یانە ئەدەب و هونەر ڕازەو مروٙچەی و مەشوولەی

ڕازەو مروٙچەی و مەشوولەی

54

ڕازەو مروٙچەی و مەشوولەی

زمسان بێ ، هەرد و درەخت جلێ چەرمێش کەردێ بێنێ وەر، مەشولێچ یانە وێرانە بیێ بێ و دەربەدەر، سووچیەنە کزش کەردەبێ و دەسێش نیای بێنێ سەروو لەمەی ئەورای و سەرەشەنە ویرێ گۆشتاوێ بێنێ و شۆروای. لوای بێ لێ بەحروو خەیاڵاو سەیرانوو هامن و سەرو یاڵا.

لە‌مەشەنە شەڕوو مان و نەمانین

مژنش تیکەی چەوروو سفرەو خوانین

واتش: بە پاو ویەردەی دووری و ناحەزی چەم کۆری و دوە هێشە کەردەی بەینەتی و لابەردەی ئێش و زامەتی مەلو پەی یانەو مرۆچێ و سیر تا پیاز و ڕازەو دڵیم و ساڕێژ کەردەی زامان و جەرگی شڵیم موانو و ماچوو:

ئەرقابل بزانیم بە وردی وێتا

مەوو گزی دەروو خۆڵەو چێر پەیتا

وەر گێری کەلم تا ڕۆ وەهاری

ئاوەخت پەیۆ ماروو ونەو ونداری

مرۆچێ لوا ویرەرە و ئاماوە یادش کۆنە قسێ واچێ (قسێ دەمم کەفتەرە، سەرەم لوا جەفتەرە) واتش: چێویە واچوو کە واتەو ژیرا بۆ و هەرمانیە بەرو که تەجرەبەو پیرا بۆ .

مەژگ و ئاوەزوو زانایا قووڵەن

پێسە سەکەلێ نەژاڵە بووڵەن

ڕەگ و خیرەتیش سازداو پەردەو سیرەتش‌لا، قۆڵفوو زوانیش ماڕاو تڵفوو گیانیش هاڕاو و شەونۆخنیش کەوتوە ویروو دەمش ئاما کەلەورو واتش:

ساڵان و مانگان ونی دڵ وەردم

بە زەبری دەمم شێڵم و یەو هەڕدم

جاڕ گەنم نەوێ شارۆش نەکەروو

تا پەی واردەنیم منەت نەوەروو

ساتۆ ئەر هەنی دەمت بە خیگە

گۆڕەت گم کەرە ئیتر نەی ئێگە

مەشوولە زەرد هۆرگێڵاوە و دەرلاد واڕیا و ئازاو ئەندامیش ئێشا و گۆنجوو چەماش

کێشا و لافاوەو هەرساش وەرداو و دێقوو دڵیش بەرداو و ڕوەش کەردە مرۆچێ و واتش:

ئانە تۆ کەردۆ بەسەرەو ئەمنی

وەرگ نەکەردەنش بە بەچکەو جنی

بە لەمەی ئەورای سەد شەو ڕۆ کەردەی

باشتەر جە منەتەن پەی ژەمیە واردەی

هەم دیسان مرۆچێ کاسەو چەماش کەرد بە ونی و نەخش و برواش هور ئەنجەنی و زوانش تاڵ کەرد پێسە هەرزنی ، بە مەشوولەی واتش:

مەرتۆ چکۆ بیێنی ئی دەرەو ڕۆزگار

چێشۆ گلێرکەردەن هامن و وەهار

شانە شل کەرە لیپ کەرە هەمان

ساتیە من دوو پام چێروو وێم نەدان

مەشوولە واتش: پەی وەشی دڵوو ئەژ ناساو فێنکی عەتر و هەناساو تاقەت و کەیفوو خاڵ خاسا، تایە وچانیم نەدٚاینەو بالۆرێم واتێنێ. ئیسە کە پاسە دەوروو زەمان گێڵاوە و زاموو منش کۆلناوە، باشتەر ئانەنە تەوێڵەو وێم سیاوە کەروو و هەردەو هەوێڵ ڕاوە کەرو.

شەرتەن تا ژیوای مەنەبۆم نەسەر

جە ئاوەو منەتەی گڵێم باروو بەر

ئیتر با وەس بۆ تەشەروو تانە

چی جە دۆسی بۆ یا جە بێگانە

مەشووڵە کە ئێتر ددٚانوو یارمەتیش کەنەبێ و هازەو باسیش نەمەنەبێ، بەرگی وەڵینش ماڵارە و پایش کەردێ پاڵارە. سەرەش نیاوەو وێش پەی وێش دویێ چێرۆ لچارە واچێ: خۆ هەڵای جە سەو من سازەن و چێروو ئاسمانی باز.

ئا ماواو مەحاڵە‌شە جیا ئاست و لوا پەی وڵاتێوە تەر، دیش گاو گۆره مەبۆڕیاوە و ئۆڵاخێ لێ خۆڵەینە وێشا تلناوە، جە وەشینە سەروو پاو وێش نەژناسێ و هەناسە بڕکێش کەوتەنە. مۆڵە مۆڵ هەر ڕێسێوە و لچێ لێسێوە. کەوتەبێ پەیش تیکەی چەوروو بە خاتری جەم، کە گەماڵ و وەر بەرەیچ نەدٚیەبۆش بە چەم.

ئاخۆ من چێشمەن بە مرۆچە گەڕێ

پێسەو گەماڵ و لەو گەلەی وەڕێ

تێرش وارد ونی و لەمەش کەردە درک

بێ خەم وتە پەیش بە بێ ورکە ورک

ئاماوە ویرش کۆنە قسێ پیری

دەس مانیا بنیە سەروو لەمەی تێری

ئیبراهیم یەعقوبی، پاوە –چۆڕژی –  کۆپڕوو۲۷۱۹

 hewraman
  • باروٙڵ و میٛمانەکەش

    باروٙڵ و میٛمانەکەش  شەوێوه‌ باڕۆڵ مێمانش بێ و سەرقاڵوو قسەکەردەی چەنی مێمانەکەیش بێ،…
  • یانەو فەتەی میٛمانیٛشا هەنیٛ

    یانەو فەتەی میٛمانیٛشا هەنیٛ ئەژنیەنش و نەمسانش. حەتتا مەکیچشا ئاردٚیٛبیٛنیٛ چەنی ویٛشا! ن…
  • هەنار

    مه‌هدی لالۆ حمه‌مراڎی! مه‌کیانه‌ په‌ی وێت پووکاڵاوی. مه‌گێره‌یچ ئه‌و دڵ. پووکاڵاوی هیچ ئه‌…
Load More In ئەدەب و هونەر

وەڵامێک بنووسە

پۆستی ئەلکترۆنیکەت بڵاو ناکرێتەوە . خانە پێویستەکان دەستنیشانکراون بە *

بابەتو دماتەری

مێللەتو گوٙرانی ئەوەجەش بە دیالۆگێوی سەراسەری دوور جە غەرەز و غەرەزکاریەن

 مێللەتو گوٙرانی ئەوەجەش بە دیالۆگێوی سەراسەری دوور جە غەرەز و غەرەزکاریەن نویسەر: مە…