یانە ئەدەب و هونەر ماموٙ عەبە گوٙشی مسانوٙ

ماموٙ عەبە گوٙشی مسانوٙ

76

ماموٙ عەبە گوٙشی مسانوٙ

    – دەی واچی چیٛش، مریچڵە پارینە و ئیٛساڵینەکیٛ پینەیە ماچا. ئاخوٙر ڕوٙڵە گیان زاڕوٙڵەو هیزی توٙگەرەکتا موٙچیاری من کەری. ئاڕەفیٛقیٛ توٙ گیٛرتیٛنیٛ گردٚ بە دەفلسیٛ نمەئیٛژا. تا ئیسە تاقییٛت کەردٚیٛنە. هەر دەم کەریەو ماچی:«دوەسدٚ دوٙسیٛم هەنیٛ و پەنسەدٚ ڕەفیٛقیٛم گیٛرتیٛنیٛ.»

         – تاتە گیان پاسە نیا توٙ فەرماوی.دنیا فاڕیێنە. دەی مشیوٙ من و توٙیچ فاڕیەیمیٛ. ئانە نیا توٙ ویٛت پیر بیەنی و هاز و گوٙزت نەمەنەن. ویتەو قینیتەنە جە گردٚ کەسی. ئەجوٙت دنیا مشتەتەنە بەرشیێنە. نیا نمەزانی جە کامپیوٙتری و موٙبایلی و نمەزانی «فەیسبووک» چیٛشا و حاڵیت نیا جە«واتساپ»ی.ئەی نەواتم با تلگرامت پەی وەش کەروو. گجارا ملی  گوٙرانییٛ گوٙش گیٛری و فیلمیٛ حەیوانا و هەرفیلمیٛ تەر کە دڵت پەو بوٙ تەماشە کەری! تازە، متاوی مفت و مەرحەبا تەلەفوون کەری پەی گردٚ کەسی هەرتا پەی خارجی! ئانە ئەوسا بیٛ دوور ئیسەیە، لوا، ئیسە دەوڵەتیچ کارش نیا سەروو کەسیەو. تا ئی ئیلای بینا، ئەولا کریوٙرە.

        – دەی خوٙ توٙ ماچی ئی گوشی منە دەردٚەو ئا هەرمانا نمەوەروٙ.

        – دەی جا دویٛ بزڵیٛ ورەشە و دەش گوشییٛوی عال ئانە کوٙگەش شیەن هەر ئانە سووک و ئاسانا.

        – توٙ قسە کیٛ مەفاڕە فەتە. ئینە بەینیٛوا هەر گەرەکما ئاوەو گوٙشات دەو و واچووت پەنە دەس ئەچی هەرماناتە کیٛشە. بە خودٚا ڕوٙ تەنگانەی خەیر جە من و ئەدٚایت کەس مەیاوو فریایتەو، تەنانەت سەلتیٛ واڵیٛچت. ئاها واتەنشا:«برا بە مەرگوو برای حەز نمەکەروٙ بەڵام بە ڕەجاڵیش شادٚا.»ئیسە توٙ گەرەکتا ئی دوٙسیٛتە بەرات پەی کورەو مانگیٛ، یام کەرات وەکیٛڵوو مەجلیٛسی! ویٛت مزانی. جە من واتەیا و جە توٙ نەژنیەی.

      – دەی تا تە گیان تاقەتم نیا. زمسانا و کار و بار نیا و گردٚ کەس خدٚیٛش دەینەنە ئی مبایلا. ئادەی توٙ واچە جیٛش کەروو. دەی هەرمانە مەنیٛنە پەی کەسی؟ منیچ پیٛسەو ئی گردٚوو خەڵکیە. منیچ پەی ئادٚیشا هەر پاسنەنا کە توٙ ماچی. ئادٚیٛ دوٙسیٛ خاسیٛ نییٛنیٛ پەی من دەی خوٙ مەشیوٙ منیچ پەی ئادٚیشا مەردٚە بوو! پیٛسە ئەدٚام گجارا ماچوٙ:

«توٙ پەی یوٙی مردٚە ئادٚیچ مەردٚە بوٙ  ئادٚ جە توٙ بەتەر ئیمان هەردٚە بوٙ»

      – ئەجوٙتا ئیٛمە گوٙشوو گاویەنە وتیٛنمیٛ. دروٙسا ئیٛمە ئەچی کامپیوٙتەر و مامپیوٙتەریە سەرە بەر نمارمیٛ، بەڵام خوٙ ئینەیە مزانمیٛ شمە شەو و ڕوٙ خەریکیٛ چیٛشیەندیٛ! با ئیٛتروەسیٛش بوٙ، ئەی شمە نمەزاندیٛ ئەگەر تا نیمەشەو چیٛروو لیٛفەکەیەنە چەنی کناچیٛ خەڵکی، خوای خودیٛ و دوای دودیٛ، واڵەکیٛچتا هەر عەینوو چیٛوی دەم پان کەروٙوە پەی کوڕو خەڵکی؟

      -توٙ ئانەیچە وەردە ئەوەڕوٙ یوٙ جە دوٙسەکاما بەنامیٛ یوٙ تەریەو پەیچیٛوش وەش کەردٚە بیٛ دنیاش کەردٚ دوٙ و دوٙخەوا. گردٚش دای چیٛوەنە. تازە خەریک بیٛ ئیٛمە گژیەیمیٛ چەنی یوٙترینیٛ. ئیٛدٚ واچیٛ توٙنی، ئادٚ واچیٛ ئەوا. مەزانوو ئیٛستشاوە یام نا؟ هەر خەریکیٛ بیٛنیٛ.

     – ئاها دەی ئانەنە من ماچوو. بەڵام توٙ هەر قسیٛ ویٛت قبووڵەتەنە. پەیچ چیٛشا؟

      – ئەجوٙم سەفحە یام یانەش ماچا. خوٙ منیچ ئاننە سەرە بەر نماروو.

       – با گووشییٛوی تازە بسانوو ئاوەختە یوٙیچ وەشکەرە پەی من! بزانوو ئینە چە لەزەتیٛوش هەن شمە ئاندٚە خجڵیەیدیٛشەنە!

وەلی فەتاحی

97/9/8

 hewraman
Load More In ئەدەب و هونەر

داواچیٛو بنویسە

پۆستی ئەلکترۆنیکەت بڵاو ناکرێتەوە . خانە پێویستەکان دەستنیشانکراون بە *

بابەتو دماتەری

ئەراگیٛڵی

ئەراگیٛڵی ئەگەر شەویە جە شەوەکان ئاسمانوو پەڕ جە هەسارەو یۆ جە هەوارەکاو هۆرامانی کەردیمێ …