یانە ئەدەب و هونەر بەڵاو گیانوو هەورامانی

بەڵاو گیانوو هەورامانی

152

بەڵاو گیانوو هەورامانی
ئارۆ ترمیناڵ سەقزنە ڕوو بە شاروو مەریوانی شارێو کە ” کلوودیووس جەیمز ڕیچ” جە سەفەرنامەکەشنە کە ساڵەو 1820 میلادیش نویستەن و نامێوەش چەنە نمەبەرۆنە، حەرەکەتمان کەرد. شۆنەو چن دەیێقارە یاوایمێ قشڵاق. زیایمێ دیاروو پۆمپ بەنزینەکەی وەحشەتمان کەرد، ڕاو ڕاڐاری نەبێ. قەتارەو ماشینان مەحشەرێوش خێزنا بێ. گورج لوایمێ سەروو سەفێ و پەرسامان ئانیشانە ئەپا دەور و بەرەنە بێنێ. واتشان” قەرارەن سەوای بەنزین گران بۆنە و خەڵک فورسەتش مەینە وەنە.” چەمێم ترووکناینە و وەحشەتم کەرد. ئینێ ئێتر کێنێ؟ نمەزانوو، گاهەز وێشان جوابیش بزانا. داخوم دەی جوابیش بزانا؟ جواب بە نەزەرەم کەمێو سەختەن.
پاڵم دا سەکۆیێویوە و ماڵام تەوێڵەمەرە و ئارامێو واتم؛ ئێحساسوو گێجی مەکەروونە.
دنیاو وێمەنە گم بیەبێنا و جار جار بێ هاگا پیزۆکڵەکەو پاڵوو گۆشی ڕاسیم مەکڕنێنا. ئەچی عانەنە سەروازێوی خرتڵە ئامانە پاڵم و بە کوردی واتش؛ ـ خەڵکوو کۆگەینی؟
دیانیش پۆرە و بە کوچێو ئێحساساتوە واتم؛ ـ هەورامان تەخت.
زوو کەردشوە جواب و واتش؛
ـ کۆگەو هەورامان تەختی؟
ـ هەباساوا.
زەردە خوێوی لاو وێشوە شیرین و لاو منیچوە تاڵش کەرد و واتش؛
ـ مەگەر هەوراماناتەنە ئەچینە دەگایێوەیچمان هەنە؟
ـ بەڵێ کاکە.
دیا پەولانە و ئەجا واگێڵ بیوە ڕوو بە ڕووم. واتش؛
ـ من ئەڐام هەورامیەنە و خەڵکوو نیەرینە.
زوو کەردم هەورامی و واتم؛
ـ هەورامی نمەزانی؟
ئی قسێمە بە لەفزێوی ئامێتە چەنیو تەمەسخۆری کەردە. بێ ئانەیە خرووکش بەینە وەنە، بێ خیاڵ واتش؛
ـ حاڵیم مەبۆنە بەڵام نمەزانوو قسێ بکەروونە.
دڵم خاو بیوە و ئێشێو پێکاشنە عەنناموو گیانیم. نەتاوام هیچتەرش چەنە بپەرسوونە. یۆترینمان بە بێ هیچ قسێوە ئاست جیای. گۆشێوەنە کزم کەرد و کۆڵێو

دڵورکێم داینە وەروو وێم:
ـ سێکس بیەن بە بەڵاو گیانوو هەورامانی. خەریکەن هەورامیێ مەبای مەبانە بە مێللەتێوی بێ هەدەف. وێشان مەسپارانە دەسوو هەر ئەندێشێویوە تا بواچان خەریکێو ژیواینمێ بێ ئانەیە ئایێندە نگەریشان چن یەسێ جە وێشان دوور کەوتەبۆوە. خەریکەن گردچێوەنە ئەفرات و تەفریت مەکەرمێنە؛ سێکسەنە، دینەنە، ماشین ساناینە، قسە کەردەی بە زوانێوتەرەنە، کۆچ کەردەینە، حەمام کەردەینە، واردەینە، نۆشاینە، وە تا هەر یاگێو کە من جە نویستەیش بێزارەنا.بێزارەنی؟ ئەچینەینە شکەت نەبۆ. سەرە ئێشەو وێم کەم نیەن ئی جامێعە بێ باوڕەیچە بیەن بە ئاهەنێوی زەوب کریا و هەر سات تکێوێش مەتکنۆنە ملمەرە. ئەرێ ڕوێو مەتاویەووە و ئینە حکمێوی حەتمین. مەگەر قەلبوو ” حەمەی موستەفازادەی” کێ مدرنا؟ جواب ئینا وەروو چەمانوە؛ من و تۆ. ئێمە بیێنمێ بە تکێوەی داخە و نۆخبەکامان ئازار مەڐەیمێنە. ویژدانمان دلێو قلووجە بەلواننە وێش ئاشار دان و زاتش نیەن بزیۆرە. جۆرج لۆکاچ ڕاس مەواچۆنە؛ زەمانێو کە نیروە موتەزادەکێو دەروونی کەم ڕەنگێ بیێنە هەر ئەدەبیاتێوی عەزیم سەرە مەنیۆوە و جەبەین مەلۆنە. کابرای سەرواز ئەننە ڕەحەت ئێحساسوو بێ ئاگاهیش جە زوانی هەورامی مەدرکنۆنە بەشەر دڕنیکی مەزنۆنە. هەر ئینە نیەن، ئەی ئا پیا گەڐە زلەتە ویر شیوە چەنیو ژەن و زاڕۆڵەکەیش هەر ئەچی ڕاو سەقز مەریوانینە واتیش پەنە خەڵکوو دەگاو سەرگەتێن و هەورامی نمەزانۆ. تۆ واتت پەنەش چی هەورامی نمەزانی؟ئاڐیچی واتش تاتەم ژەنیش کوردە بیێنە و هەورامش نیشانە نەڐاینمێ. کناچەکێ وێچش هەورامی نمەزانێ. بێ ئانەیە هیچکام نسبەت بە ئی مەسەلێ ئێحساسێوشان بۆ. هەر ئینە نیەن. ئەی کابراکەت هۆش شیوە هەر ئەچی ڕاو مەریوان سەقزینە سوارش کەردی و واتش هەورامین و هەورامی نمەزانۆ. تۆیچ واتت

دەی چی؟ واتش؛ ژەنیش کوردە بیێنە و ئی جۆرە قسێ.
خاسەن دڵە زامی کۆنە و نۆم تازە مەکەرەوە. نە بە گیانوو تۆ، ئەپا پیر خڐروو شاهۆی کە جە سۆتەی نەجاتش بی مەشۆم تا ڕا هەنە بلوونە و زامەکانم بژماروونە. ئەی ئا پیاتە ویر شیوە مەواتش سلێنینا و هەورامی نمەزانوو. ئینێ هەمیشەی جە وێشان و هەورامی قسە نەکەردەیشان دیفاعە مەکەرانە. بەهانێ مەیۆزاوە و مەخوانە. مەواچان بەرابەری، گردمان ڕامان بەهەشتەن و ئی جۆرە خیاڵێ. واقێعەن وەختێو ئینانێ لاشانە ئێحساسوو پووچ گەرایی مەکەروونە ئەگەر چێش ئاڐێ وەرمشاننە بەهەشتشان دیەن.
ویژدان ئینا قلووجە بەلوێوەنە و پەناش گێرتێنە.وتەن، شیرین وەرمت بۆ.

نویسەر: مەحموود قادری

سەرباسەکە بەنامیٛ(سێکس بەڵاو گیانو هەورامانی) من کەلیمیٛ یوەمەم لابەردە، چون خەڵک ئەوەلجار پەی سەرباسی مڎیونە، وەڵێ ئانەی بوانوٙوە،، وەڵاوگاو هەورامانی.. چەنی داواو چەنەویەردەی ئەو نویسەری

 hewraman
  • هۆرامانوو دڵی

    هۆرامانوو دڵی ئەمن هانام به‌رده‌بێ لاو هانایشان. پاسە زانێنان ئه‌چا هانه‌نه‌ ته‌ژناییمان ک…
  • ساڵێو تەڵاقوو تاتەو فەتەی کەوتەبێ!

    ساڵێو تەڵاقوو تاتەو فەتەی کەوتەبێ! -ئاندٚە بەینما نەبێ، من و عەبە چەنی یۆی ژەنیما ئاردٚە. …
  • توٙ جە ئاخرین ویٛنەکەمانە مەردی

    تۆ جە ئاخرین وێنەکەمانە مەردی. جە ئاخرین قسەکامانە، جە ئاخرین دیداریمانە،ئاخرین واچەکانە، …
Load More In ئەدەب و هونەر

داواچیٛو بنویسە

پۆستی ئەلکترۆنیکەت بڵاو ناکرێتەوە . خانە پێویستەکان دەستنیشانکراون بە *

بابەتو دماتەری

مەحمود خانو دزڵییٛ و گیانو هامکاری

مەحمود خانو دزڵییٛ و گیانو هامکاری بوٙنەو یاڎو سەڎ ساڵەو ئازاڎ کەردەی سلێمانی چیٛردەسو ئین…