یانە ئەدەب و هونەر فەتە و مەراسموو داستان کوٙتای هەورامی

فەتە و مەراسموو داستان کوٙتای هەورامی

61

ئەدٚام ماچۆ نان و چای بوەرە ئیجا لوە. واتم بەخودٚا برا زوو ملوو، نەوەکەتی بوە ئەوجار و ڕام پەی نەمانۆ! قاچێم مێشا و نمەتاوو سەروو پەیاوە مدٚروەرە. ئاخۆر پار سەندٚەڵیەم پەی نەمەنێبێ. پارساڵۆنەکێ فوونەدٚێ، پەڕەبێبە. پادٚارا گێرتێ بێ و بێ پایێچ هەر دەوروو وێشارە خۆلیای خۆلیێنێوە. تاریک و بووم و لێڵ یانەنە زیانیەرە و هەڵای سەعاتێوش مەنە بێ مەراسمەکەی دەس پەنە کەرا من ساڵۆنەنە نیشتانیەرە و ڕایێوە زیادٚێچم گێرتە، هەر وێمەو خۆرپیابێنە دڵم، وەروو وێمەرە واتم نەکا، ئاشنا و ڕۆشنایێو یاگێش نەبۆ، با من دەوش پەنە. ئاخۆر وەختێو ئەدٚام و سەلتێ ملا پەی زەماوندٚێ، یاگێ چوار نەفەرا گێرا، چوون فرەو ژەنا پاسە کەرا، ماچا نەوەک قەومێوما یاگێش نەبۆ، با پیاوەتی کەرمێ و دەیمێش پەنە. لالۆ حەمە ماچۆ:«بڕێو سەروو ئاوەو حەمامیەو پیاوەتی کەرا»

ساڵۆنە پێسەو پاری نەبێ. پەرە نەبیبێ و هەڵای سەندٚەڵیێ هاڵیێ فرێ مەنێبێنێ. میەو یۆ ماڵاش شانەمەرە، لام کەردٚەو دیم مامۆساکەمانە و ئادٚیچ تەشریفش ئاوردٚەن. پەشۆکیانی و جیای سڵامی خودٚاحافێزیم کەردٚ! مامۆسا نەخوام پەنە و تەرێقش نەکەردٚاوە و واتم زاتوو خودٚای نەژنیش یا بەش نەژنیەبۆش! ئەگەر لالۆ حەمە بیایا حەتمەن تەرێقم کەرێوە و دێم وەروو لاقرتیا! ماچۆ:« فەتە با بەو لاتەنە بنیشوەرە». ئاماولامەنە نیشتەرە. من هەم حەزم کەردٚ و هەم حەزم نەکەردٚ. حەزم کەردٚ چوون واتم با خەڵکی چەمو بۆ و بزانا ئاها من چندٚ مۆهێمەنا کە مامۆسا ئامان لاو منەنە نیشتەنەرە. پەنەیچم ناوەش بێ کە نەتاوێنی و ڕوەم نەبێ لاو ئادٚیەنە، تەپ و جم کەروو. ئەجێم ئینانا وانگانە و دەرسم چەنە پەرسۆوە و منیچ هیچ نمەزانوو. ئندٚە مازیم وریێ، ڕوەم نەبێ کڵاشووش!

باوڕم پەنە کەردێ ئەجێ ئینانا سەروو دڕەیاوە. حەز کەرێنێ پاڵەیەکام وەژوو وەلێم ڕوەم نە بێ چوون گۆرەوەکێم دڕیایبێنێ. لالۆ حەمە ڕاس ماچۆ، ماچۆ:« مشیۆم دلێ جەمعێنە پاڵای نەوەژدێ چوون هەم عەیبا و هەم بوەو پەیایچتا مێ». پەشیمان بێنێ چانەیە کە سەندٚەڵیێوە زیادٚێم گێرتێبێ! قۆرئانشا واناوە و بە سروودەو جمهووری ئیسلامی گردٚیما هۆورسیمێوە. ئیجا پێشکەشکار لوا پاڵوو میکرۆفۆنی و خێرئاما و وەش ئامای خەڵکیش کەردٚ. نامێ بڕێوی دێ و دیار بێ ئانێ مشیۆم فرە گەورێ و نامیێ با! یۆ دوێویشا ئەشناسێنێ، زەڕدارێ یا حکوومەتیێ بێنێ. زەریفێچشا چەنە بێنێ. دڵوو وێمەنە واچێنێ بەش نامێ منیچ بەرا و خێر ئامایم کەرا، خۆ زانێنێ نمەکەرا و نمەبەرایچ. من چکۆ و ئادٚێ چکۆ.

کناچڵێوە گۆلانێ وەڵێ گردٚ کەسیەنە ڕازەو«ورکڵە»یش واناوە. منیچ یانەو وێما مامایم ڕازەو ورکڵەیش پەی گێڵنابێنێوە، بەڵام ئینێ، چەنی هنەکێ مامایم دالێو تەوفیر کەرێ. هەرفرە وەشە بێ. سەلتێچ فرە وەشش گێڵنۆوە و حەرتا ڕازێ فرەتەرێچ مزانۆ، بەڵام حەیف سەلتێ نەلێنە مەدٚرەسە و سەوادٚش نیا تا بنویسۆشا و بەی بوانۆشاوە. گیرەم سەوادٚیچش بۆ لالۆ حەمە ماچۆ: «مشیۆم کانچێ ڕوودارە نەبۆ و فرە نەخۆلیۆوە»!

وەختێو کناچڵەکێ دەسش کەردٚ قسە کەردٚەی و وانای، مچۆ مچۆ کەوت دلێ ساڵۆنەکێ و خەریک بێ پەشۆکیۆ و نەتاوو عال بوانۆشەو، من نەزانێنێ چێش ماچا و ئی مقۆ مقۆ چێشا. مامۆسا ماچۆ:« من یاوانیەنە. چادٚمای پەیت ماچوو. ئیسە با گۆش دەیمێ ماباقیشا». دمای ئادٚێ، تێکەڵ تێکەڵ ئامای و گردٚ کەس ڕازەو وێش وانێوە و چەپڵێش پەی کۆیێنێ. من هەر پەلەم بێ تا زووتەر تەمامیا و بلمێ نان واردٚەی، ئاخۆر واتەبێشا نانیچما مدٚا. باوڕ کەردێ من خاس نەیاوێنێنە بڕێویشا.

ئەجێ وەزیم پەی مژمارا. یوەشا بیێبێ بە ئەوەڵ، لاو منەو ئاخرەیچ نەبێ! من هیچم حاڵی نەبیە چەنە. مامۆسا ماچۆ:« فەتە ڕاسا تۆ حاڵیت نەبیەن چوون تۆ خاس شارەزا نیێنی. با گەورە بی و بلی دانشگاه ئاوەختە مزانی کە ئا ڕازێ چی بیێنە بە ئەوەڵ و یا ئەوە چی بیێنە دوەم و هەر پاسە تا ئاخر». مامۆسا لامەنە بێ و ڕوەم نەبێ بازوو جیا. وێچم تەعاجباتەنا چەنی تا ئاخر لەشم بی و نیشتانیەرە! چوون سەرەنجم دا، یوە یوە و دوە دوەی ئازای ئازێنێ جیا و لوێنە بەر. خۆ بەخودٚا بڕێو جە ڕازەکا هەر فرە وەشێ بێنێ، چانەیەنە زانێنێ کە چەپڵێ فرەتەر و تندٚتەرێشا پەی کۆیێنێ! شەڵای بە شەڵڵای گردٚ پێسەو ورکڵەی وەشێ بیاینێ! من هەر هنەو ورکڵەی خاس حاڵی بیا. پێشکەشکار گلەیێ ئانیشاشە کەردٚێ کە داستانێشا کیاستێنێ، بەڵام چوون هۆرنەچنیاینێ ئێتر ناماینێ پەی مەراسمەکەی. ماچۆ:« قەرارنیا هەرکەس هۆرنەچنیۆ، ئیجا تەشریف نارۆ. دیارا حەفتا هەشتا داستانێ کیانیێنێ و تەنیا دە وانزێوشا هۆرچنیاینێ و دلێ ئینیشایچەنە یوەشا بۆ بە ئەوەڵە و یوەشا دوەمە و یوەشا یەرەمە و تا ئاخر. هەرئانە کە داستانێتا نویستێنێ و زەحمەتتا کێشتەن و کیاستێنێتا، دەستا وەش و قەڵەمتا ڕەنگین و زەینتا پاراوبۆ».

مامۆسایچ ماچۆ فەتە:«منیچ فرێ مژناسوو کە داعیەو زوانی و فەرهەنگی و ڕۆشنویری و ئیچێواشا پەنەنە بەڵام نمەزانوو چی تەشریفشا ناردٚەن. پەیم یاگێ پرسیارێن. ئایا جە وەرپرسا مەراسمی گلەیێشا هەنێ یا هەر وێشا کەم لتفیشا کەردٚەن؟». واتم:« مامۆسا گیان دەی من چووزانوو. من نە سەروو سیریەنا و نە … پیازی». مەراسم تەمامیا و من هەر فکروو ئانەیەنە بێنێ کە ئەگەر سەلتێچ لوایا مەدٚرەسە و سەوادٚش بیایا چانەیەنە بێ یوە ئەچی داستان واچا بۆ، چوون ژەنی فرێچ بەشداریشا کەردٚەبێ. با بلوە یانە ماچۆ بە ئەدٚایام و سەلتێ ئێتر گۆش نەدٚارا بە لالۆ حەمەی. ئیشەڵڵا ئەگەر مەنیمێ ساڵێوتەر، سەلتێچ ماروو چەنی وێم بەش شوەکەش بازو چوون دەزگیراندارەنە!

وەلی فەتاحی

 hewraman
  • باروٙڵ و میٛمانەکەش

    باروٙڵ و میٛمانەکەش  شەوێوه‌ باڕۆڵ مێمانش بێ و سەرقاڵوو قسەکەردەی چەنی مێمانەکەیش بێ،…
  • یانەو فەتەی میٛمانیٛشا هەنیٛ

    یانەو فەتەی میٛمانیٛشا هەنیٛ ئەژنیەنش و نەمسانش. حەتتا مەکیچشا ئاردٚیٛبیٛنیٛ چەنی ویٛشا! ن…
  • ڕازەو مروٙچەی و مەشوولەی

    ڕازەو مروٙچەی و مەشوولەی زمسان بێ ، هەرد و درەخت جلێ چەرمێش کەردێ بێنێ وەر، مەشولێچ یانە و…
Load More In ئەدەب و هونەر

وەڵامێک بنووسە

پۆستی ئەلکترۆنیکەت بڵاو ناکرێتەوە . خانە پێویستەکان دەستنیشانکراون بە *

بابەتو دماتەری

مێللەتو گوٙرانی ئەوەجەش بە دیالۆگێوی سەراسەری دوور جە غەرەز و غەرەزکاریەن

 مێللەتو گوٙرانی ئەوەجەش بە دیالۆگێوی سەراسەری دوور جە غەرەز و غەرەزکاریەن نویسەر: مە…