یانە ئەدەب و هونەر وه‌شته‌رین مه‌رده‌ی

وه‌شته‌رین مه‌رده‌ی

49

وه‌شته‌رین مه‌رده‌ی

نویسته‌ی (ئازاد ئه‌رگوشی) 

هوٙرگیٛڵنای: فاتمە محمەد

فره‌ ته‌قه‌لام دا ده‌نگه‌که‌یش بژناسوه‌وه‌ و بزانوو کێنه‌ ، واتش سه‌روو که‌شه‌که‌یوه‌ ئاستێنات جیا ، که‌ی مه‌زانوو. گێڵانێوه‌ یاگه‌کۆ وێم  په‌ی ئانه‌یه‌ دیسان ده‌س پنه‌ که‌روه‌وه‌ به‌ نویسه‌ی به‌ڵام هیجم په‌ی نه‌ی نه‌تاوێنێ هیچ بنویسوو  ئه‌ره‌جیه‌ بێ سه‌واده‌نا و هیج مه‌زانوو، ئانه‌ ئا ژه‌نێ مه‌ژگێم  گێرته‌بێشه‌ره‌ یاگۆ هیچ چێوی ته‌ری نه‌بێوه‌ ،  لا وێمه‌ره‌ واتم با بدیۆ چیرۆکه‌کامه‌ره‌ کێ مزانۆ گاهه‌ز یۆ جه‌ پاڵه‌وانه‌کا  رازه‌کام با ئێنه‌ کاریگه‌ری و ته‌ئسیرش نیا بۆ سه‌روو وه‌نیه‌رێویم که‌ پاسه‌ش سه‌ر به‌ی و ته‌له‌فونم په‌ی که‌رۆ و یا گاهه‌ز گه‌ره‌کش بۆ ئه‌نقه‌سی سۆحبه‌ت و گاڵته‌م چه‌نی که‌رۆ ، خه‌ریکوو ئه‌وه‌ده‌ی لاپه‌ره‌ (وه‌رقۆ) ده‌فته‌رکه‌یم بێنێ که‌ پاڵه‌وانوو یۆ جه‌ چیرۆکه‌کام ئێدتۆ. ژه‌نێوه‌ سه‌رتاپا سیاو پۆشه‌  که‌ وێش تاقوو ته‌نیا سه‌روو که‌شێویه‌وه‌ ئاستێبێم جیا  و پێسه‌ گردوو ئا که‌سا دلێ چیرۆکه‌کام ئادیچه‌م به‌ڕه‌ڵا که‌ردێبێ و ئه‌تر رازه‌ رازه‌نه‌  ، خۆ قه‌رار نیا ئینسان هه‌ر پاڵه‌وانێو دلێ چیرۆکه‌کاشه‌نه‌ وه‌ش که‌رۆ شه‌وو و رۆ گنۆ شۆنیش  نه‌کا چێوێوشا سه‌ر به‌ی  ، به‌ هه‌رقه‌تی هیچ چێوێو  ته‌ر نییا گرد چێو خه‌یاڵێوا و هیچی ته‌ر  .  خوه‌م  به‌ قسه‌کا ژه‌نه‌کێ ئه‌ی لا وێمه‌ره‌ واتم شێته‌ بیێنه‌؟ رێک زانێنێ، یۆنه‌ جه‌ وه‌نیه‌ره‌کا چیرۆک و رازه‌کام که‌ ته‌له‌فونش په‌ی که‌ردانێ  و ته‌نیا گه‌ره‌کش بێ  گاڵته‌م چنی که‌رۆ ، ته‌له‌فونه‌که‌م یه‌کسه‌ر کۆشناوه‌ و ده‌سم که‌رده‌وه‌ به‌ نویسه‌ی ، مه‌زانوو تا چن خه‌ریک بینێ ، ئه‌تر زانام مه‌تواوو بنویسوو مانیانا ، وه‌رمێم ئه‌ی لوانی وتانێ ئانه‌ش پنه‌ نه‌شی هه‌یم بیه‌وه‌ ساعات هه‌شتوو ساعبی بێ  دمۆ نانوو  چای  ساعبی لوانێنه‌ کتێبخانه‌که‌م چه‌مم که‌وت به‌ یادداشته‌که‌ی که‌ ناونیشانوو ئا ژه‌نێشه‌ پۆوه‌ بی که‌ هیزی شه‌وێ ته‌له‌فونش په‌ی که‌ردا ، لا وێمه‌ره‌ واتم خاسته‌ر ئانه‌نه‌ بلوو شۆنۆ ئی ناونیشانه‌یره‌  کێ مزانوو ، تۆ واچی راس نه‌بۆ ، مه‌زانوو چی فره‌ حه‌ز که‌رینێ بلوو و پاسه‌ زانێنێ که‌سێو چاگه‌ ته‌مه‌دارما ، هه‌ر وه‌روو ئانه‌یه‌ سواروو ئۆتۆمبیله‌که‌یم بیانێ و یه‌کسه‌ر لوانێ په‌ی مڵکه‌کا لای واری شاره‌که‌ی ، وه‌ختارێو که‌ راسه‌ ڕا قیتاو نه‌کریاکێم ته‌مامنا ، ئۆتۆمبیله‌که‌م مدرنا و وه‌ستانێره‌ و دیانی پیلۆ پۆلاره‌ ، فره‌ مڵکه‌کێ دوورێ نه‌بینێ ، ئه‌ره‌جیام که‌سێو دلێ دارسانه‌که‌ینه‌  چڕه‌یم چڕۆ وه‌نه‌ ، هه‌رچن فره‌ خوه‌م ئه‌ی ، هه‌ره‌قه‌تی ئی دراسانه‌ و ملکێ یاگۆ ژیوه‌ی نه‌بینیێ ، تۆ واچی که‌سێو چاگه‌ بۆ ئادیچ  پاڵه‌وانۆ چیرۆکه‌کام بۆ؟ که‌ چن ساڵێ چیۆ وه‌ڵته‌ر سه‌روو که‌شێویه‌وه‌ ئاستێنه‌م جیا ، به‌ڵام ئه‌ی ئه‌گه‌ر ئاده‌ چاگه‌ بۆ، باوه‌ر مه‌که‌روو وه‌روو ئانه‌یه‌ ئا که‌سه‌ چیرۆکه‌که‌مه‌نه‌ وه‌شه‌م که‌رده‌ ئێنه‌ ناسک و نازاره‌ بێ وه‌رگۆ ئی یاگێ سه‌خت و ناله‌بارێ مه‌گێرۆ ، رانگا هه‌ر گیانه‌وه‌رێ دڕێ بتاوا چیه‌ بژیوا ، تا میاۆوه‌ ئا خه‌م و خه‌فه‌ته‌ من دلێ رازه‌کۆ وێمه‌نه‌ وه‌شم که‌رده‌بێ. ماوه‌یو خه‌ریکوو شی که‌رده‌وه‌ و له‌یه‌که‌وه‌ ده‌ی ئا چێوه‌یه‌ بێنێ که‌ هیزی شه‌وێ قۆمیابێ ، که‌ یاوانێ قه‌برسانێو ، قه‌برسانه‌که‌ هیچش دیار نه‌بێ ، ته‌نیا دوێ ، یه‌رێ قه‌برێ دیارێ بێنێ ئێنا گردێ تێکێ شیه‌ بێنێ ، وه‌ختارێو ویه‌ردانێ لا قه‌برسانه‌که‌ره‌ چه‌مم که‌وت به‌ که‌یڵێوی  ، سه‌ره‌م سڕ مه‌ن ده‌نگوو پیانۆی ئه‌ی ، که‌ زیاته‌ر نزیکوو که‌یڵه‌که‌ی بیانێوه‌ ده‌نگه‌که‌ به‌رزته‌ر بیه‌وه‌ ، ئاخر دارسانوو و پیانۆشا نه‌واتن ، ئه‌وه‌ڵ ڤیرم که‌رده‌وه‌  رانگا که‌سێو بۆ سۆحبه‌ت و گه‌ڵته‌م چه‌نی که‌رۆ ئامان ئێگه‌و و گه‌ره‌کشا گۆش جه‌ مووسیقه‌ی گێرۆ ، ئادیچ دلێ ئی ملکانه‌ …..نا ….نا  چامنه‌ نیا ، به‌ڵام وه‌ختێو نزیکوو به‌رۆ که‌یڵه‌که‌ی بیانێوه‌ ده‌نگێو پێسه‌ ده‌نگوو ئا ژه‌نێ که‌ هیزی شه‌وێ ته‌له‌فونش په‌ی که‌ردا واتش: فه‌رماوه‌ بۆرێ چوه‌ر  ، فره‌ ئارام و سه‌روو ویم به‌ره‌که‌م که‌رده‌وه‌ 

، سه‌ره‌م سڕ مه‌ن ، وه‌ختێو زیاته‌ر ورد بیانێوه‌ نا هه‌ره‌قه‌تی بێ و ئێشتیبام نه‌که‌ردێبێ هه‌ر ئا ژه‌نێ بێ که‌ دلێ چیرۆکه‌کێمه‌نه‌ سه‌روو که‌شه‌که‌یوه‌ ئاستێبێم جیا  و پێسه‌ فرۆ نویسه‌کام ڤیره‌م شیێبێه وه‌ ، دلێ ڕاسۆ که‌یڵه‌که‌ینه‌ مدرانێ ، فره‌ جوانخاسه‌ بێ سه‌رتاپا سیاوش که‌رده‌بێنه‌ ، به‌ په‌نجه‌ ناسک و نازاره‌کاش خه‌ریکۆ ونه‌ ده‌ی پیانۆی بێ ، تا واچی ئاهه‌نگه‌ کێش غه‌مباره‌ بێ پاسه‌م زانا به‌ گردوو وجوودیشه‌وه‌ مدۆ وه‌نه‌ ، ئانه‌شه‌ نه‌خه‌ینا ، وه‌ختێو  سه‌ره‌س به‌رزش که‌رده‌وه‌  دیام پۆره‌ ،  ده‌موو چه‌مش په‌ڕ بیه‌بێ هه‌رسی ، هه‌رسه‌کێش سه‌ریێش  و واتش : خێر به‌ی ، کۆرسیه‌وی دارینش  نزیکوو وێش نیاره‌ په‌یم و واتش: فه‌رماوه‌ بنیشه‌ره‌ ، مزانوو ته‌مه‌داروو من نه‌بینی  ، یۆ پێسه‌ تۆ ته‌نیا متاوا وه‌شی و جیژ وه‌ش که‌را به‌ڵام مه‌تاوا پارێزناش ،دیسان ده‌سش که‌رده‌وه‌ به‌ پیانۆکه‌یش، نه‌زانێنێ چێش واچوو گێڵویم وشکه‌ بیه‌بێ ،هیچ قسێم پنه‌ نه‌کریه‌نێ ، هه‌ره‌قه‌تیش هیج نه‌ینه‌ مه‌ژگم ، من گرد جارێو ئه‌جێم قسه‌ که‌رده‌ینه‌ خاسته‌ره‌نا جه‌ گرد که‌سێوی ، مه‌زانوو چی چا وه‌خته‌نه‌ هه‌رچن گێڵێنێ شۆنۆ دوی که‌لیمه‌ رێک و پێکا تا جوابش دۆوه‌ ، هیچم په‌ی نه‌ی ،  نه‌زانینی ئا گردوو که‌لیمه‌  زله‌ زلا که‌ گلێره‌وه‌ بیه‌یه‌کانه‌ واچێنێشا ئیسه‌ چێشا سه‌ر ئامان  و ده‌ورووبه‌ریه‌کێم گرد جارێو ئاواتشا ئانه‌ بێ قسه‌ که‌رده‌ینه‌  بتاوا پێسه‌ من با و منیچ وێم به‌ مامۆسۆ قسه‌ که‌رده‌ی زانینێ ، ئیسه‌ مه‌زانوو چی لاڵ که‌وته‌بینێ پێسه‌ بی مه‌رده‌ی په‌ییم ، ته‌نیا تاوام واچوو تۆ فره‌ جوانخاسه‌نی.

ئادێچه‌ فره‌ به‌ ئه‌سپای و سه‌روو وێش واتش: جوانخاس؟ ….. جوانخاسه‌نا ها….؟ به‌ڵام وێت ئی جوانخاسی و زه‌ریفیته‌ په‌ی من وه‌ش که‌رده‌ن که‌ فره‌ با ئاسانی سه‌روو که‌شه‌که‌یوه‌ ئاستانێت جیا و به‌ره‌ڵات که‌ردا ، واتم : به‌ڵام ئا وه‌خته‌ تۆ ئێنۆ ئیسه‌ی جوانخاسه‌ نه‌بینی ، به‌ڵام ئیسه‌ ئه‌شه‌د بیلا جوانخاسه‌نی . واتش رۆح زه‌ریفی و جوانخاسی وه‌ش که‌رۆ ، ئه‌گه‌ر پاک و جوانخاس بۆ جوانی وه‌ش که‌رۆ ئه‌گه‌ر ناشیرینیج بۆ ناشیرین وینۆ . هه‌ر وێش خێجڵنابێش به‌ پیانۆکه‌شه‌وه‌  ، وێشه‌وه‌ ده‌سم به‌رد په‌ی ده‌سه‌کاش و واتم تکات وه‌نه‌ که‌روو واز باره‌ چی ئاهه‌نگه‌ غه‌مبارێ، بڕه‌شه‌وه‌  ، ئینسان که‌ گۆشش چه‌نه‌ گێرۆ تاویه‌ی تاویۆوه‌ ، ئه‌تر  وه‌رگه‌ش مه‌گیروو ، ده‌سه‌کێش به‌ردێشه‌وه‌ دما  و واتش: چا روه‌وه‌ منت وه‌ش که‌ردا تا ئیسه‌ من گۆش جی ئاهه‌نگه‌ غه‌مبارێ گیروو  و چنیش مژیوو، ئیسه‌ په‌ی ئی تۆزه‌یچه‌ مه‌تاوی گۆشش چه‌نه‌ گیری و وه‌رگه‌ مه‌گیری …به‌زه‌یم  مه‌ی پۆره‌ت . واتم: چی؟  واتش: وه‌روو ئانه‌یه‌ گرد چێو فره‌ به‌ ئاسانی ڤیرت مشۆوه‌ ، وه‌روو ئانه‌یه‌ هه‌ر پاسه‌ وه‌ش که‌ری و خۆڵقنیشۆ دمۆ ئانه‌یه‌ په‌شتیش وه‌نه‌ که‌ری  ، هه‌ر پاسه‌ چه‌نی منت وه‌شه‌ که‌ردا و دماوه‌ په‌شتیت وه‌نه‌ که‌ردا . واتم وه‌روو ئانه‌یه‌ نیا ئینسان وه‌ختێو گه‌ره‌کش بۆ رۆحش بسیۆوه‌ و ئارام گێرۆ په‌نا مارۆ به‌ وه‌ش که‌رده‌ی ئه‌فسانه‌ و رازا  و منیش یۆنا چا که‌سا که‌ پاسه‌م که‌رده‌ن  ، واتش : هه‌ره‌قه‌تی فره‌ گێله‌نی پاسه‌ مزانی  ئانه‌ که‌ وه‌شش که‌ری و نامێش منیه‌ی رازو ئه‌فسانه‌ ئه‌تر هه‌ره‌قه‌تی راز و ئه‌فسانه‌ن چن بێ هاگانی مه‌زانی ئانه‌ که‌ به‌ نامۆ ئه‌فسانه‌ و چیرۆکی وه‌شش که‌ری هه‌ره‌قه‌تی و راسیا ، راسیا و مشۆ باوه‌رش پنه‌ که‌رێ به‌ڵام تۆ په‌شتێشا که‌ریه‌وه‌ وه‌نه‌ ، واتم : تۆ گه‌ره‌کتا واچی تۆ هه‌ره‌قه‌تیه‌نی و به‌ راسی هه‌نی ، ده‌سش کێشته‌ره‌ و واتش: ده‌ست باره‌ ….ته‌رسانێ تێڕم په‌ی که‌رده‌ ، هه‌ر فره‌ چه‌مه‌کێش جوانخاسێ بێنێ واچینی ته‌مه‌داره‌نه‌ پا چه‌ماشه‌ قووتم دۆ ، وه‌رگه‌ نه‌گێرێنێ، وه‌روو ئانه‌یه‌ ناچار بیا په‌ی یاگێوێ ته‌ری بدیۆ تا نه‌دیۆنه‌ دلێ چه‌مه‌کاش ..دمۆ ئانه‌یه‌ به‌ ئه‌سپای واتش : ته‌رسه‌ی ته‌رسی؟دیسان دیامه‌وه‌ پۆره‌ ، یاگۆ وێشه‌نه‌ هۆرسه‌وه‌ و ئاما وه‌راوه‌رم ده‌سه‌کێش کێشتێشه‌ره‌ و واتش: ده‌سم مه‌گیری و ره‌دێشا که‌ریه‌وه‌ ؟ بێ ئانه‌یه‌ هاگام وێم بۆ ده‌سه‌کێم نیه‌ی مه‌نه‌ دلێ ده‌سه‌ گه‌رمه‌کاش ، چن نه‌رم و نۆلێ بێنێ ، ئه‌ره‌جیام یه‌کسه‌ر که‌وته‌نانه‌ ته‌ڵه‌ش  و گه‌ره‌کم بێ ده‌سه‌کام  دلێ ده‌سه‌کاشه‌نه‌ به‌ر باروو ئه‌جێ لکه‌ دریه‌نێ ، زاناش پنه‌م ناوه‌شا و  به‌ یه‌واشی واتش : چێشتا ته‌رسه‌ی ته‌رسی ؟ واتم : تۆ یاگۆ من بیه‌یانی نه‌ته‌رسێنی ؟ واتش: وه‌روو چێشی ؟ واتم: وێت بنیه‌ یاگۆ من چیرۆکێوه‌ بنویسی و دماوه‌ کتووپڕ پاڵه‌وانه‌که‌ش قیتد بۆوه‌ ونه‌ و واچۆت په‌نه‌ فه‌رماوه‌ با چایه‌و پێوه‌ره‌ بوه‌رمێ ؟ واتش: : ئه‌گه‌ر ئینسان راس وین بۆ هه‌رگێز چا چێوه‌یه‌ که‌ قۆمیۆ سه‌ره‌ش سڕ مه‌مه‌نۆ ، وه‌روو ئانه‌یه‌  گرد چێوێوی که‌ قۆمیۆ به‌ڵگه‌ و ده‌لیلێوه‌ت پنه‌ مرمانۆ . 

کتووپڕ ده‌سه‌کێش دلێ ده‌سه‌کامه‌نه‌ به‌ر ئاردێ و گێڵاوه‌ دماره‌ ، ته‌مه‌داروو ئانه‌یه‌ بێنێ چێوێوم پنه‌ واچۆ به‌ڵام بێ ده‌نگه‌ بیه‌ و مه‌زانوو چنش پنه‌ شی چنی ناڵه‌و پیانۆکه‌ی گێڵانێوه‌ دماره‌ و و ده‌سش که‌رده‌وه‌ به‌ ونه‌ ده‌ی پیانۆکه‌یش ، ئاهه‌نگه‌کێش جۆرێو بێ ،یه‌کسه‌ر منش وێستانێوه‌ ڤیروو  گه‌ڵارێزانوو پاییزی و سه‌رده‌موو زاوڵه‌ییم  ئاردانێوه‌ ڤییر ،که‌ پاییز بێ چه‌نی تاته‌یم لوێنمێ په‌ی ملکه‌کا   و باغچه‌کا شاری ،  وه‌ختارێو قاچ نییه‌نێ سه‌روو گه‌ڵاکا به‌ گردوو وجوودیم حه‌زش چه‌نه‌ که‌رێنێ و پنه‌م وه‌ش بێ و وه‌شیه‌نه‌ پاسه‌م سه‌ر ئه‌ی ڕه‌مێنێ دلێ گه‌ڵاکانه‌ و بڕێو جارێچ هۆرپرێنێ دلێشانه‌ ، روێو که‌ هه‌رگیز ڤییرم مه‌شۆوه‌ پاییز بێ و تک تک  واران وارێ گه‌ڵه‌ی داره‌کا نه‌رمی بیه‌بێنێ ،وه‌ختارێو که‌ ئینسان قاچشا منیۆ سه‌ر مه‌ره‌جیۆت رۆحشا هه‌ن و  ناڵه‌شا مه‌ی چه‌نه‌، وه‌روو ئانه‌یه‌  وه‌ختارێو که‌ واران مه‌ی که‌متر ئامه‌و له‌وی که‌روو . ئا روه‌ چێروو تکه‌ تکه‌و وارانه‌که‌ینه‌ نیشته‌ بێنێره‌ دیه‌ی دیه‌نێ ئاسمانیه‌ره‌ ، گۆشم گێرته‌بێ په‌ی ئاهه‌نگه‌کێ ، هه‌ر وێشه‌وه‌ چه‌مێم په‌رێبیه‌ی هه‌رسی و گره‌وانێ  و وه‌ختێو ئاهه‌نگه‌که‌ ته‌مامیا  ته‌رێق بیانێوه‌ و هه‌رسه‌کێم سه‌ڕیه‌م گه‌ره‌کم نه‌بێ ژه‌نه‌کێ هه‌رسه‌کام وینۆ ، وه‌ختێو دیام په‌ی خوێوی شیرین ئاما سه‌روو لچاشوو واتش:گره‌وه‌ی گره‌وی ؟ واتم ئه‌تر… ئه‌تر ، چی مه‌گه‌ر شووره‌یا پیا گره‌ۆۆ؟ برێو جارێ مشۆ گره‌وی . بێ ده‌نگه‌ بیه‌ و ئه‌وپه‌روو بێ ده‌نگیه‌نه‌ هه‌ر دیه‌ی دیه‌ی په‌ییم ، منیچ سه‌ره‌م وێسته‌ره‌ و به‌ شه‌رمه‌وه‌ واتم فره‌ جوانخاسه‌نی . واتش : که‌ی   یاوه‌ینه‌ ئی راسیه‌ که‌ من جوانخاسه‌نا ؟ واتم: ئارۆ . واتش: ئه‌ی ئا وه‌خته‌ سه‌روو که‌شه‌که‌یوه‌ ئاستات جیا چێشم بێ ، چی وێم تاق و ته‌نیا ئاستات جیا ؟ 

واتم : رانگا ئا وه‌خته‌ پی وردیه‌ سه‌رنجم  نه‌دابۆ پی جوانخاسیته‌ ، واتش ئیشتباه که‌ری هیچ چیو ئێنۆ جوانی و زه‌ریفی جه‌ ئینسانیه‌وه‌ نزیک نیا ئینا پاڵته‌نه‌ ، وه‌ختارێو که‌ رۆحوو ئینسانی وه‌رمش که‌وته‌بۆ  پۆره‌ چه‌نی متاۆو  جوانخاسی و ناشیرینی جه‌ یه‌کتری جیا که‌رۆوه‌ .

واتم رۆحم وه‌روو خاترۆ تۆ وه‌رمه‌نه‌ هۆرسه‌نه‌وه‌ ، تۆزێو بێ ده‌نگه‌ بیه‌ و دیا وه‌روو ده‌میشه‌ره‌  هه‌ر گره‌وه‌ی گره‌وێ و دمۆ ئانه‌یه‌ ده‌نگێش له‌رزه‌ی له‌رزێنێ  واتش : وه‌شه‌ڵه‌ی پانه‌یه‌ رۆحت وه‌رمه‌نه‌ بیه‌یا  به‌ جارێو و دوێجاڕی شۆکنێنێته‌وه‌ هۆرزێنیه‌وه‌ وچڵه‌کیێنیه‌ره‌ ، به‌ڵام مه‌کریۆ مه‌رده‌ چڵه‌کیۆره‌ ، واتم: گه‌ره‌کتا واچی رۆحم مه‌رده‌ن؟ واتش چینه‌یه‌ زیاته‌ر هیچ چێو ته‌ر نیا  رۆحت مه‌رده‌ن و دمۆ ئانه‌یه‌ به‌ گردوو هه‌ره‌که‌تیه‌وه‌  ده‌سش که‌رد به‌ گره‌وه‌  ، توزێو ئازا بیانێ و گه‌ره‌کم بێ وێم برمانوو لوانێ پاڵش و ده‌سم نیا سه‌روو شانه‌یش و واتم: چی گره‌وی ؟  واتش : په‌ی تۆ ….واتم : په‌ی من؟…. واتش به‌ڵێ په‌ی تۆ… واتم  وه‌روو چێشی ؟ .. واتش: سه‌ره‌م سڕ مه‌نه‌ن چه‌نی متاوی واز چی  لاشه‌یته‌ بارێ که‌ جه‌ گۆشت و پێشا وه‌ش بیه‌ن …چه‌نی متاوی… دیام پۆره‌  و لچێش بره‌میێنێ و واتش: چه‌نی مری؟ 

فره‌ خوه‌م به‌ قسه‌کێش ئاما ئێنه‌ خوانێ چه‌مێم په‌رێ بیێ هه‌رسی ، به‌ڵام  ئاده‌ هه‌ر ئارامه‌ و سه‌روو وێش بێ و به‌ ئه‌و په‌روو دڵسۆزیه‌وه‌ دیه‌ی دیێم پۆره‌ ، ده‌سم نیا چێروو چه‌ناگه‌یش و چه‌میم بڕیه‌نێ دلێ چه‌ماش دمۆ ئانه‌یه‌ واته‌م په‌نه‌ : چه‌نی تۆ مری منیچ هه‌ر پاسه‌ مروو . دماوه‌ گێڵانێوه‌ یاگه‌کۆ وێم  و نیشتانێره‌ و واتم: ئه‌گه‌ر پاسنه‌ نیا واچه‌ پاسنه‌ نیا….. فره‌ به‌  روێوێ وه‌شه‌وه‌ واتش: مرمانووت پنه‌ که‌چامنه‌ نیا ، تۆ مه‌تاوی پێسه‌ من مری ، واتم پاسه‌ مه‌واچه‌ ، ئاده‌ فره‌ باوه‌رش به‌ قسه‌کۆ وێش بێ واتش نا تۆ مه‌زانی بدیه‌م په‌ی بزانه‌ چن به‌ ئاسانی مروو ، گێڵاوه‌ و سه‌ره‌ش نیا سه‌روو پیانۆکه‌ و بێ ده‌نگه‌ بیه‌ ،  تۆزێوش پنه‌ شی هه‌ر بێ ده‌نگه‌ بێ ئێجیام سۆحبه‌تم چه‌نی که‌رۆ چه‌ن جارێو ده‌سم دانه‌  پیکه‌کا پیانۆکه‌ی ، چا وه‌خته‌نه‌ چه‌مم که‌وت به‌ لته‌ کاغه‌زێوی که‌ نریابێ دلێ پیکه‌کا و ده‌ق  کریابێ   ، وه‌ختێو که‌ردمه‌وه‌ نویسیابێ .. ( هه‌ر وه‌ختێو مه‌ردا چیه‌ بنیه‌یدێم وئی پیانۆچه‌ په‌ی ئا که‌سه‌یه‌ که‌ منیۆم ) کاغه‌زه‌که‌م فڕه‌ دا و به‌  په‌ڵه‌ چه‌ن جارێو شۆکنامه‌وه‌ به‌شکه‌م چڵه‌کیۆره‌  ، سه‌ره‌م سه‌روو پیانۆکه‌یوه‌ به‌رزه‌ که‌رده‌وه‌   ره‌نگش پڕه‌ی بێ ، هه‌ره‌قه‌تی ئاده‌ مه‌ردێبێ ، چه‌مه‌کێش نیه‌ی سه‌روو یۆۆی و به‌ گردوو هه‌ره‌که‌تیمه‌وه‌ گێرته‌مه‌نه‌   وۆشیم (باوشیم)ده‌سم که‌رد به‌ گره‌وه‌ی ، ئانه‌ش پنه‌ نه‌شی ، ئه‌تر کار جه‌ کار ترازیا بێ و مشیه‌یا وه‌سیه‌ته‌که‌م به‌ یاگێ ئارده‌یا و به‌ هه‌ر مسیبه‌توو ته‌قه‌لایه‌و بێ قه‌بره‌کێم په‌ی وه‌شه‌ که‌رده‌ و نیام ، و ته‌نیا یادگاریه‌که‌ش  به‌ردمه‌وه‌ یانه‌ ، چا روه‌وه‌ زانام گه‌وره‌یی و خاسی هه‌ر پاسه‌ مانۆ  ژیوه‌ی ئینا پانه‌یۆ چه‌نی مری و وێره‌گا  شایه‌توو ئی راستیه‌نه‌ 

  • لیٛفی جاجم

    لیٛفی جاجم هەورامان هەمیشە تایبەمەندی ویٛش بیەن، هەر جە سیپاڵی و سەناتی دەسی…هتد، یو…
  • سی و یەکەمین ساڵیادو کیمیاوارانو شارو نوٙتشەی

    یاڎو کیمیاوارانو شارو نوتشەی ئاروٙ هەڤدەو مانگەو یەری 17/3/2017 ( 26 و سیاوکامی ) سی و یوٙ…
  • هەڵەبجە

    هەڵەبجە چەتە لافاوو ئەنفالی، قاچاخە کارێزوو گۆڕە بە کومەڵەکارە وێش یاونارە هەڵەبجە. هەبەسی…
  • لیٛفی جاجم

    لیٛفی جاجم هەورامان هەمیشە تایبەمەندی ویٛش بیەن، هەر جە سیپاڵی و سەناتی دەسی…هتد، یو…
  • سی و یەکەمین ساڵیادو کیمیاوارانو شارو نوٙتشەی

    یاڎو کیمیاوارانو شارو نوتشەی ئاروٙ هەڤدەو مانگەو یەری 17/3/2017 ( 26 و سیاوکامی ) سی و یوٙ…
  • هەڵەبجە

    هەڵەبجە چەتە لافاوو ئەنفالی، قاچاخە کارێزوو گۆڕە بە کومەڵەکارە وێش یاونارە هەڵەبجە. هەبەسی…
 hewraman
Load More In ئەدەب و هونەر

داواچیٛو بنویسە

پۆستی ئەلکترۆنیکەت بڵاو ناکرێتەوە . خانە پێویستەکان دەستنیشانکراون بە *

بابەتو دماتەری

لیٛفی جاجم

لیٛفی جاجم هەورامان هەمیشە تایبەمەندی ویٛش بیەن، هەر جە سیپاڵی و سەناتی دەسی…هتد، یو…