یانە ویر ئا مەرزانە کە زوانی نویسیاری گۆرانی چەنیو زوانی دەمواچی گۆرانی جیاوە مەکەران

ئا مەرزانە کە زوانی نویسیاری گۆرانی چەنیو زوانی دەمواچی گۆرانی جیاوە مەکەران

102

ئا مەرزانە کە زوانی نویسیاری گۆرانی چەنیو زوانی دەمواچی گۆرانی جیاوە مەکەران

نویسەر: ژیاری سڵامەتیان
14/4/1398 مەریوان
“بەشو دوهەمی”
بە پاو ئا بەڵگانە کە هەنێ وەرو دەسیمانەنە، وەرینانو زوان و ئەدەبو گۆرانی بە دەسپەنەو ئائینو یارسانی ئەو هۆرامانەنە حدودەن نزیکەو١٢٠٠ساڵا ئەچیوەڵیی، دەسشان کەرد بە مەکتوب کەردەو زوانو گۆرانی. مەقسودمان ئەو زوانو گۆرانی: هەر ئا زوانەنە کە هۆرامانیەکان ئەو پەنج بەشو هۆرامانینە ئارۆ قسێش پەنە مەکەران، ئا زوانە کە شەبەکەکانو موسڵی پەنەش قسێ مەکەران ئا زوانە کە کاکەیی، و زەنگەنە، باجەڵان، ئۆلمەلەکیێ و کەنوڵەیەکان” ئارۆ قسێش پەنە مەکەران. ئا زوانە کە پەیرەوانو یارسانی بە هەر قۆم و قەبیلێوە(کورد، تورک، ئازەری، فارس، عەرەب) ئیمانداری و ئەخلاقش پەنە مەمسانێ و فێرێش مەبان. پەوچی ئومیدم هەن ئیتر وەختێ مەواچمێنە زوان و ئەدەبو گۆرانی، هیچ گۆران زوانێوە ئەو هۆراماناتەنە یا هیچ باجەلانێوە ئەو عێراقەنە و هیچ زەنگەنێوە و شەبەکێوە وەهمەش پەی وەش نەبۆ کە مەقسود ئەو گۆرانی، دورەن ئەو لەهجەکەو ئەمن. نە خەیر، ئینسانێوە کە پڕزۆڵێوە ماریفەتش ببۆ مەزانۆ کە زوانو ئەئی شێعرێ کە 489ساڵێ ئەچێوەڵی مامۆستا شێخ مستەفا تەختەیی(951-1047مانگی)پەنەش نویستەنش، هەر ئا زوانەنە کە سەرانسەرو هۆراماناتینە ئارۆ پەنەش قسێ مەکەران.
چەندەین جە دووریت خەستە و مەهجورم———–چڵ مەدۆ دایم زام ناسورم
با هەر بمانوو پەی جەور و جەفا———— سەر و ماڵ و گیان بکەروو فیدا
دیوانو شێخ مستەفا تەختەیی، نوسخەو محەمەد پاشای جاف. جەموەکەردەی: محەمەد ڕەشید ئەمینی، پاوە: ئارۆ، ١٣٩٧.(پەلو ١٣٢)
ئەچێگەنە ویرنمەکەرونە لانیکەم هیچ موناقشێوە بەینو گردینو ملەتو گۆرانینە ببۆ. گردینمان مەزانمێ، “چەندین، جە، دوریت، جەسە، مەهجور، چڵ، مەدۆ، دایم، زام، ناسورم” گردینشان کەلیماتێوەنێ کە ئەسڵ و ئەساسشان ئەو گردینو محاڵە گۆران زوانەکانەنە بە کار مەیان و ئاماینێ. هەتا ئا کەلیماتایچە کە نژادەن عەرەبیێنێ، دیسان قۆمیەتشان گۆرانەن بە حەساب مەیان، چون ڕەنگ و ساختاروو گۆران بییەیشان گێرتێنە. ئی نموونەمە ئاوردوە تا ئیتر باسو مامۆسا بێسارانی، مامۆسا مەولەوی تاوەگۆزی، مامۆسا سەیدی، و عەبدول وەهابی ئاریانی و . . .هەزاران گەورە ئینسانی تەری کە ئەچی ڕاگانە قەڵەمشان ئەنمانان، نەکەرونە.
ئیمە وەختارێ ئی زوانە نویسیاریەیە مەوانمێنەوە، “بل القوە” هەر ئا زوانەنە کە شەبەکەکانو موسڵی و هۆرامانیەکانو پەنج بەشو هۆرامانی و . . . قسێش پەنە مەکەران. بەڵآم ئەگەر ورد و ژیرانە و بێ تەعەسوبی ‘لادەگایانەوە’ فەرزەکەیمان بوینمێ و لەیەکش بدەیمێنەوە مەوینمێ ئی زوانە نویسیاریە، هەنگامێوە هەن وەڵێ زوانو لەهجەکانو ملەتو گۆرانینە، ئا شەخسیەتە کە ئی زوانە هەنش داراو سیفاتێوەن کە هەن وەڵێ گردینو لەهجەکانشەنە و تایبەت مەندیێوە ساختاری و نویسیاریانەش بە ویەرو زەمانی گێرتەن ئەو وێش.

— تەمسیلێوە پەی زوان و ئەدەبو گۆرانی و لەهجەکانش:
ئەدایێوە جە نەزەرەنە بگێردێ کە یانەنە “سالارەنە’ و هەرمانەکان گردینشان لاو ئادێوە مودیریەت مەکریان. نەزم و ئینزباتو یانەگاکەی و ئەندامەکانش(زاڕۆکان) گردینش هەن دەسو ئادێوە. ئەچێگەنە هەر کوڕ و کناچێوە کە جە مەوازینو یانەگاکەی کە ئەداکێ مەرزنانەرە پەیرەوی مەکەرۆنە، چون ئەندامەکانو ئی یانەیە وێشان دلێو نیزامێوەنە سازمان مەدان کە پەنەش مەواچان سازمانو یانەگایی ئەدای، و هیچ کامشان نمەتاوۆنە ئەچی یانەگایە وێش دوور بدارۆنە و هەتا ئەگەریچ بلۆنە جبەر دیسان نمەتاوۆنە بواچۆنە ئانە ئەدا ئەمن نییەنە. بەڵام سەروە ئیشارەما پەی کێشا، کە ئەدا ئەدانە و زاڕۆ، زاڕۆن. ئەدا سالارەنە و زاڕۆ پەیرەو ئەدای. ئەچێگەنە زوان و ئەدەبو گۆرانی، حەقێقەتەن مەبۆ بە سەرپرسو یانەگاکەی، و لەهجەکانو ئی ملەتەیە مەبان بە زاڕۆ و کوڕ و کناچەو ئا ئەدایە. ئینە تەمسیلێوەن کە ئەگەر بە ئاوەز و ویری ڕووت چەمش پۆرە بکێشنمێ. مەسەلەکێمان پەی ڕۆشنوە مەبۆنە. ئارۆ، دوێ ڕاگای فرەتەرێمان نییەنێ ئەو وەردەمەنە: یا مەشۆ گردینو ملەتو گۆرانی، پەیرەوی بکەرۆنە ئەو ئەداو یانەگاکەی، یا ئانە کە هەر زاڕۆڵێوە یا هەر کوڕ و کناچێوە هەتیمچانە بلۆنە و بواچۆ گۆران ئەداو ئەمن نییەنە و ئەمن بێ ئەدا و تاتەنان(خوانەخواسە). ئیسە ئیتر مەشۆ پەیتان ڕۆشنوە بییەبۆنە کە زوانو ئەدای، گردینو زوانەکاو زاڕۆکان مەگێرۆنە وەر بەڵام زوانو یەک زاڕۆی زوانو ئەوتەر ئەندامەکانو یانەگاکەی نمەگێرۆنە وەر، چون گرد هەنێ یەک پلەنە. زوانو گۆرانی(ئەدا و بابەمانەن) لەهجەکانو مەحاڵەکاو هۆرامانی، شەبەکستانی و باجەلان و زەنگەنەی و ئۆلمەلەکی و کەنوڵەی(زاڕۆ، کوڕ و کناچەو ئی ئەدا و بابەیەنێ).
پەرسەی بونیادیە ئارۆ وەرو گردینو ئیمەنە ئینێنە کە بە کام زوان بنویسمێنە؟ زوانی نویسیاری گۆران(ئەدا و بابە) یا زوانی دەمواچ( زوانو زاڕۆکان).

خسڵەتەکانو زوانی نویسیاری گۆرانی، کامێنێ:
1. ئەداو بابە سن و ساڵێوە فرەشان ویارنانەرە و تەجرۆبەو ژیوایشان سەرتەر ئەو زاڕۆکانەن. گەرەکمەن بواچونە: زوانی نویسیاری گۆران، پێسەو ئەداو بابەین. شش دەورێ تاریخیێش ئەو ژیوایەنە ویاراینێرە و ئەچی پەنج دەورەنە سەرکەوتە ئامان جبەر:
دەورەو یۆوەمی: زارۆڵەیی(زوانو گۆرانی پەی ئەوەڵ کەڕەتی جە دەموە کەوتەرە و نریارە سەرو زەمینی و سەرو کاغەزیوە پەنەش نویسیا وێش نمانا)
دەورەو دوومی: نۆجوانی(مەوجودیەتش نمانیا، پاگێرتەی فێر بی)
دەورانو یەرۆمی: جوانی(دەورانو زۆرەملێ، و ێسەپنای، ئەچی دەورانەنە چەنیو هروژمەکانو زوانەکاو عەرەبی و فارسی گژیا و سەرکەوتە بی، ناستش زاڕۆکانش بە زوانو عەرەبی، کوردی، فارسی بنویسان)
دەورەو چوارۆمی: دەورانو گەورەساڵی(دەورانو زاڵ بییەی ملو زاڕۆکانشەرە و ئەوتەر یانەگاکاتەریرە، دەورانو فاسڵە گێرتەی ئەو زوانی دەمواچی گۆرانی)
دەورانو پەنجۆمی: دەورانو پیری(پیری ئەچێگەنە مەنزوورم، تەسبیت بییەو سیفەت، ساختار، و ئەژناسیای و ئەژناسنایو زوانو گۆرانین، پیری یانی پوویایی، دەماخ، دینامیسم، زایش، ئاور بییەی و بەهرە دای. زوانی نویسیاری گۆران دەورانو پیرینە بی بە باخێوە گەورە و سەمەرەدار کە تاواش زاڕۆکانش تا ڕۆ ئارۆی وەی بکەرۆنە و تەربیەت و ئاموزش و سێر بکەرۆنە. ئەچی دەورەنە کە ئارۆ چەنەشەنمێ زوانی نویسیاری گۆرانی مەبۆ بە زوانو دین، فەرهەنگ و ئەدەب، ئێحساس و هونەرو ملەتو گۆرانی.
2. زاڕۆکان، ئەچێگەنە مەنزوورم لەهجەکانو زوانی نویسیاری گۆرانینێ، ئازیزان ئی زاڕۆڵێ سن و ساڵشان نییەن، تاریخشان نەسازنان، نویستەیشان نییەن، وێشان نەنمانان، پەوچی تەنیا سیفەتێوە کە ئارۆ هەنشان “ساواڵەیین” مەسەلێوە کە مەشۆ بزانمێش ئانەنە کە هەر یۆ ئەو لەهجەکانو دەگاکانو سەرانسەرو گۆرانستانی ڕێک هەقشان هەن، مەسەڵەن ئەگەر کەسێوە گەرەکشەن دەگاو وێشەنە بە زوانی دەمواچو دەگاکێش بنویسۆنە، مەشۆ هەق بدۆ بە گردو ئا دەگایانە کە لەهجەکەش نیزامش چەنیو قسەکەردەو ئادی جیان تا بە زوانو دەگاو وێش بنویسۆنە. ئەگەر بەنا پانەیە بۆنە کە مەسەڵەن کەسێوە بە زوانو نۆتشەیانەی بنویسۆنە، ئی کەسە تەنیا جە مەحدودەو دەگاو نۆتشەیەنە مەتاوۆنە زوانی دەمواچی نۆتشەیانەی ئاموزش بدۆنە و ئیتر مەسەڵەن شارێوە پێسەو مەریوانینە کە سەدان دەگایێ هۆراماناتیش چەنە مەژیوان کەس پەیش نییەن، زوانو دەگاو وێش سەپنۆ ملو دەگاکانو تەریرە، پەوچی ئەگەر بەنا پانەیە بۆنە کە زوان و ئەدەبو گۆرانی وەرچەم نەگیریۆ، هەر دەگایێوە هەقش هەن پەی وێش نیزامێوە فێرکارانێ تابیەتە بمەرزنۆرە، و پەنەو زوان و ئەدا و بابەیش بنویسۆنە و قسێ بکەرۆن. ئی تەرزە ویروە کەردەیە ئارۆ دلێو فرەینەو دەمواچ نویسەکانەنە هەن، کە پاسە خیاڵ پلاو مەڕێژان کە زوانو دەگاو ئادیشا بەرتەر ئەو دەگاکاو تەرین! حەقێقەت ئانەنە کە گردینو لەهجەکانو دەگاکا و چەم و شارە گۆران زوانەکان هەر جە هۆرامان هەتا موسڵ، ئی زوانانە کە پەنەشا قسێ مەکریۆنە نە مەتاوانە نمایندەگی ملەتو گۆرانی بکەران و نە تەوانایی ئانەیشانە هەن کە ببا بە باخ. ببا بە زوانو فەرهەنگ و ئەدەبی پەوچی هەر جۆرە دەگابازی چەپوانەو ئاوەز و ماریفەتو ملەتێوە موتەمەدنین. ئومیدم هەن ئی تەمسیلیە بە چەمێوە واز لەیەک بدەیدێنەوە: ئەشیۆم ئیمە بزانمێ نیاز نییەن بلمێوە پەی دەورانو زاڕۆڵەیی، وەختارێوە ئیمە باخێوە پەڕ سەمەر و باشکۆ پێسەو زوان و ئەدەبو گۆرانی یا زوانی نویسیاری گۆرانیمان هەن، پەری چێش نەیمێ خزمەتو ئی ئەدایمانە و ئی یانەگا گەورەیە بکەرمێنە و هەر کاممان وێش بە یانەوەی ئی یانەیە نەزانۆنە. هەر یۆ ئەو لەهجەکانو زوانو گۆرانی بزانان کە تا زەمانێوە ئادیشان ساحیبو ڕیشە و ڕەگەز و ئیسالەتینێ کە یانەگاو گۆرانینە وێشان تاریفنا. ئانە کە ئارۆ هەر کەس ئامان و بە دەگاو وێش مەنویسۆنە و لاو بڕێوە کەمفام و ساواڵە مەژگ و زاڕۆڵە ویرینە(دەمواچ نویسیوە) پشتیوانی مەکریان، بێجگەم ئەو خیانەتی ئەو زوان و ئەدەبو ملەتو گۆرانی چێوێوەتەر نمەتاوی نامێش بنیەی. خیانەت بە یانەگاو گۆرانی، ئانەنە کە تۆ بە وێت ئیجازە بدەی بلینە: زوانو لەهجەو دەگایێوە ئەو هۆرامانی کە نە ئیسالەتش هەن و نە ڕێخە و ڕیشە و نە سابقەو نویستەی و نە تاریخی مەکتوب و نە دینامیسم و نە ئەدەبیەت، بەینە بە خیاڵ پڵاوەکانت بکەریش بە زوانو ملەتو گۆرانی. نەفام ئەچانەی کە ملەتو گۆرانی ساحیبو ئەدا و تاتەین و ساحیبو باخێوەن کە هەزاران میراوانێ ئەو دەیان سەد ساڵێنە ئاویشا داران و خزمەتشان کەردەن، تا ئا ئەدا یاواینە ئەپا گەورەیە کە ئارۆ ملەتێوە گەورە ئێحساسو وێباوەڕیش ئەچادێوە مەگێرۆنە و هویەتش زوانزەد عام و خاسین.

ئازیزان ئیسە پەی نەتیجەو باسەکەیم دوێ مەتنێتان جە دوێ کتێبانە پەی ماوەرونەوە تا مەرزەکانو زوانی نویسیاری و دەمواچی هۆرامیمان پەی بنمانیۆ.

نموونەو یۆوەمی:

زوانی دەمواچ:
“خاڵێ کە یاگێ واتەیەنە ئینەنە کە پەی بەردەوامی و یاوای پەنەو ئی ڕەوتێ جە هۆرامانوو ئەودیمی، ئەشۆم هەوڵ دریۆ، ئی شێعرێ چێروو بڕێ مێکانیزما زاڵینە دەربازە کریۆ. ئەگەر چی بڕوای تەمامەم هەن بە پێوەندی هونەری و ڕۆشنویری وەرانوەری، کە دیاردێوە سەردەمی و وەرپەنگ نەکریان. بەڵام لۆژیک و پەنەزانای وێچش هەن و ئەشۆم وەرچەم گیریۆ و پێوەندی سرۆشتی ئەدەبی و هونەری و کاریگەریەکاش چنی هێژمۆنی زاڵی سەپیارەی کریۆ جیاکریۆوە کە ئی دوێ پێوە جیاوازیشا هەن. بیەی ئی شاعێرا کە چێگەنە دەقم ئاردێنێ، پاڵپەشتێ هێقم و دەلاقەیێ ڕوو بە ئاسۆنێ پەی شاعێرە گەنجەکا ئەودیمی و دێونای و هازنای ئی ڕەوتە شێعرێ”(پ،93)
——- خسڵەتەکانو ئی مەتنە دەمواچێ ئینێشانێ:
– ئەوەڵەن گردینو مەتنەکێ بە پاو زوانی دەمواچو دەگاو نویسەری نویسیاینە، یانی نویسەر وەرچەمش پەی نویستەی زوانو قسەکەردەو وێش و دەگاو وێش بییەن. – ئی مەتنێ ناقس العزوەنە، یانی نەتاوانش پەیامەو نویسەری بە درۆسی بیاونۆنە. – ئی مەتنێ فێعلش بە غەڵەت نریانەرە چەنە، – جنسی دەستوریش شێویان پێوەرە – مەتنەکێ مکانیکیەنە و وەردەنگ بە واناو مەتنەکێ مەزانۆ نویسەر قودرەتێوەش سەروو مەفاهیمەکانوە نەبیەن – جوملەبەندی نویستەکەی گردینش سەرانسەر غەڵەتەن – ئی زوانە پوویا و داراو دینامیسمی نییەن و تەنیا پەی قسەکەردەی و ئیما و ئیشارەی خاسەن نەک پەی وازنایوەو مەفاهیمی ئەدەبی و زانشتی. – کەلیمەکاتو ئی مەتنێ قرتیا و ناڕێک بە کار ئاماینێ. – ئەچی مەتنێنە مدرای و هەرەکەت دیار نییەن مەنزوورم ئانەنە کە(ویرگۆل، نوقتە. و خەتە تیرە- و پەرانتز() و . . . بە درۆسی بە کار نامان). ئینە گردینو ئا خسڵەتانەنێ کە دلێو زوانو دەمواچو گردینو دەگاکانو پەنج بەشو هۆرامانینە هەنێ و تایبەتو یەک دەگای نییەن.

– زوانی نویسیاری:
ئەگەر گەرەکما بۆنە ئی مەتنێ بە زوانی نویسیاری بنویسمێوە، تا گردینو خەڵکە گۆران زوانەکان هەر جە موسڵ هەتارە هۆرامان و کەنوڵە گردینشان چەنەش کەل بگێران و بەهرە ببەران، حاڵیێشان ببۆ چەنەش، مەشۆم ئی مەسەڵانە وەرچەم بگێرمێنە: یۆوەم: ساختارو زوانەکەی مەشۆ کامڵەن بواڕیۆ بە زوانی نویسیاری دووهەم: مەشۆ هەر کەلیمێوە بە تەمام و کەماڵ بەیان بکریۆ و نویسەکەش پەڕ مانا بۆ(مەنزوورم ئیملاو کەلیمەکانەن) یەرۆم: جوملەبەندی مەشۆ بە درۆسی و بە وەرچەم گێرتەو مەقسودو نویسەری و ساختارو زوانەکەی ڕێک و پێک بنویسیۆ. چوارۆم: وەرچەم گێرتەو ئاهەنگو کەلیمەکان و ویرکەردەیوەی پەی ئانەیە کە بتاوی مەفاهیمێ بە کار باوەرینە کە دینامیسمو نویسەکەی بپارێزنان و ئیقتدارو نویسەری سەروو مەتنەکێوە و پەی وەردەنگی دیمئاشکرا بکەران.
مەتنەکێ بە زوانی نویسیاری:
” خاڵێوە کە ئەچێگەنە یاگێشەنە بواچیۆنە، ئینێنە کە پەی بەردەوامی و پەنەیاوای ئی ڕەوتەیە جە هۆرامانو عێراقینە، مەشیۆم کۆشش بکریۆنە ئی شێعرێ وەرانوەرو بڕێوە مکانیزمە زاڵانە ڕۆزگارە بکریۆ. هەر چندە تەمامەن باوەڕم بە پەیوەندی هونەر و ڕۆشنویری وەرانوەرانەی (متقابل)، پێسەو سەرئامەدو دنیاو ئارۆی و خسڵەتێوە وەرپەنگ نەگیریا هەن، بەڵام “لۆژیک و پەنەزاناو” وێچش هەنش و مەشۆم وەرچەمش گیریۆ. ئەچایچوە پەیوەندی؛ سرۆشتی ئەدەبی، هونەری و کاریگەریەکانش چەنیو هێژمونی زاڵی سەپیارە بکریۆنە، بنمانیۆ کە ئی دوە دانە پێوەرە جیاوازیشان هەن. بییەو ئی شاعێرانە کە ئەئەچێگەنە دەقەکانشانم ئاوردێنێوە، پاڵپەشتێوە هێقم و دەلاقێوە ڕووبە دماڕۆیەنێ پەرێ شاعێرە نۆڕەسەکانو هۆرامانو ئەودیمی، هەر پاسە دێونای و هازناو ئی ڕەوتە شێعرەیە”
— نامێو کتێبی: محەمەدپور، عادڵ. “چەکەریای حەزێ تازێ و عومرێ جادە” مەریوان: ئەوین، چاپو یۆوەمی.1396(پەلو 93).

نموونەو دووهەم:
ئەچی کتێبەنە، موتەرجمی هۆرامی، بە خیالو وێش بێئانەی ویرو ساختارو زوانی یا ماناو فێعلەکان و زەمانەکەشان ببۆ ئامان هەر ئا زوانە کە وێش چەنەش ئاگاییش بییەن و ئەو یانەنە و دەگاکێو وێشانەنە قسێش پەنە مەکەران ئاوردەنش ئی مەتنە فاخرێشە پەنە تەرجمە کەردێنەوە کە هەرمانێوە درۆسە نییەنە و نویسەر هەتا نامان کوچێو زەحمەت بدۆ وەرو وێش و بلۆ بزانۆ کە “مامۆسا سەیدی هۆرامی” کە لاپاڵو دەسیشەنە بییەن، چەنیش نویستەن و چەنی فعلش بە کار ئاوردەن و چەنی کەلیمەکانش سازناینێ و ساختارو نویسەکەیش چەنینەن: ئینەیچە نموونێوە قەرەت ئەچی مەتنە تەرجمەوە بیێ کە بزەنەم سامۆئێل بێکێت ئارۆ زینە بیێ، دادگانە شکایەتو ئی ئازیزەیە مەکەرێ، ئی برادەرە سامۆئلی “نهیلیسمش” ئاوردەن باسو کەلیمێو “اللە و خوایش’ وستێنە دەمو نویسەری! ئەڵبەتە من فرەتەر نمەلو دلێو ئا باسەیە تا وەختو وێش، ئیسە تەنیا ساختاری دەمواچو ئی نویسەیە باس مەکەروونە:

— زوانی دەمواچ:
ولادیمێر: ئیسە؟. . .(بە وەشحاڵیوە) تۆ واوەی ئینای چێگە. . .(بێ فەرق) ئیمە واوەی ئینایمێ چێگە. . .(عادز) من واوەی ئینانا چێگە. . .!
ئیستراگۆن: خۆ وێت وینی. . . وەختێ من هەنا لاتنە تۆ وەزعەت فرە گولەنە. . . من ئەگەر هەر وێم بو بێتاقەت مەبوو.
ولادیمێر: (تۆریای) ئەی چی واوەی منەتەت کێشتە و ئامایوە؟
ئیستراگۆن: مەزانوو
ولادیمیر: وەلێ من زانوو، ڤەروو ئینەی مەتاڤی هاگاداری وێت کەری، ئەگەر منت چەنە بیێنێ نازێنێ کوشات!
— زوانی نویسیاری:
وەلادیمێر: ئەئیسە؟ . . . بە وەشحاڵیوە تۆ واوەی ئینایرە ئەچێگەنە. . . بێ تەوفیر ئیمە واوەی ئینایمێ ئەچێگەنە. . .(عادز) ئەمن واوەی ئینانی ئەچێگەنە.
ئیستراگۆن: خۆ وێت مەوینی. . . وەختێ ئەمن هەنا لاتەنە ئەتۆ وەزعەت فرە گولەنە. . . ئەمن ئەگەر هەر وێم ببوو بێتاقەت نمەبو.
وەلادیمێر: تۆریای؟ پەی چێش واوەی منەتبار بییەی و ئامایوە؟
ئیستراگۆن: نمەزانون
ولادیمێر: وەلی ئەمن مەزانوونە، وەرو ئانەیەنە کە نمەتاوی حامی وێت بشیەی، ئەگەر ئەمنت چەنی بیایێنێ نازێنا بوکشانێت!(پەلو71)
نامێو کتێبی: بکێت، سامۆئێل، “چەمەڕایی گۆدۆینە” هۆرگێڵنای: ڕۆستەمی، فەرشید، مەریوان: ڕێباز،1395(پەلو71)

 hewraman
Load More In ویر

داواچیٛو بنویسە

پۆستی ئەلکترۆنیکەت بڵاو ناکرێتەوە . خانە پێویستەکان دەستنیشانکراون بە *

بابەتو دماتەری

ئەراگیٛڵی

ئەراگیٛڵی ئەگەر شەویە جە شەوەکان ئاسمانوو پەڕ جە هەسارەو یۆ جە هەوارەکاو هۆرامانی کەردیمێ …