یانە ئەدەب و هونەر چنارە بەرزەکەو ئاواتەکا شەتاویٛ

چنارە بەرزەکەو ئاواتەکا شەتاویٛ

78

چنارە بەرزەکەو ئاواتەکا شەتاویٛ

پێشکەش بە گردو ژەنە زەحمەت کێشەکا هۆرامانی
شەتاوە سەرو تۆختانو هەسارە گۆلانەکێ وەرو کەپرەکێشانە نیشتێبێرە و خەریکەو کڵاش چنیەی بێ.
گەرماو نیمەرۆی دابێشەرە، پاسە زانێنی کە هیچ هەوێو تەنانەت پەی نەفەس کێشایچ نەمەنەن، چنارە بەرزەکەو قەراخو هەسارەکێ جە سەما کەردەی کۆتەبێ، بە ئاشکرا ئاواتو شنە وێوی وازێ کە دیسان بە رەقس و سەماو گەڵاکاش، وێش برمانۆ بە هەنارە نزمەکا دلێ تەڵانەکێ کە چن گەزێو چەنەش نزمتەرێ بێنێ. ئاد؛ تەنیا ناز ملو هەنارەکارە نەکەرێ، بەڵکو سەرو ملیچش ترازنابێ سەرو نەمامە وەزەکارە کە دلێ دەرەکەیەنە بێنێ و بە بەرزی و ئازاد ژیوای وێش شانازی کەرێ و وێش بە شاو تەمامو ئا چەم و دۆڵیە زانێ.
شەتاوە کە بە گەرمی خەریکەو چنیەو تاکە کڵاشەکەو دەسیش بێ، جار جارێو ملش سڕ بێ و سەرە بەرز کەرێوە و بەینو گڵاوەزەکانە، پۆپەو چنارەکەی وینێ، وێچش نەزانێ چی وەختێو تەماشەو چنارەکەی کەرۆ هەس و ئێحساسێوی تایبەتش پەی مێ، هەس و ئێحساسێو کە ئۆمێدوارەش کەرێ بیاوۆ بە ئاواتەکاش کە هەمیشە حەسرەتشا وەرێ.
ئارەقو تەوێڵێش چا گەرماو نیمەرۆیەنە ئاندە فرە بێ کە چن سانیێ جارێو مەجبوورە کریێ کە بە پەشتەو دەسیش بسەڕۆش تا نەلۆنە دلێ چەماش و بتاوۆ چەنەو کڵاش چنیەکەی خاس وینۆ. وێش خاس زانێ کە ئەگەر نەتاوۆ سەرو وەختی کڵاشەکا تەمامنۆ، مۆمکێنا پەی ماوێوی گردو خانەوادەکەی بێ قەند و چایێ با.
شەتاوە کناچێ گۆرێ خانەوادەکەی بێ، یەرێ برێ و دوێ واڵێ جە وێش گۆلانەتەرێش بێنێ، براکێش هەر یەر گۆرێ بێبێنێ و بەتاڵ و بێ کار، سەحبێ تا وێرەگا پا مڵکانە خۆلێێنێوە و فرەو وێرەگانایچ چەنی گردو خانەوادەکەی بە نانێوە وشکەو چن دانێ تەماتێ لەمەو وێشا سێرە کەرێنێ و وسێنێ.
ئۆ دوە واڵەکێچش هەڵای زارۆڵێ بێنێ، دانێوەشا نزیک بە دە ساڵێش بێ کە تازە فێرەو کڵاش چنیەی بیێبێ.
تاتەش نیمە نۆقسان یانەنە کۆتەبێرە و هیچ کارێو نەتاوێ کەرۆ، تا چن ساڵێ چێوەڵتەر شەنیەریش کەردە بێ، کە جە حادسێوەنە سەرو وەزێوێ بەرزێوە کۆتەبێرە و جە مەرگی گێڵابێوە، کڵۆکش مەڕیابێ و تا ئیسەیچ هەر پا دەردێوە ناڵێ.
ئەذاش بە بۆنەو ئەرک و مەینەتێوی فراوانیۆ کە بێش، زەردەو زەعفیە بێێبێ، بە دایم چنگۆڵێش دلێ ئاوێنە بێنێ و خەریکەو مڵک دارای و ئەرکو یانەی و تەڕ و وشک کەردەی زارۆڵا بێ، سەرەڕاو ئا گردو ئەرکیچە مەشیێ ئاگایچش جە بارامی شویش بیێ.
شەتاوە کە ئا گردو رەنجا بە چەما ویش وینێ و هەسشا پەنە کەرێ، بەڵام هیچ وەختێو تەسلیمەو نائۆمێدی نەبێ، هەر چن کارەکەش سەخت و دژوار بێ، بەڵام جە دنیاو خیاڵاشەنە هەس و سۆزی کناچانەش مۆجێ وەرێوە، ئۆمێد بە ئایەندێوی وەشتەری و ئارەزو ژیوێوی خاستەری هەمیشە بیەبێ خۆلیاو دڵ و دەرونیش.
ئاذە پێسە گرد کناچێوێ پەنە یاوێ، نەتاوێ ویر جە شو کەردەی و وەشبەختی وێش نەکەرۆوە، بەڵام ئینە تەنیا پەی ئاذێ خیاڵێو بێ، ئی خیاڵایچە فرەتەر جە وەختێوەنە کەرێ کە بە گەرمی خەریکەو کڵاش چنیەی بێ، مەشیێ جە شەوو رۆنە ١٤تا ١٥ ساعاتێ کڵاشش چنیێ، چون ئەگەر تەنانەت یەک سەعاتیچ دما کۆتێ بە هیچ شێوێ نەتاوێ قەرەبوش کەرۆوە.
نزیک بە یەرێ سەعاتێ بێ کە سەرو تۆختانەکەیۆ نەجمێبێ، ئی جارە ئیتر نەک تەنیا سڕی ملیش ئازارەش دێ، مازیچش کۆمیابێوەو دەقش گرتەبێ، پەنجە ناسکو زەعیفەکێش ئاندە بە سۆرعەت چەنو نەیەکێ پێچنێنێ یەکتریۆ، کە ئەگەر کەسێو وەراوەرشؤ تەماشەو دەسو پەنجێش کەردێ حەیران مەنێ جە خێرایی و سۆرعەتو پەنجاش.
هەر چۆمنێو بی تاکە کڵاشەکەش تەمانا، تەماشێوو پۆپەو چنارەکێش کەردۆ، سەیێ لارێ بیێبێنێ،گەڵێو چنارەکەی بە ئارامی لەرەشا ئێ، دیار بێ مژدەو شنە وێویشا پەنەن کە قەرارا چن ساتێتەر هۆر کەرۆ و گردو دەرەکەی فێنک کەرۆوە.
هۆرسۆ و سەتڵە گۆلانێوەش گرتە دەسۆ و سەرەچێرە بیۆ روەو پلورەو هانەکەی، وەڵی ئانەیەنە بیاوۆ سەرو هانەکەی، جەمال کۆڕو هامسا مڵکەکەیشا سەرو هانەکەیۆ بیەبێ. جەمال چن مانگێو بێ کە دڵو وێشەنە عاشقو شەتاوێ بێەبێ، بەڵام هیچ وەختێو نەیارێ لا شەتاوێنە دڵش کەرۆوەو پەنەش واچۆ، پەی شەتاوێ جەمال هەڵای رەفێقە هارو هاجەکەو دۆرانو زارۆڵەیش بێ، دیار بێ ئیسە گۆرە بیەبێ و بیە بێ بە پیا، بەڵام ئیسەیچ هەر شەرمێوی گۆرە بەینشانە مەنە بێ، کە شەتاوە هەڵای پێسە رەفێقێوی تەماشەش کەرێ، فرە وەشش سیێ و هەمیشە حەز بە دیەیش کەرێ.
جەمال پاسشە سەر ئامابێ کە گرد روێو وێش گێرێرە تا شەتاوە بلۆ پەی سەرو هانەکەی، هەمیشە وەڵێ ئانەیەنە ئاذە بیاوۆسەرو هانەکەی، تاقە ولێوە نیێ سەرو پلورەو هانەکەیۆ و دڵش پانەیە وەش کەرێ کە شەتاوە گرد جارێو ولەکێ هۆرگێرێ و بوێوەش کەرێ!!. ئی کارو جەمالیە گرد روێو پاسە درێژەش بێ، تا کار یاوا یاگێو کە جەمال شانسو وێش تاقی کەرۆوەو کیانۆ هیجبی شەتاوێ.
چن روێ دماتەر، ئەذاو جەمالی، ئاما پەی ئیذەسی پەی کەپرەکێ یانە مامۆ بارامی تاتەو شەتاوی، تا مەسەلێ هیجبی کەردەی کناچەکێشا پەی جەمالی کۆڕیش باس کەرۆ.
شەتاوە تا ئا روە هیچ ئاگادارەو مەسەلەکێ نەبێ، رۆی دماینش وەختێو شەتاوە سەرو تۆختانو هەسارەکێوە خەریکەو کڵاش چنیەکەێش بێ، ئەذاش ئاما لاشۆ و سەرو قساش چەنی مەرزنارە.
ئەذاو شەتاوێ خاس زانێ لوای شەتاوێ چا یانەنە، یانی نەمەنەی ژیوای گردو خانەوادەکەی، بەڵام ئاذە، ئەذا بێ،! ئارەزوش وەشبەختی کناچەکێش بێ، چێش تاوێ چاگەنە هۆرچنۆ؟، یا وەشبەختی شەتاوێ، یا نەمەنەی ژیوای زارۆڵەکا تەریش، سەرئەنجام ساقە بیۆ سەرو ئانەیە کە ژیوای وێشو شوەکەیشو زارۆڵەکاش بسپارۆ بە خوای، بەڵام وەرو بەختەو شەتاوێ نەگێرۆ.
بە ئارامی و مێهرەبانیێوی ئەذایانۆ قسەکێش درکنا و واتش؛ “شەتاو گیان قۆربانەت بو وێت مزانی کە گردو کناچە رەفێقەکات شوشا کەردن، ئێمەیچ مشیۆ ئیتر ویرو تۆنە بیمێ“.
بە ئەژنیەی ئی قسێ شەتاوە توشوو شۆکێوی بیە، هەرگیز عاذەتش نەبێ کە پەی قسە کەردێوی ئاسایی و عادی، دەس جە کڵاش چەنیەکەێش هۆر گێرۆ، بەڵام بە ئەژنەویەی ئی قسێ ئەذێشە، کڵاشەکەش نیارەو تۆزێوتەر نزیکەو ئەذێش کۆتۆ و واتش؛ ئەذا خاس مزانی چێش ماچی؟!” ئەذاش بە بێ ئانەیە گۆش دۆ بە قسەکا شەتاوێ، جە درێژەو قسەکاشەنە واتش؛ “ئەذاو جەمالی هامساما هیزی ئاما پەی لایم و واتاش پەنە کە گەرەکشانە بەیا هیجبی تۆ، رؤلە شەتاو گیان، من مزانو کە جەمال کۆرێوی عال و رێک و پێکا، وێت مزانی هەر بە زارۆڵەیی چەنی شمە گۆرە بیەن، تێکەڵو هیچ چێوێوی خرابی نەبیەن، تۆ ئەگەر شو کەری پاذی ئیتر دورەیچ مەگنیۆ چەنەم، هەر چەمم ئینا چەنەت رۆڵە”. ئەذاو شەتاوێ وەختێو یاوا ئاخرو قسەکاش پڵمەو گرەوەی دلێ گڵوێشەنە وەرو قسەکاش گرتشو نەتاواش درێژە بە قسەکاش دۆ.
شەتاوە هەسش پانەیە کەرد کە ئەذاش دڵش پەڕ بی، دەسە بێ گیانەکێ ئەذێش نیێشەنە دلێ دەساش و واتش؛ “ئەذا گیان، مزانو جەمال کۆری عالا، مزانو ئەذاو تاتەش چن عالێنێ، بەڵام ویرت کەردەنۆ کە ئەگەر من بلو شمە چێشتا سەر مێ؟!، تەماشەو فەردە ئاردەکەێت کەردەن کە دوێ یەرێ تەشتێ زیاتەر ئاردیش چەنە نەمەنێنێ!؟ هیزی وێرەگا ئاگام چەنە بێ کە سارا گجیەکەش دابێ ملو قەندانە هاڵیەکەیەرە، کیاسێبێت یانەو دێدە ماجی کە قەندانێو قەن قەرز کەرۆ!! چێش ماچی!؟ من چەنی بتاوو بلو!، پا وەزعێوە شمە بازو جیا، هیچکام جە کۆڕەکا پاڵێشا نیەنێ، چیرو پەیاشا گرد بیەن زەخم، ئاخر خۆ ئەگەر من بلو یانەو شوی، چەنی ئیجازە مذا بە من کە سەحب تا وێرەگا بنیشوەرەو کڵاشێ پەی شمە چنو!، مەکریۆ ئەذا گیان“.
شەتاوە خاس زانێ کە جەمالی چن وەشەمسیۆ، وێچش دڵەنە پی کاریە رازیە بێ، زانێ کە ئەگەر سەرو تەوەنایچۆ بیەن کریۆ چەنی جەمالی بە ئارامی بژیوا، بەڵام چەنی تاوێ پا وەزعێوە خانەوادەیش بازۆ جیا، ، چ هۆرچنیێوتەرش بێ، بیژگەم ئانەیە کە داواکاریەکەو جەمالی رەذ کەرۆوە.
چن روێوش پۆ شی، جەمال ئەژنەویە بێشۆ کە شەتاوە داواکاریەکەش رەذ کەردەنۆ، غرورش بە جۆرێو مەڕیابێ، ئیتر حەز نەکەرێ بە هیچ جۆرێو دۆروبەرو هانەکەیەنە وێش بەر وزۆ.
دماو ئا مەسەلێ شەتاوەێچ حاڵو وەزعێوی خاسەش نەبێ، فرە پەرێشانەو جەمالی بێ، وەختێو ویرو قسە وەشەکاش گنێوە، خەمێوی گۆرە دڵش گێرێرە، تازە ویر کەرێوە کە هەم شویوی عال و هەم رەفێقێوی دڵسۆزش جە دەس دان، بەڵام چارێوش نەبێ، ئاندە وەزعەو یانەیشا خرابە بێ کە روێو چن جارێ دەس کەرێ گرەوای، تەنانەت وەختو گرەوەکەیچەنە، واز جە کڵاش چنیەکەێش نارێ، جار جار بێ ئێرادە هەڵسەکێش تکێنێرە سەرو تاکە کڵاشەکەی، کە دمایی مەجبوورە بێ هۆرش تەکنۆوەو ئەوەڵۆ چنۆشۆ.
ئەرەنیشتەی دایم جە ڕۆنە، و شۆقو کەمو چراودەسیەکێ شەوێنە، کارێوش پەنە کەردێبێ کە مازیش کۆمیابێوەو چەمێچش روەو زەعیفی لوێنێ.
نزیک بە ویس هیتێ کڵاشیش جە ماوێوی کەمەنە چنیێ بێنێ، کابرای کڵاش ئەسان کە مانگێو جارێو سەر دێ ئاگەیە، ماوێو بێ دیارش نەبێ، هەر جارێویچ کە ئێ، چن تمەنێو جە نرخەو کڵاشەکا ماڕێ، بە بەهانێ ئانەیە کە بازارش کەساسا و قیمەتو بازاری مەڕیان.
فەردەو ئاردەکا روەو تەمامیای لوێ و زیاتەر جە حەفتێویچ بێ کە قەن و چایێو جە یانەکەنە نەبێ، ئارگاو کۆگاکێ سەردەو خامۆشە بێ.
شەتاوە پاڵش دا بێ کۆڵەکێ کەپرەو کۆگاکێشاوە و پێسە هەمیشەی پەنجێش دلێ چەن و نەیو کڵاشەکەیەنە سەمای کەرێنێ. تاتەش لاشەنە نیشتەبێرە، زوو زوو قۆتوەو تەماکۆکەێش بەر ئارێ، ئاندە تەماکۆش چەنە مەنە بێ کە پێچنابێشۆ و کەردەبێش بە یەک جگەرە، هەر چن دەیێقێ جارێو قۆتوەکێ کەرێوە و جگەرەکەی بەر ئارێ و نەفەسێوەش دێ وەنە و کۆشنێشۆ و دیسان نیێشەناوە دلێ قۆتوەکێ، ئی کاریە لا شەتاوێنە زوو زوو دوبارە کەرێوە، پەی ئانەیە شەتاوە بزانۆ کە تەماکۆکەو تاتەیچش تەمامیان، چونکە شەتاوە هەر جارێو کە کڵاشەکا ورەشێ بەشەو مانگێوی تەماکۆیچ پەی تاتەێش ئەسانێ.
ئی وەزعێ؛ شەتاوەش یاونێبێ بە ئۆپەڕو گیان بێزاری و دەردو رەنجی، وەختێو تەماشەو رەنگ و رۆخسارو تاتەێش کەرێ دەرونش گریای گریێ، چێش تاوێ کەرۆ؟!، هۆرسۆ یاگێ وێشەنە، پێسە عاذەتی روانەێش ئاماوە پەی سەرو تۆختانو هەسارەکێ و جە وەراوەرو چنارەکەیۆ نیشتەراوە، وێچش نەزانێ چی وەختێو تەماشەو قەذو باڵاو چنارەکەی کەرۆ ئارامشێوش پەی مێ و هەس بە ئاسوودەیی کەرۆ، دیار بێ چا بێ دەنگی و کشو ماتی نیمەڕۆیەنە، تەنیا چنارە کە بێ کە وەراوەرشۆ مەنەبێرەو و چەنی شنەواو سەر وێرەگای بە لەرەو گەڵاکاش ماچەو وەشەویسیش پەی کیانێ، پا جۆرە هازێوە وزێ سەرو پەنجەکاش تا بتاوا چەنەو کڵاش چنیەکەی هەرچی خێراتەر دۆرو نەیەکێنە گێڵنا.
چن روێ پا جۆرە لوا، وەزعەو خانەوادەو شەتاوێ ڕۆ بە ڕۆ خرابتەرە بێ، سەحبانێو کە گرد جەمێ بێنێ و چیرو کەپرەکێنە نیشتێ بێنێرە، مامۆ بارام تاتەش، روەش کەردەنە کۆڕە گۆرەکەیشو واتش؛ ” ئا رۆڵە هیوا؛ ئەژنیم کە حاجی مەحموذ خەریکو یانە کەردەیا، لوە سڵامو منش پەنە بیاونە، واچە تاتەیم وات چن کەسێ کیانۆ با چنارەکەو سەرو هەسارێ بڕا و بەراش، وێش مزانۆ وەڵتەر چا بارۆ قسێما کەردیێنێ، پەی باهو وەرهەیوانیش گەرەکا“.
هیوا بە پەلە نەمدرا و لوا، شەتاوە بە ئەژنیەی قسەکێ تاتەیش، ئەوەڵ جار ئاندە دلێ خیاڵا وێشەنە بێ کە خاس نەزاناش تاتەش چێشش وات، دمایی کە ئاماوە وێشەرە، نامێ چنارەکەی کۆتێبێ گۆشش، پەرساش ئۆ تاتەیش؛ “تاتە گیان ئانە چێشت وات.؟!” تاتەش جوابش داوەو واتش؛ “هیچ رۆڵە، ئا روە کە حاجی مەحمود چێگە بێ، قۆڵم دابێ پەنە کە وەختێو یانەکاش دەس پەنە کەرۆ چنارەکەش دەو پەنە“.
شەتاوە کە نامێ چنارەکەیش ئەژنیە، پێسە کەسێوی کە ئازیزێوی نزیکش مرۆ، دڵش کۆت لەرزای و پڵمەو گرەوەی دلێ گڵوێشەنە پەنگش داوە، دڵش پۆ بێ کە بە دەنگی بەرز گرەوۆۆ بەڵام لا تاتەیشينە و باقی زارۆڵەکانە پەنەش عەیب بێ، نە تاتەش و نە هیچ کەسیتەر نەزانێ، کە چ پێوەنێوی ئێحساسی ئینا بەینو ئاذێ و چنارەکەیەنە، هیچش پەی ناما واچۆ بە تاتەێش، تەنیا ئانەشە وات؛ “تاتە گیان چی ئا چنارە ؟! چی حاجی مەحمود مەپرۆوە ئۆذس، پەڕا چنارێ؟! ئاخر ئێمە دلێ گردو ئی مڵکیەنە، چنارێما نیەنێ، تەنیا ئا تاکە چنەرەما هەن“.
تاتەش فرە سەرەش سڕ مەن، چی پەرسو جوابو شەتاوێ، لاشۆ سەیر و سەمەرە بێ کە شەتاوە چی ئاندە حەساسیەت نیشانە مذۆ پا چناریە، کۆچێو ویرێش کەردێ و زەردەخویوش پەی ئاماو واتش؛ “دەی رۆڵە پەی چیشیما، رێخەش تەقا، روێو گەزێو زیاذ کەرۆ! سەیەو هەنارەکایچش گرتێنی! دەی ئیتر تەنیا ئانەما هەن کە ورەشیۆ پەیما، خۆ هەرچی بۆ فەردێو هاردی کەرۆ!!”.
شەتاوە هەناسێوش هۆرکێشت و هۆرسۆ، هەرچن هەڵای سەحب بێ و وەختو لوایش پەی سەرو تۆختانو هەسارەکێ نەبێ، بەڵام جە قسەکا تاتەیشەرە زاناش کە ئاخرین رۆ و ئاخرین دیدارشا چەنی چنارەکەی.
ئاندەش پۆ نەشی کە چن نەفەرێ پێذێ بیێ، دەسشا کەرد بڕیەی چنارەکەی، هەر تەوەرێو کە ماڵێنێ تەموەو چنارەکەیەرە ئەجێ سەرو دڵو ئاذێرە ماڵا، هەر چا وەختەنە کە چنارەکە داریاوە، کابرای کڵاش ئەسان پەیذا بی، بە دیەی کابرای تۆزێو ئارامە بیۆ، لوانە دلێ خیاڵی (ئەگەر کابرا سەعاتێو زوتەر ئامێ گاهەز کریێ چنارەکەی جە بڕیەی نەجات دۆ!!).
پا جۆرە چن روێ و چن حەفتێو چن مانگێ سەرو یۆی لوێ، کۆچێ ئامێوە دلێ دەگێ، هیچ چێوێو پەی شەتاوێ نەفاڕیا بێ، تەنیا یاگێ کڵاش چنیەکەێش نەبۆ، کە جە سەرو تۆختانو هەسارەکێوە فاڕیابێوە پەی لا سۆبە سەردو سڕەکەو دلێ تاقە هۆذەکەێشا، کە بە بۆنەو کەمی هێزماوە روێو جارێو یا دوێ جاری زیاتەر ئێرش چەنە نەکریێوە.
هەرچن هێشتا جوانە بێ بەڵام رەنگەو پیری و مانیایی جە رۆخسارشەنە ڕۆ جە دماو ڕۆی زیاتەر بەر گنێ، چەمێش روەو زەعیفی لوێنێ، تا رادێو کە چا بارۆ بە تەمامی نگەرانە بیێبێ، هیواو و ئۆمێذو جارانیش نەمەنە بێ. جە دەگاکێنە هیچ کۆڕێو ئیتر نێ وەرۆ پەیش و داواش نەکەرێ، چونکە کۆڕی دەگاکێ گرد زانێنێ کە ئاذە تەنیا نان ئاوەرەو یانەکەیەنە.
زمسانو سەختو ئا ساڵیە هەر جۆرێو بی لوا، پەی شەتاوێ و خانەوادەێش سەختەرین زمسانو ژیوایشا بێ، وەزعەو چەماش ڕۆ بە ڕۆ روەو خرابە لوێ، پاسشە پەنە ئاما ژمارەو کڵاشەکاش کە جە مانگەنە چنێشا، جە نیمەی کەمتەرێ بیێ، هەرچن دۆکتۆر دوورە دەس بێ، بەڵام هەر مەشیێ دۆکتۆری دیێ، دۆکتۆر کڵاش چنیەیش وەنە مەمنۆع کەردە، ئی واتەو دۆکتۆریە خەریک بێ شێتەش کەرۆ، چێشش کەردێ!؟، ئاندە خەفەتو مەعیشەتو وێشو خانەوادەیش وەرێ، نیمەو ئانەیە خەفەتو چەماش نەوەرێ، ئیسە ئیتر وێش بە نانەوەرێوە زیاذێ زانێ چا یانەنە، توشو وەزعێوە خرابێ بیێبێ.
چن مانگێ چاوەڵتەر، کابرێو کە جە دەگێوە تەرەنە ژیوێ، کیاسەبێش هیجبیش، بەڵام هێشتا جوابشا نەدابێوە، کابرا جە وێش فرە گۆرەتەر بێ، ژەنیش مەردێبێ و ساحێبو یەرێ زارۆڵا بێ، هەر چن کابرای نەژناسێ و نەزانێ کە چ ئایەندێو ئینا وەرشەنە، بەڵام وێش دا دەسو قەزاو قەدەریۆ تا بەڵکو بتاوۆ چا رێوە تۆزێو یاردیدەرەو یانەو تاتەێش بۆ، بە دڵێوی پەڕ جە خەفەتۆ، واتش بە ئەذێش کە جوابشا پەی کیانۆ با بەیا بەراش!!.
پا جۆرە شەتاوەی دڵ پەڕ جە سۆزو حەسرەتە، شوش کەرد بە کابرێوی کە تەنیا یەک جار جە عەمرشەنە دیەبێش.
ئا روە کە وەیوە بێ و تازە یاوێ بێ وەرۆ، ژەنێوە پیرە ئاما پێوایشۆ، ژەنەکێ ئەذاو کابرای بێ، کە وەڵتەر کابرای باسو ئانەێشە نەکەردێبێ کە ئەذاش چەنی ئاذیشا مژیوۆ.
هەر ئا شەوە سەوایشۆ کە هەڵای جلێ وەیویش وەرەنە بێنێ، ئەذاو شوەکەێش (هەسروەش) کۆتە خەتو نیشان کەردەی وەنەش، هەر جە رۆ ئەوەڵیۆ پێسە کارەکەرێوێ رەفتارش چەنی کەرێ، یەرەمین رۆ مانگەو هەنگوینیش!! (ماە عسل) بێ کە جلێ شش مانگا چاوەڵتەرو وێشو کۆڕەکەیشو و هەر یەر زارۆڵەکاش، نیێرە وەرو دەمیش، و بە لا لوتێوۆ دەستوورش پەنە دا کە شۆرۆشا.
نزیک بە مانگێو پا جۆرە لوا، ڕۆ جە دماو ڕۆی داخێ فرەتەرێ لوێنێنە دڵش و نەیارێ هیچ جوابێو دۆوە یا قسێوە کەرۆ، تەنیا دڵوەشیش ئانە بێ کە جار جار بە ئیجازەو شوەکەێش، کەلێو قەن یا چن کیلوێ برنج، یا قۆتوێوە روەن ئارێوە پەی یانەو تاتەیش، ئی کاریە وەختێو کەرێ کە هەسروەش چا وەختەنە نەبێ چا، چونکە شوەکەێش پەنە واتێ بێ کە بە هیچ شێوێو ئەذاش مەبۆ با چێوا بزانۆ.
پا جۆرە یەرێ مانگێ لوا، ماوێوی درێژ بێ کە سەرو یانەو تاتەیش نەذا بێ، کەلێو قەندش پێچاوەو نیاشەنە دلێ دەسماڵێوی، برا گۆلانەکەش کە ١٤ ساڵێش بێ ئامابێ شۆنیش، خواحافێزیش جە شوەکەێش کەرد، چا وەختەنە کە گەرەکش بێ جە داڵانو یانەکەێشانە بزیۆرە، هەسروەش ئاما روەشۆ، وەختێو کەلە قەندەکەش دەسشۆ دی، چەمێش پڕێ تۆقەو سەرەێش، بە دژمان دای و فەزێحەت واچی، کەلە قەندەکەش ئەسا دەسشۆ و هەتا زۆرش بێ کواش وەرو دەمیشەرەو واتش؛ “نامبارک بۆ یاخوا، زیاذما کەرد! کۆڕو من تەنیا متاوۆ تۆ وەی کەرۆ، نەک ئەذاو تاتەی سواڵ کەریچذ!!.
شەتاوە بە ئەژنیەی ئا قسا و دیەی ئا وەزعێ، لەرزێوی گرتەرە، نیشتەرە و هەردوە دەسێش نیێ سەرو چەماش، کۆچێو گرەوا تا دلش خالی بی، بە خیاڵ لواوە پەی مڵکو وێشاو سەرو تۆختانەکەی، باڵاو بەرزو چنارەکەیو شنەواو ئۆمێذ و ئارەزوەکاش ئاردۆ وەرو چەماش، جە یاگێ وێشەنە هۆرسۆ، لوا سەر، جلەکێش فاڕێ، دەسێو جلێ زەمانو کناچەییش بێنێ، کە پەی هەرمان کەردەی چەنی وێش ئاردێبێنێش، کەردێشەناوەو هەڵقەکەکێش جە پەنجەشەنە بەرئاردەو نیاش سەرو دەسماڵەکەیۆ کە قەندەکەش پێچنابێ پۆ، تەماشێوو میاچەماو هەسروێش کەرد، بە شۆجاعەت و هەیبەتێوی ژەنانۆ کە بێش، پەردەو شەرمیش دڕی، پەڕچینو نەدامەتیەکاش ماڕا و جە داڵانەکەنە ئاما بەر، پیسە بۆڵبڵێوی کە جە زیندانو قەفەسیەنە نەجاتش بیەبۆ، ئاماوە دلێ دارستانو ژیوای دوبارەی.
چەنی برا گۆلانەکەێش گێڵاوە پەی یانەو وێشا، وەختێو یاوێوە یانە، یانەکە فرە گۆلانەو بێ دەنگ بێ، بەڵام پەڕ بێ جە ئارامش، پەڕ بێ جە شۆقو دیداری، نیشتەرەو بە حەسرەتێوۆ سیر سیر تەماشەو گردیشا کەردش، سارا؛ واڵە گۆلانەکێش کە ساڵێو گۆرەتەرە بیێبێ، وەراوەرشۆ نیشتێبێرە، چەنەو کڵاش چنیەکەی بە سۆرعەتێوی فرۆ دلێ پەنجەکاشەنە گێڵنێ، پاڵش دا لاشۆ واتش؛ “سارا گیان هۆشو وێت بۆت، ئیتر تۆ تنیا نیەنی منیچ هەنا!!”. واڵە گۆلانەکێ تەرەش کە زیاتەر جە حۆت ساڵاش نەبێ، لکێبێ باوشیشەرە و واتش؛ “دادێ، ئیتر مەلی نمازیماجیا؟!” جوابش داوەو واتش؛ “نا دادێ گیان، جارێو مەلو، ئینانێ لاتاوە“.

بنویس :  حەمەرەزا بەهمەنی، سۆئێد، یۆتۆبۆری، ٢٠١٧/١٢/٩

 

 hewraman
Load More In ئەدەب و هونەر

داواچیٛو بنویسە

پۆستی ئەلکترۆنیکەت بڵاو ناکرێتەوە . خانە پێویستەکان دەستنیشانکراون بە *

بابەتو دماتەری

زیانیٛو پاڵای پاژنە بەرزی پەی خانما

زیانیٛو پاڵای پاژنە بەرزی پەی خانما فرەو ژەنا دلێ زەماونڎ و مێمانیا و…حەز مکەرا پاڵا…