یانە ئەدەب و هونەر باروو سەربارا فەتە ئەچی گرانیەنە عاشق بیەن!

باروو سەربارا فەتە ئەچی گرانیەنە عاشق بیەن!

80

ئەچی ڕوانە و پی وەزعە وەشێوە و سەی سەرەو حکوومەتیەو ئەپی هەرزانیەیە فرە و فراوانیەو و ئەپێ پڵاو و گۆشتە مشەمەریە کە متەنش وەروو دەموو خەڵکی، باروو سەربارا فەتە پاش کەردٚەنەنە پاڵاو و ژەنیش گەرەکە نە. ئینەنە ماچۆ: «گەدٚایی وەشا قۆرتێش خرابێنێ.» ئەی نەواتەنشا: «ڕواسە نەلێ وڵەرە هەژگێوەیچ بینێ قلیچکەشەرە.» قەوم و عەشرەت گردٚ مانیا چەنیش کە بەشکووم دەس کێشۆ و کوڵە دۆ. ماچۆ:« گەرەکەمەنە و دنیا بێ هەر مارووش. بە کەسی چێش. ئێنترنێتەنە ئێستێنەمۆ. دوێ مانگێن خەریکەنا. چل شەوێن نەوتەنا! چانەیە تەرسوو یۆتەر دەس وزۆ وەڵێ و بەرۆش. ئی گووشیە هیچ منفەعەتێوش نەبیەبۆ پەیم ئینەفعێشە بیێنە کە ژەنەو وێم یۆستێنەمەو و دنیا قسێم پەی کەرۆ دەسبەردٚار نیێنا. چەنی ئەدٚایچش قسێم کەردٚێنێ. ئەدٚاش جە وێش عالتەرەنە. عەلەلتەوارە چەنی وێش قسێ کەروو. واتەنش وێم حەلێبەنا هیچم گەرەک نیا. تەنیا کلکەوانێو باردێ کەردێ دەسموو قۆتاروو ئیلەڵڵا.» دەی یانەشا ئینا چکۆ؟ تارانیەنە. تا ئیسە دێنەت؟ ناوەڵڵا. ئەدٚا و تاتەش چێش بەدەسێنێ؟ نمەزانوو. منیچ درۆ یا ڕاس نمەزانوو فەتە مزانۆ! ئەجۆوم تاتەش شێرکەتش هەن. خودٚا ڕەحمما پەنە کەرۆ. من دڵم ڕازی نیا و تۆقای تۆقوو بەڵام عەبە دالێو نەرم بیەن. ئادٚیچ چێ نەرمێو! دەی بارە بووڵەو ئا بووڵگایا گردٚ کەرە سەرەمەرە. عەبە ئینەشە کەردٚەن دڵوەشی وێش و ماچۆ:« بەشکووم با بە دادٚلە پەی فەتەی و سەرە وەرێسێویچ دا دەسوو ئادٚیەو. جەحەنەم یا بۆ بە خانوو خانا و یام بۆ بە بووڵەو بانا. پیایچ تا دوور نەگنۆوە مەبۆ بە پیا. تۆ ئەجۆت من وێم ئەگەردەورەو شای سەروازیم نەکەردٚەبیایە، ئیسە ئی پیا بێنێ کە تۆ وینیم.» ئیجا ڕاس ماچۆ.ئاساڵە کە ئاما هیجبی من کارتوو سەروازیکەیش چەنی دوێ عەکسا دەورەو سەروازیش ئاردٚێبێنێ چەنی وێش. «عەجەبشێرەنە» مەشقشا پەنە کەردٚێبێنێ و چادٚمای نەقڵوو«چابەهاریشا» کەردٚەبیەن. تا سەروازیش تەمانابێ یەک ڕۆیچ نامابێ مەرەخەسی! ئەجۆت چابەهار نزیکا و ئینا لاو کرماشانیەنە. ماچا ئینا ئەوپەڕوو ئێرانیەو. ئنە دوورا بە ماشین چوار شەوانە ڕوێ نمەیاوی وەرەو. ئەجۆم سنی مەزەبێچەنێ. بەخوا هەر تەپەو دڵیما مێ. مزانوو عەبەیچ چارش ناچارا، ئا قسێ بە دڵ نمەکەرۆ. «حەراڵ واردٚەیش جە بێ دەسەڵاتیشا.» دەی چێش کەرمێ. «دەسێو نەتاوی بڕیش مشیۆم ماچش کەری.» کۆرەکەی زۆر پەی ئاردٚێنمێ دەسەڵاتما نیا. یانەو ئانەی شێویۆ ئی گووشی و مووشیشە ئاردٚەنە! ئنا ئێمە چکۆ و تاران چکۆ.
ئانا دنیا ما کەردٚ تکاکار دەس نمەکێشۆ. تەرسوو یا وێش کۆشۆوە یا سەرەو وێش هۆرگێرۆ و بەربشۆ بلۆ پەی تارانی و پەندٚێوە بارۆ سەرەو وێشەرە و ئاوەڕوو ئێمەیچ بەرۆ. خاسیش ئانەنە زەرش نیا و ڕاو تارانیچ نەمزانۆ. ماچوو:« ڕۆڵە گیان تۆ کە زەڕت نیا کەواپانتۆڵێوی تازە بسانی ژەنیت چەنی پەی مێ. ئینا ئاوردٚەت ئەی بە چێش وەیش کەری؟ دەی خۆ تاتەیچت فلس شکە نمە بەرۆ. بەهەزار حاڵ و نەحاڵێ و شوکر پەی خودٚای کە متاوو نانی هاڵیچما پەی بسانۆ.» مەزانوو باوڕ کەردێ یام نا. «خانە داری خەبەر داری.» ئینە مانگێوا گۆشتما نەسان. ئەگەرکەرگێوەیچ بسانمێ زاتما نیا بێخەم بوەرمێش کۆتێوش مازمێ، ئەی کۆت و پڕ نەکا یۆی خەوارە بزیۆنە و هیچما نەبۆ و خەجاڵەتما بەی پەنە. ئەوەرۆ خەریک بێ نان وەرێنمێ هەڵای دەسما نەبەردٚەبێ پەی تیکەی میەیمێ تەقەو بەرەی ئاما سەلتێ لوا بەرەش کەردٚەو. خێر بەیا ژەن و پیایو تەشریفشا ئاوردٚ پەی یانەیما. مێمان حەبیبوو خودٚایا بەڵام کە نەتاوات خاس وزیشاوە ڕا مشیۆم هەر لچێ کرۆچیە و بەشەو خەجاڵەتی بی. هر پاسە من و عەبە تەکەما داوە دما و واتما ئێمە بێ شمە ناوەش نانما واردٚ و ئانە ئیسە لواینمێ دما. خەریک بێ زەمینەکە عەبەی قووتە دۆ. چاشتەکێ کەمەبێ و فەتەیچ خۆ خواش چەنە ڕازی بۆ ڕەحم نمەکەرۆ بە چاشتێ و هەواڵوو مێمان و ئاوانی نمەزانۆ. پاسەیچ گەرەکشا ژەنی بارۆ. ئەجۆش ژەن ئاردٚەی چاشت واردٚەیا و پێشە کڕنای! ئیجا ماچۆ:«ساڵەو یۆسۆی کابرایێو تاتەش مەردٚەبێ. دێسەرەشەرە و واچێ: ئای تاتەی هێڵەڕوەن نەوەرم ڕەو. یۆیچ ماچۆ:دەی بێ تا نەوەرۆ!» ئێتر ئانا چێگەنە مەنێنمێ ئەجۆ تەختەو سەروو ئاوێنمێ. دوێ یەرێ ڕوێن دەنگ و دووش نیا. بەش ویرەش شیێبۆوە یام ئەوێ جواب دابۆ. بەدٚبەختی ئەگەر بارۆیچش من نمەزانوو فارسی قسێ کەروو. مەر فەتە وێش نیشانەم بدۆ ماچۆ: ئەدٚا گیان خەفەت نەوەری وێم نیشانەت مدٚەو.» ئەجۆش خەفەتوو من هەر فارسی نەزانایما مەزانۆ سەدٚ وڵێ ئینای جەرگمەنە. خۆ مەجبوورەیچ نیێنا فارسی قسێ کەروو ئادٚە شووش کەردٚەن بە فەتەی مشیۆ ئادٚە هەورامی قسێ کەرۆ. ئادٚە یوەنە ئێمە دەگایێوەنمێ. با ئادٚە هەورامی فێرە بۆ. خۆ ئێمە کفروو خودٚایما نەکەردٚەن فارسی نمەزانمێ. پێسەو وەیوەکێ لالۆ حەمەی خۆ جافەنە بەڵام پاسە هەورامی قسێ کەرۆ ئەجۆ حەوت پشتێ هەورامیە بیێنە. چەولایچەو فەتە وێش حەسێبا کە چندٚ قابلیەت دار بۆ تا ژەنەکێش حۆرمەت بنیۆ زوانەکەو ئادٚیچیەو. خۆ جارێو هیچی هیچ نەبیە مەزانوو من چی سەرەو وێم مێشنوو بەش هەر رێک نەگنۆ. ئینەنە ماچۆ:«یۆ نانش نەبێ بوەرۆ لوێ پیازی ئەسانێ.»
وەلی فەتاحی
98/5/29

  • پیران و ژیران

    پیران و ژیران پیر، لاو گوٙران زوانەکانوە، مەفهومێوە مانادار و ئەرزشمەند بییەن و هەن. پیر ج…
  • هەملقوانی

    هەملقوانی هەملقوانی: ڕازێوە وەشەی هەورامیە، نویستەی و ئەوەوانای گونا ڕاپەیما، فەرماودیٛ گو…
  • ئارسن

    ئارسن  کابرێوە مەسیحی بوٙ کەشاروو ڕەشتینە جە ئەۮای بوٙ ، دەورەو ئەوەڵوو دەرزوەنای هەر…
  • پیران و ژیران

    پیران و ژیران پیر، لاو گوٙران زوانەکانوە، مەفهومێوە مانادار و ئەرزشمەند بییەن و هەن. پیر ج…
  • هەملقوانی

    هەملقوانی هەملقوانی: ڕازێوە وەشەی هەورامیە، نویستەی و ئەوەوانای گونا ڕاپەیما، فەرماودیٛ گو…
  • ئارسن

    ئارسن  کابرێوە مەسیحی بوٙ کەشاروو ڕەشتینە جە ئەۮای بوٙ ، دەورەو ئەوەڵوو دەرزوەنای هەر…
 hewraman
Load More In ئەدەب و هونەر

وەڵامێک بنووسە

پۆستی ئەلکترۆنیکەت بڵاو ناکرێتەوە . خانە پێویستەکان دەستنیشانکراون بە *

بابەتو دماتەری

پیران و ژیران

پیران و ژیران پیر، لاو گوٙران زوانەکانوە، مەفهومێوە مانادار و ئەرزشمەند بییەن و هەن. پیر ج…