یانە هەورامانی بشناسدیٛ هەورامان و پیرشالیار و کوٙمسای

هەورامان و پیرشالیار و کوٙمسای

123

هەورامان و پیرشالیار و کوٙمسای

حەیفا تەختەکم دەورە دریانی
دەفتەروو نەقشوو بێگانەکانی
تا نەقشەکێشت ئیستێعمارا
هەراڵە برەیمی هەرسیش پەیت وارا
بە تۆو وەشا هەورامانی تەخت
گۆراڵێش شیفان پەی زامانی سەخت
پەی ئانەی کە خاستەر و ڕوونتەر تاومێ یاومێ بە ئەوپەر یام قووڵایی بابەتی ، سرنج دەیمی بە ئی واتەی کە دەسەرقۆتوو فرەو بابەتاو هەورامانینێ .
هەورامان
هور+ئامان = هورامان ، هور یانی بەرز بیەوە و ئامان یانێ ئامای .
یانێ یاگێ کە پیایێ گەورەش چەنە بەر ئامان .ئی یاگێ بۆنەو ئا ژیراوە برز بیەنۆ و جە وەڵاتاتەری هور ئامان .
هۆر یانی ، وەر
ئامان یانێ بەر ئامان
هۆرئامان یانێ یاگێ کە وەرش چەنە بەر ئامان . چێگەنە ئا کەسایەتیە کە پیرشالیار بیەن تەشبیە کریان بە وەر .
ئەگەر خاس سرنج دەیمێ هەورامان بە بۆنەو شاخاوی بیەیشۆ جە وەڵاتوو کۆردوارینە ئەوەڵین یاگێن کە وەرش گنۆ .
هەورامان جە لایەنوو جۆغڕافیایرە جە ماباقی وەڵاتەکا بەرزتەر و هۆر ئاماتەرا و پێسەو جەزیرێوێ وشکی کە دەوروو بەرش شاخوو کۆی گێرتەن و دەور دان .
هەورامان یاگێوەن کە ئەهوورامەزدا چەنەش بەر ئامان و ژیڤان یانێ یاگێو ئەهوورامەزدای .
هەورامان یاگە پاو ئا کەسی کە جە ئوورنە پێد٘ا بیەن ، حەزرەتوو ئیبراهیمی جە وەڵاتوو بابلوو عێراقی و ئوورنە جە ئەد٘ێ بیەن و پەی ئێرشادی ڕۆەش کەردێنە شاخوو کۆو هەوراماناتی کە پا بۆنەوە نامێش نیان ئوورئامان ، یانێ کەسێ کە جە وەڵاتوو ئووریوە ئامان .
گێڵناوە کە جە دەورانوو پاشاییو ئەسکەنەری مەقدونی ، هەورامان بۆنەو دوورە دەسیوە یاگێو زیننانوو ئەسکەننەری بیەن ، زینانیکا چڕیەنشا ئەورامان ، نانما پەی باردێ ، ئی واتە ئێننە تێکرار بیەنۆ تا دمایی پێسەو یاگێ ئێژاو ئەسەنگێ سەروو زوانوو خۆڵکیوە مەنەنۆ و نامێشا نیان ئوورامان .
ئانە ڕاسە بۆ جە بارەو هەورامانیوە ، هەورامان جە لایەنوو سیاسی ، عیلمی ،سنعەتی کۆمەڵایەتی ، ئابووری ، زانایی ، ژیری و ئاوەزیوە ، جۆغڕافیایی و ..
جە ماباقی وەڵاتەکاتەری ، هۆر ئامانوو بەرز بیەنۆ . هەر ئی خاڵە گرنگێ بیێنێ هۆکاروو ئانەی کە ئی وەڵاتە نامێش بیێنە هەورامان .
ئەگەر گەرەکما بۆ هەورامانی بەش کەرمێ ، جە کۆلنە هەورامان یەرێ بەشێن .
هەورامانی گەورە ، شەبەکستان ، هەورامانی وچکلە .
هەورامانی گەورە ، تەخت ، لهۆن ، ژاوەرۆ ، گاەرۆ
شەبەکستان ، سپاو ئیسلامی بڕێ جە هەورامیەکاش دەس بەسەرێ کەر٘ێ و ڕوانێو وەڵاتوو مووسڵیش کەرد٘ێنێ و ئیسەیچ هەر چا یاگە کیرێنێ .
هەورامانی وچکلە ، بڕێ جە هەورامیەکا جە زەمانوو ڕەزاخانی ڕوانەو شماڵوو ئێرانی کریێنێ و ئیسەیچ چاگە ژیڤا .

 هەورامانوو تەختی
چی ماچمێ هەورامانی تەخت ؟
هەر پاسە زانمێ هەورامان نشینگاو پیا ژیرا و ساحیب ئاوەزا بیەن و فرەو ئی پیایایچە جە مەحالوو هەورامانوو تەختینە ژیوایشا دانشا سەر .
ئی گەورە پیایێ هەر کام پەی وێشا تەختوو ژیری و زاناییشا هۆر دان و یاوگەو ئاواتەکاو خەڵکی هەژاروو سەردەموو وێشا بیێنێ .

تەختوو زانیاری و وانەری، پێسەو گۆگڵە مێزێ ئۆستاد و وانەری دەورەدان .
تەختووشاهی ، یاگێو گەورە پیایا
تەختوو دەس کرد٘ی یام ئارۆ واتەنی میزکار، ئی تەختە پەی هەر سنعەتێ جیا بیەن و وسای ژیر و دەس ساز وەردەسەکاش مڵووشنێنێش دەوروو تەختوو کارەکەیش .
تەختوو سانی، یاگێو نیشتەیرەو سانەکاو پیا ماقووڵوو گەورەکا .

 پیرشالیار
یاد٘وو پیرشالیاری جە دلێو هەورامیەکانە پەڕەدڵ زیننەن . ئەگەر کەسێ بلۆ دلێو خەڵکو هەورامانیو جە بارەو پیرشالیاریوە گنۆ بەحس ، بە جۆرێ نامێش بەرا وباسش کەرا ، پاسە زانۆ کە چن ڕوێ یام چن مانگێن کۆچی دماییش کەردەن . هەر ئانە بیەن بانگەشەو پرد٘ێ پتەوێ ما بەینوو ئاد٘ی و خەڵکینە . کە بن بڕ کەردەیو ئی پێوەنە هێقمە مێژوویەی ستەم و مەحاڵا .دوورش پەی نەلێنمێ کە ئەگەر واچمێ بە جۆرێ کە ئی پێوەنە ، پێوەنێ بە هێزا بەینوو ئێنسانی و باوەڕە کاشنە .
چەۆلاو ئی پێوەنە هێقموو محکەمەیوە کە پیروو خۆڵکش لکنێنێ یۆیرە شۆنوو پیری جە دلێو تارێخینە فرە لێڵاو تۆزاوی .
بە جۆرێ کە کەسایەتیو پیری ڕواڵەتێ ئۆستوورەییش سەرئامان و پەی وێش تارێخێ بە جیاش هەن .
واتەو پیرشالیاری وێش جە چن دەسە واتاتەری پێکیانۆ ،
جەبواروو زەمانیوە پیرشالیار واتێوەن کە بە درێژایی تارێخوو هەورامان سەروو زوانوو خەڵکیو بیەن و کاوێژش پەنە کریان . ئی واتە وێش جە چن دەسسە واتاتەری وش بیەن کە هەر کام بە جیا سەروو زوانوو خۆڵکوو هەورامانیوە بیێنێ و هەر کام پەی وێشا مانایێ قۆڵەشا جە زوان ، فەرهەنگ و تارێخوو هەورامانینە هەنە .
ساکە پاسە ئیتر لازم مەکەرۆ گێڵمێ شۆنوو ڕێخەو واتەو پیرشالیاریرە . ئەگەر چی ڕانە دڵەورکێ و دڵە چرکێ پەی ئی واتەی لاپشکێما کەرا پێسەن پاشێلوو زوانوو بابەبڵ بابیما کەرد٘ە بۆما .

پیر + شا + لیار = پیرشالیار
پیر ؛ ئی واتە گۆلک نیشانێوا پەی دەسەڵاتێ ڕۆحانی و دینی کە جە لاو خەڵکیوە یاگێ باوەڕی و ڕێزی تایبەتینە .

پیر یادگاروو ئایینوو میتراییسمین وە چا ئایینیوە سەرچەمەگێرۆ و دمایی پەی دلێو ماباقی دینەکاتەری فاڕیانۆ .
شا ؛ ئی واتە ئیشارە کەرۆ بە دەسەڵاتێ زەمینی و حاکمێ پاو فەڕ پۆختەی .
شا ، ئا ئاواتوو هیما پاکوو پۆختەو بەفەڕو پۆڕ خەیرەنە کە تاڤۆ خۆڵکی دەوروو وێشنە کۆ کەرۆوە و بۆ بە شادار پەی بیەی .
جە زوانی هەورامینە ئی واتە فرەو یاگانە دەرسەرقۆتوو واتە زەریفەکا بیەن ، پێسەو ؛شادار ، شاهەنگ ، شالەق …..
لیار ( یار) ؛ یانێ یاریدەر ، یارد٘ەوەر ، وەروێڕک ، وەردەس ، هامشان ،
جە قووڵایینە ئی واتە ئیشارە کەرۆ بە دەسەڵاتێ ڕۆحانی و دینی کە ساحیبوو سۆڵتەو دەسەڵاتێ فەڕداری خودایین و چەنوو تێکەڵ کەردەیو دەسەڵاتی دینی ـ زەمینی ،هیچ مەرزوو حدودێوەش مابەینوو وێشوو خۆڵکینە ناسەنۆ ، وێش بە یاریدەروو هامشانوو ماباقی پیرەکاتەری و هەرپاسە خەڵکی زانان .
ئی جۆرە دەسەڵاتێ جە هەورامانوو تەختینە دوورێ نەبیێنێ و پیرشالیاریچ پێسەو ڕۆحانیێ فرە گەورەی جە دەسەڵاتی ئەرک گیریان . ئی ئەرکیچە پێسەو دانشگای مەعنەوی ، قۆتابخانەی ، مزگی جە لایێوە و یاونای پەنەو پەروەرد٘ەکەرد٘ەی و ماباقی پیرکاتەری جە لایێ تەرۆ قۆرسایێ فرەش وستەن سەروو شانوو پیرشالیاری .
پیرشالیار پێسەو ماباقی پیراو وەڵاتەکاتەری پێسەو بابۆلی و چۆمانی و زاگرۆسی نەبیەن کەتەنیا وەرپرسوو مزگی بیەبۆ بەڵکوو پێسەۆ پیروو پیرەکا قسێ سەرەکیەش کەرد٘ێنە . پەی خەڵکیچ پێسەو ڕانموونیێ بیەن پەی باخداری ، ئاژەڵداری و سنعاتی دەسی .
زانایانێ پێسەو مێهردادی بەهار ، ئینێ سەروو ئا باوەڕیوە کە چوار چیوێ دیاری کریێ پێسەو :
بیروو بڕوا ، ڕاوڕەسمی ، یاگە پیرۆزە و مەبارەکەکێ ، شۆن کەوتەکێ . باوەڕوو دینێ تایبەت سەلەمنا .
بە ڕۆشنی پاسە دیارا کە گرد٘وو ئانیشا جە هەوراماننە هەنێ و دیارێنێ .کە ئەگەر واچمێ جە هەورامانی کۆنەنە پەرستشگایێ بە فەڕڕوو پڕ جموو جۆڵ بیەنو شانش دان شانوو بابۆلی و یونانیو بە هەڵە نەلێنمێ .
ئەگەر مامۆسا گەورەکێو کۆردەواری، پێسەو مەرحووموو مامۆسا عەبدۆل کەریمی مۆدەڕێسی و مامۆسا عەبدۆسسەمەدی تووداری ئیشارە بە لەقەبوو سێ مسەفای کەراو ماچا پیش اڵڵە یار بیەن ، جە لایێ تەرۆ مەرحووموو مامۆسا قانعی ئیشارە بە مارێفەتوو پیری پێسەو سەرچەمێ پەی ڕەسەنایەتی کۆردی ، کەرۆ و فەرماڤۆ ؛
کتێبی زڕدەشت کە ئەوێستایە
وەک باقی کتێب خەڵاتی خوایە
بە زوان هەورامی هاتە سەر بەشەر
یانێ های زەڕدەشت بوو بە پێغەممەر
تا دەوری خۆی بۆ وەک باقی دینان
بەڵام نەسخ بۆ ئەویش بە قۆرئان
مارێفەتی پیر ، واتەی شالیارە
کە بە پیر شالیار لەگشت دیارە .

ڕەسموو ژیرلاو (ژیراو) مەرێ و کۆمسای؛

وەڵ جە پیرشالیاینە ڕەسموو کۆمسای پێسەو ڕەسموو ژیرلاو مەرێ لوان ڕاوە . ئی ڕەسمە یۆ جە ئەوەڵین ڕەسموو هۆر چنیەو شۆری جە وەلاتنە و جێهانە بیەن ، گێڵۆوە پەی سەردەمێ کە هەورامان چێروو فاقەو تەڵەو دەسەڵاتدارانە ، کەوتەن مەترسی و پەی ماوێ فرەی پاش جە پێوەزی چەنوو لاید٘ەی کۆتا بیەن . چی سەردەمنە کە ماوێ فرەتەر جە ویس ساڵا درێژەش بیەن ، خوڵکوو هەورامانی پەی وێشا دەسەڵاتشا گێرتوو جە فرەو لایەناوەخودکەفا بیێ .
بۆنەو ئانەیوە ئی هۆرچنیەی دوور بۆ جە دەغەڵ بازی بەشەری بە ڕسمێ سننەتی بەرێنێش ڕا .
ئەگەر گەرەکما بۆ کارد٘ەوەژێو ڕەسموو یاساو ژیرلاو مەرێ کەرمێ، خاستەر ئانەن سرنج دەیمێ بە “ژیرلا(ژیرا) ” و “مەرە(مەرێ)”.

ژیرلا(ژیرا)؛
ژیر یانێ ساحیب ئاوەز، زانا، زانیار، کەسێ کە ڕاوێژدار و ڕاوێژمەند بۆ و تاڤۆ پەی دەورووبەریەکاش ڕاگا هۆر پێکنۆ .
هەورامان بە درێژاو تارێخی جە پیا ژیراو ساحیب ئاوەزا هاڵی نەبیەن .
تاومێ ئیشارە کرمێ بە ژیرانێ پێسو ، غازی بەهمەنی، باباخۆددای ، حەممەدی غەیبی ، پیرشالیاری و ماباقی پیرەکاتەری و مامۆسا گۆشایێشی ….
جە هۆر چنیەو ساڵانەو شۆرێنە ئی پیا ژیرێ مسگەرێ بیێنێ پی خۆڵکی و جە تۆشەبەروو ژیریشا کەڵک هۆر گیریان .
هەر پاسە بە ڕاویژی ژیرانەو ئاد٘یشا ئەندامێ ژیرێو شۆری هۆ چنیێنێ .
ژیرلا ، یانێ کۆمەڵێ پیا ژیرێ و ساحیب ئاوەزێ کە ژیرانە ئومووراتوو وەڵاتێ بەرا ڕاوە .

مەرە (مەرێ )؛
وەڵاتوو هەورامانی بە عام هاڵی جە ئی یاگێ نیا و گرد٘وو هەورامانە و هەر پاسە فرەو دەگایەکاو هەورامانی مەرەشا هەنە .
جە هەورامانوو تەختینە جیا جە دەگایەکا بەڵکوو فرە هەوارەکاو باخەکا مەرەشا هەنە .
مەرە ، بە یاگێ پانوو پۆڕە و هاڵی جە تلوو تەوەنی ماچا کە تەختش جە هەرێزی پۆژیان .
ئی یاگێ کەس بە تەنیا داواکارش نیا و سەروو هیچ کەسی دابەش نەکریێنە ، یام ئەگەر داواکارێش بۆ گەورەو دەگێ ، هەوار یام تایفەی بەشش جیا کەرۆوە .
جە پاڵوو مەرێنە ، مێرگ و مێرگەواریچما هەن ، کە ئی دوە واتەیچە هەر بنجوو بێخشا جە مەرێوە گیریان بەڵام مێرگوو مێرگەوار تاپۆشا ئینا سەروو تەنیا کەسێوە یام ساحیب زەمینێوە .

ژیرلا (ژیرا )و مەرێ؛

پا وەسفە کە کریا پەی “ژیرلا” و “مەرێ” ڕۆشن بۆوە پەیما کە، ژیرلا(ژیرا)و مەرێ یانێ ، هۆر چنیەو پیا ژیرا جە مەرەنە ، پەێ شۆرا یام کۆنگرەو وڵاتێ ، سەروو بەردەی ڕاوە یاساو ئا وڵاتی . بە جۆرێ کە نە هۆر ئێستەیو نیشتەیرە گنۆ چێروو فاقەی و نە نە کەسێ زڵم چەنی کریۆ .
ژیرلاو مەرێ وەڵ جە پیرشالیاریچنە بەدەوام بیەن و چەنوو هۆرچنیەو شۆراو مەرێ و کۆ بیەیوە خەڵکی ڕاوێژکار بە ڕاوێژی ژیرانەو وێش هەم ئەندامێو شۆرێ هەم خڵکش مۆچیاری کەرد٘ەن .
چی بارەوە تاومێ ئیشارە کەرمێ بە ڕاوێژ وو غازی بەهمەنی پەی فاڕایوە و دەگاو هەورامانی جە هانەو دەگێنە پەی سەرد٘ەگای و قەرەبوو کەرد٘ەیوە و شەڕوو هەورامانی و دێوەزناوی .
هەر پاسە جە زەمانوو پیرشالیارینە ، تاومی ئیشارە کەرمێ بە تەبەڕکوو تەوەنوو کاکە موسای …
ڕەسموو ژیرلاو مەرێ و کۆمسای پێوەزا چەنوو هەواروو هەوارنشینی و هەر پاسە باخوو باخداریوە . ئەگەر سرنج دەیمێ بە بنەماو دەگایەکاو هەورامانی ، گردوو دەگایەکا جە پاڵوو کانیاوەکاو هانەچەمەکانە بنەما نریێنێ . هەر پاسە دەگاو هەورامانوو تختی ئە ئینا پاڵوو هانەو دگێنە .
خۆڵکوو هەورامانی ژیڤایش یەکجا نشینی بیەن و هەر پا بۆنەوە جە دەگانە یانەی دوانزە مانگەش وەش کەرد٘ەن و جە هەوار و باخنە کەپروو کەوێڵش پەی ماوێ کۆرتی سازنان و موەقەت چەنەش ژیڤان .
چەنوو مەرزنایرەو نۆباوڤوو باخا و کۆچ کەرد٘ەی پەی سەرهەوارەکا دوور دارایوەو ئاژەڵەکا جە دەگی و یاونای بە لەوەڕگایەکا هام کات چەنوو چل و پەنجوو وەهاری ، کە ئیتر خۆڵک جە یۆی جیا بۆوە و دەگا چۆڵە بۆ پەی ماواو یەک ساڵی رەسموو ژیرلاو مەری و کۆمسای ملۆ ڕاوە .
ڕۆو کۆمسای جە لایێرە ڕۆوە هۆرچنیەو پیا ژیرا و جە لایێ تەریچۆ ڕۆو خوا حافێزی و گرد٘ەن ئازادی واسەن بیەن . هەر پا بۆنەوە گرد٘کەس سەوقاتوو وارد٘مەنیو کۆمسایش بەسەن مێشنە و چەنوو وێش بەردەنش پەی مەرێ تا هەم پێسەو نانوو نیمەڕوێ وێشو ئانێچ کە فەقیروو دەس هاڵیێ بیێنێ چەنەش وەرا و هەم پێسەو ناموو نیشانێ سەروو ئەنداماو ئنجۆمەنوو ژیرلای کەڵکش چەنە گیریۆ .
بە ڕەسموو وێ بیەو هەورامانیوە ئی سەوقاتی و واردەمەنیە گردش سەمەروو باخەکاو هەورامانی بیەن و هیچ کەس ئەوجەش بە وەڵاتێتەری نەبیەن .
وەزی ، تفە وشکێ ، هەڵوچەوشکێ ، مرۆ لتێ ، هەچکۆچی و ماباقی سەمەرکا سەوقاتوو ڕۆو کۆمسای و نام نیەروو ئەنداماو شۆراو ژیراو مەرێ و کۆمسای بیەن .
پی جۆرە کە هەر نامسەرێ ، بە نامێو سەمەروو دارێوە نریان و هۆرچنەکێ ڕای و نەزەرەشا هەرکام بیەبۆ جە دلێو تۆرەکڵەو سەمەرینە کە هەرکام بە جیا جیا بیێنێ (تفی جیا ، وەزی جیا )هۆرش گێرتەن و نیانش دلێو هەزار پێشەی (سننۆقوو ڕایا ).

کومسای؛
کۆ ؛ یانی کۆبیەیوە ، جەم بیەیوە
مسای ؛ یانێ فێر بیەی ، تەکبیرکەردەی پەی ساڵێ
کۆمسای یانی کۆ بیەیوە پەی تەکبیروو ئومووراتووساڵێ ، فێر بیەو ڕەسموو یاسای .
ئی مەراسمە جە چل و پەنجو وەهارینە کە واران بڕیان و خەڵک دەسش کەردەن ئاوداراو باخەکاشا ، بریان راوە ، چا رۆنە گردوو خۆڵکو پەنچ دەگاو هەورامانی جە یاگێوەنە کە ئیسە بارەگاو پیرشالیارین جەم بیەنۆ و تەکبیرو راۆیژ ساڵێشا کەردەن ، قێخا، میراو، شوانە،خاد٘م و…. شا گێرتێنی . چیوانێتەرێ ، پێسەو گێرتەو مامۆسای پەی جەژنوو هەوارەکا ، گێرتەو شەنیەری پەی تەکنایو وەزاو مزگی چا رونە کریێنێ.
دماو بەحس سەرو ئۆمووراتوو ساڵێ گردوو خۆڵکی خواحافێزی و گەردەن ئازاد٘یشا واسەن و سەباش گرد٘ کەس کۆچش کەردەن پەی هەواری ، ئانیشایچ کە زوتەر لوێنێ پەی سەرهەوار یام وەهارەهەواری ، جە مەراسمو کۆمساینە بەشداریشا کەرد٘ەن پەی ئانەی بزانا تەکبیروو ساڵانەی چەنینا..
ژیرلاو مرێ یام هۆرچنیەو شۆرێ کە وەڵ جە پیرشالیارینە لوان ڕاوە ، جە ڕۆو کۆمساینە بیەن….
ژیرلا، یانێ هۆرچنیەی یام ئێنتێخابو پیاێ ژیری پەی بەرد٘ەی ڕاوەو کاروباری….
مەرێ ، یانێ یاگێ پانو پۆڕو تەڵاناوی کە خۆڵکێ فرە چەنەش ڕاش بۆوە…..
ژیرلاو مەرێ ، یانێ جەم بیەیوەو خۆڵکێ فرەی جە یاگێ پانوو پۆڕەنە پەی هۆرچنیەی یام ئێنتێخابو پیا ژیرا پەی ماوێ فرە یاکەمی ، بەبۆنەو بەردەی ڕاوە کاروبار یام ئۆمووراتوو وەڵاتێ….
وەڵ جە پیرشالیارینە ،جە هەورامانو تەختی یاگێ پانوو پۆڕە ، پەی بەردەی ڕاوە ژیرلاو مەرێ و کۆمسای ئا یاگێو بارەگاو پیرشالیارینە کە ئیسەیچ ڕەسمو یاساو کۆمسای چەنەش ملۆ ڕاوە.
ژیرلاو مەرێ یام هۆرچنیەو پیا ژیرا یام ئێنتێخابات ،جە سەردەمو پیرشالیاری و وەڵو ئادیچنە پی جۆرە بیەن، جە ڕۆو چل و پەنجو وەهاری گردو پیایا مەحالەو هەورامانی جە مەرەنە جمێ بیێنێوە و ئانیشا کە نامێشا نیێنە سەرو وێشا یام وێشا کاندید کەرد٘ەن بە بۆنەو نەبیەو ئێمکاناتو ئێنتێخاباتی ، هەرکام جە کاندیدەکاشا بە نامێو سەمەرو دارێوە نامێ نیێنێ ، پەی نمونەی وەزی، تفی، هەڵوچێ ، مروی یام چیوانەتەرێ ، چنیەرێ یام رای دەرێ ، هەرکامش هورچنیێبا یۆ چی سەمەرو داراشە هۆرگێرتەنو وسەنشنە دلێو سنوقێ کە پەنەشاواتەن هەزارپێشە …
ئازیزا هەوارنشینی جە هەورامانوو تەختینە هەم وەڵو پیرشالیارینە وەهەم دماو ئاد٘ی چەنوو کۆمسای پێوەنشا بیەن.
جە زەمانوو پیرشالیارینە ، دەروێش گۆمار جە دەگاو دەمەیەوی کە ئاژەڵدارێ بەنامو ئاسەردەمی بیەن ، ساڵێشا زوو ملو پەی هەواری یانێ وڵۆ واران بڕی و چڵو پەنج و وەهاری ، ئاژەڵەگەش نەوەش گنۆ، پاجۆرەگێڵناوە شۆتەکەش ڕێویۆ و دەرد٘ەو ماس و دۆی مەوەرۆ ، کەیوانوەش ماچۆ لوە پەی خزمەتوو پیرشالیاری داد٘ بەرەلاش ، بۆنەو ئانەیوە کە دەسش هاڵی نەبو ، جە گەڵا یاپراخوو ئەوەڵ وەهاروو هەواروو دەربەن کەڵەمی قاولەمێ یاپراخی پێچنۆو بە سەوقات ماروشاپەی پیرشالیاری جە ڕۆو کۆمساینە ، دادو نەوەشیو ئاژەڵەکەیش یاونۆ بەپیرشالیاری و دماو تەمام بیەو مەراسمو کۆمسای و واردەویاپراخە کا ، ماچۆ بە دەروێش گۆماری لوە سەرو قەبرو کاکە موسای کە یوجە موریدکاش بیەن و وەڵ جەوێش فەوتش کەردەن ، دوێ رەکاتێ نما وەنە ، وەختە کە سڵامت داوت ئەوەڵین تەونێ(کۆ) کە چەمت گنۆ پەنە چەنەش پڕنەو بەرە وزەش دلێو شۆتو ئاژەڵەکەیت باوەش بۆوە ، ئانە وارانی دان وەنە و سەرد٘ەدەم بیەن ، چی زوو لوانی هەوار….؟
دەروێش گۆماریچ تەوەنەکێ بەرۆوە وزوش دلێو شۆتەکەی و ئاژەڵەکەش وەش بۆوە ، هەر پا بۆنەوە جە دماو بەردەی ڕاوەو ڕەسمو یاساو کۆمسای ، گرد ساڵێ تەوەنو کاکە موسای (کۆو مووسای ) ماڕا…..
ئینەبێ ڕەسمو یاساو کۆمسای ، وەڵ جە پیرشالیاری و دماو ئادی جە هەورامانو تەختینە….

عەبدۆڵڵا ڕۆستەمی
سێنزەو پاژەرەژوو نەوەدوو هەشتی

 hewraman
  • هەورامیەکیٛو وەڵاتو هیٛندستانی

    هەورامیەکیٛو وەڵاتو هیٛندستانی جە وەرنیشتو وەڵاتو هیٛندینە و جە شارو بومبەینە کە کەوتەن لا…
  •   هەرەرا

    هەورامان بەهەشتا و یاگە وەشەکاش بشناسمیٛ.            “هەرەرا” ئەگەر ڕات گنوٙ ل…
  • ژیوانامەو ڕەحمەتی مەڵڵا غەفورو گوڵپی

    وەرکوڵیٛ پوختە جە ژیوا نامەو خواوەنەوەش بیەى(ماموٙسا مەڵاغەفور)و (گوڵپ)ى. نویستەی: (ئیبراه…
Load More In هەورامانی بشناسدیٛ

داواچیٛو بنویسە

پۆستی ئەلکترۆنیکەت بڵاو ناکرێتەوە . خانە پێویستەکان دەستنیشانکراون بە *

بابەتو دماتەری

ئەراگیٛڵی

ئەراگیٛڵی ئەگەر شەویە جە شەوەکان ئاسمانوو پەڕ جە هەسارەو یۆ جە هەوارەکاو هۆرامانی کەردیمێ …