یانە ئەدەب و هونەر فەتە و مەتی ڕابێ گیریاینە یوٙی

فەتە و مەتی ڕابێ گیریاینە یوٙی

93

«فەتە» و مەتی «ڕابێ» گیریاینە یوٙی
– ماچۆ گەدٚایی وەشا بەڵام قۆرتێش خرابێنێ. بە نەداری و فەقیری وێماوە ساچێنمێ. ئەچی ڕای ڕایەو ناکامێوەنە مەزانوو ئی بەڵای ناگەهانیە چکۆوە پەیما تاین بی. گیان، گۆنابارێنمێ، عەیب و عار نەمەنەن، حیا تکێنە، بەخوا دروێم پەنە مەدٚەیدێ گردٚ خەتاو ئی سووراو و سپیاویەنە.
سووراو و سپیاو گردٚ دەسکاریا
خاڵێو خودٚای ڕەژت هەر دیاریا
نەعووزووبیلا چێوی چامنە مژنەوی خەریکا فرقان کەری. ئەوسا حەفتێو ناخوونێت نەکەندێنێ، واچێنێ: «شەیتان سەرشاوە نما کەرۆ.» هەمیشە کاردٚی دەسماوە بێ نازێنمێ سەرە بەربارا! کە چی ئیسە نمەکەناشا هیچ، با هەڕەو دنیای نەدەو سەرەمەرە، ملا ناخوونێ مەسنووعیێچ منیا، من ئەژنیەنم تەماتە منیا بەڵام قژ نیای و ناخوون نیای ئێتر عەقڵم بڕوا نمەدٚۆ. خۆ شەتڵە تەماتە نیا.مەژگم خەریکا تەقۆوە. مەیاری نزیکەش بیەو، وەی وەی گێرۆرە. نزیکەم مەگنەو ناخوونەکێم پڕا! بەڵێ، وەرەتاو نەکەوتەن تەشتێو نانت پەتەن! دەی ئینە ئاخر زەمان نیا. خودٚا چەنی مەردٚا شمە بەخشۆش مامام قەسەم وەرێ واچێ:«ساڵێوشا واران نەوارێ و ها خەریک بێ کەشی سۆچای سۆچێنێ، واچێ: ئەوسا خەوڵک ژیر بێ و کۆش دارێنە گەورە گەورەکا. گەورەی و وردٚی بێ. زل و گۆلانەو دەگێ جمێرە ڕوەو هەڵاوەگا و بە وەیوڵەباڵە واتەی دوێ یەرێ دەورێشا دەێوە. وەیوڵە باڵێ سەروو پیرا یاخودٚا وارۆ پەی فەقیرا. وەیوڵە باڵێ سەروو پیرا یاخودٚا وارۆ پەی فەقیرا. قەسەم وەرێ هیشتا خەڵکەکە نە گێڵا بێوە دما و وەیوڵەباڵەکێ دەمشانە نەبڕیێبێ هەرئنەما زانا ئاسمان کەوت ناڵەو نرکە خەریک بێ دنیا ئاوی بەرۆش!»
-عەوی مەتی «ڕابێ» ئانە چی وێتەو دروێ مدٚەی. واران وارای و نەوارای کەی خەتاو ئانەیەنە کە وێما خاسێ بیمێ یام خرابێ.
– ڕۆڵەگیان تەرێق بەو من بە پۆپێ چەرمێوە مێژۆژ وەنە دروێ دەو، بەڵام تۆ …ئینا سەروو دەنووکیتەو ڕاس واچی.دەی واچی چێش. دەیخۆ باوکەکەم من وێمەو بەرمناردٚەن جە زوانوو مامێمەو گێڵنوە. ئازەمانە من هەر پێدٚا نەبێنا و ئەدٚاو تویچ باڵوسێ بیێنە. زل زلوو قۆل قۆل ماچۆ تۆ دروێ مدٚەی. دڵش پەون واچۆ مامایچت دروێ مدٚۆ! مریچڵە پارینە و ئێساڵینەکێ پینەیە ماچا. تۆ خوا من شێتە نەبوو قسێ کەروو پەی شمە.
– دەی چی تووڕێ بی خو منیچ وێمەو مەواچوو. دەموو مۆعەلێمەکەیماوە ئەژنیەنم. ماچۆ:« شمە با هەر وەیوڵەباڵێ کەردێ و وێتا مانندێ، واران نمەوارۆ. جۆغرافیان و هەورێنێ. منیچ خاس ویرم نەمەنەن چێشش وات بەڵام بڕێو قسێتەرێ کەرۆ کە ئێمە مسیارەکێچ فرە حاڵیما نمەبۆ. مەسەڵەن ماچۆ دەوڵەتەکێ هەرکەی مەیلشا بۆ متاوا هەورەکا وارنا و هەرەکیچ دڵشا پەو بۆ متاوا وەروو واران وارای گێرا. دەی خۆ منیچ پی قساشە هەر باوڕ نمەکەروو.چوو وەڵیەو بڕێو قسێش گێڵنەیمەو پەی لالۆ حەمە، واچێ :« پاسە تۆ باس کەری ئەجۆ مۆعەلێمەکەتا شێت بیەن.»
– نا ڕۆڵە گیان تۆ حەقت نیا پاسە واچی بە مۆعەلێمەکەیتا و مەبۆ وەراوەروو ئی ژەنایچەو پاسە من تەرێقە کەریەو. ئانە من دڵ و دەروون دارەنا یۆتەر بۆ هەردٚوێ گۆشێت بنەنە بەرمارۆ، هەر پەی وێت عەیبا. ئاها دەیەقێو تاتەت شکەت نەبەردٚ، گۆرچ چەنی پێسە بڵبڵی موانی. من پەی وێت ماچوو، با هەم دووچاروو گۆناحی نەبی و هەم فێر نەبی چەنی گەورەتەر جە وێت چەلان چەلان کەری. ئانا ئەدٚایچت ئاماوە، قەیدٚش نیا مەگێڵنووشەو پەی. ژەنا شمەیچ هیچ نەواچدٚێ. فەتە خام و خلیچکا هەر ئاندٚە مزانۆ! ئەی چیش پەنە ماچا فەتە؟ هەر وەروو ئی فرەدوایشەنە.
وەلی فەتاحی

 hewraman
Load More In ئەدەب و هونەر

داواچیٛو بنویسە

پۆستی ئەلکترۆنیکەت بڵاو ناکرێتەوە . خانە پێویستەکان دەستنیشانکراون بە *

بابەتو دماتەری

سەرنجێ ویٛمانە سەروو دەقێوە کاک بێهرووز محەمەدپووری (شاروٙ)

قومێ لەزەت و عومرێ جادە سەرنجێ وێمانە سەروو دەقێو کاک بێهرووز محەمەدپووری (شارۆ)  عادڵ محە…