یانە ئەدەب و هونەر فەتە ئی نەوروٙزە کەوا و پانتوٙڵی تازە نمەسانوٙ

فەتە ئی نەوروٙزە کەوا و پانتوٙڵی تازە نمەسانوٙ

82

«فەتە ئی نەوروٙزە کەوا و پانتوٙڵی تازە نمەسانوٙ»
تاتەش ماچوٙ:
من ئیسەیچ نەزانام«ساڵەو یۆسۆی» کەیەنە. تەنیا گجارا دەموو ئەدٚایمەو ئەژنەوێنێ کە واچێ:«خۆ ساڵەو یۆسۆی نیێنە.»
ڕەنگا بڕێو چێوێ هەنێ کە ئەگەر نەوەرمێچشا نەمرمێ و هەر پاسەیچەنە. ئەگەر مۆزی و کۆلیچێ نەوەرمێ خۆ مەمرمێ و ئەگەر زەڕما نەبۆ تا گۆشت پسانمێ پەی مێمانەکاما عەیب و عار نیا. با ئێساڵ گردٚیما پێوەرە جلێ تازێ نەسانمێ و زەڕەکەیشا دەیمێ بە نان و تەماتێ و سێفی و قەندٚ و چای و ئەزراق. با زاڕۆڵەکا حاڵیێ کەرمێ. چە ئیرادٚێوش هەن با قەندٚەکاما دالێو گۆلانەتەرێ و چایەکەیچما کۆچێو کەمڕەنگ تەرێ کەرمێ و هەرتا جیای یەرێ چایا با دوێ بوەرمێ. با پیاڵێوە جیای دوێ کڵوێ قەندٚا یۆش پەو بوەرمێ. با چاشتەکا کەم چەربتەر بنیەیمێ سەر و تەنانەت با تەڕتەرێ با. من ئی دەرسێمە زووتەر جە ئەدٚایم مسێنێ. هەرکەی چاشتە تەڕێمێ بێ و مێمانێما فرێ بێنێ جامڵێو ئاویش کەرێوە سەر! من وێم خاس هۆشما دەورەو جەنگی ئاوەختە کە ئاوارێ بێنمێ، ئەدٚام تەماتێو کەرێ دوێ لتێ پەی من و براکەیم. باوڕ کەردێ یام مەکەردێ مەیلوو وێتانە، دوێ واڵێم بێنێ کە ئەدٚام تەماتە نەدٚێ پادٚیشا! چوون هەم تەماتێ نەبێنێ و هەم ئادٚێ کناچێ بێنێ! من تیکێو دێنێ بە واڵێوێم و براکەیچم تیکێو دێ بە ئەوێشا. داخۆم لتە تەماتێو چێش بیەبۆ کە من لتێوم دابۆ بە واڵەکێم. مشیۆم ئا تیکێمە چن مەزەو تەماتەیشا دابۆ! بەڵام خۆ بەڕاسی تەماتەکێش عالێ و گۆشتنێ بێنێ و پێسە ئیسەیە بوەو کۆلێری نەدٚێنێ! هیچما نەبێ و هەر ئەجۆم ئارۆن مانگەو«قنگ کڵاشی» بێ. وەڵتەر نامێ ئی مانگێمە ئەژنیێ بێ، بەڵام ئیسە وێم بە چەما وێم وینێنێش و دلێشەنە بێنێ.ڕەمزان ئاما یا خودٚا خێر بێ. شەوێنە هۆرزێنمێ پارشەو کەرێنمێ. خودٚا بەخشۆش ئەدٚام واچێ: «ڕۆڵە چای فرە شیرین مەکەردێ کەچەڵێ بیدێ و مەژگەی کەمیچ بنیەیدێ دلێ تیکەی با ڕشکی نەدٚاتانە.» یۆ کەڵەبابێوە، یام چوار سووچێ مەژگە بە شمارە وزێ وەروو دەمیما و واچێ:« پەرسانم مامۆسای واتەنش کۆڕەکێ چوون زاڕۆڵێنێ و دەرسیچ موانا ڕۆچێشا سەر نیێنە.» ئادٚە فرە حەز کەرێ کە ئێمە ڕۆچێ نەگێرمێ. واڵکێچم فرە قینیشا ئێوەنە من و براکەم پارشەو هۆرزێنمێ. ناحەقیچشا نەبێ چێو کەم بێ و ئێمە فرێ! توومەز مەکەرە ئەدٚایچم هەر وەروو ئینەیە دڵش نیا پەو ئێمە ڕۆچێ گێرمێ. ئاسابوو واڵەکام وردٚ بێ. واچێنێ:«ئەگەر هۆرزدێچەو مشیۆ نەماڕدێش.» چادٚمای کە گەورەتەر بیا زانام کە دەردٚەو گردٚیما چێشە بێ. دیارا ئینایمێ زەمانێوی سەختەنە و سفرەکێما رەونەقشا نەمەنەن با ئینتیزارێما جە وێما و جە یەکتری بارمێ وارەو تا بەشکووم ئی مۆشکڵاتێ ویەرا و ئۆمێد هۆرگێڵۆوە پەی یانەکا.
وەلی فەتاحی
97/12/12

 hewraman
Load More In ئەدەب و هونەر

داواچیٛو بنویسە

پۆستی ئەلکترۆنیکەت بڵاو ناکرێتەوە . خانە پێویستەکان دەستنیشانکراون بە *

بابەتو دماتەری

مە؛ موٙرفیمو سەرەمڕەی

                مە؛ موٙرفیمو سەرەمڕەی موٙرفیمو”مە”ی سەرەمڕەی، یوٙن جە سیما دیا…