یانە ئەدەب و هونەر فەتە بای بوٙ بە نمایندە

فەتە بای بوٙ بە نمایندە

15

فەتە بای بوٙ بە نمایندە

فره داذ و فەریادٚم کەردٚ. هیچش نەبەخشا. گیان، گوٙش نمەدٚوٙ بە کەسی، قسیٛ هەر قسیٛ ویٛشەنە. تەنانەت لالوٙ حەمەیچ سەرەش نیابیٛ سەرش، بەڵام ئادٚ ئەپی گوٙشیش مژنەوو و پەو گوٙشەکەی بەرش کەروٙ. فی فیش مەی وەنە. تاتەش ماچوٙ:«ئەگەر ئادٚ مەدرەکەکەش گیٛرتەبیایا ئیسە تاویٛنمیٛ ئەریٛ یا نەریٛ کەرمیٛ. بە خودٚا سەر و ماڵم نییٛنیٛرە و کیانیٛنیٛش. دەی داخیٛ گرانەم مەدرەکش نیا.» ئانا ئیٛسالیچ بەرنەشیابییٛ، دەیخوٙ برا با ساڵیٛو تەربوٙ، کوٙگەش شیەن، ئادٚ هەڵای زاڕوٙڵەن. ئیسە سی ساڵیٛشا. شەریکیٛ ئادٚی«قوٙلەقانیٛ» و«بیلانی» کەرا.

دەی مەگەر ئادٚ نەلابیٛ زانشگا، دەی خوٙ توٙ پار واتت زانشگاش تەمامنان. مەزانوو، نامیٛ دەگاییٛوی فیلحیٛنیٛت بەردٚە، کە گوایا ئەچاگە دەرسش وانان. ئەی نەواتت تا دەرسش تەمامنا ڕووتیٛش کەردٚیمیٛ. قەرانش پەنە ناستیمیٛ. توٙ واچی درویٛش دای بوٙ و مەدرەکش نەگیٛرتەبوٙ. دەی خوٙ مەدرەک گیٛرتەی شاخ و گوٙشش نیا. هەر نامنویسی کەردٚەیش حەلابا. مەعلیٛم تا ڕویٛو مەی کەلاس، پەنج ڕویٛ نمیٛ. ئاخریچەو موٙروو ئیٛمزات پەی کەرا کە بەرشیەنی. هەر زەڕەکەی بووسنە، وەسیٛن. توٙ تا ئیسە دیەنت و ئەژنیەنت یوٙ جە زانشگانە بەرنەشیەبوٙ و بەرشا کەردٚە بوٙ؟ قسیٛ ئانەیمە نییٛنە یوٙ پیٛسەو فەتەی ویٛش لەشوو وانایش نەبیەبوٙ و ئاستەبوٙ جیا. وەڵا حاڵیم نیا، فەتەو مەجلیٛس فرە دووریٛنیٛ. یاروٙی واتەنی، فەتە و مەجلیٛس کوٙجا مەرحەبا. چاگە ئاو هەن گڵ نیا و چاگە گڵ هەن ئاو نیا.

دەیچی واڵیٛ گیان، فەتە چیٛشش چینیشا کەما. لالوٙ حەمە ماچوٙ توٙ ئادٚ مەسەلیٛ مەدرەکەکەیش حەل و فەسڵ کەروٙ، نامنویسی و لوایش سەروو من. ماچوٙ بە بوٙقیٛچ بوٙ بەرووش! ئینیٛ چەنی ملا، ئیٛدٚیچ ملوٙ! ئینە یەکەم، گردٚوو دەگاو ویٛما ئینای چەنە فەتەی. پاڵای کەروەنە و نمەنیشوەرە دەگا بە دەگا، خوٙ شوٙکوٙربەشەو ئانەیە ئاشنا و ڕوٙشنا ما هەن، هەرکەس ئیٛمە بژناسوٙ پەی ئادٚی ڕەئیە مدٚوٙ. برام پەی توٙ بوٙ، بزوو مزی ورەشمیٛ، دوٙشا بڕیا. بیٛوەی لوا مەجلیٛس ئاوەختە کوٙچما ملوٙ تاران. ئی کوٙڵک و موە چیٛشا. خوٙ تاران یاگیٛ ئاژڵی نییٛنە. چیٛگەیچە کەسما نیا دەمشاوە بوٙ. ئاوەختە هەر مشوٙ ورەشمیٛشا، دەی با ئیسە ورەتیٛباما. ماچا تاران فرە زلا، یانیٛش دەتەبەقیٛنیٛ! بە چەم ئی پەڕ و ئەو پەڕش دیار نیا. بەڵام من ئەجوٙم چاگە تاقەت نمەبەروو. عەبە ماچوٙ من هەر نمەو پەی تارانی. شاروو تەم و دووکەڵیا. خودٚا بەخشوٙش، ئاساڵە حاجی لوا پەی حەجی، قەسەمش واردٚ سڵاموو سی نەفەرام کەردٚ دویشا جواب نەدٚانیەو! هەواڵوو سڵام و سەباحی نمەزانا! من ویٛم تا ئیسە نەلیٛنا تاران بەڵام خوٙ دەموو چوار نەفەرا پیٛسەو لالوٙ حەمەیەو کە تەلەفزیون تەماشە کەرا ئەژنیەنم. ماچوٙ مرەنە یانە کەس بەرەت نمەکەروٙوە. کتەی کوٙرە نمیٛ یانەت.

دەی خوٙ برا مەجلیٛس لوای ئەپا سووکوو ئاسانیە نیا کە توٙ مزانیش و هەرئیسەو پاڵایت هوٙرکیٛشتیٛنیٛ و جمیٛنیەرە. هیشتا نام نویسیش نەکەردٚن تەکبیریٛ کەری.توٙ بازە با بزانمیٛ ئەسڵەن هەر مەدرەکش هەن. ماچوٙ ساڵیٛو یوٙ بیەبیٛ وەزیر چادٚمای کاشف بعەمەڵ ئاما هەر مەدرەکش نەبیەبیٛ. بەرشا کەردٚ. واتەبیٛش گمم کەردٚەن! دەی خوٙ کریٛڵ نیا گمت کەردٚەبوٙ! دمای ئانەیە نامنویسیش کەردٚ، مشیوٙ تەئیدش کەرا. ئیجا ئاوەختە دەسکەروٙ بە تەبلیٛخات و عەکسیٛ ویٛش کورە و قسیٛ کەروٙ پەی خەڵکی و ماشینیٛ گناشوٙنیش. مشوٙ سفرەو خوانتا بوٙ. بە خودٚا موٙرغدارییٛو بەشتا نمەکەروٙ. ئەجوٙت زەڕی کەم و چوورش گەرەکا. خوٙ واڵیٛ گیان گوٙترەی و ئەپا سووک و ئاسانیچە نیا کە توٙ فکرش کەری. فەتە ویٛش چیٛشماچوٙ؟

فەتە سەرەش نیا پەو. ماچوٙ ئەدٚا گیان ساڵەو یوەو هەزاریچ بوٙ مشوٙ هەر بلوو. ماچوٙ گەرەکما بوو بە نماییٛندە. نمایندەیی فرە وەشا! ئانا چا دەفتەریٛوش ئەسان و هەر چیٛویٛ منویسوٙ و هەر وەروو ویٛشەرە قسیٛ کەروٙ. ئەوەڕوٙ تاتەش ماچوٙ: فەتە ئانە وەروو ویٛتەرە چیٛشا ماچی؟ چی بوٙڵنی؟ ماچوٙ: ئانە تەمرینوو سوٙخەنڕانی کەروو. ماچوٙ: هەرلوانی وەڵیٛ گردٚ چیٛویٛوی ویٛم ماشینیٛو مسانوو. ویٛچم بەرووش ڕانە، ڕانندەم گەرەک نیا. بەنزین هەرزان کەروو. یارانە فرە کەروو. پەی واموو ئیزدواجی زامن لابەروو. مدیریٛ خرابیٛ دویٛ مدٚەوچوٙری. دز و دروٙزن بەرکەروو. هەرمانە میٛزوە پەی جوانا. سەلتیٛ بەروو لاو ویٛم سەرە وەریٛسیٛو مدٚەو دەسشەو. ئی زانشگا فرە و بیٛسەمەرا کەهەر فیٛریٛ بییٛنیٛ مەدرەک بدٚا تەعتیلیٛ کەروو. ماچوو بە رەیس جمووری چیٛو هەرزان کەروٙ. ئیجا دمای ئینیشا و بڕیٛو هەرمانای تەری و پەردٚوٙچم پیٛدٚا کەردٚ، ئانیٛ کە کوٙمەکشا کەردٚەنا و یاوناناشا ئەپی دەرەجە و مقامیە کەرووشا ڕەیسیٛ. خوٙ واڵیٛ گیان حەقوو ویٛشانە. هەر کەس چەمش فەتەیەو بیە بوٙ، هەقوو ویٛشا کەروٙش کار بەدەسیٛو. توٙ خودٚا درویٛ مدٚەو؟ مشوٙ بنیادٚم نمەک شناس بوٙ! ئەی نەژنیەنت واتەنشا:«توٙ بوٙ بەرەو، من چەمیٛم هەنیٛ سەرەو» لالوٙ حەمەیچ کەروٙ بە نماییٛندەو ویٛش. ئاد قوٙربانەش بوو ئیٛتر نمەتاوو فرە ئاما و لوای کەروٙ، پاییٛوش چیٛگە بوٙ و پاییٛوش تاران. خوٙ هەڵاوە نمەنیوٙ. ماچوٙ بە تەیارە مەو و ملوو. فرە تەرسوو تەیارەکەش گنوٙرە.

هوٙرزەو تەیارە تەیارەو چیٛشیتا. کەم وڕاویٛ کەرە. ئەجوٙ شەویٛ گیٛرتیٛنی. سەدٚ کەڕەتیٛ واتم وەختیٛو مووسی شەوەکیٛ کەرە ویٛتەرە. یا کاردٚیٛوە بنیە چیٛروو سەرەیت!

ئانە عەبە چی هایت کەردٚاوە. وەرمەکەم فرە وەش بیٛ. وەشییٛ خەریک بیٛ بوو بە ئاندٚەتەر. سەدٚەقەش بوو مەجلیٛسش پەی چیٛشی ئانا یارانەکەشا فرە کەردٚەن، نانیٛوە فەقیرانیٛنە منیشمیٛرە دەوروو یویەنە موەرمیٛش.

خاسا سەرە بنیەو شەوگار فرەش مەنەن، ساحبیٛ گیٛڵنیشەو پەیم.

وەلی فەتاحی
۹۸/۹/۱۲

 hewraman
  • لەزەتوو خاسی کەردەی

    لەزەتوو خاسی کەردەی زاڕوٙڵە فەقیریٛوە کەبە وردەواڵە ورەشی دلیٛ شاریرە خەرجوو وەنایش بەرئار…
  • هیزی شەویٛ ڕاو یانەکەیمانم گم کەرد

    هیزی شەویٛ ڕاو یانەکەیمانم گم کەرد. بە جیاتی ئانەی بلونیٛوە پەی یانەی سەرەم دلیٛو کوجیەوە …
  • ئوٙجاخەی ڕوٙشنە!

    ئوٙجاخەی ڕوٙشنە!         کابرایە کوٙڕیەش بیٛ و وەخ…
Load More In ئەدەب و هونەر

وەڵامێک بنووسە

پۆستی ئەلکترۆنیکەت بڵاو ناکرێتەوە . خانە پێویستەکان دەستنیشانکراون بە *

بابەتو دماتەری

لەزەتوو خاسی کەردەی

لەزەتوو خاسی کەردەی زاڕوٙڵە فەقیریٛوە کەبە وردەواڵە ورەشی دلیٛ شاریرە خەرجوو وەنایش بەرئار…