داستانە

93

داستانە

ئەوسا … زەمانوو زووی … هەر فرە زوو … مەزانوو کەی؟ تۆ واچە هەزار ساڵێ چێوەڵتەر … من ماچوو گێرە فرەتەر …!!

کابرێوە خوڐای ڕوە سیاوە کەرڐ، پێسە واچی: “خوڐا قار گێرۆ مرۆچەی، باڵێش پەی وەشێ کەرۆ یا ڕواسە جە وڵەو وێش هۆرگێڵاوە، گەڕە بو!” جە قەوم و عەشرەت و وەڵاتیش پەشتیش هۆرکەرڐە و لوا پەناش بەرڐە بە هۆزێوە! ئەگەر حەسێبش کەری هۆزەکەو وێش بە گرڐ بارێرە چا هۆزیە کە ئاڐی پەنا پەنە بەرڐ، فرە فرە زیاتەر بێ و چاڐی هیچش کەمتەر نەبێ، بەڵام ئاڐ نەزانێ دەرێ ڕوەنینێ دوورۆ ئاوەڐانێنێ!
کابرا نامێش “زۆراب” بێ. زۆراب لوا و واتش ئامانا پەنام ئارڐێنە بە شمە. ئاڐ تا تاواش لا ئاڐیشاوە زەمەو هۆزەکەیش کەرڐەش! یۆشا واتش: “کاکە ئێمە گەورەما هەن و مشۆم پەرس پاڐی کەری.”
زۆراب لوا لا گەورەو هۆزی و واتش: “قوربان! من ئامانا خزمەتوو شمە، دەسوو قەوم و عەشرەت و وەڵاتیم ئاستەن؛ گەورەیی کەرە وەرم گێرە!”
زۆراب پەی وێ شیرین کەرڐەی تا تاواش ئاما شان و باڵوو هۆزی تازەیرە و تا تاواش زەمەو هۆز و وەڵاتوو وێش کەرڐەش! ….
گەورەو هۆزەکەی کە پیەوە ژیر و دنیا دیڐە بێ، پەنەش وات: “قسەکێت تەمام؟”
ـ “بەڵێ گەورەم!”
– گەورەو هۆزی سەرێش سووڕ دا و هەناسێوە کاڵش هۆرکێشت و جە جوابەنە پەنەش وات: “ڕۆڵە شیرینەکەم! کاکە زۆراب گیان! بە ژنیەی قسەکات یەرێ چێوێ ئامێوە ویرم:
۱ـ ماچا جە شارێوەنە جەماعەتێ ڕەفێقێ بێنێ و بەینشا فرە وەش بێ. ئاڐێ عاڐەتشا پاسنە بێ گرڐ ڕۆ دوەشەمێوە دەورە مێمانیشا بێ و بە نۆبە، مێمانی دێنێ بە یۆترینی. ئاڐ پی جۆرە هەم گلێرێ بێنێوە دەوروو یۆترینی و هەم شەونشینیچ کەرێنێ.
ئەگەر کتوپڕ چی ڕۆنە یۆشا مێمانش بیایە، بەرێش چەنی وێش. ئاڐێ بەینوو وێشانە پی مێمانە مڵۆزمیە واچێنێ “قوڕۆمساخ”!! جا ئەگەر مێمانەکە چەرڐاوەڕوو و بێ ئەدەب بیایە و زیاڐە قاچێش کێشتایەنێرە، پەنەش واچێنێ “تەرەس”!! ئینەتە بۆ.

۲ـ زانی چی کەرگە کڕە گنۆ؟ …
چوون قەرارا جە ژیوایشەنە فاڕ و گۆڕێوە گەورە ڕوە بڐۆ. قەرارا تۆرمش دنیانە مەنۆ و دەوامش بۆ. ئاڐە زانی چی هەیا هەیا قرتنۆ و بێ قەرارەنە …؛ چوون بەڐەنش تووشوو یاوی بۆ و گڕ مسانۆ. بە پاو وارۆسکەی مشۆم حەرارەتوو بەڐەنیش یاوۆ ڕادایە کە هێڵەکێ با بە جووجەڵێ. کەرگەی داماگە ویس و یەک ڕۆ نیشۆ سەروو هێڵا و دایم جە بێ قەراریێنە قرتەش مێ. ئاڐە چی ماوەنە تەنیا پەی لێقنە کەرڐەی مزیۆرە، ئاڐیچ وەروو ئانەی هێڵەکێ پیسێ نەبا! گجار ڕەوتوو ڕێنە دوێ دەنڐووکێ شانۆ و ئانە گرڐوو وارڐەیشا! جا کرژ ملۆە سەروو هێڵەکا تا دەماشا نێرە واری و نەخرابیا و …
مەگەر خوڐا وێش بزانۆ ئی کەرەگە داماگێ چنڐ ئێش و ئازار و مەینەت وینۆ؟ ئەگەر دەسش دەی وەنە تەنیا چنگێ پێشێ و پەلێش مەنا!
جا شۆنەو ویس و یەک ڕوارە کە جووجەڵێ دلێ هێڵەینە جووقیا، گنۆ وەڵێشا و بەرۆشا چێو وارڐەی. ئاڐە هەرچیش دەس گنۆ بە دەنڐووک ورڐش کەرۆ پەیشا تا وەش تاوا وەراش … وزۆشا چێروو پەل و باڵیش تا سەرڐشا نەبۆ و جە بەڵاو داعبایا ئەمانەنە با … ملۆ گژێ گیاندار و بێ گیانیرە تا لەتمە نەوەرا و …
جا زانی نامەرڐتەرین و بێ وەفاتەرین کەس بە ئی کەرگێ کێن؟
با پەنەت واچوو هەر ئا جووجەڵێنێ کە پاسە یاونێش پەنە!! ئاڐێ تەنیا شۆنەو چنڐ ڕوارە ئەوەڵ کەسەنێ کە پڕا کۆڵێ ئەڐاکێشا!! نەختێ گەورەتەرێ بیێ، ئەوەڵ کەسەنێ کە سەروو دانێ بە دەنڐووک شنیا سەر و پۆپوو ئەڐاکێشا و … ئینەیچتە بۆ.
۳ـ ماچا کابرێوە بۆ نامێ “فەرەج”ی. فەرەج ڕوێ جە ڕوا چەنی برێوەش گژیۆ. ئاڐ نەختێ ناتەمام بۆ. فەرەج داخیێنە سەرەو وێش هۆرگێرۆ و مازۆ جیا. واچمێ خەڵکوو دەگێوە هەورامانی بۆ و ملۆ پەی شارەزووری! کەس شۆن و قوڵاخوو فەرەجی مەزانۆ ـ ئاخر چا دەورە و زمانەنە پێسە ئارۆی تکنلۆژی نەبیەن و خەڵک بە سەختی هەواڵوو خەڵکیتەریش زانان ـ.

ڕوێ جە ڕوا لالۆ ڕەحمان کە کەرۆ برای گەورەو فەرەجی، چەنی تاقمێ کەس و کاری ملۆ کارەوان پەی شارەزووری. قسمەت پاسە بۆ ئاڐێ ڕوە منیا دەگێوە کە فەرەج پەناش بەرڐێنە بە ئاگەی. چاشتینگا بڕ مڐا نزیکوو دەگاکێ. مەگیرە دوورۆ فەرەج ئاڐیشا مشناسۆ. وەختێ کاروانیێ نزیکێ دەگێ گناوە، تووتێ دەگێ دەس کەرا گەفای و هەڵمەتە مڐا وەڵاخەکا. واڵاخێ تەرسا و سڵەماوە. کاروانچیێ بە تەوەنی شنیا تووتەکا …
فەرەج پەی ئینەی خەڵکی بڐۆ گژێ کاکەیش و هاوماڵەکاشەرە، بە دەنگی بەرز دەس کەرۆ دژمان دای پەنەشا و ماچۆ: هەورامی هۆ دایکەکەتان …. لێ بکەم، ئەوە کەڵەشێری ئەم ئاواییە ئەکوژن …!
لالۆ ڕەحمان وەختێ مزانۆ بە فەرەجی، ماچۆ کورە کەرەش ڕاو خوڐاینە واز بارە و زایما پە مەتاونەوە … فەرەج تا مێ شیرگیرتەر بۆ و هەیا هەیا دژمانەکا ئەوەخوا کەرۆوە!! ئاخرش لالۆ ڕەحمان ملۆ دەس نوونۆ دەمشەرە و مڐۆشەنە وەر و مارۆشۆ!!

کاکە گیان … ڕۆڵە شیرینەکەم! قەڐیمی فەرماوان: ڕۆڵەو کەسی بە کەسی نەبڕیان و یۆ ڕۆڵەو ئەڐاو وێش بۆ خاسا تا وێش وزۆ باوشەو دێڐێ!! ئەگەر جە من کەری و گۆش داری ئی ڕیش چەرمەیمە، تا حورمەتت نەمەڕیان سەرە وزیرە و ملیوە باوشەو قەوم و عەشرەتوو وێت. ئەگەر زۆرابیچ نەبی با زۆرابڵەو وێتا بی خاسا …!!
ئەگەر بەی دلێ ئیمە یا مشۆم قوڕۆمساخ و تەرەس بی یا نامەرڐ و بێ وەفا پێسە جووجەڵەکا یا فەرەج …!!
ئیسە کەیفوو وێتا، کامت پەنە وەشا؟”
زۆراب چوون دەنگوو دهۆڵیش دووراوەندوو لاوە وەش بێ، واتەش ئەگەر گرڐیچم پێوەرە پەنە واچا، هیچ قەیڐ مەکەرۆ …!!
ڕیش چەرمەی وەرگێرت، بەڵام وەروو وێشەرە واتش: “تۆ خوڐا کەسێ پەی وێش و قەوم و عەشرەتی و وەڵاتیش ئانە وەفاش بۆ، مشۆم وەفاش پەی من چێشە بۆ …؟!”

ساڵەش پەڕە نەکەرڐۆ … زۆرابشا ئنڐە تەوسناوە، بێزار بی جە وێش! ئاڐ پێسە گولوو دووروو ئاوای چاگە وێش بە سەربار زانێ و ئەرەویای هیچ مڵکیەتێ نەکەرێ. زۆراب ئاخرش پەشیمان بیۆ، بەڵام پەشیمانی چ فایڐە؟!
زۆراب ئیسە پاش جه گرڐ یاگێ بڕیا بێ؛ چوون نە تاوێ چێگە بەر بەرۆ و نە ڕوەیچش بێ بلۆوە دلێ قەوم و عەشرەتیش. ئاڐ ئاخرش سەرەو وێش هۆرش گێرت و کەسی نەزانا خاکوو کام مەغریبسانی بی نەسیبش.

سوبحان ئەمینی

  • پیران و ژیران

    پیران و ژیران پیر، لاو گوٙران زوانەکانوە، مەفهومێوە مانادار و ئەرزشمەند بییەن و هەن. پیر ج…
  • هەملقوانی

    هەملقوانی هەملقوانی: ڕازێوە وەشەی هەورامیە، نویستەی و ئەوەوانای گونا ڕاپەیما، فەرماودیٛ گو…
  • ئارسن

    ئارسن  کابرێوە مەسیحی بوٙ کەشاروو ڕەشتینە جە ئەۮای بوٙ ، دەورەو ئەوەڵوو دەرزوەنای هەر…
  • پیران و ژیران

    پیران و ژیران پیر، لاو گوٙران زوانەکانوە، مەفهومێوە مانادار و ئەرزشمەند بییەن و هەن. پیر ج…
  • هەملقوانی

    هەملقوانی هەملقوانی: ڕازێوە وەشەی هەورامیە، نویستەی و ئەوەوانای گونا ڕاپەیما، فەرماودیٛ گو…
  • ئارسن

    ئارسن  کابرێوە مەسیحی بوٙ کەشاروو ڕەشتینە جە ئەۮای بوٙ ، دەورەو ئەوەڵوو دەرزوەنای هەر…
 hewraman
Load More In ئەدەب و هونەر

وەڵامێک بنووسە

پۆستی ئەلکترۆنیکەت بڵاو ناکرێتەوە . خانە پێویستەکان دەستنیشانکراون بە *

بابەتو دماتەری

پیران و ژیران

پیران و ژیران پیر، لاو گوٙران زوانەکانوە، مەفهومێوە مانادار و ئەرزشمەند بییەن و هەن. پیر ج…