یانە هەورامانی بشناسدیٛ ژیوانامەو کاک باقی خالیدی

ژیوانامەو کاک باقی خالیدی

93

ژیوانامەو کاک باقی (باقر) خالێدی

بێ زەند٘ ئەوەڵ کەسێ کە پێسە سەرقافڵەی تاواش جە ڕەوتوو تازەو عێلم و زانایینە، پێسە مامۆسای جە دەگاو هانەگەرمڵەینە ڕچە ماڕۆ و شانازی پۆشای بەرگی مەبارەکوو مامۆسایی پەی وێش کەرۆ سەوقاتوو ژیوای، کەستەر نیا بێژگە بە ڕەحمەتی کاک باقی خالێدی نەبۆ.

کاک باقی خالێدی جە دەگاو هانەگەرمڵەینە ئەوەڵ کەس بیەن کە تاوانش دما پلەکانەکاو واناو ئا دەورە و زەمانەیە بڕۆ و شەرافەتوو مامۆسایی پەی وێش دەس نیشان کەرۆ.

کاک باقی خالێدی بە پاو شناسنامەکەیش چواروو یەخبەند٘انوو ساڵەو هەزار و یەرەسەد٘ و هەژدەی کۆچی ڕۆجیاری (۴؍۱۰؍۱۳۱۸) جە دەگا دڵستان و دڵبەرەکێ هانەگەرمڵەینە و جە دامانوو شرامی هەمیشە سەربەرزینە ئامان دنیا.

تاتەش نامێش مەحموود٘ و ئەد٘اش نامێش خاتوو ماجەمینەنە.

کاک باقی دلێ خێزانێ ئیمانداری و ساحیب ئێخلاقینە ئامان دنیا و وەرە وەرەی گەورە بیەن و یاوان پەنە.

ئاد٘ پا حەزە واد٘ەو مەکتەبیش یاوان تاتەی بە ڕەحمەتیش کە فەڕاشوو مەکتەبوو هانەگەرمڵەی بیەن، دەس گێرتەن و نیانش وانای و بە هانیاری ئاد٘ی پێسە ئەوەڵ کەسی تاوانش باخوو زەحمەت و ئاواتەکاش نیشنۆ سەمەر.

کاک باقی بە سەرکەوتەی تاوانش پلەکان بە پلەکانوو وانای بڕۆ و بلۆ دانشسەرا.

ساڵەو ۱۳۳۸ کۆچی ڕۆجیاری بە سەرکەوتەی دانشسەرایچ تەمامنۆ و بەرگی مەبارەکوو مامۆسایی پۆشۆ و ئی ئەرکە گەورە و گرانە گنۆ سەروو شانەیش.

کاک باقی شانازی ئانەیش پەی وێش لانیە کەرد٘ەن کە ئەوەڵ مامۆسا و ئەوەڵ ڕانیاری هانەگەرمڵەیی مەکتەبوو دەگاو هانەگەرمڵەی بۆ.

کاک باقی خالێدی سەرجەم دوێ ساڵێ هانەگەمڵەنە هەم پێسە مامۆسای، هەم پێسە ڕانیاروو مەکتەبی خزمەتش کەرد٘ەن بە خەڵکوو دەگاکێش. (۱۳۴۰ و ۱۳۴۵ کۆچی ڕۆجیاری.)

هەرپاسە کە وەڵتەر ئیشارەما کەرد٘، کاک باقی سەرقافڵەو ڕەوتی عێلمین جە دەگاو هانەگەرمڵەینە و تاوانش دەها مسیارێ زیرەکێ و لایقێ پێسە:
کاک فەراد٘ فەتحی، کاک حسەین یۆسفی، کاک ئارام ڕەسووڵی، کاک ئەسعەد٘ لایی، کاک فایق فەتحی، کاک خەسرەو ڕەحمان زاد٘ە، کاک ڕەحمان غوڵامی، کاک ئەمین ئوستۆار و … کە هەرکام چی ئازیزا وێشا بیێنێ سەبەبوو ترۆقوو وانای جە هانەگەرمڵە و مەحاڵوو هەورامانینە، پەروەرد٘ێ کەرۆ و یاونۆ پەنە.

کاک باقی خالێدی ئینسانێ ژیر، وەش پەنە کەوتە، وەش گوزەران، عەشرەت وەشەویس، ڕۆح سووک و دەس و دڵ واز بێ و هیچ وەخت دوورە وەڵاتی نەتاواش بۆ سەبەب جە قەوم و عەشرەتی و کەس و کاری بڕیۆ.

کاک باقی دوێ ژەنیش ئاورد٘ێنێ و چی دوە ژەنەیە یەرێ کناچێ و یەرێ کوڕێش هەنێ کە ئاواتوو سەربەرزیشا پەی وازمێ.

ئاغەی خالێدی ئەوەڵ ساڵوو خزمەتیش (ساڵەو ۱۳۳۸ کۆچی ڕۆجیاری) قسمەتش بۆ تێکەڵوو خەڵکوو دەگاو زاوەری و چاگە ئەوەڵ ساڵوو خزمەتیش مد٘ۆ سەر. پەی دوەم ساڵوو خزمەتیش (۱۳۳۹ کۆچی ڕۆجیاری) ماوا دەنگ وەشا (دەگاو کەیمنەی) بۆ یاگێ خزمەتیش.

کاک باقی خالێدی ساڵەکاو ۱۳۴۱ تا ۱۳۴۴ چی شار و دەگایانە پێسە مامۆسای و ڕانیاروو مەکتەبی خزمەتش کەرد٘ەن: شمشێر، ڕوانسەر، مەزید٘ی، هەلوول (بەش درۆسم واتە بۆ.)

ئاغەی خالێدی ماوێ گنۆ شەهاباد و ئیدارەو پەروەرد٘ەو ئی شارینە ئی هەرمان و ئەرکێ گنا سەروو شانەیش:
وەرپەرسوو کارگوزینی، وەرپەرسوو ڕەفا موعەلێمی، وەرپەرسوو بەشوو ئەکابری یا پەیکار با بی سوادی، ڕەئیس فەرهەنگ و ئی ئەرکا بە عالتەرین شێوە بەرۆ ڕاوە.

کاک باقی خالێدی چوون خێزانش خەڵکوو کرماشانی بۆ، چی شارەنە پەی هەمیشەی جانیشتە بۆ و تا دما هەناسەو ژیوایش کرماشان بۆ ماوا و مەکانوو ژیوایش.

کاک باقی شونەو وڕای دەوڵەتوو شایرە، تێکەڵوو بڕێ گیر و گرفتی بۆ و سەرجەم دوێ ساڵێ (۱۳۵۷، ۱۳۵۸ کۆچی ڕۆجیاری) جە خزمەتی بڕیۆ، بەڵام شۆنەو ئی دوە ساڵەیرە دیسان خوڵکە کریۆوە پەی هەرمانێ و ملۆوە سەروو خزمەتی.

کاک باقی سەرجەم ۲۴ ساڵێ خزمەت کەرۆ و بە زەوقوو وێش، وێش یانەنشین کەرۆ و سەرقاڵوو ژیوای ڕوانەیش بۆ.
……….

هەرپاسە کە ڕەوڕەوەو ڕۆزگاری ڕوێ قسمەتوو ئینسان چەنی وەشیەکاو ئی دنیە تێکەڵ کەرۆ، ناچار مشۆم ڕوێچ جیاش کەرۆوە و دلێ پەراوێزوو وێشەنە پێچۆشۆ!!

بەڵێ کاک باقی خالێدی ئاخرش ڕێککەوتوو ٦؍ ٦؍ ۱۳۷۴ کۆچی ڕۆجیاری جە شاروو کرماشانینە دڵە گەورەکەش پەی هەمیشەی جە کار گنۆ و چەنی دنیای ڕۆشنێ یانەئاوایی کەرۆ و زیارەتەڵانوو هەوڵی شاروو پاوەی بۆ ماواو ئەبەد٘یش.

یاد٘ش بەرز و ڕۆحش شاد٘

✍️سوبحان ئەمینی

 hewraman
Load More In هەورامانی بشناسدیٛ

داواچیٛو بنویسە

پۆستی ئەلکترۆنیکەت بڵاو ناکرێتەوە . خانە پێویستەکان دەستنیشانکراون بە *

بابەتو دماتەری

سەرنجێ ویٛمانە سەروو دەقێوە کاک بێهرووز محەمەدپووری (شاروٙ)

قومێ لەزەت و عومرێ جادە سەرنجێ وێمانە سەروو دەقێو کاک بێهرووز محەمەدپووری (شارۆ)  عادڵ محە…