یانە ئەدەب و هونەر ئا وەخته من جوانێوی کەم ڕوو بیٛنیٛ هەمیشەی سەرەم دلیٛ کتیٛبانه بیٛ

ئا وەخته من جوانێوی کەم ڕوو بیٛنیٛ هەمیشەی سەرەم دلیٛ کتیٛبانه بیٛ

79

ئا وەخته من جوانێوی کەم ڕوو بێنێ هەمیشەی سەرەم دلێ کتێبانه بێ. گردوو دەور و بەریەکام عادزێ بێنێ چینەیه من هەمیشەی کونج گێروو و خەریکوو وانایەو کتێبانا.
ئەدٚام ژەنێوه سادٚێ و بێ سەوادٚە بێ، باوەرش پاسه بێ مشیۆ من بەرا لا مێرزا قاسمی دۆعا کەر و جن گیروو دەگاکێما تا وەش بوەو، هەر پاسەشه کەرد و بەرداش!
مێرزا قاسم پەشتوو عەینەکەکاشەنه تەماشێوی سامدارش کەرداو ئەدٚایچم گورج گورج و هەناسه بڕ خەریکە بێ قسێش پەی کەرێ:

– مێرزا قاسم گیان من ده زارۆڵێم بیێنێ نۆشا ڕێک و پێک و پاک و پۆخته گەورێ بیێ و لواینێ سەردەموو یانە و ژیواو وێشاوه، تەنیا ئینەشا نمەشۆوه هیچکامی، ئەجیۆ جنا پێکان.
ساحبێو ڕۆ بیەو تا وێرەگا سەرەش ئێنا دلێ کتێبانه، نه نان و ئاوش هەن پەی، نه ژیوایش مشۆوه بەشەری. مێرزا قاسم گیان خودٚا عومری پەڕ بەرکەتیت فره کەرۆ، تۆ گیانوو مەتی کولسوومێ ئی کوڕیمه بارەو سەروو ڕای ڕاسێ.
مەتی کولسوومێ ژەنەو مێرزا قاسمی بێ، گردٚ کەس به گیانوو ئادٚێ قەسەموو مێرزای دێنێ.
مێرزا قاسم دەسش ئاورد ڕیش و ڕوه چرچ و ترەک ترەکەکێشەره و پەرساش :
چەنەم ویەره واڵێ گیان، ئی کوڕته هینوو شەوەو گونای و حەرامێ نیا؟!
ئەدٚایچم ماچۆ : یانی چێش مێرزا؟ یانی تاتەش یۆتەر بۆ؟!
مێرزا ماچۆ: نا واڵێ گیان، چی قسێ منیەی دەموو من؟ من کەی پاسەمە واتەن؟ ماچوو هینوو شەوەو قەتڵی و مانگێ حەرامێ نیا؟!!
ئەدٚام لچش گەسشەنەو ماچۆ : خودٚا عومرم نەدٚۆ ئینه چە قسێوەنه؟ چی من و شوەکەم جوولەکێنمێ، چی هاگاو خودٚا و پێغەمبەری نمەزانمێ؟
مێرزا قاسم به ئەهوەنیێوه ماچۆ : عادزه مەبه واڵێ گیان، من مشیۆ ئی چێوا پەرسوو تا بزانوو چێششا! جا ئیسه خواینه با تەماشەو کتێبەکەیم کەروو بزانوو چێش ماچۆ.
پەلێ کتێبه شەق و شڕەکەیش دایشەو لاو چیروو لچانە دەسش کەرد به وره ور کەردەی، پێسه واچی ورد و ئەورادٚ بوانۆوه، جار جاریچ به تیسیێوه دیێ پەی من و هەم دیێوه ملوو کتێبەکەیشەره.
وره ورش تەمامیاو ڕوەش کەرده ئەدٚایم و ماچۆ : ئی کوڕته مانگەو شانسیش مارەکۆڵیەنه.
ئەدٚام به پەلە و سەر سڕیێوه ماچۆ : دەی عەلاجەش چێشەنه مێرزا گیان؟؟
مێرزا قاسم وێش جەم و جۆر کەردو ماچۆ : دوێ هەرمانێ هەنێ مشیۆ حەتمەن کەردێشا ئەننا بەدٚتەر بۆ! وەڵینەشا ئینێنه مشیۆ گردٚوو کتێبەکاش سۆچندێ، تەماشێوی خۆفناکش کەرداو خوڕاره ماچۆ : چه کتێبێو موانیەو؟
منیچ به تەرس و لەرزێوەو واتم : “مخس” کتێبوو “فرانتس کافکا”ی.
مێرزا وڕم بی پۆنەو ماچۆ : مەسخ؟ پراتس کافیکۆ؟
دیا پەی ئەدٚایم و ماچۆ : ئەوە ئەوه ئەوه، ئی کافکۆ ناپسڵمانێوا بێ ئەنناز، هەرچی جوانێ هەنێ جه ڕای لاش داینێ.
جه بێ سەوادٚی و بێ ئاگایی مێرزای خوەم پەی ئامابێ و زاتم نەبێ خوو.
دیسان ماچۆ به ئەدٚایم : ئەنا واتم، هەرچی کتێبێش هەنێ جەمێشا کەردێ و بەنزینشا کەردێ ملەرە و سۆچندێشا، ئەی نامێو وێش چێشا؟؟
ئەدٚایچم فره ماقووڵانە و به حورمەتەو ماچۆ : کامبیزی نوکەرت!
مێرزا قاسم ماچۆ : حەی حەی حەی، دەی کامبیز نامێنه؟! دلێ فاڵەکەیشەنه نویسیان مشیۆ نامێش واڕدێ کەردێش ئەسەد.
ئەدٚایچم ماچۆ : دەی مێرزا گیان ئینیشا کەرمێ ئێتر وەش بۆوە؟
مێرزایچ به ڕۆح زلیێوه ماچۆ : ئەی چێش واڵێ! تازه بو بەشەرێوی دەرد وارده.
ئەدٚام دەسش کەرد لا سۆخمەکەیشەره بڕێو زەڕش بەر ئاورد و نیاشەنە مشتەو مێرزا قاسمی و ئامایمێوه یانه.
سەبای من نامێم واڕیاو بیانی ئەسەد و مەراسموو کتێب سۆچنای جه هەوشەکێمانه لوا ڕاوه، منیچ مات و دڵگیر تەماشەو شۆڵەو کتێبەکا کەرێنێ، “زنبق دره” کتێبوو “باڵزاک”ی و “لبەی تیغ” هینوو “سامست موام”ی و ….

ئیسه من ئەسەدەنا، تەماتە ورەشوو سەروو جادٚەی. ژیوایم وەشا، کاسبی و زەڕم فرەن.
قەرار بێ کامبیزی نویسەر بوو بەڵام بیانی ئەسەدی تەماتە ورەش.
هەر وەخت ویروو ئا ڕوا کەروەو، دۆعاو ئەدٚایم و مێرزا قاسمی کەروو.
هەر چن نەبیانی نویسەر، بەڵام نویسەرێ مشناسوو زەڕوو کێلێو تەماتاشا نیا، منیچ بۆنەو ترۆقی و وەڵ کەوتەی هۆنەر و فەرهەنگوو وەڵاتەکەیما، بێ زەڕ تەماتێشا مدٚەو.

هۆرگێڵنای به هەورامی : یاسر ڕەشیدی

سەرچەمه : ئێنترنێت

 hewraman
Load More In ئەدەب و هونەر

داواچیٛو بنویسە

پۆستی ئەلکترۆنیکەت بڵاو ناکرێتەوە . خانە پێویستەکان دەستنیشانکراون بە *

بابەتو دماتەری

ئەراگیٛڵی

ئەراگیٛڵی ئەگەر شەویە جە شەوەکان ئاسمانوو پەڕ جە هەسارەو یۆ جە هەوارەکاو هۆرامانی کەردیمێ …