یانە گردین سیمبوڵو وردٚەواڵەو هەورامانی کاک «جەماڵ کەریمی» ئاستیمیٛ جیا

سیمبوڵو وردٚەواڵەو هەورامانی کاک «جەماڵ کەریمی» ئاستیمیٛ جیا

119
سیمبوڵو وردٚەواڵەو هەورامانی کاک «جەماڵ کەریمی» ئاستیمیٛ جیا
لەتەرێ، شانێ، نانەشانێ، چەنی، گوچەوەنی…….
ڕەوایەت کەرا کە «ئەسکەندٚەر مەقدوونی» دمای ئانەیە فەتحەی فرە و فراونەش کەردٚە، گێڵاوە پەی یوونانی. دنیا لوا پێشواز و خێر ئامایش، خەیر جە «دیوژن»ی کە فیلسووفێوی قانع و مامۆساو جەنابیشا بیەبێ. غەیبەتوو هیچ کەسی پەی ئەسکەندٚەری یاگێ پرسیاری نەبێ، بەڵام هنوو دیوژنی یاگێ پرسیاری بێ. پەرساش:«ئانە دیوژن کۆن؟» عەرزشا کەردٚ:«قۆربان ئینا ئەچوو بانجێڵەنە گڵێمێوەش وسێنە چێروو وێش و لەمە وەرەتاوێ کەرۆ.» دیارا عەزەمەتوو دیۆژنی ئەسکەندٚەرش کێشنا پەی لاو وێش! ئەسکەندٚەر سەروو پەیاوە وەراوەرشەو مدٚرا و دیوژن یاگێ وێشەنە تەپ و جمش نەواردٚ.ئەسکەندٚەر ماچۆ:«دیوژن هورزەو، ئەی مەزانی دنیام فەتحە کەردٚێنە. چێشت گەرەکا و داواو کام مەملەکەتی کەری تا تەقدیمت کەروو.» دیوژن بە بێمەیلی ماچۆ:« تەنیا یەک چێوم جە تۆ گەرەکا. ئادٚیچ ئانەنە کە وەروو وەرەتاوەکەیەو لاپشی، با وەرەتاو بدۆم وەنە!» وە ئەسکەندٚەر ماچۆ:«ئەگەر ئەسکەندٚەر نەبیاینێ حەز کەرێنێ دیوژن بوو!».
ئێتر کووچەو محەلەکاو مەحاڵا هەورامانیەنە دەنگوو ئاشناو کاک«جەماڵ کەریمی» نمەشنەودێ. ئی دەنگە و ئی ڕەنگە پەی هەمیشەی خامۆش بی. ڕاسی تا ئیسە شمەیچ لاو کاک جەماڵیەو چێوتا ئەسان؟ دەم ژاوێو وێژەنە وێمانە یا گۆنجەنێو یا چەمچێوی چوین. کاک جەماڵ مێهرەبانانە ژیوا و سەخاوەتمەندٚانە کۆچی دماییش کەردٚ و جیاش ئاستیمێ. ئەگەرچی کاک جەماڵ خامۆش ژیوێ بەڵام مەرگش چراوەو ڕەوشنگەریش گیسنانە پەیما و دەرسوو عەزەمەتی و گەورەییش پەنە دایمێ! چی ئێمەیچ نەتاومێ دەسوو نیازی نەکێشمنێرە ئەو هیچ کەسی و وێما ڕووسوورانە هەر پێسەو جەنابیشا نەژیومێ؟ پەی پۆس و مەقامی نەگنمێ شۆنەو هیچ کەسی و نانەو دەسوو وێما بوەرمێ و منەت بارێ هیچ ئەحەدێوی نەبیمێ. کەوتاوە ویروو داستانەکێ گۆلستانی: دوێ براڵێ بێنێ یۆشا خزمەتوو زەری و زۆریەنە و یۆتەریچشا بە زۆروو بازوو وێش نانە پێدا کەرێ.چندٚ وەشت گنۆ و چندٚ بە گەورەیی مری، ئەگەر گەورە بژیوی. بەڕاسی کاک جەماڵ گەورە ژیوا و گەورە مەردٚ. دڵم پەڕا، ئێتر جنابیشا و تۆشەبەرەکێش و شانە و لەتەرەکەیش مەوینوو. چندٚ مەنزەرەو بەساتەکەیش جە گۆشەو خیابانیەنە وەش و لەزەتی بێ. چندٚ ژەنا دەوردابێ و تەماشاو وەسایێلە دەس سازەکەیش کە ساختوو هەورامانی و دەسە پینە بەستەکا خەڵکوو ئی دەوریە بێ، کەرێنێ. یادٚت بە خەیر کاک جەماڵی ئازیز. یادٚت بە خەیر و وەشی. ڕۆحت شادٚبۆ. تۆ نیشانێ و سیمبۆلوو مدرامانی و دروستی و ڕاستی و سەخاوەتی بێنی. متمەئێن بە تاریخ ئانیشا کە بە هەر شێوێو زەڕشا بەدەس ئاروردەنٚ و ئارۆ ساحیبێ ئەمڵاک و سەروەتێوی فرەو فراوانینێ و ئەوحەد دەریەنێ، فەرامۆش کەرۆ، بەڵام هەرگیزای هەرگیز تۆ جە یادٚ نمەشی.
کەم تا کۆت ڕام کەوت ئەو قەبرسانی
چەمم کەوت گۆڕەو ڕەعیەتی و سانی
نەدار بێ کەفەن، نەلان نەتۆی خاک
دارایچ یۆش وەر بێ، هەرچی دیانی
تەرجمە«باباتاهێر»
وەلی فەتاحی
98/2/22

 

 hewraman
Load More In گردین

داواچیٛو بنویسە

پۆستی ئەلکترۆنیکەت بڵاو ناکرێتەوە . خانە پێویستەکان دەستنیشانکراون بە *

بابەتو دماتەری

ئەراگیٛڵی

ئەراگیٛڵی ئەگەر شەویە جە شەوەکان ئاسمانوو پەڕ جە هەسارەو یۆ جە هەوارەکاو هۆرامانی کەردیمێ …