یانە هەورامانی بشناسدیٛ گوٙرەویٛ بەنینیٛ

گوٙرەویٛ بەنینیٛ

75

گوٙرەویٛ بەنینیٛ

گوٙنا ڕاپەیما

وەهار ئەومیبیا حەیواندارێ بار کەرێنێ لێوێنێ هەوار. بە هەژگی و لۆ و گوڵە چنوور کەپرێشان بەسێنێ.

لێ مانگەو خۆردادی بڕێوەشان واچێنێ ئارۆ بڕینەمان هەن گەلەکە نەجمندێ بێرەگانە.

پیای نەڵێنێ پەی سەروو ئاڵفی، بە ئوورینگی پەژم و موو حەیوانەکەی پاچێنێرە. ناماوە ئوورینگەکێ حیوانەکەش زامد٘ار کەردیبیا بە چەوری ڕەشە(کەرێ و بووڵە ڕەشێ قەد٘وو ساجوو نانێ) تیمارش کەرێنێ.
پەژم و موەکە حەر چا یا ورەشێنێش یا ئەورێنێشەو پەی وێشان.
بزێ بێنێ پەنەشان واچێنێ بزە مەرەزێ موەکێشان بەرێنێ کەرێنێشان چوخ و رانەک. ئا بزێ، بزێ قیمەتیە بێنێ.
ژەنی بە گلارکۆ لچوو دەرەنە گنێنێ گیانوو پەژمەکەی.
گلارکۆ تەختێوە بێ لە سەرینش پان بێ لە وارینەکەچش دەسێوەش بێ.
دەوروو حەفتێوە لچوو دەرەنە بێجگەم زرمەو گلارکۆی هیچەتەر نەژنەویشی لێ ئاوائینە.
هەوار نشینێ گرد دەس دێنێ دەسوو یەکترینیوە پەژمەکەی پێوەرە شۆرێنێ.
چا ئاخرەو بە نەختەی فاف پەژمەکەی شۆرێنێ بێ چلواری چەرمە.
کەمێڵێ پەژمەکەی کەرێنێ لێ گوونیان نینێش لێ دەرەکەی تا سەورۆ غەزەوەکەش فیسیەبیاوە.
پژمەکەی یاوێنەی تا عال وشکەو بیبیا، جا وەرە وەرە ئەورێنێ بە دەس شیش کەرێنێوە حەرچی قەلداس و پووش و پەڵا بێ لاش وەرێنێ.
بە پەژمە عالەکەی، مەوج و مازڵۆخ ڕێسێنێ، نیمەچش کەرێنێ دۆشەکێ و سرنگیای.
پەژموو کەمێڵەکانیچ(پەژموو قەد٘وو دەس و پا حەیوانی پەر بێ سەورۆ کەمێڵێش واچێنێ) دمەو ئانیە شۆرێنێش، شیش کەرێنەی و بە لەتەرە ڕێسێنێش پەی گۆرەوەو پووزوانی. ژەنی هەورامیە نازێنێ پرزۆڵە چێو خەسار بلۆ.
حەیواندارەکێ پەژم بەشوو ئا یانەنە دێنێ نا بز و مەیشان نەوۆ تەنیا مانگا و گۆرەکەشان بێ.
ئەدا یاسەمەنەم مانگاوێش بێنێ بەڵام هەمیشە پەژمش بێ. دمەو ئانەیە پەژمەکەش شی کەردیبیاوە وەرە وەرە بە لەتەرە ڕێسێش. هەمیشەچ جورە ڕێسێش نە فرە قەیم بێ نە فرە باریک، نە فرە کرژ بێ نە فرە خاو.
وەختەی سەیە لارێ بێنەی نەمێ لەتەرەکێش، مشکیەکەش دێ دەوروو ملیش، وەروو بەرەو کەپرەکێشەنە مندرێرەو دەس کەرێ لەتەر ڕێسەی. جا وەروو وێشەنە گرینگێوە کەرێ:
پەرسام جە شاهۆی نشینگای خوێشان
کۆنێ نازارێ چێش ئامە پێشان.

سەنگ سیای عەدەم پاسە جواو داوە
ئا نازارێ تۆ دیت لواو ناماوە

ئاڕۆ ئارەزووی باڵاو کەسەمەن
ساتە بوینووش سەد٘ ساڵ وەسێمەن

چەنی لەتەرەکێش خۆر خۆر هەڵسی مجێرە، ئەمنیچ چەنیش گرەوێنێ.
پاییزی کەمکۆڵ گرینێ بەنەکەش پەنە بۆیاخ کەرێ، ڕەنگێوە قاوەیی زەریف شتیبیاچۆ تەغەیۆر نەکەرێ.
واچێ ئینە پەی گۆرەوەو پووزوانوو فەتحڵڵای مەوۆ..
ئەدایاسەمەنەم هەمیشە پەی قەوم و کەس و کاریش گۆرەوی چنێ بەڵام ئنێ کاکەم و کاک هیوام عەلاحیدێ بێنێ.
ئیسەچ نەزانام چەنی بە ئا پەنج سنگەیە تاوێ پاسە ئا گۆرەوەو پووزوانانە بچنۆ، نیم نەخششان وزێنە هیچ کارخانێوە ئیسەچ نمەزانۆ ئا نەخشەیە بووزۆ لێ گۆرەوان.
ئەدا یاسەمەنەم هەمیشە ماچۆ ڕوڵە گۆرەوێ بەنینێ چەنی پووزوانان نەمەنێ حەرچی پیان سەردا گرۆ بیەن.
ئەوسا ژەنیچ گۆرەوێ بەنینێمان کەردێنێنە پەوکەتێ تووشوو ئی ڕۆماتیسمە بریایە نەومێنم.
ئیسە حەرچی بەد٘ەنەن چیامانوو دنیاش هۆرکێشان.
لەپە پەرۆ مەورەشان بازارەنە ماچان ئینە گۆرەوێنێ. مەعلووم نیەن بە چێش چنیەنێ.
چیامان پانە مەلۆ لێ بەد٘ەنی.

واچی ئەدا یاسەمەنەم ڕاسش واتەبۆ؟

پانویس: ئوورینگیٛ: برینگیٛ

لە سەرینش: لای سەرینش

نەژنەویٛشی: نەژنەویٛنی

لیٛ: دلیٛ

قەڵداس: قەلاس: داسی

مندریٛرە: مردیٛرە: مدریٛرە

 hewraman
Load More In هەورامانی بشناسدیٛ

داواچیٛو بنویسە

پۆستی ئەلکترۆنیکەت بڵاو ناکرێتەوە . خانە پێویستەکان دەستنیشانکراون بە *

بابەتو دماتەری

مەحمود خانو دزڵییٛ و گیانو هامکاری

مەحمود خانو دزڵییٛ و گیانو هامکاری بوٙنەو یاڎو سەڎ ساڵەو ئازاڎ کەردەی سلێمانی چیٛردەسو ئین…