یانە ئەدەب و هونەر هۆرامانوو دڵی

هۆرامانوو دڵی

118

هۆرامانوو دڵی

ئەمن هانام به‌رده‌بێ لاو هانایشان. پاسە زانێنان ئه‌چا هانه‌نه‌ ته‌ژناییمان که‌م‌ مه‌بۆنێوه‌‌. ئه‌جیێم ئه‌چاگه‌ وەرگەکاش دیانێشان نیەنێ. لەمینه‌کا گیفانەشان نەوراستێنەوە و نیەنێ شۆنەو لەمێشاوە. ڕواسەکاش هەر ڕۆیە فێڵیە وەشە نمەکەران و نمەورازان. نەزانێنا ته‌نانه‌ت پشیلەکایچش سفڵەتەر جە گرد لایەوەنێ و هەتا کوو چێویە بیاوۆ لاو لەخاماشان چەمێشان فرەتەر مەقووجنان و ئاخر سەریچوە بە گمێزیشان شیشەکێمان مه‌شۆران.

ئامابێنا که‌یل بوونێ جە واچەکان. دلێو کەلیمانە بەونێوە مەلێ و دەسە مەلێ. عێلم و عەمەڵی بورازوو یۆرە و تا بێبەر نەبۆنە باخوو دڵی سەروەنەشێویایمان. گەرکم بێ جە مەردەکاوە بنویسوون هەتاکوو زیننێ بانێوە و جە زیننەکاوە بنویسوونه‌ هەتاکوو ڕۆحشان نەمرۆنە.

واتشان: بکێشە نەقاشی. نه‌قاشی یانە هەڕینەکان و دەلاقە کەوەکان و ته‌کنای وه‌زه‌کان. ئەمنیچ کێشام. پەیکەرێم کێشای. مەولەویم کێشا، بێسارانیم کێشا، سەیدیم کێشا. هه‌رپاسه‌ مه‌ستووره‌ و خاڵۆی کۆماسی و هه‌مه‌وه‌ند و جه‌باری و ره‌نجوری و مه‌هجوری و داواشی و پاوه‌یان و جه‌هان ئارا و دێوانه‌ و داخی و بڵبل و سازانی و ئه‌لیاس و سوفی و یاسکه‌ و ده‌ردین و شێخ و زه‌کریان و مه‌و‌لانا خالد و نه‌قشبه‌ندی و مه‌لا تاهیر و قاسم و شالیار و دزڵی و حاجی و مه‌ردۆخی و مه‌جزوب و نەزانی و کاردۆخی و به‌دبه‌خت و نگڵی و عه‌بوڵڵابه‌گ و ئه‌قده‌سی و…… شیخوو ته‌خته‌یچم گرد کێشای. کەندۆڵە و ئەڵماس خان و سه‌ی یاقووب و ئه‌رکه‌وازیچم کێشای. تا یاوانیره شاخۆشین و لۆرستان گردیم کێشای. وه‌ره‌ق نه‌مه‌نه‌ و هه‌رپاسه‌ نه‌تاوام و نه‌یارام و نه‌یاوانی پۆره‌ که‌لامه‌کاو یارسانی و شانامه‌کان بکێشوونه‌ نه‌قاشی.

واتشان: ئێمە واتمان هۆرامانی بکێشە نەک ئینیشانە. ئینه‌ گۆرانێنێ و ره‌بتشان به‌ ئێمه‌وه‌ نیه‌ن و ده‌وره‌شا ویه‌رده‌ن. گەرکش نیەن بکێشی، دووربینیە بگێرە دەستوە و وێنێ بگێرە.
وێنم گێرتێ جە دەس نویسەکا. قەدیم هەتاکوو ئیسە گێردێم ئاوردێ وەروو دەسی و لاپەڕە بە لاپەڕە وێنێم چۆوە گێرتێ.

واتشان هەی هوو برا هیچت حاڵی نیەن جە هۆرامانی! ئێمە واتمان جە هۆرامانی وێنێ بگێرە.
واتشان: ئیجار قەڵەمیە بگێرە دەستوە و تۆ دەردەو ئینیشانە نموەری.

نویستم: دەنگوو ماما سەدریێ ئێ و خانای قوبادیش گرد نیابێنێ تۆ سینەکەیش و خەریکە بێ لەیلێ و مەجنوونی و شیرین و خوسره‌وی و شیرین و فه‌رهادی و حه‌یده‌ر و سنۆبه‌رێ و خورشید و خاوه‌ری لاونێوه‌. مه‌تی نه‌جیبه‌ مێعراج نامه‌ و مه‌ولوونامه‌ و قه‌ڵاو خه‌یبه‌ری و حه‌مه‌ حه‌نیفه‌ی شیوه‌ن که‌رێنه‌. دەنگوو لالۆ حەمە مورادی ئێ و بە دەنگی بەرز مەولەوی وانێوە. چن یانێ چەولاتەریچوە لالۆ ئەولکەریم زاڕوێش جەموە کەردێبێنێ و ده‌وڵه‌تنامه‌ و ڕۆڵە بزانی مەڵا خدریشا پەی وانێوە و فره‌ چه‌و‌لاته‌ریچوه‌ ده‌نگوو حه‌ماسه‌و‌ شانامه‌کا ئێنه‌ گۆش.

واتشان: پاسه‌ دیاره‌ن…

واتم: ئیتر وه‌سشه‌ن. ئینەن هۆرامانوو ئەمن. ئەمن ئامانا چەنی ئینیشانە سەمای بکەروون، چەنی ئینیشانە سەرچۆپی بگێروون و کەیلاو جە عەشق و وەشەویسی ببوونە و بژیوۆنه‌.

واتشان: ئانە نیەن. هۆرامانی مەشیۆم ئارۆیانە بکەرمێوە!!
واتم: وایه‌تا چێشەن؟
واتشان: مەشیۆم هەر کەسیە کە پەیش مەکریۆ هەرمانە بکەرۆن، هەر کەسیە هەر چیێویە مەزانۆن و مەتاوۆن بکەرۆنەش.
واتم: دەی خۆ ئەمنیچ هەر ئینمە واتەن!

واتشان: هه‌ی هوو. هۆرامانی نمه‌شناسینه. ئانه‌ که‌ی‌ هۆرامانه‌ن. هۆرامان تەنیا و قوتار جه‌ دەگاکێ ئێمەوه‌ تا چند دەگای ئەولاو دەگاو ئێمەوە نەترازیان. ئه‌سڵه‌ن هۆرامان یانێ ئی دوه‌ ده‌گاو ئێمه‌.
واتم: به‌ پاو کام کتێب و نه‌خشه‌ و تاریخ و سه‌رچه‌مه‌ی؟

واتشان: ئه‌داگه‌ورێمان و بابایمان یاگێ و سه‌رچه‌مه‌و گردچێویه‌ینێ.

گێجاوڵێ ئامای سه‌ره‌مه‌ره‌. وەروو چەمام سیاو‌ بی. گە‌زێو ئەولاتەر جە وێم نەوینێانا. تەنیا ئاننە فریا کەوتانی هەردوە دەسەم نیای سەروو سەرەیموە و یاگەکێو وێمه‌نه‌ ئیژیانیره‌!

سەعدۆڵڵا خوونخام (شەهریار)

 hewraman
Load More In ئەدەب و هونەر

داواچیٛو بنویسە

پۆستی ئەلکترۆنیکەت بڵاو ناکرێتەوە . خانە پێویستەکان دەستنیشانکراون بە *

بابەتو دماتەری

ئەراگیٛڵی

ئەراگیٛڵی ئەگەر شەویە جە شەوەکان ئاسمانوو پەڕ جە هەسارەو یۆ جە هەوارەکاو هۆرامانی کەردیمێ …