یانە پەیلوای هەرچی نامێ ژەنێ بەرا

هەرچی نامێ ژەنێ بەرا

59

هەرچی نامێ ژەنێ بەرا
ئەد٘ام
و
هەرچی ئەد٘ێم ماروە ویر
کۆڵێ ڕەنج
و
خەفەت …!!!

قەد٘یمی واتەنی: هەرچی خاک ئینا سەروو ئەد٘ایا و مامایا و ئەد٘ا گەوراماوە تا ئا یاگێ ڕەنج و مەینەت لوان …!! گرد٘ بۆ بە وەشی و شاد٘ی و مجیۆ ملوو خاتوونەکاو ئارۆیمارە.

هەشتوو مارسی وەراوەرا چەنی ڕۆ جەهانی ژەنێ. ئی ڕوە پەر خەیر و بەرەکەتە بەهانێنە تا بە دڵێ عەزرەتەمەند٘ و پەڕ تاسە مەبارەک باد٘یە فرە گەرم پێشکەشوو شێرەژەناو هەورامانی سەربەرزی کەروو؛ بە تایبە ئا خاتوونە دەس نەخشین و قەڵەم ڕەنگینا کە پەی پارێزنای فەرهەنگی هەورامی خەریکێ ئەرک و زەحمەتینێ و ئاڵایەشا سەوزەنە.

ڕاسا ئەوسا ژەنی ئەرک و مەینەتی لاشەیی و جەسەییش ئەوەدەر و بێ شۆ بێ [زاڕۆڵەد٘اری، نان پەتەی، جل شتەی، هەڵیز ژەنای، گەلە و دماگەلە، ئاژەڵ وەی کەرد٘ەی، نیمەرێسی، تف چنیەی و … ئەگەر بلمێ تانوو هەرمانەکاشەرە مشۆم چند٘ لاپەلێ ونارمێ] و بە ڕواڵەت ئارۆ کەوتێنە وەشی و ئاسایش، بەڵام ئەگەر ورد٘ سەرەنج دەیمێ، ئەرکەکێش قورستەرێ و ناسکتەرێ بیێنێوە؛ چوون دنیاو ئارۆی ئێتر ئا دنیا ساکارێ زوویە نیەنە. تاومێ واچمێ ئەرکە لاشیەکێ یاگێ وێشا دێنەشا بە ئەرکە فکریەکا. پەی نموونەی: ئەگەر ئەوسا ژەنی زاڕۆڵە یاونێ پەنە تا بۆ بە شوانەو ئاژەڵی یا گەلەهێزم و گەلە درەو و کارەوان و فڵان و فیسارش پەنە کەرۆ، ئارۆ مشۆم یاونۆش پەنە دنیە سەمەرێ ئارۆی بەرۆ ڕاوە!!
ئاد٘ە ئارۆ مشۆم ئی مۆچیاریە نەخت و ئەوەجدارەیە کە قەد٘یمیاو وەڵاتەکەیش فەرماوان، کەرۆ ئاوێزەو گۆشیش: “ئەد٘ا بە دەسێش بێشکێ جمنۆ و بە دەسێش زەمینی!!”
یانێ ئەد٘ا بە پەروەرد٘ە کەرد٘ەی ڕۆڵەی عالی، تاوۆ دنیە ئاوەد٘انە کەرۆوە و بەرۆش ڕاوە و ئینەیچ ممکین مەبۆ تا وەڵێنە وێش پەروەرد٘ە نەکەرۆ؛ چوون تا ئیسە جە دامانوو ژەرەژێ کولەداشتێنە هەڵوو پەروەرد٘ە نەبیەن!!
کەسیەتێ عەرەب هەن و ماچۆ: “ئەد٘ا ویرچەمە و مەکتەبێن ئەگەر درۆس و ڕێک و پێک پەروەرد٘ێ بۆ، چینێ ڕێخەد٘ار و ڕەسەن پەروەرد٘ە بۆ.”

ئیسە ئێتر خاستەر دیاری مد٘ۆ ئەد٘ا چند٘ ئەرکش گران و قورسا. ئەگەر ئەوسا بەشی نیمەدیاروو کۆمەڵگای بێ، ئارۆ گرد٘وو کۆمەڵگاینە و لازما پەی یاوای بە ئی مەرامە گەورەیە، وێش خاستەر جە گرد٘ وەخت و زمانێ یاونۆ پەنە.

جارێتەر ماچو:
نەک جارێ، بەڵکوو هەزاران جارێ ئی ڕۆتا وەنە مەبارەک بۆ.

مەندێ بە وەشی، ژیودێ بە سەربەرزێ

۸ مارسوو ۲۰۱۸ – سوبحان ئەمینی هانەگەرمڵە

 hewraman
Load More In پەیلوای

داواچیٛو بنویسە

پۆستی ئەلکترۆنیکەت بڵاو ناکرێتەوە . خانە پێویستەکان دەستنیشانکراون بە *

بابەتو دماتەری

یوەمین “ئەنیمێشن”و جهانی

یوەمین “ئەنیمێشن”و جهانی جە سەرزەمینو باستانی”شاری سۆتە” جە ٦٥ کیل…