یانە ئەدەب و هونەر ڕەوایەت و دژەڕەوایەت؛ دوێ دەقێ ئازادٚێ و بەراوردکاریێوە نیشانەیی

ڕەوایەت و دژەڕەوایەت؛ دوێ دەقێ ئازادٚێ و بەراوردکاریێوە نیشانەیی

76

ڕەوایەت و دژەڕەوایەت؛ دوێ دەقێ ئازادٚێ و بەراوردکاریێوە نیشانەیی

زەنجیرە باسێ تێئۆریکی- ڕەخنەیێ شێعرێ سەردەمیانێ(ڕەوایەت و دژە ڕەوایەت جە دوێ دەقێ تازێنە)

عادڵ محەمەدپوور

ڕەوایەت فرەتەر ڕەگەزێوە تایبەو داستانێن بەڵام شێعرەیچ چە کلاسیکە و چە شێعرێ سەردەمیێ(ئازادٚ و غەزەڵە)، چنی ڕەوایەتی و ڕەوایەتمەننی پێوە دەسەملانێ بێیێنێ و ئی ژانرە چی هونەرسازەیچەنە بێبەشە نەویێنە. شێعرەو فارسیچ هەر پاجۆرە بیێنە. جە سووچە دیاو ڕەوایەتمەننیوە ڕەوتەو شێعرەو فارسی قۆناغێ جۆراوجۆرێش بڕیێنێ: شێعرەی ئەوساییە، شێعرەی سەردەمیە و ڕەوتەجۆراوجۆرەکاش: نیمایی، سپید، حەجم، مەوج نەو، مەوج ناب، حەرفی و دمامۆدێڕن و…

مەبەستوو شاعێرێ نیمایێ جە ڕەوایەتی، یۆگێریی ئەستوونی و سەرتارەواری شێعرێ بیەن، پێسەو تاڵە بەنێوە کە گردٚوو ئەندامەکاو دەقی پێوەرە گرێ بدٚۆنه‌( پيوستار عمودی شعر). بەڵام شاعێرێ دمامۆدێڕنێ(دمانیمایی و…) جۆرێوەتەر دیاینێ پەی ڕەوایەتی. ڕەوایەت جە ویرۆکەو ئادٚیشاوە یانێ: تەشک ماڕای، فرەدەنگی دەقی، مەرگوو بنیەری، بەینادەقی، ناحەتمیەت و گومانخێزی، تالێق، ناوەندگورێزی، ماڵایرەو بنیەری جە دەسەڵاتوازی، مەودا نیایرە(فاصلە گذاری)، ڕا ئاچۆخکەردەی پەی بەشداری وەردەنگی و ئێستەیەو مانایتەرێ و کامڵ کەردەیشان. چی ویرۆکە شێعرێنە ئی نیشانێ گردٚ وێشا جە دژە ڕەوایەتی و بڕیایرەی جە ڕەوایەتی خەتی، زەمانی خەتی و مانای خەتی و سێناعەتی کڵێشەیی مویناوە.

ئینە نیشانێوە نەبیەن کە شاعێرێ دمامۆدێڕنی جە ڕەوایەت و بەیانڕەوایی نکوولیشا کەردە بیەن، چەپەوانە هەوڵێچشا داینێ پەی بەرجەستەنمایی ڕەوایەتی بەڵام بە شێوازوو وێشان: کوت کوت کەردەی ڕەوایەتی(فرە تەوەری) و ناسازنماییشا(تناقض نما و چند کانونی) ئینەیچ جیا بیەن چنی  ڕەوایەتێ سەرڕاسێ و یەکپارچێ و خەتی کەردەیش. ئی نیشانێ مێکانیزمێوە بیێنێ پەی ئانالیزکەردەی ڕەوایەتمەننی شێعرێ دما وەڵکەوتێ جە باقی نەحلە شێعرەکایتەری. جە ڕاسینە بەیانڕەوایی پەی شاعێراو پەسامۆدێڕنی ڕەخسنای فەزایێوە تالێقی و چەرمێ بیەن کە وەردەنگی بارۆ سۆسکە و چەلەنگنۆش. ئی جۆرە ڕەوایەتە جە ئەزموونوو ئی شاعێرانە فێرکانسشا پێویۆنە: رضا براهنی، علی باباچاهی، مهرداد فلاح، بهزاد خواجات، حافظ موسوی، عليرضا آبيز، علی عبدالرضايی، بهزاد زرين پور و…

…………………….

وەڵتەر واتەبێم: “چن شاعێرێوە شێعرێ ئازادٚێ هورامی بە نیشانەکاو شێعرێ وەڵکەوتێ ئارۆی(دما مۆدێڕن) نزیکێ بیێنێوە.  ئی تاقمە شاعێرێ بە وینگایێو تازە، نە تەنیا جە وێنێ و مووتێفێ چەقبەستێ چاوەڵیێ، بەڵکوو تاوانشا جە ڕەوایەتێ شێعرێ ئازادێ هورامیێچ، پا دەقاوە کە دریاینێ بەر، شکست وەشکەرانە و جە نۆرمێ خەتیێش بویەرانە و خێزنەرانە وێشا بە شێوازی پەڕ مۆدێرن و ئارۆیانەتەر، نزیک بکەراوە و چێوێ نەواتێچ بواچانە.”

وەروو ئانەیە بە تەرزێوە پراکتیکی، پۆلێوە نیشانێ شێعرێ ئاوانگاردێ و دمامۆدێڕنێ بشناسمێنە و بزانمێچ ئی ڕەوتە ئازادٚێ ئێمە بە شێوازێ جۆراوجۆرێ قسێش پەی واتەی هەنێ و نیشانە مدٚۆنە کە شاعێرێ ئی ڕەوتێ هەریۆ بە شێوازوو وێشان ئەزموونێ خێزنانێ و ئێژانەو دەقیچ لاو نرخشناسیەوە پارێزیان.

چی دەراوەنە دوێ دەقێ تازێ “کاک سابیر عەزیزی و کاک مەهدی ئەبری”ما داینێ یۆرە. ئی دوە شاعێرێ هەردوی شاعێرێ ئازادٚواچێ هورامینی و ئی دوە شێعرێ جە یەک زەمانیچەنە خێزیاینێ. ئیسە بە سەنگەو “ڕەوایەتمەننی و ڕەوایەت گورێزی” کێشانەشا کەرمێ (بەراوردکاریی تەتبیقی)، بزانمێنە چی گێڵە نیشانەیینە چێشما دەس گنۆنە و هەرکام جە شاعێرا چنی لواینێ گژێ ئی ڕەگەزە ئەدەبیەرە.

ئەڵبەتە ئینەیە بوزوونە سەرش کە هەر دوە دەقەکێ ساختارشان ئازادٚەن، زانستوو سیمیۆلۆژی سەلەمنۆش کە گردٚ دەقێوە ئازادٚ، ئەگەریچ سەرکەوتێ بۆنە، نمەتاوۆ ئاوانگارد فەرزیۆنە، چەپەوانەیچ هەر ئاوانگاردێوەیچ دەقێوە سەرکەوتە نیەن. ئینە ئانالیزوو نیشانەکا و تەرزەو پێوەننیشانە متاوۆ ڕادەو سەرکەوتەیی دەقێوە بیاونۆنە.

هەر دوێ شێعرەکێ جە حەنناو وێشانە ساحێبوو پۆلێوە دیاردێ و سێناعەتێ ئەدەبیێ و زوانیێ و ڤیریێنێ. بەڵام ئایێرەو من پەی ئی بەراوردکاریە کە نیشانکەردوو مادەو “ڕەوایەت”ین، کە بیەن مێکانیزمێوە پەی هەست بە جیاوازیشا و ئینەیچ پەی خێزنای شێعرێ و ڕاهەرمانەو شاعێرێ فرە ئاسایی مرمانۆ. چێولای ئی دوە دەقانە بە نیشانێ(M) و (S)، تاپۆشان کەرمێنە.

……………..

1) دەقی (M)، ئێستێعارێوە سەرەکین، بەزنای ڕەوایەتی باوی و لوان گژێ مەزموونێ چاوەڵیێرە، چنی ئانەی کە ڕەوایەتمەننیچەن و پەڕەن جە وردەڕەوایەتێ و هەرپاسە ناسازنمایی کەردەیشا:

هیچشا بە هیچوە ناستەن/ ئیتر وەرزیە پێسەو باقی وەرزەکا نیەن/

بە سەرئەنجام یا  بێ سەرئەنجام/ گرۆڵیەو وەشی یا تاڵی/

بەشیە جە خەتیە/ تیکیە جە تاکیە و…

هەرکەس جە ڕاوە ئاما/ سەرەگێجانەو کاڵ فامیشەنە

شێعریەش ئستفراق کەردە سەرشەرە/پەڕ جە حەسرەتو کەما و لۆ وەهاری.

شاعێر دمایی ئی وردە ڕەوایەتانە تەفسیر کەرۆنە و کۆتایینە پاڵەوانی سەرەکی ڕەوایەتەکەی(پرۆتاگۆنیست) کە پاییزەن، کەرۆش خێتاب و پەرسیێوە دماڕۆیانێش پەی سازنۆ کە هەر پاسە وەردەنگی کارا و گۆشەقوڵاخ شۆنەو حەقێقەتیەرە هەر وێڵەن و گێڵەش پەی کەرۆنە:

ئەرامەننە پاییز!

کام شەرمساریتا/ بە کام گەڵا

جە کام ڕەنگی/ بپۆشنۆرە.؟   

 ئی ڕاهەرمانێ جە شێعرەی پۆست مۆدێڕنەنە بە تەعلیق نامێش چۆ بریاینە. تەعلیق یۆتەرەن جە نیشانێ فرەتەوەری دەقوو (M)ین. تەعلیق ئاشنایی سڕیەی جە زوانی و مانایین کە جە ڕەوایەتی سەرڕاسوو شێعرێنە “شکست” وەش کەرۆنە و جە حاڵەتی خەتی مێنە بەر و بە قەوسی هێرمنۆتیکی، مەودا و مدٚرایش(فاصلە و مکث) مدٚۆ بە دەقەکەی، هەر پاسە ئی دەقە لیپەن جە ئی جۆرە مادانە، ئینە بیەن هۆ بەدی ئامای فەزایێو جیاواز و خوڵقنای وێنێ جۆراوجۆرێ.

بەڵام دەقی (S)، جە ڕەوایەتێوە سەرڕاس بەهرەش بەردەن و چا تاقە مەزموونییە(حەزانێ و دیاەردەکاش)، پەلکێش نەکریان پەی بەری و پیبۆنەوە وەردەنگ نمەتاوۆ ڕەتیۆنە و چنی ئانەی کۆمەڵێوە هونەرسازێ زەریفێچش چنەنێ کە تا کۆتایی شێعرەکێ شۆنەماو هێڵێشا(خطی) هەر بەردەوامەن:

جە ئاخێزوو شێعرەکێوە:

“وەختێ… پۆپەو پەنجاس کێشیۆ باڵاو پەنجاشەرە

تا مەس کەوتەی حۆت پەشتێ چەماش و

تا پژگیای بوەو وەشەسیایی و موعجزێ تازێ و

تا مێحرابوو باوشێ و

تا ئامای ئامای تاقانەکێش و …”

گردٚ دەس مدٚا دەسوو یۆیوە و نیشانە مدٚۆ کە ڕاوی حەقێقەتی دیاریکریاو وێش وێستەنوە. حەقێقەتیچ پەی ڕاوی(شاعێر) هەمان کاراکتێروو شێعرەکێشەن و هەمان تاقانەکێش و وەشەویستەرینەشنە و کەسەشنە و دنیایچشنە… پیجۆرە حەقێقەت و پەنەواز پەی ڕاوی بە ئامای کاراکتێروو ڕەوایەتی، کونێشوو شێعرێ ئیتر تەمامیۆنە و زەینوو وەردەنگیچ ماتڵوو چێوێتەری نیەن و ئاوی کریۆنە ملوو ئی ئاویریرە…

٢) سووچە دیاو(زاویە دید)ڕەوایەتگەروو دەقوو (M)ی یەرۆم کەسی نادیار یا دانای کوللەن. ئی تەرزە دیایە سوودش ئینەنە کە نویسەر مەردە فەرز کریۆنە و ئینە ڕاوین کە زەمانی حاڵنە، پێسە بکەرێوە چەمدٚاری، هاگادٚار و زاڵەن ملوو کارەساتوو شێعرەکێرە و سەیروورەت و جمەشا مدٚۆ پەنە:

نا نمازانە/…/ پیس/ چەپەڵ 

بۆگەنەن پاییز…/ پێشخوانیە مجیایندێ  کۆڵانە چۆڵەکاو تاریخیرە

جە تەعامیە فەقیرانەی/ نمەئێژدێ  کتیەیچ بوەتا بکەرۆنە…

هیچ و پوچەکا/ مەژگتا  ئەگەر بۆنەتا/ هەوکیمیەن

دلێگەڵاتانە تەقان/ و…

گۆشە دیاو ڕەوایەتگەروو دەقوو (S)ی یوەم کەسی تاکەن و شاعێر وێش یۆن جە کاراکتێرەکاو شێعرەکێ، بەڵام پێوارەن. ئی جۆرە ڕەوایەتە، ماهیەتش تاق تەوەرەن، بەڵام چوون نویسەر و ڕاوی ئینای پێوەرە و حاڵی حازر حوزوورشا هەن و دەسەڵات مرمانانە، ئاراستەو ڕەوایەتەکەی عالتەر و عانیتەر متاوۆنە چنی وەردەنگی پێوەننی بەرقەرار کەرۆنە . بە دیمێوتەرشەرە، چەپەوانە دەقوو (M)ی بنیەر حزوورش نیەن و مەردە فەرزیان(مرگ مولف)، نویسەروو ئی دەقیە پەشتەو سەرەو ڕاوینە وێش پەنا دان و ئامێرانە کارەساتەکاو ڕەوایەتی ماچۆوە بە ڕاوی و پلانەو خێزناکەی ملۆ وەرەو. ئینە نیشانە مدٚۆنە کە بنیەر چنی ڕوڵ وینای سەرەکی ڕەوایەتی، دەسەڵاتچی شێعرەکێچەن و شێعرەکێش یەخسیروو ئی دابیە کەردێنە.

پۆپەو پەنجام کێشیا…/ وەختێ لچێم… / زوانم  ڵاڵ بیی…

قیبلێم فاڕیا…/ ئازیزەکەم/ زانام ناحەزێ زۆڵێنێ…

شێعرەم/ شارەوەندێ بەھەشتینە…

بازە بێدەنگیم/ دەشتە بۆ…/ ویرەوەریەکام

پێسەو ویارەو  گەلاوێژی  دیارێنێ…/ دەنیێمەنی

٣) وەڵتەر جە بارەو دوێ شێعراو کاک سابیریوە واتە بێم:

“تینەتوو ئاوانگاردێ چنی سێناعەتێ خەتیێ و تەجرۆبەکریایێ و تاریفکریایێ هیچ گرێبەسێش نیەن. دیاردێوە کە ئێژای جەوهەریێ و زەریفێ مد٘ۆنە بە ماناو جەماڵ شناسیش، وڕنای سنعەتە شەکیل و تەشکە ڕازوانیەکاو چاوەڵین. سنعەتێ پێسەتەرکیبێ تەشبیهیێ، ئێزافیێ،تەرادۆفاتێ، تەناسوباتێ و

جەماڵ شناختی شێعرێ ئاوانگاردێ دیاردێوە دێمۆکراتیک، پەتی و ئازادٚەن. ڕوەکەردی ئەسڵی ئی جۆرە شێعرێ لادایەن جە ڕاسیۆناڵی زوانی. ڕاسیۆناڵ یانێ لایەنێ وێئاگای زوانی و چوارچۆی عەقڵی- کڵێشەییەکاش. بەدی کەردەی ئی ئامانجێ تەنیا بە وێران کەردەی و گەمەکەردەی نیشانەکاشا قەوام گێرۆنە و بۆ بە زەمینە پەی ئاوانگاردیزەکەردەی زوان و کەرەسەکاو دەقی”. شاعێر توشوو هەمان ڕوەکەردی وەڵینی بیەن. ئی تەرکیبێ زەریفێنێ و جە حەزانەشێعرێنە یاگێشا تایبەنە و شاعێر بە ئاردەیشا، لۆمە نمەکریۆنە، بەڵام مشۆم دوێ خاڵێما وەرەچەم با: یۆ ئانە کە ئی گەمە زوانیێ دەلالەتوو ئی شێعرێشا وستەن چێروو کەڕە سێبەرەو وێش، یۆیچ چنی فەلسەفەو پەتیگەری و دێمۆکراتیزەکەردەی جەماڵ شناختی ئاوانگاردی یۆ نمەگێراوە، چوون ئی ڕەهەندە شێعرێ، دژبەرەنە چنی هەر جۆرە تەرکیبگەرایی و شەکیل کەردەی و چن ڕەوایەتی شێعرێ.

باڵاو پەنجاتەرە/ کزەو دەروونی/ شەرابوو لچا

مێحرابوو باوشێ/ ئەلفباو ماچا/ عێشقی چوزە کەر

هەناروو سینەی/ وانگاو ئامای/ لۆلاوو باڵای

خیابانو سیمای/ ویارەو  گەلاوێژی / و…

وەختارێو پی ئایێراوە، چنی شێعرەو (M)ی ئی بەراوردیە کەرمێنە گردٚ چێو چەپەوانە مرمانۆ. ئی دەقە جگەم یەک تەرکیبی(گرۆڵیەو وەشی یا تاڵی)، ڕووتیانەوە جە هەر جۆرە تەرکیبگەرایی. چنی ئینەیە شێعرەکێ بە گردین، هۆرگێروو دیاردەو جوانخاسیچەن، چوون بە کۆتایی شێعرەکێ، دالەکێ نەمدراینێ و ڕێچکەو سووڕەیشان بەردەوامەن. ئی ڕاهەرمانێ یانێو هەوڵ پەی دێمۆکراتیزە کەردەی ئی ڕەوتە شێعرێ. با بزانمێ کە فەلسەفەو جەماڵ شناختی ئی دەقیە سەروو هونەرسازەو دژنمایی و ئایرۆنی(تناقض و طنز) تەشکەش گێرتێنە و گردٚوو دەقەکەی یەک ئێستێعارەن(ئەرامەننە پاییز)، نەک گەمە بە تەرکیبێ تەشبیهیێ و تەرادۆفاتێ ڕێچکەکریای و… 

هیچشا بە هیچوە ناستەن/ بە سەرئەنجام یا  بێ سەرئەنجام/

گرۆڵیەو وەشی یا تاڵی/ بۆگەنەن پاییز/ شێعریەش ئستفراق کەردە/

پێشخوانیە مجیایندێ  کۆڵانە چۆڵەکاو تاریخیرە/

عەزەمەتوو کائێناتیتا گلێروە کەردەن دلێ مەمیەنە/ و…

٤) دەقی (M)، چوون بنیەر مەردە فەرزیان و دانای کول ڕەوایەتگەروو دەقەکەین، پیبۆنەوە چن ڕەوایەتی و فرە کانوونە و شەککاکەن، ڕاش ئاچۆخکەردەن پەی وەردەنگی یا وەردەنگەکا کە چەلەنگیانە و جە مانازایی و ئێستەیەو نیشانەدەلالیەکاو دەقەکەینە بەشداری بکەرانە.

جە دەقی (S)نە، بنیەر حوزوورش هەن و گرد چێوێوە مەیلەو ئادٚی ئاراستە کریان(نۆستالۆژی و یاوای حەزێ تاسیێش) و تاقە پێرسپێکتیوو دەقەکەین و ڕاوی فەقەت بنویسەن، پیبۆنەوە تاک ڕەوایەتی و تاک کانوونون، جگەم ئا وێنا تەرکیبیا کە حزوورشا هەن و پەی بڕێوە وەردەنگایچ ڕازیکەرەن، بەڵام تاقمێوەیچ سەرسامێ نمەبانێ پەی شۆنگێری دمایی ماجەرای، چوون تەماکێ و دالەکێ بڕیاینێوە و ئیتر مانازایی نمارا شۆنەو وێشارە و درێژەو بەشداریشا چێولای پەی وەردەنگی مەحاڵەن.

پەنەوازم بە ئاماییت ھەن/ شەکەتی گرد وەختێم  تکیۆ

خیابانو سیمایتەنە/ ویرەوەریەکام/ پێسەو ویارەو  گەلاوێژی  دیارێنێ

وەختێ ئامای وەشەویستەرین کەسەنی/ تاقانەکێ…

……………………………………………….

هیواو سەرکەوتەی پەی هەردوێ شاعێرێ

……………………………………………….

ئینەیچ کامڵ هەر دوی دەقەکێ:

………..

نا نمازانە/ هیچشا بە هیچوە ناستەن./ ئیتر وەرزیە پێسەو باقی وەرزەکا نیەن

بەشیە جە خەتیە/ بە سەرئەنجام یا  بێ سەرئەنجام/ تیکیە جە تاکیە

گرۆڵیەو وەشی یا تاڵی./ بێزیانم/ پیس/ چەپەڵ/ بۆگەنەن پاییز.

هەرکەس جە ڕاوە ئاما/ سەرەگێجانەو کاڵ فامیشەنە

شێعریەش ئستفراق کەردە سەرشەرە/پەڕ جە حەسرەتو کەما و لۆ وەهاری.

پێشخوانیە مجیایندێ  کۆڵانە چۆڵەکاو تاریخیرە/ جە تەعامیە فەقیرانەی

نمەئێژدێ  کتیەیچ بوەتا بکەرۆنە./ چە حەقیرێندێ/ عەزەمەتوو کائێناتیتا گلێروە کەردەن دلێ مەمیەنە و گەورەتەرین گرفتو ژیوایتا بە کام دەس گێرتەیشەن. /هیچ و پوچەکا

مەژگتا  ئەگەر بۆنەتا / هەوکیمیەن/ دلێگەڵاتانە تەقان./ ئەرامەننە پاییز

کام شەرمساریتا/ بە کام گەڵا/ جە کام ڕەنگی/ بپۆشنۆرە.؟/    

 مەهدی ئەبری

…………………………………………………………………

وەختێ…/ پۆپەو پەنجام کێشیا/ باڵاو پەنجاتەرە/ کزەو دەروونی ھۆر خێزیا

دووکەڵێ سیاوی ئاشناش/ بە دزیەوە چەنی بووڵێ/ ئاورد سەما                                                                                                                                                              

چەمێت شنیەو/ تا حۆت پەشتێ مەسێ کەوتێ/ وەشەسیاییت

بوەش پژگیا/ مۆعجێزێ تازێ / ڕوەش دا…/ کتێبێتەرو و  وەحیێ  ئاما

وەختێ لچێم/ شەرابوو لچاتەنە مەسێ کەوتێ/ خەتەو ئێستێوای مەرزیارە

زوانم  ڵاڵ بیی…/ زوانوو سڕی جە ئەدێ بیی/قیبلێم فاڕیا…

مێحرابوو باوشێتەنە/ بیا بە دەروێش/ئەلفباو ماچام تۆریا

دەفتەرو جەنگی چەرمە بی/گرد بیی سۆڵحە/ئیسە زانام چننە وەشا

وڵات بێ جەنگ/ وەختێ واتت…/ ئازیزەکەم

زانام ناحەزێ زۆڵێنێ/ نمازا / عێشقم چوزە کەرۆ

ئەر سەلەموو گردو/ درواشا کەردە بۆ/ وەختێ چەنیت پیاسکە کەرو

شێعرەم / شارەوەندێ بەھەشتینە/ دەمش بۆ ھانەو کەوسەری

جیاو  ھاواری …/ بێ خەمەنە/ ئارام  ئارام/ باخوو ھەناراو  سینەینە

وەرم  بەرۆشۆ/ خاس  خاس  مووسۆو/ حەر وەختێ مەی

بازە بێدەنگیم/ دەشتە بۆ/ کەویرو قووڵی دریای بۆ/ چەمێم پتەپتشا نەبۆ

پەنجێم / ئازارەو  سرگی  گێرا/ دەروازەو شارێ/ باوشیم بۆ

پەڕچینوو بوەێم پەی کەرە…/ وەختێ تۆ مەی/ چراوە سوورەکێ

سەوزێ با…/ حەز کەرونە/ دایم دایم/ ئاماینە بیی/ بێجگەم ئامای

حیچ نەکەری…/ ئێمزاو دووری و خواحافێزی/ دەی ئاویرە

وەختێ تۆ مەی/ دەنگت/ زەنگۆڵێ ژیوای/ زرنگناوە

پەنەوازم بە ئاماییت ھەن/ تا ڕەنگەت مجیۆ ڕۆخسارمەرە

جە وانگاو ئامایتەنە/ شێعرەم  ئاننەتەر هارە بۆ/ ھەیوانە لۆلاوو باڵایتەنە

شەکەتی گرد وەختێم  تکیۆ/ خیابانو سیمایتەنە/ ویرەوەریەکام

پێسەو ویارەو  گەلاوێژی  دیارێنێ/ وەختێ ئامای وەشەویستەرین کەسەنی

تاقانەکێ…/ دەنیێمەنی

سابیر عەزیزی

………………………….

سەرچەمە: ادبیات پارسی معاصر، پژوهشگاه علوم انسانی و مطالعات فرهنگی، سال ششم، شماره دوم تابستان ۱۳۹۵، صص ۱۲۵- ۱۵۰

………………………

* سیروان، شەممە ٩٨/٧/٢٠، ش ١٠٥٥

 hewraman
  • باروٙڵ و میٛمانەکەش

    باروٙڵ و میٛمانەکەش  شەوێوه‌ باڕۆڵ مێمانش بێ و سەرقاڵوو قسەکەردەی چەنی مێمانەکەیش بێ،…
  • یانەو فەتەی میٛمانیٛشا هەنیٛ

    یانەو فەتەی میٛمانیٛشا هەنیٛ ئەژنیەنش و نەمسانش. حەتتا مەکیچشا ئاردٚیٛبیٛنیٛ چەنی ویٛشا! ن…
  • ڕازەو مروٙچەی و مەشوولەی

    ڕازەو مروٙچەی و مەشوولەی زمسان بێ ، هەرد و درەخت جلێ چەرمێش کەردێ بێنێ وەر، مەشولێچ یانە و…
Load More In ئەدەب و هونەر

وەڵامێک بنووسە

پۆستی ئەلکترۆنیکەت بڵاو ناکرێتەوە . خانە پێویستەکان دەستنیشانکراون بە *

بابەتو دماتەری

مێللەتو گوٙرانی ئەوەجەش بە دیالۆگێوی سەراسەری دوور جە غەرەز و غەرەزکاریەن

 مێللەتو گوٙرانی ئەوەجەش بە دیالۆگێوی سەراسەری دوور جە غەرەز و غەرەزکاریەن نویسەر: مە…