یانە هەورامانی بشناسدیٛ نموونێوە جە وەفاد٘اری و وەتەن وەشەسیای!!

نموونێوە جە وەفاد٘اری و وەتەن وەشەسیای!!

39

نموونیٛوە جە وەفاد٘اری و وەتەن وەشەسیای!!

ئاروٙ ڕیٛکەوتوو ٤، ۸، ۱۳۹۸ کوٙچی ڕوٙجیاری چەنی دوکتور ناجیٛحی و کاک شەوقی شەیدای، خیابانوو مەریوانینە یاوایمیٛ کاک “حەسەن سەلیمی عەبدولمەلەکی”.

چەنی کاک حەسەنی ئاشنایی وەڵینما هەن.

کاک حەسەن سەلیمی زیاتەر جە ٤۰۰ ساڵا چەیوەڵی چەنی خیٛڵەکەیشا کە پەنەش ماچا خیٛڵوو عەبدولمەلەکی، پەی وەرەنگاری دژمەنی، پاریٛزنای مەرزەکاو ئیٛرانی و جەنگی چەنی دژمەنا بەراشا پەی مەحاڵوو خوراسانی.

ئی خیٛڵە پەوچیشا بەرد٘یٛنیٛ پەی ئاگەی چوون جە ئازایی و چەنەئاماینە نموونیٛ بییٛنیٛ.

دماتەر شوٙنەو تەمیای جەنگەکاو ئیٛرانیرە، خوراسانوٙ ماراشا پەی تارانی و چاگەیچوٙ ماراشا پەی مەحاڵوو مازیندەرانی.

ئاد٘یٛ بنەڕەتەنە خەڵکوو هەورامانی و دەور و بەری پاوەینیٛ.

ئاد٘یٛ هامشانوو شاکاو زەندی و قاجاری جە فرەو جەنگەکانە بەشداریٛشا کەرد٘ەن و غیرەت و ئازاییشا ئەرمانان.

ئاد٘یٛ خزمەتیٛ گەورەشا کەرد٘ەن بە دەسەڵاتوو کەریم خانی زندی و سەد٘ها کەسیٛشا چی ڕیٛنە بییٛنیٛ قوربانییٛ.

خزمەتوو ئاد٘یشا بە کەریم خانی کە ویٛچش گوٙرانا و خەڵکوو مەلایرین (ملەئایر)، خزمەتیٛ هاوماڵی بیەن و دەسەڵاتەکەو ئاد٘یشا بە مڵکوو ویٛشا زانان!

دەورەو قاجارەکایچەنە ساڵهای ساڵ پیٛسە هیٛزیٛ جەنگاوەری چەنی سپاو بیٛگانەی گژیەنیٛ و غیرەتشا ئەرمانان.

تاریٛخوو ئی خیٛڵیە تاریٛخیٛ دوور و دریٛژا و چیٛگەنە مەکریوٙ بە ورد٘ی باسش سەر کەرمیٛ.

جا شوٙنەو تەمامیای جەنگەکاو ئیٛران و ڕووسیەیرە، بە نیەتوو فەوتیایشا دووریٛشا وزاوە پەی مەحاڵوو مازیندەرانی و زاغەمەرزی.

بە فەرمایشوو ویٛش پەوچیشا دووریٛ وستیٛنیٛوە تا دلیٛ مەش و مەگەز و مالاڕیاینە گرد٘ نەوەشیٛ گنا و فەوتیا.

بەڵام بە ئاوەز و عەقڵیەتی هەورامیشا هیچ نەفەوتیەنیٛ، بەڵکوو ئی مەحاڵشا  کەرد٘ەن بە بەهەشتیٛ بیٛ ویٛنە!

ئاد٘یٛ مەحاڵوو بەی شاری (بهشهر) و زاغەمەرزی چوار دەگیٛشا هەنیٛ و پەنەشا ماچا چوار قەڵاو عەبدولمەلەکی.

زاغەمەرز و ئەمیرئاوا دویٛ چی دەگایانیٛ و باخ و باخاتوو پرتەقاڵ و نارنج و نارنگی و … شا ئیٛرانەنە نامیەن.

ئاد٘یٛ نامیٛ فرەو یاگەکاشا هەورامییٛنیٛ و ئەگەر ڕات گنوٙ ئاگە، ئەجوٙت هەورامانا. پەی نموونەی تالارەشا هەنە بە نامیٛ تالارەو هەورامانی، سووپر مارکیٛتشا هەن بە نامیٛ ژیواری و …

ئاد٘یٛ پاک ویٛشا بە هەورامی ڕەسەن مزانا و فرە خاس زوان و فەرهەنگوو ویٛشا پاریٛزنانشا.

کاک حەسەن ئینسانیٛ ڕوٙح سووک و زەڕەشیرینا و ئەگەر پەی هەر مەراسمیٛ دەعوەت کریوٙ، عەزیەتوو زیاتەر جە هەزار کیلوٙمیٛترا ڕیٛ مد٘وٙنە وەروو ویٛش و بە ئەوپەروو وەشی و ڕەزامەند٘یوە بەشداری کەروٙ.

کاک حەسەن کەمتەر دەگیٛوە هەورامانی هەنە بە سوٙزوو شیٛعریٛش نەلاونیٛ بوٙش و ئا شیٛعریٛ کە ئاد٘ی چنییٛنیٛ هانەگەرمڵەی و باخ و باخاتیشەرە، هیچ هانەگەرمڵەیە ویٛما نەچنییٛنیٛ.

کاک حەسەن ماچوٙ ئاروٙ هەڵەبجە و بناروو هەورامانی بیەنا و کیلویٛ خاکوو تەویٛڵیٛ، کیلویٛ خاکوو پاوەی و کیلویٛ خاکوو هەورامانوو تەختیم ئارد٘ەن و وەسیەتم کەرد٘ەن هەر وەخت مەرد٘ا و نیانیٛشا قەبرە، وەڵیٛنە تویٛ خاکی مەبارەکوو هەورامانی شانا ملمەرە، جا دماوە بە خاکوو غەریبی پوٙژنامەرە!!!!

پی فەرمایشیشە کە کونجوو دڵیشوٙ بەر ئیٛ، دڵم پەڕ بی و هەرسی ئامیٛ کانەو چەمام!!

سووبحان ئەمینی

٤، ۸، ۱۳۹۸ کوٙچی ڕوٙجیاری

 hewraman
Load More In هەورامانی بشناسدیٛ

وەڵامێک بنووسە

پۆستی ئەلکترۆنیکەت بڵاو ناکرێتەوە . خانە پێویستەکان دەستنیشانکراون بە *

بابەتو دماتەری

مێللەتو گوٙرانی ئەوەجەش بە دیالۆگێوی سەراسەری دوور جە غەرەز و غەرەزکاریەن

 مێللەتو گوٙرانی ئەوەجەش بە دیالۆگێوی سەراسەری دوور جە غەرەز و غەرەزکاریەن نویسەر: مە…