کوٙڵبەری

74

زمسان، سەخت و دڵڕەق بێ!  بۆران کەرێ و تفت کەرد٘ێ ئاسمان، بیێ! تا وێم یاوناوە یانە، وەخت بێ ڕەق بووە! پا حەزە بەرەکەم کەرد٘ۆ، بە جێڕەو بەرەکەی، ئاسۆی کۆڕم وەرمەنە چڵاکیارە! ئاما پێوایمۆ:

تاتە گیان خێر بەیۆ. چی دێر ئامایۆ؟ فرە بێ تاقەتت بێنێ…!”

ڕۆڵە گیان، دەسوو وێم نەبێ، بارەکە دێر ئاما! وێت خاس مزانی، کۆڵبەری لیتەسەرین، ڕۆ هەن زوو مەیوە، ڕۆ هەن دێر، ناشوکری نەبۆ ئینە کەی …؟

تاتە گیان دایم خەموو تۆما، واتم نەکا چێویە قۆمیا بۆ. ڕۆڵە گیان، وەختوو وتەیا و لوە بووسە

 بووسە با سۆحەنە بتاوی زوو هۆربێزی پەی مدرسەی. گەلاوێژە شۆنەو بێ قەزای و خێرئامای و وەش ئامایرە، نان و چایش پەی ئاورد٘انێ.

گەلاوێژ ڕۆڵە، سۆحەنە وزەوە ویرم با ئا بەرە قیراو بیەیە وەش کەروو، هەم جێڕەش مەی، هەم هەوا مەی دلێ. خەیلێن جێڕە جێڕش نمازۆ بووسدێ و وەرمتا شێونۆ! با جە جێڕەی وزووش!

گڵێمەیچ مد٘ەو ملشەرە بەش ئێتر وادەمە نەی دلێ، یانەکەما فرە سەرد٘ا.

تاتە گیان جا واتت، شەوێنە سەردایێ وەرمما مەگنۆ پۆرە، نەوەشێ گنمێ، سەروو چەما وزووشۆ ویرت

گەلاوێژە یاگێش پاڵوو سۆبەکەیەنە یاوارە. ئێند٘ە مانیا بێنا، نەزانام چنی وەرمم کەوت پۆرە؟! سەوایش بە دەنگە دەنگوو ئاسۆی کە مدرەسەنە ئاماوە، هاییم بیۆ!!

نیمەڕۆ نانەما وارد٘ە. شۆنەو نان و چای نیمەڕۆیرە گەلاوێژە ماچۆ: “تاتە گیان بەرەکەت ویر نەشۆ!” هۆرستانێ بەرەکەم وەش کەرد٘، پێسە چاوەڵی پاڵم دا دیواروو یانەیۆ، دیوارەکە نمش دابێ، تکەیچ کەرێ…! دارەکێ قڕنەی واردێ بێنێ! ناعەیلاجی نەبۆ ئینە کەی یانەن؟ گێرە مەڕە خاسە بۆ تا ئی یانە کە ئێمە هەنما! فکرێنە بێنێ، ئاسۆ چڕیش: تاتە! قەوڵت دا بێ کۆت و مانەگەزێ و گۆرەوێم پەی بسانی. ئانا زمسان تەمامیا، پاڵاکێم شڕێنێ و پایێم تەڕێ با!

ڕاو مەدرەسەیەنە دایم سەردٚایێ لەرزای لەرزوو، ڕەفێقەکێم دێقە دێقەم مد٘ارە، جلە عالەکاشا مرمانا پەنەم، تەشەرێم مدٚانە…!” ڕۆڵە، تاقەتت بۆ. ساحێو بارەکێ قەوڵشا دان زەڕما بد٘ا پەنە. زەڕشا دانێ، سەر تا پات پەی مسانوو.

چی قسانە بێنێ، دیاکۆ چڕیش: مامۆ حەمە، ئارۆ بارێ فرێنێ، مەگەر زوو بلمێ…! گاهەز دوە کەڕەتما کەرد٘! زوو تۆشەبەرەم پێچنا

گەلاوێژ ڕۆڵە! هاگات جە ئاسۆی بۆ، گاهەز دێر ئامانێوە ڕۆڵە خودٚاحافێز.

خود٘احافێز تاتە گیان، خود٘ا پەشت و پەنات بۆ. پەلە پەل لوایمێ مەرزەکە، کۆڵما گێرت کۆڵێوە

ڕاکێ دوورە و سەخڵەتە بێ

تا ئەوەڵ کۆڵم یاونا وەرەوە، گیانم ئاما بەرەو بینێم!! ئەجیام تەنیا من مانیانا، ڕەفێقەکێم جە من خراوتەر هەناسە دێنێ! واتم مەتاوو کۆڵێتەر باروو، پایێم مەکەراش! زەنگۆڵێم هازیشا نەمەنێ بێ، کەوتیمێ ڕا پەی کۆڵێتەری

ڕۆجیار لوا بێ کەلەرە، هەوا لێڵ و بووم بێ و بە هەزار حاڵێ وەروو پایاما وینێنمێ کۆڵ کۆڵێماوە بێ، دلێ وەروێنە تا زەنگۆڵێ چەقێنمێ!پایێم سەرد٘ێ و بێ ڕۆحێ بێنێ و نەینێ چەنیم! ناکاوێنە تەقەو تفەنگی ئاما! هەر ئاند٘ەمە زانا کەوتیمێ دلێ کەمینێ! تەرسایمێ، حەیبەتیێنە خزایمێ بن تەوەنێ! سەروازەکێ نزیکێما کەوتێوە، ڕەفێقەکێم حەیوەتیێنە بەرشیێ لوای پەودیمەرە…! هازیم نەوێ و پێسەو مەرد٘ەی خزانێ چێر تەوەنەکە…! ئێند٘ە تەرسا بێنێ، سەرد٘اکەم ویر شیەبێوە…! پێسە شۆڕە ویکۆڵی بەد٘ەنم لەرزێ، وەقرەم بڕیابێ و نەتاوێنێ هیچ کەروو! سەروازەکێ ئێند٘ە نزیکێ بێنێ، دەنگشا ئەژنەوێنێ بە چراوبرقیە کەشەکەی وشکنێنێ! سەروازێوە ڕوو بە من ئای ئێ، ئێند٘ە ئاما تا دیانێش خوڕیش ملمەرە و ماچۆ هۆرزە وێت کەرد٘ەن کتەی …! تا نەکەرد٘ەنیم کەمە، هۆرزە بۆ بەر…! حەیوەتیێنە زیانێ بەر، دڵم خەریک بێ بەر ئێ…! ڕەنگەم پڕای بێ، جار جار چراوبرقیەکێ گێرێ دڵێ دیدٚەیم…! شەوارێ کەرێنێ، کوچێم مەنەبێ بیاوو لاش، چراوبرقیەکێش کۆشناوە. ئاما وەرۆ … سڵامش کەرد٘انێ! سەرەم سڕ مەنە، واتش مامۆ ئەجیۆ مەژناسیم…؟ منەنا … ئاکۆ!

هۆشتا پار هەرەسەو وەروێ ئاما، پەنگیانێ و نەتاوام بلوە پاسگا، شەوە ئاما ملمەرە، پەنام ئاوردە دەگاکێ شمە، بە لەفزی شیرین بەردانێت یانەو وێتا، نان و چایت دانی، سۆحەنە تا پاسگا ڕوانەت کەرد٘انێ؟!

من ئا کوڕەنا، خەفەت نەوەری ئیسە گرد٘ی کیانوە پەی پاسگای، دماتەر تۆیچ متاوی بلیوە پەی یانەی!” چی قسانە بێنمێ سەروازێشا چڕیش ئاکۆی: ئا ورنگە ورنگە چێشا؟ چی نمەی ڕانە؟

– “هیچ نیا، ئیسە مەونە، کۆڵبەرەکێ لواینێ پەودیمەرە، باوڕ مەکەروو بەیاوە، لا بەردێ با بلمێوە و نەختێ بسیەیمێوە، خۆ مەرد٘یمێ…!وەختێ ئاد٘ێ کەوتێ ڕا و دوورێ کەوتێوە، منیچ کۆڵەکەم گێرت کۆڵێوە و کەوتانی ڕا ڕوو بە یانە!

 محمەد کەریمی

 hewraman
  • باروٙڵ و میٛمانەکەش

    باروٙڵ و میٛمانەکەش  شەوێوه‌ باڕۆڵ مێمانش بێ و سەرقاڵوو قسەکەردەی چەنی مێمانەکەیش بێ،…
  • یانەو فەتەی میٛمانیٛشا هەنیٛ

    یانەو فەتەی میٛمانیٛشا هەنیٛ ئەژنیەنش و نەمسانش. حەتتا مەکیچشا ئاردٚیٛبیٛنیٛ چەنی ویٛشا! ن…
  • ڕازەو مروٙچەی و مەشوولەی

    ڕازەو مروٙچەی و مەشوولەی زمسان بێ ، هەرد و درەخت جلێ چەرمێش کەردێ بێنێ وەر، مەشولێچ یانە و…
Load More In ئەدەب و هونەر

وەڵامێک بنووسە

پۆستی ئەلکترۆنیکەت بڵاو ناکرێتەوە . خانە پێویستەکان دەستنیشانکراون بە *

بابەتو دماتەری

مێللەتو گوٙرانی ئەوەجەش بە دیالۆگێوی سەراسەری دوور جە غەرەز و غەرەزکاریەن

 مێللەتو گوٙرانی ئەوەجەش بە دیالۆگێوی سەراسەری دوور جە غەرەز و غەرەزکاریەن نویسەر: مە…