هەڵەبجە

71

هەڵەبجە

چەتە لافاوو ئەنفالی، قاچاخە کارێزوو گۆڕە بە کومەڵەکارە وێش یاونارە هەڵەبجە.
هەبەسیابێ، هەورێ سیاوێ ئاسمانەوە وینێ وەرم بە خەردەل گوراڵێش سەراو کەردێ، باڵوو باڵداراش ماڕا، وەرموو پەپوولاش زڕنا، یانەقۆڵەو زارۆڵاش وڕنا، خەزانوو چرۆیش ئەو هەژگا پۆشا، بادی قوش ئاسا شارێوش قڕنا. بێشکۆ زارۆڵا، گوچانەو پیرا، گیواوو کەشا، ڕاگا کەڵەلانا، چۆڵ و وێرانا و قاڵاوێ وانا.
ئا وەهارە نالەبارە ڕوو سیاوە، پەی ڕەشبەڵەکوو زەماونەو گەورەکناچا داوا چۆپیش کەرد، بنجێو چنووری پڕووزیاشا دا دەسش.
ڕۆجیار خەجاڵەتیێ ڕەشبەڵەکوو مانگ و هەسارەینە، وێش پەشتەو هەورە سیاواوە شارابێوە.
سیروانیچ گیر واردە بێ چەنی باڵۆسەو بڵی ڕۆڵەیش، واچێ منیچ زاموو تۆم هەن هەڵەبجەی کۆس کەوتەکە نەجما مەرگەکەیت، پێراریچ شەنگالەنە تەقناش.
ئیسەیچ هیشتا بۆڕەو لۆدرەکەی گۆشوو ئا قەبرە بە کۆمەڵانە زرنگەش مەی؛ حەوت ئاسمانەش کەڕوکاس کەردەن.
قابێز قنج و قیت دەسش دابێ کەلەکێش و واچێ هەی هاوار یارمەتیم دەیدێ خۆ کافرستانی نیا مەتاوو ئی گردوو گیانا کاڵ وخام دەس کەن کەروو.
ئاخر پەنج هەزار کەڕەتێ بە چ ڕوێوەوە و چەنی بلوەوە لا خودٚای. هەی وەرگەکا وەژدێ ئا لیباسوو ئەشرەفوو مەخلۆقاتیە.
ئەرخەوانێ شەوقی سیاوشا دابێ بە زیارەتوو هەراڵەبرەما و وەرواوەکێ یاگۆ وێشانە ڕچیەبێنێ، شۆنەو وڵەکەڵەکێویەوە بێنێ خەجاڵەتیێنە با بە ئاوی .
گردوو چووزە گیواوا و خۆنچەو گۆراڵا واچێنێ شەڵای زمسانوو ئێساڵی ئی وەهارە یەلداییە نەبیەیا شۆنیشەوە؛ وەز نەبێ زمسانێ پەڕوو دڵیما هەناسە لاپاش وزێنمێ .
دز دەسش بڕا، فڵان سەنگسارش کەرا، حەر تاوانێو بە سەنگەو وێش کێشانەش کەرا، هەی هاوار تاوانم چێش بێ هەناسەشا بڕیا، کۆچ و کڵفەتەوە، مەل و موورەوە، تەنانەت ئاسمانیچم غەزەبشا گرت وەنە.
خودٚا هەقەم سانی چا ناهەقا.
ئاسمانی خیانەت پێشە هەورێ ژەهراویێش هیرۆشیماوە قاچاخ کەردێبێنێ .
شاهۆی ڕشوەو ونێش گرتەبێ، نەواچۆ بە پەلەوەرا هەناسە نەکێشا.
هەی هاوار هەناسە کێشتەی تاوانش مەرگ بێ مەرگ ئادیچ بە گەل.
بیس وپەنجوو سیاوکاموو ئا وەهارە ڕەشپۆشە ڕووسیاوەی ئاخرین زۆرانەکۆ شەماڵی و زەلامیەنە، پەی ئەوەڵ جاری شەماڵ بەزیا و زەلام ئینەش قۆمنا، ڕوەو وەهاریش پەی حەتاحەتای سیاوە کەردە.
ئەی زەلامی زاڵم ڕوەت سیاوە پەنج هەزار جارێ.

ڕەحیم ڕەحمانی

 hewraman
Load More In ئەدەب و هونەر

داواچیٛو بنویسە

پۆستی ئەلکترۆنیکەت بڵاو ناکرێتەوە . خانە پێویستەکان دەستنیشانکراون بە *

بابەتو دماتەری

لیٛفی جاجم

لیٛفی جاجم هەورامان هەمیشە تایبەمەندی ویٛش بیەن، هەر جە سیپاڵی و سەناتی دەسی…هتد، یو…