یانە هەورامانی بشناسدیٛ ماموٙسا مەڵڵا «عبدالخالق»ی زاوەری و شوٙشمیٛ

ماموٙسا مەڵڵا «عبدالخالق»ی زاوەری و شوٙشمیٛ

80
ماموٙسا مەڵڵا «عبدالخالق»ی زاوەری و شوٙشمیٛ
حافێزەو پیری ماچی نەقشا سەروو وەروێوە کە تا وەرەتاوێوی داوەنە بۆ بە ئاوی، بەڵام هنوو زاڕۆڵەی پێسەنە نەقش و نگاری سەروو تەوەنێوە کە ئەپا سووک و ئاسانیە نمەکۆشیۆوە. دلێڕاسەو ساڵەکا دەهەو پەنجای بێ و هەڵای ئێنقلابوو ئێرانی سەر نەکەوتەبێ. من کەڵاسوو یەرۆموو ڕاهنمایی بێنێ و جە شۆشمێنە ژیوێنێ، بەڵام چوون شۆشمێ ڕاهنماییش نەبێ منیچ پێسەو ماباقی زاڕۆڵەکا دەگاو شۆشمێ بە پای پیادە ئێنێ پەی نەوسوودٚێ و ئەچاگا دەرس وانێنمێ. ساحبانی هەڵای دۆس و دژمەن تاقی نەکریێوە گنێنمێ ڕا و شەوێ کە هەوای تاریکش کەردٚەبێ و شەوە باڵش کێشتەبێ سەروو دنیایەرە، گێڵێنمێوە پەی شۆشمێ! مەوقعییەتوو جۆغرافیایی شوشمێ جورێو بێ کە تەقریبەن فاسڵەش تا نەوسوودٚە جە ئێرانەنە هەر ئاندٚە بێ پەی تەوێڵێ جە عێراقەنە. ڕەنگا ئی مەوقعیەتیە بە نۆعێو خەڵکوو دەگاو شۆشمێش تا ڕادێو جە دەگایا تەری جیا کەردٚەبێۆوە. شاراوە نیا و ئینکار نمەکریۆ کە شۆشمێ فرەتەر بە گۆرانیێ و گۆرانی واچاوە و هۆرپڕەیەو هۆرپڕەکەراوە مەشهوورەنە تا بە چێوانی تەرەو.
وری وری کەوتەرە دەگا کە گوایا فڵانە کەس و فڵانە کەس لواینێ شۆنەو مەڵڵا یەرە کە باراش پەی شۆشمێ. پەی ژەن مارە بڕیایێوی، ژەن تەڵاقدایێوی، سەروو زیارەتێوی و فاتێحە وانایێوی مەڵڵا لازما. هەر خاسا دەگانە مەڵڵا بۆ. بیەیش خاسا تا نەبیەیش. گرد دەگایێوی مەڵڵاش هەن ئێمە چیمانەبۆ؟، ئاخۆر دەگاو ئێمە تا ئیسە بەڕەسمی مەڵڵاش نەبیەبێ و خەڵکوو دەگایا تەری بە گاڵتە و بە تەنزە واچێنێ شۆشمێ مەڵا نمەگێرۆ وێ و خاکش مەڵڵا نمارۆ! فەرامۆش نەبۆ کە مەڵڵا فایێق و مەلا کەریم بێنێ و تەنانەت وێچشا شۆشمەیێ بێنێ بەڵام سەوادی چامنەشا نەبێ و بەهەزار حاڵ و نەحاڵێ ئەلف وبێ بەرکەرێنێ و پەنەشا واچێنێ کۆلکە مەڵڵا. حەتتا نەزانێنێ ژەنیچ مارە بڕا! عەسر بێ کە قاڵ کەوت دەگا و واتشا: ئامێوە و مامۆسا مەڵڵا «ئەولخالق»ی زاوەریشا ئاردٚەن چەنی وێشا. دمای دوێ یەرێ ڕوا خەڵکوو دەگای یانێشا داپەنەو و تفاقشا پەی ڕازناوە و دەسشا کەردٚ بە خزمەتکاریش. ئێحترامش لاو خەڵکیەو بێ حەد و شمار بێ. یەواش یەواش جوانەکێ ڕوەشا ئاردٚە ڕوو بە مزگی و منیچ یۆ ئەچا جوانا بێنێ کە دەسم کەردٚ بە نما کەردٚەی و قۆرئان وانای. وەڵێ ئانەیە مامۆسا تەشریف بارۆ پەی شۆشمێ خەڵک، فرە کەم ئامۆشیەو مزگی کەری و تەنیا لالۆ«مچە» بێ کە پەلە پەل وەروو ئانەیە یۆتەر بڵنگۆکەی نەگێرۆ دەسەو، بانگەکەی دێ و ئەحیانەن چەنی چندٚ نەفەرێو تەری نماکێش کەرێ و زیێرە.
مامۆسا ئەولخالق پیایێوی مێهرەبان و وەش بەرخوردٚ بێ . چەنی پیرا پیرانە ڕەفت کەرێ و چەنی زاڕۆڵا مۆتەوازحانە. ئێحترام نیێ جواناوە و ئەگەر کەسێویچ نما نەکرێ مامۆسا هەرگیز ڕوەش وەنە درژە نەکەرێ و سووک نەدٚیێش پۆرە. ئادٚ واچێ مشیۆم بە کردٚەوەت خەڵکی دەعوەت کەری پەی نما کەردٚەی و خودٚا شناسی، نەک ڕوو بەڕوو چێوێو واچی و پەشتەسەر چێوێو تەر. مامۆسا هەرگیز تەلاشش نەکەردٚ تا چایخانەو دەگای کە دەقێقەن تەبەقەو سەروو مزگیەکەیەو قەرارش گێرتەبێ، تەعتیل کەرۆ! هەرکەس دڵش پەو بیایا ئامۆشیەو مزگی کەرێ و هەرکەسیچ دڵش پەو بیایا چایخانەنە دوومینە و تەختە کەرێ! خەڵکی بە خیاڵی ئاسوودٚە زەماوندٚەکاشا کەرێنێ و دەس جە هۆرپڕای هۆرنەگێرێنێ و مامۆسایچ بەڕاسی بە تەساهۆل و ئێحترام دیێ خەڵکیەنە و ئەرزشەکاشا تەخریب نەکەرێ. دیارا مێدٚانوو هۆرپڕای پاڵوو مزگیەنە کەناروو بارەگاو «پیرمحەممەدٚ»یەنە بێ و هەمیشە مەرحووموو مامایم واچێ: پیرمحەممەد ئامانەنە وەرموو چندٚ نەفەرا و فەرماوانش من جە هۆرپڕای و گۆرانی واتەی و شادٚی خەڵکی ناڕەحەت نیێنا و تەنانەت وەشم مێ کە خەڵکی وەششا. مامۆسا ئەولخالق یۆ ئەچا مامۆسایا بێ کە ئەهلوو مۆدارای بە مانای کامڵش بێ و هەرگیز بە زۆر و ئیجبار و تووڕەیی چەنی کەسی بە گولی بەرخوردش نەکەردٚ. هەرگیز دەنگش بەردٚ نەکەردٚەو نەخوڕا ملوو کەسیەرە. ئارام و وەش قسێ کەرێ و بە سەبر و مەتانەت گۆش گێرێ پەی ئانیشا کە قسێ کەرێنێ. هەرگیز مینا شکێنیش نەکەردٚ و نەدٚاش دلێ زەوقوو کەسی. تەکەبور و غروور نەبێ جاڕەشەنە. سڵام و سەباحوو خەڵکی پاک و پۆختە ئەسانێوە و ئەگەر یۆیچ هۆشش نەبیایا سڵامش کەرۆ ئادٚ گۆرچ سەڵامش کەرێ و هەواڵوو وێش و زاڕۆڵاش پەرسێ. تا وا هۆشم بۆ و چادٚمایچ واتەبۆشا و گێڵنابۆشاوە، مامۆسا مەڵڵا ئەولخالق هەرگیز نە بە ڕەفتارش و نە بە زوانش کەسش نەڕەنجنا و پەی هەمیشەی وەشەویسوو شۆشمەیا مەنەو. بەڕاسی مێهرەبان بیەی و ئێحترام نیای بە خەڵکانی تەری ممکینا کەم ڕەنگ بۆ بەڵام هەرگیز فەرامۆش نمەبۆ، بە پێچەوانەیچش بێ ئێحترامی بە هەرکەسی ئادٚیچ هەر جە یادٚ نمەشۆ! بەڵام بە قەوڵوو فارسی «این کجا و آن کجا». یادٚش بەرزا و هەر مەنۆوە دلێ دڵوو شۆشمەیانە.
وەلی فەتاحی
98/6/5
  • پیران و ژیران

    پیران و ژیران پیر، لاو گوٙران زوانەکانوە، مەفهومێوە مانادار و ئەرزشمەند بییەن و هەن. پیر ج…
  • هەملقوانی

    هەملقوانی هەملقوانی: ڕازێوە وەشەی هەورامیە، نویستەی و ئەوەوانای گونا ڕاپەیما، فەرماودیٛ گو…
  • ئارسن

    ئارسن  کابرێوە مەسیحی بوٙ کەشاروو ڕەشتینە جە ئەۮای بوٙ ، دەورەو ئەوەڵوو دەرزوەنای هەر…
  • پیران و ژیران

    پیران و ژیران پیر، لاو گوٙران زوانەکانوە، مەفهومێوە مانادار و ئەرزشمەند بییەن و هەن. پیر ج…
  • هەملقوانی

    هەملقوانی هەملقوانی: ڕازێوە وەشەی هەورامیە، نویستەی و ئەوەوانای گونا ڕاپەیما، فەرماودیٛ گو…
  • ئارسن

    ئارسن  کابرێوە مەسیحی بوٙ کەشاروو ڕەشتینە جە ئەۮای بوٙ ، دەورەو ئەوەڵوو دەرزوەنای هەر…
 hewraman
Load More In هەورامانی بشناسدیٛ

وەڵامێک بنووسە

پۆستی ئەلکترۆنیکەت بڵاو ناکرێتەوە . خانە پێویستەکان دەستنیشانکراون بە *

بابەتو دماتەری

پیران و ژیران

پیران و ژیران پیر، لاو گوٙران زوانەکانوە، مەفهومێوە مانادار و ئەرزشمەند بییەن و هەن. پیر ج…