ئیتر گردو یانەکان چوٙڵیٛ بیٛنیٛ، ئیجا گرد دزی کەریٛنیٛ ئەو یانەو یوٙترینی، پژگینیٛ یانەو یانە، گرد کەس لوان دزی یانەو هامساکەیش و هام شاریەکەیش، هەتا نزیکو دەمبەیانی، چەوسەرۆ هەرکەس ڕووە یانەو ویٛش ئیٛوە، کۆڵ و بارێوە قورسش پەنەبیٛ کە دزیەبیٛش، تا یاویٛوە یانەکەو ویٛش سەرنجە دیٛ یانەکەش هاڵی و پەتی هیچش پەی نەمەنەبیٛ، گرد دزیابیٛ. چاوەختەو هەکە هەر یوٙ دزی کەریٛ چەوی تەری، ئوونەیچ جە ئەویشان، ئەویٛ جە ئوڎیشان، پی جوٙرە پیٛوەرە گوزاران کەریٛنیٛ بە دڵوەشی، کەس ویٛش بە دوٙڕیا نەزانیٛ.

ئەسای و ورەتەی و بازرگانی ئەچی وەڵاتنە گرد ناپاکی و خەڵەتنای و غەش و دزی بیٛ جە هەنترینی، بسان جە بورەشی و چەپەوانەیچەو. حکومەتکەشان دەزگاییٛوە تاوانکاری بیٛ، دزی کەریٛ ئەو هەرمانبەرەکانش، ئەو هامکارانیش، هەرمانبەرەکیٛچ دزی کەرینیٛ ئەو هامبەشەکاشاو هامڕایەکاشان، هەرمانبەر هەر چەمش چانەی بیٛ کە فرسەتێوەش پەی هوٙربگنوٙنە تا بتاووٙنە دزی بکەروٙنە جە حکومەتی، ژیوای و گوزاران ئەپی جوٙرە ویەریٛ بە نەرمی و وەشی، هیچ کەس دوٙڵەمەندو دارا نەبیٛ و هیچ کەسیچ نەدار و فەقیر نەبیٛ.

ڕوٙزگار ئاماو لوا، کەس نمەزانوٙن چەنی قوٙمیا، کەسێوە سەرڕاس و دەمڕاس ئاما پەی ئی شاریەو بارگەو بنەش وست وچیٛگە یانێوەش نیاوە قننیٛ و ژیواش ئەچی شارنە دەسپەنەکەرد. شەویٛنە جیاتی ئانەی ئاڎیچ ساک و چراوەکیٛش هوٙر بگیٛروٙنە و بلوٙنە پەی دزی،  یانەنە نیشیٛرە جگەریٛ دوودیٛ و ڕوٙمانیٛ وانیٛوە. کە دزەکیٛ ئیٛنیٛ پەی بڕیەی یانەکەیش، وینیٛنیٛ ئانا چراوەکیٛش گڕای گڕوٙنە، ئتر مەگیٛڵیٛنیٛوە دما و نا ئومیٛدیٛ بیٛنیٛ و نەلیٛنیٛ چوەر پەی دزی.

قەڎریٛش پەنەیشی، دزەکیٛ واتشا ئەپیٛسە نمەبوٙنە، با پەیش ڕوٙشن بکەرمیٛوە کە  یام پیٛسەو ئیٛمە یانە جیا بازوٙ بلوٙنە دزی، چون ئەچی وەڵاتنە(شارنە) ئیلا مەشوٙ دزی بکەری ئەو هامساکەیت و هامشاریەکەیت ئینڎا گوزەران نمەلوٙنە وەروٙ. هەم پەنەش بواچمیٛنە توٙ بیەنی وەربەس و وەرپەنگ وەرو دزیەکەو ئیٛمەنە، نمازینە هەرمانەو ویٛمان بکەرمیٛنە، سەرماو وەنە تیٛک مدەینە، کابرای سەرڕاس گرد شەویٛ تا بەیانی ویریٛ کەریٛوە ئەچا کەسا کە سەوایشەو هیچشا نیەن بوەرانەش، لەمەی هاڵیە گوزەرنان، چون شەوەکیٛش یانەکەشان تاڵان کریان و هیچشا پەی نەمەنەن.

کابرای سەرڕاس فرە بە سەختی دژو ئی جوٙرە کەردەوان بیٛ، ئتر داخییٛنە ئاڎیچ شەویٛنە زیێرە لویٛ پەی جبەری و لویٛ سەرو پردەو ڕوٙخانەکەی پەی وچانەو مەژگی و لاشەیش تەماشەو ئاوەکیٛش کەریٛ، دەمەو بەیان پیٛسەو ئادیشان گیٛڵیٛوە پەی یانەکەیش، وەلێم هەرگیز دزی نەکەریٛ، چون سەرڕاس و ڕاسواچ بیٛ. مەوینیٛ یانەکەش  گزیش وەنە دریان و گردشان دزیەن، هیچش پەی نەمەنەن.

کەمتەر جە هەفتێوە کابرای ڕاسواچ حاڵش فەتوتبیٛ، چون مفلیٛس بیەبیٛ، هیچشان پەنە ناستەبیٛ، هەرچیش بیٛ تاڵان کریا و ئانەیچ پەنەش بیٛ واردش،  ئی حاڵەتە فرە سەخت بیٛ لاشەو، هەرچنڎە خەتاو ویٛش بیٛ، چون ڕاش دا بە دزەکا هەکە گردچیٛوەکاش ببەران، وەلێم ویٛش هیچش جە کەسی نەدزی،  دنیا  وەرە وەرەی پیٛسە لوا وەرۆ، بڕیٛوە جە دزەکان فرە دوٙڵەمەندیٛ و داریٛ بییٛ، گەرەکشان بیٛ دزی نەکەران جە کەسی و بلا پەی پیاسە سەرو پردەو ڕوٙخانەکەی،  ئانیٛچ هەکە لویٛنیٛ دزی پەی یانەو کابرای ڕاسواچی، بەهاڵی ئیٛنیٛوە ئانڎەی تەر فەقیریٛ گنیٛنیٛ،  ئتر دنیا پاسەش سەرئاما ئا دزیٛ کە دوٙڵەمەندیٛ بییٛبیٛنیٛ ئاندەی تەر دوٙڵەمەندیٛ بییٛ، فرە دوٙڵەمەند، ئانیٛچ هەکە فەقیریٛ کەوتیٛنیٛنیٛ ئانڎەی تەر فەقیریٛ کەوتیٛ،فرە فەقیر. دزە دوٙڵەمەندەکیٛ واتشان، ئیسە ئەگەر ئیٛمە بلمیٛنە پەی سەرو پردەکیٛ و دزی نەکەرمیٛنە جەکەسی، وەرەوەرەی فەقیریٛ و نەداریٛ گنمیٛنە، ویرشان کەردەو کە بڕێ جە دزە فرە فەقیر و نەدارەکان بگیٛران بەکریٛ پەی ئانەی بکیاناشا دزیشان پەی بکەران، پی جوٙرە کوٙنترات(قوٙنترات) دروس بی میانو ساحیب سامانی و دزە فەقیرەکانە، موچەی ڕیٛک و پیٛکشان پەی بڕیاوە هەتا دزی بکەرانیٛ پەی دزە دوٙڵەمەندەکان هەکە تا ئیسەیچ هەر دزیٛنیٛ، هەوڵیٛ مەڎان یوترینی بخەڵەتنان، پی جوٙرە دزە دوٙڵەمەندەکیٛ هەر فرەفرە دوٙڵەمەندیٛ بییٛ و فەقیرەکیٛچ هەر فرە فرە فەقیریٛ کەوتیٛ.

بڕێ جە دزە دوٙڵەمەندەکان، پاسەشان سەرئامابیٛ کە ئەوەجەشان بەدزی نەبیٛ، چون فرە سامان و دارایشان بیٛ، وەلێم ئەگەر دزیشان نەکەرداییٛ، نەداریٛ و فەقیریٛ گنیٛنیٛ دماو ماوێوە، چون فەقیرەکیٛ سەرەمڕە دزی کەریٛنیٛ جە دوٙڵەمەندەکان،  ئتر کریٛها دیٛنیٛ بە فرەفرە فەقیرەکان تا سامان و داریی و یانەو چیٛوەکانشان بپاریٛزنان جە فەقیرە دزەکان، ئی هەرمانیٛ پاسەش سەرئاما کە پوٙلیس و زیندان بنیارە پەی سزادای ئاکەسان کە دزی ئەو فرە دوٙڵەمەندەکان مکەرانیٛ.

چنڎ ساڵیٛوە دماو بەرکەوتەی پیا سەرڕاسەکەی، مەردمو ئی وەڵاتیە، ئتر باسێوە جە دزیکەردەی یانە بڕیای نەکەریٛنیٛ، باس باسو دوٙڵەمەندی و فەقیری بیٛ، وەلێم هەڵای گرد دزیٛ بیٛنیٛ، تەنیا پیا سەرڕاسەکە، ڕاسواچەکە بیٛ هەکە ماویٛ کوڵ دلیٛشانە ژیواو ئاوریٛنە سەرش نیاوە.

مەیە سیاوەکیٛ یانی پیای جیاواز دلیٛو هەزاران دزو گەندەڵینە، دلیٛو وەڵاتو دزانە          15/1/2020      

 hewraman
Load More In ئەدەب و هونەر

وەڵامێک بنووسە

پۆستی ئەلکترۆنیکەت بڵاو ناکرێتەوە . خانە پێویستەکان دەستنیشانکراون بە *

بابەتو دماتەری

ئەلوەدا، شیٛخی ڕیشەدار جە شیٛخەکانو ھوٙرامانی

ئەلوەدا، شیٛخی ڕیشەدار جە شیٛخەکانو ھوٙرامانی بوٙنەو کوٙچی دمایی کاکە باقی شەفیٛعی،شاعیٛر،…