هەشتو مارسی پیروٙز کریا
بە بوٙنەو ڕوٙ جەهانی ژەنا وە یانەو سیاوچەمانەی ئەرمانگێوە تایبیٛش کەردەو پەی حوسنا هەورامییٛ ،
دەم ژمارو 10.30 دەو نیمو سەر سەحبو ئاروٙی 8/3/2018ی جە هوٙڵوو یانەو سیاوچەمانەینە ئەرمانگا کریاوە ڕووە و میمانەکارە ، بە بەشداری چالاکوانا ویارو ژەناو میدیاکا پەخشو وەڵاکەردەی بەشداری ژەنا هەورامانی وەرەچەم بیٛ ، چوون ئینە یوەم جارا ئەرمانگێوە کە سیمای هەورامیانەش بوٙنە و ڕوٙ جەهانی ژەنانە کریوە دلیٛ شاروو هەڵەبجەینە ، ئەرمانگاکە هەتا دەم ژمارو چوارو ویٛرەگای خواینوٙ .
چی ئەرمانگانە زیاد جە پەنجا ” ویٛنا ” کە دەسکارو نەخشیێ بیٛنیٛ بە تەوەنی وردیٛ ، نەخش سەرو تەوەنیٛوە و چن جوٙرە ویٛنێوە تەریچ هەنیٛ .
حوسنا مەحمود جعفر بەڵخەییە ئەشناسیێ بە حوسنا هەورامی ، ساڵەو 1989 پەیڎا بییٛنە ، ساڵەو 2010 بڕوانامەو دپلۆمیش گیٛرتەن جە ڕاوەبەردەی هەرمانیٛنە ، بەشدارەو چنڎین ئەرمانگایا هامبەش و ڤستوٛاڵی تایبەییش کەردیٛنە جە دەسکارەنە ، حەر جە زاڕۆلەیوە حەزو ئارەزوو هونەری و هەرمانە دەسیاش بییٛنە ، دماو تەمامنای وەنەی ئتر ویٛش یەکلا کەردەو پەی هەرمانەو هونەری ، تائیسا زیاد جە سەد ویٛناو هەرمانیٛ دەسکاری ڕەنگینیٛش هەنیٛ، ئارۆ پەی یوەم جاری یانەو سیاوچەمانەینە ئەرمانگێوە پەی هەرمانە دەسیەکاش کەروٙوە بە بوٙنەو یادو هەشتو مارسی ڕوٙ جەهانی ژەنا وە .
N
