یانە ئەدەب و هونەر یانەو فەتەی میٛمانیٛشا هەنیٛ

یانەو فەتەی میٛمانیٛشا هەنیٛ

66


یانەو فەتەی میٛمانیٛشا هەنیٛ
ئەژنیەنش و نەمسانش. حەتتا مەکیچشا ئاردٚیٛبیٛنیٛ چەنی ویٛشا!
نمە نمیٛو وارای واروٙ، هەر مەشیا زانایام چی هەوا بوەو خاکی مدٚوٙ! ئینە دویٛ حەفتیٛن ئاوی کەوتیٛنە و خەوڵک ماتڵا تا بەشکووم وارانیٛو واروٙ و هەنار وەشکەروٙ و گنوٙ واردٚەی! ئاخوٙر سەرینا تا وەڵینا و تا وایاگیٛ من هوٙش و گوٙشم بوٙ واتەنشا هەنار وەختیٛو مەیٛنە واردٚەی کە لانی کەم وارانێو دوٙش وەنە. دیارا ئەچی فەسڵەنە ئاودارای و وارانی فرە وارای بە تایبەت ئەگەر شەویٛنە هەوا زقم بوٙ، بوٙ بە سەبەبوو ئانەیە کە هەناری ترەکاوە و با بە مەشکاڵیٛ.
ئەچی حەیس و بەینەنە و ئەچی ڕەت وەڵایەنە بیٛنمیٛ کە تەلەفوونشا کەردٚ، میٛمانیٛما مای مەیا. دیارا ئامیٛمانیٛ کە قەرارا پا بنیا سەروو گلەنیەو چەما ئیٛمە وتەشریف بارا بنەماڵیٛوی هەر فرە ئازیز و وەشەویسەنیٛ. واتە بیٛشا:« کە غەیر جە ویٛما میٛمانیٛ تەریٛچما پەنەنیٛ». فەرماوابیٛشا:« کە ئیٛمە جە حاڵ و ئەحواڵوو شمە و ئیمکاناتوو دلیٛ مڵکیتا خەبەرداریٛنمیٛ و ئەگەر گلەییٛما نەکەردیٛ با لانی کەم نانی وشک و ئەحیانەن دویٛ کەرگیٛما پەنە با، چڵووزنمیٛشا زیٛڵیمارە». دیارا کەلوو پەلی تەر هەن و دەفر و دوٙڵە فرە و فراوانا، جەهەوەڕیەو گیٛرەش پەنە هەرتا…. فەتە تا نامیٛ کەرگاش ئەژنیە میٛدٚەش کەوت تەرەشوٙع و ساتیٛو چەم جە ڕاکیٛ کل نەکەریٛ و هەر گوٙشەوەنگ بیٛ تا کەی ماشین بزیوٙوە و میٛمانیٛ تەشریف بارا. دیارا ئیٛمە تا ئیسە جە نزیکەو نەیاویٛنمیٛ خزمەتوو ئا میٛمانا کە ئیٛنیٛ چەنی یانەو ئا دوٙسە ئازیزیما. ئەپی وەسفە دویٛ بنەماڵیٛنیٛ، یوٙشا دوٙسوو ویٛمانە و ئەویتەرشا میٛمانوو ئادوٙسیمانە.
فەتە لوا پەی سەروو جادٚەی دەمشاوە تا زاڕوٙڵە گوٙلانەکەیشا گیٛروٙ کوٙڵیٛ و پیٛسە گردٚ کەڕەتیٛوی باروٙشەرە واری. میەو ئینا گوٙرج و گوٙڵ وەستەرە واری و ئیسەر ئەوسەرش یوٙبیٛ. ماچوٙ:« چەمتا ئەچا زاروٙڵەیە بوٙ ئەپا بانوو کیٛڵیەو نەگنوٙرە واری تا بلوە دەمشاوە و هەمتەر یاردٚیشا دەو. ئاخوٙر خەیر جە کەرگا و نانوو نانەوای، دویٛ یەریٛ قاولەمیٛ هاڵییٛ و ویس سی سیٛخیٛ کەبابی و دالیٛو بریٛنجی وشک و چندٚ چەمچیٛ ڕوەن و مشتیٛو مەکی و پەنج شش پیازی و دویٛ یەریٛ دەسیٛ تەماتیٛ و شش حەوت چەمچیٛ چاشت واردٚەی و دویٛ پەتویٛ و دویٛ قرووشکیٛ چای و بڕیٛو کەل و پەلی تەرشا پەنەن». فەتەی بەسەزوان دویٛ ڕایش کەردٚیٛوە تا بیٛمزەڕەت و بیٛ وەی ئی چیٛویٛ ئامایرە واری! خودٚای ڕەحمش کەردٚ کە ئەچا وەخت و بەرەگانە، واران هوٙرش وریٛژنابیٛ، ئننا پەڕوٙی وشکشا پەووە نەمەنیٛ و قەندٚ و چای و مەکەکە تاوییٛنیٛوە! ئەڵبەتەنە فەتە ئەپا شیرین عەقڵیە ماچوٙ:« مەشیا ئی چیٛویٛشا ناوردٚاینیٛ، ئەی ئادٚیٛ مەگەر نمەزانا، ئیٛمە جە مڵکەنە هەم قاولەمیٛما هەنیٛ و هەم سیٛخیٛ و هەم مەکی و هەم چای و هەم قوٙری و کتری و هەم….»
ئانەنە ئیٛمە گوٙش نمەدٚەیمیٛ بە لالوٙ حەمەی. بەخودٚا مشیوٙ بڕیٛو جە قسەکاش بە ئاوەو تڵای بنویسی. بەڵام دەی چیٛش کەروو چوون سەوادٚش نیا ئیٛمە ئەجوٙما هیچ نمەزانوٙ و هەر ویٛشەو کەلام ترەکنوٙ. نا برا پاسە نیا فرەو خەڵکیچ سەوادٚدارا بەڵام یا بڕیٛو چیٛویٛ نمەزانای نمەزانوٙ، یا ئەنقەس کەروٙ. ئەگەر نمەزانوٙ هەر وەی و ئەگەر ئەنقەسیچ کەروٙ بەدٚەی بەدٚتەرینە!
وەلی فەتاحی
98/8/13


 hewraman
  • باروٙڵ و میٛمانەکەش

    باروٙڵ و میٛمانەکەش  شەوێوه‌ باڕۆڵ مێمانش بێ و سەرقاڵوو قسەکەردەی چەنی مێمانەکەیش بێ،…
  • ڕازەو مروٙچەی و مەشوولەی

    ڕازەو مروٙچەی و مەشوولەی زمسان بێ ، هەرد و درەخت جلێ چەرمێش کەردێ بێنێ وەر، مەشولێچ یانە و…
  • هەنار

    مه‌هدی لالۆ حمه‌مراڎی! مه‌کیانه‌ په‌ی وێت پووکاڵاوی. مه‌گێره‌یچ ئه‌و دڵ. پووکاڵاوی هیچ ئه‌…
Load More In ئەدەب و هونەر

وەڵامێک بنووسە

پۆستی ئەلکترۆنیکەت بڵاو ناکرێتەوە . خانە پێویستەکان دەستنیشانکراون بە *

بابەتو دماتەری

مێللەتو گوٙرانی ئەوەجەش بە دیالۆگێوی سەراسەری دوور جە غەرەز و غەرەزکاریەن

 مێللەتو گوٙرانی ئەوەجەش بە دیالۆگێوی سەراسەری دوور جە غەرەز و غەرەزکاریەن نویسەر: مە…