کوٙچ شامار

70

‍  تاقمێوە تلگرامینە کە تەنیا چوار نەفەرێش چەنە بێنێ، وەڵ جە گردیشانە نامێ و وێنەو شلێرێ کەوت وەروو چەمام; وێنێوە بە ڕووسەری فەقیانەوە; چیروو دارە گەورەینە نیشتێنەرە، چەولاوە هانەو غوسڵانیوە. دەنگوو تەنبوورەکێش هیشتای دلێو گۆشامەنە زرنگەش مەیۆ.

دماو ساڵانێو کە لوای بێنمێ پەی سەرانەی و پەردیوەری، پێسەو شەوێ، لا پاڵوو سیروانینە لوێنمێ ڕانە. پاڵوو ساجنارینە عەکسی یادگاریمان گێرتەبێ. ماقوو پردێوە بێبێنمێ کە ئەو دەسش مەعلووم نەبێ ڕووبە کۆگە مەلۆ. پردێوە کە ئاخرین عەکسوو یادگاری ماریا مینۆرسکی ئەچاگەنە گیریان.

دمایی داستانەو ئەدام و تاتەیم گێڵنابێموە پەیش، تاتەم جە سەفەر پەی پەردیوەری عاشقوو ئەدایم مەبۆ. ئەدام سونییە بیێنە و تاتەم…، تایفەو ئەدایم دڵشان نیەن کارەکەیوە. شەویە تاتەم دەسوو کناچەکێ مەگێرۆ و مەپڕان سەروو ئەسپی.

ئەپاسە کە وێش واچێ، ئا ئەسپە پەی وێش ڕەخشێوە بیەن. جە پەردیوەر هەتاکوو داڵاهوو یەک شەو مەلان. ئەدام واچێ هەر ئا شەوێ چیروو دار بەلوێنە ئەمن کاڵیانا.

نویستش: ستارەم نە پشت سەرنگوون کەردەن… کەلاموو میرزا سەیاڵین ژنەوتەنت؟

نویستم:ویەردەو هەر کەسێوە سڕ مەگوونەن. دەی خۆ مەزانی; ڕۆیەشا داود، بنیامین و پیر مووسا، کتووپڕ هەنترینی سەرو کۆ شاهۆیوە جە هۆرامان مەوینان، بێ ئانەی کە هەنگەری بشناسان، تەم مژ بیەن و هەر یەرەیچ ئاورا.

نانێوە دەسوو پیر مووسایوە بێینە، نانەکێ مەکەرۆ بە چوار لتێ و سەروو تەوەنێوە مەنیۆشەرە، کتووپڕ کوتە چوارمینەکە مەحفەو مەبۆ. چەم مەوزان دلێو چەمانوو هەنترینی و هەنگەری مەشناسان. بنیامین مەواچۆ ئا یارە چوارمینەیە بچڕمێ کە بەشوو وێش ئەستاناش چەنەمان بێ ئانەی کە دیار ببۆ. ئاد دلێو ڕۆجیارینە شاریانەوە، ئەپاسنەن کە یارو داودی بە دەنگوە مەچڕۆش، مەقاموو سەرخیوی جە بەرزی کۆ شاهۆیوە مەوانۆ، هەتاکوو ڕۆجیار پەشتەو دارە بەلوەکانە بزیۆ.

بۆریێوە دیسان بۆرێوە.

نویستش: ڕاسی ماما خورشیدەیچ چیروو ئاوارینە مەنێنەوە، مامۆساو تەنبوورێم بێ، هیزیکە زانانم، کەوتانیوە ویروو زاڕۆیم، ڕازەکانش، نەزریەکانش، و سفرە وستەیرەکانش، مێمانداریەکەیش، ئەمن و برایەکام چەڵەمەبەرێ کەرێنمێ. واچێ: هەی ڕۆ هەی ڕۆ بە پێشەو کەڵەشێری نەزری چەڵەمەبەرێ نەکەردێ…

ڕۆیەشا دیەم پاڵوو ڕۆخانەینە نیشتێبێرە، هەر جلێش شتێ و شتێ. لوانی سەرو سەرەیش. واتم ماما خورشید ئی گردوو جلانە هنێ کێنێ؟
واتش:هنێ مەردەکامەنێ.

شۆرێ و وزێ سەروو لەقو تفەکێ و دارە بەلوەکان هەتاکوو وشکێ ببانوە. دەمی مەغریب گردێش پێچنای و بەردێش، وستێش دلێو سەندۆقە قەدیمیەکەیش.

ئیسە ئادێچە لواینە. ماما خۆرشیدە. لوای هەر کام ئەچا بنیادمانە، ماڵئاوایی چەنی ئاخرین نەسڵێوەن کە هیشتای جە ویەردەی نیشانێوەش هەنە. ئەپی نیشاناوە دڵبەسەی عەجیبم هەن.

نویستم:ئەمنیچ چن جارێ وینای بێم. دلێو ئا یانە کۆنە و بێ دەلاقەینە، تاریک و کۆر، پەڕ جە بوەو داروو و پانسمان و زەخما.
داوام چەنە کەردە کە دەفتەرێوە سەندۆقەکەنە بەر باوەرۆ و بوانۆشوە.
دەفتەرێوەش هۆر گێرت، بە هەنکووسە لەرزۆکەکاشوە وەرەقش داوەنە و واناشوە

زەمین مەلەرزۆ هات هەیهات مەبۆ

واتش ئی بەیتێ جە دەفتەرێو کە هنوو دوەسەد ساڵا چێوەتەڵتەرین وانیاینە

واتش:ئیل بەیگی جاف یەرێ قەڕنێ چێوەڵ ئی ڕۆزگارشە دیەن. دیدەوەرەنە بیەن
_دەورانی دڵسەردی مەبۆ.

واتم :هەر پاسەیچە بیەن ماما خۆرشید
واتش:پیر بنیامین دلێو جەمۆ هەفتەنینە مەواچۆ: تەڵەکێش نیشانە دانی.قۆزەش پەنە ئاما. ئینە کەلاموو ئاخریش بێ: ئەی وێرای وێران، مەیۆم وەرەو ویر

بەینوو من و شلێرێچەنە ئیتر قسێوە نەمەنێبێ.

#کوچ_شامار_نشر_ئاگە_و‌_بان

فرهاد‌_گوران

هورگێڵنای‌:#سەعدۆڵڵا_خوونخام(شەهریار)

  • پیران و ژیران

    پیران و ژیران پیر، لاو گوٙران زوانەکانوە، مەفهومێوە مانادار و ئەرزشمەند بییەن و هەن. پیر ج…
  • هەملقوانی

    هەملقوانی هەملقوانی: ڕازێوە وەشەی هەورامیە، نویستەی و ئەوەوانای گونا ڕاپەیما، فەرماودیٛ گو…
  • ئارسن

    ئارسن  کابرێوە مەسیحی بوٙ کەشاروو ڕەشتینە جە ئەۮای بوٙ ، دەورەو ئەوەڵوو دەرزوەنای هەر…
  • پیران و ژیران

    پیران و ژیران پیر، لاو گوٙران زوانەکانوە، مەفهومێوە مانادار و ئەرزشمەند بییەن و هەن. پیر ج…
  • هەملقوانی

    هەملقوانی هەملقوانی: ڕازێوە وەشەی هەورامیە، نویستەی و ئەوەوانای گونا ڕاپەیما، فەرماودیٛ گو…
  • ئارسن

    ئارسن  کابرێوە مەسیحی بوٙ کەشاروو ڕەشتینە جە ئەۮای بوٙ ، دەورەو ئەوەڵوو دەرزوەنای هەر…
 hewraman
Load More In ئەدەب و هونەر

وەڵامێک بنووسە

پۆستی ئەلکترۆنیکەت بڵاو ناکرێتەوە . خانە پێویستەکان دەستنیشانکراون بە *

بابەتو دماتەری

پیران و ژیران

پیران و ژیران پیر، لاو گوٙران زوانەکانوە، مەفهومێوە مانادار و ئەرزشمەند بییەن و هەن. پیر ج…