یانە پەیلوای لاچەمیٛو پەی کتیٛبی چاپ نەکریاو خەرمانە گەورەی

لاچەمیٛو پەی کتیٛبی چاپ نەکریاو خەرمانە گەورەی

107

لاچەمیٛو پەی کتیٛبی چاپ نەکریاو خەرمانە گەورەی

خەرمانە گەورە”، نزانییو لیکموو سەوزەلانی/ ئومید حەبیبی

 

 گرۮوو ئەدەبیاتە هازدارەکاو دنیایەنە کوٙمەڵیٛو کتیٛبیٛ هیٛقمیٛ و بنەڕەت بڕیٛ هەنیٛ کە دایمە لاسەری ئەو بەرە نویسیاریەکاشاوە هوٙرشاگیٛرا و کلکەنیشانیٛ نویسەرا و ڕوٙشنویرەکاشانیٛ.کریوٙ واچی پەرگەماو فرەو هەرمانە ئەدەبیەکاو شوٙنوٙ ویٛشانیٛ، چوونکەتی بە باوەڕوو ئی خامەیە یەریٛ لاقوٙریٛ ژیرانیٛ هوٙربڕنا.

یەکەم: بە دیامانیوی کەرۮەیی خزانە ساراو کوٙڵانەکاو کوٙمەڵگایشا و هەماریٛو مەتەڵیٛ،قسیٛ نەسەقیٛ، کەنایە و واچیٛ کە خەریکیٛ فەوتیایەنیٛ،تەکناشا،زیاۮەو تەکنای خاس مسەڕاشا و منویساشاوە،پەی هاتا هەتای نمازا ژەنگوٙ ویەرینی بڕیٛزنوٙشارە سەروو پوٙسی!!.

دوەم: بە گلیٛرەوە کەرۮەی و ئەرمانای ئا بەرە نویسیاریا یاوەری و دەسباریوی بەپیت و قازانجدار مۮا پەی ئەو نویسەر و پەیجوٙرکارەکا تا پەی دەوڵەمەند کەرۮەی،پوٙختە کەرۮەی و ویٛمانە کەرۮەی فرەتەروو نویستەکاشا چاۮیشا کەڵک گیٛرا.

یەرەم: جیاکار چانەیە هەرمانیٛ چیٛمنیٛ جوٙکڵەماڵ کەرۮەی،تەڕوبڕ کەرۮەی و ئاژین نیای ئاڤوٙ باخوو ئەدەبیاتیا متاڤوٙ یاوەری دەروو لەیەکەوەدەراو بەشوٙ ویەرینوو ئا وەڵاتیە بوٙ تا بە توٙ توٙ هوٙروشکنای ئی قسە و مەتەڵا چەنیەتی هوٙرزەوئەرەنیشتوو خەڵکی جە سەرەوەختە جیاکارەکانە بیوٙزاوە.

ئەدەبیاتوو هەورامانیچ مەکریوٙ چی قسیٛ بیٛ بەش و بەری بوٙ ئانەنە تا ئیسە مەینەتی فرە جە لاو نویسەراشەوە کیشیان تا بە چاپوو ئی تەشک کتیٛبا،گەورەیی کەرا خەڵات پەی ئەدەبیاتەکەیشا بەڵام بەداخەوە وەروو نەبیەی تاقانە دەزگایوی پەی وەڵاوە کەرۮەی بەرهەمەکاشا کوٙنجیٛڵەو تەنیایی هوٙۮەکاشانە هوٙرشاگیٛرتیٛنیٛ و گازروٙ توٙزیٛشا مەزەندە مەکریوٙ!!!.داخەکیٛم مەشوٙ هیچ ڕیٛکڤزیاییٛو وەنگەگوٙشوو ئی هەرمانیٛ نیا و گوٙشیٛشا ماخەنا نەکا قسیٛوە بژنەوا!،تا ئیسەیچە ئەر کتیٛبیٛو چاپ بیەبوٙ بە مانیایی نویسەری و کوٙگا خەمەوەرەکا بیەن.

یوٙ چا کتیٛبە بنەڕەتیا کتیٛبوو “خەرمانە گەورە “نویستەو کاکە سوٙبحان ئەمینی ا،بنیاۮمیوی ڕوٙح سووک،زانا،ئەنەیاوا و دایمە لچ بە خوەوە،ئازیزیٛو کە چن ساڵیٛن وەشەویسی زوان و فەرهەنگوو وەڵاتی،مووچرکیٛ حەز و تارسەیش ئارۮیٛنیٛ لەشی ئەراگیٛڵیشەورە و لەحازیٛوە لاشەخەرش نەکەرۮەن. جە کاکە سوٙبحانی وەڵتەر یەریٛ کتیٛبیٛ هوٙرگیٛڵیەیبیٛنیٛوە سەروو زوانی هەورامی کە بە ژیری و فامیوی بەرزەوە هوٙرشچنییٛبیٛنیٛ،کتیٛبی ئەژناسیاو ئیٛسپیٛنسیٛر جانسوٙن نویسەری گەورەی ئامریکایی،کتیٛبوو گەورە فیٛرکاری ئازادیواز سەمەد بیٛهڕەنگی و کتیٛبیٛڤوو هوٙرگیٛڵنەری گەورە موٙحەمەد قازی.ئیسەیچ هەشت کتیٛبیٛش ئاماۮەو چاپیەنیٛ کە یوٙشا خەرمانە گەورە ن.کاکە سوٙبحان تاریفوو ئی کتیٛبیەنە ماچوٙ پانزە ساڵیٛ چیەو وەڵیٛ توٙ جە ئەۮا بیەیش مەژگمەنە گرسان و چوٙڵیٛم هوٙرکەرۮیٛنیٛ،زیاتەر جە چوار هەزار مەتەڵیٛ،کەناییٛ،موٙچیارییٛ و قسیٛ نەسەقیٛ هەورامییٛم چاگەنە گلیٛریٛ کەرۮیٛنیٛوە،شەرحوو گرۮیچم بە زوانی هەورامی دان.چی ماواو پانزە ساڵەینە ئیٛننە لواناوە پوٙرەش کە هازوٙ چەمام بیەن دوە کوتەوە!.

حەشاش چنە مەکریوٙ گلیٛرەوە کەرۮەی چامنە پا سووک و ئاسانیە نمەینە بەر مشیوٙم توٙموو زانایی و وەشەویسی دڵوو ئا کەسیەنە چووزیٛش ئاسیٛبارە تا لیڤیوٙش پەی شەو و ڕوٙ خجڵیوٙ گلیٛرەوە کەرۮەی بەشیٛو جە فەرهەنگوو وەڵاتیش.

چی سەرەوەختەنە کە هەڵای نویستەی بە زوانی هەورامی بە تەشک و دیامانیوی ئاروٙیانە و زانستیانە ئینا کاکوٙڵکانوٙ زاڕوٙڵەیی ویٛشەنە و ئیسە خەریکوو پاپالیٛ گیٛرتەیا،فرەتەر جە گرۮ چیٛوی ئەوەجەش بە بەرکەوتەی و وەڵاوە بیەی کتیٛبە ئەچیٛمنیشا هەن تا ئا کەسانیٛ ویەروٙ ئەدەبیاتیەنە هەرمانە کەرا چەم وزا پەی قووڵایی فەرهەنگی بریقەداریشا و بتاوا دماڕوٙنە وەشکەریٛ بەرهەمە هازدارەکاشا با،جیای کەڵک گیٛرتەی جە واچ و دەسەواچە لەیۮەکا کە بوٙ نوونگەو شیڤیای دلیٛگروو نویستەکا و وەش نەبیەی پیٛوەندییٛوی قووڵ و ڕیٛخدار چنی وەردەنگی با تخوونوو خەرمانوو ئەدەبیاتوو ویٛشا گناوە.

گەورەتەرین ئەدبیاتیٛ ئاروٙ دنیای، زەمانیٛو بیەن ڕوٙشنویرەکیٛشا دەسشا کەرۮەن گلیٛرەوە کەرۮەی ئەدەبیاتی دەمواچیشا و توٙمار کەرۮەیش هەر پا شیٛوەیچە بیەنە ئەدەبیاتشا دەوڵەمەند بیەن و کوٙلوڵەداستانیٛ و ڕوٙمانیٛ گەوریٛ و بنەچەق بەرزیٛشا دەینیٛوە بەر،یامکەتی پەی هوٙرگیٛڵنای جە زوانەکاتەری پەنگشا نەوارۮەن.

بەداخەوە ئەدەبیاتوو هەورامانی چەپەوانەو ئەدەبیاتەکاو تەنانەت دەور وپەشتیچش پڕانەنە دلیٛڕاسەو ڕوٙخانەی بیٛ ئانەیە دوٙ ویەڕەکیٛ هەر ویٛشەوە چا گیٛجئاوەنە ئامانەوە مەلیٛ!!.

زوانوو نویستەی هەورامی وەختاریٛو هازیش گنوٙوە سارا کە هەرچی فەرهەنگی دەمواچش هەن توٙمار کریا بوٙ تا نویسەروو ئاروٙیش بتاڤوٙ تووڵەڕاو فەرهەنگیشەنە لاقوٙریٛ هیٛقمیٛ و هەسەمیٛ بنیوٙ.

بیٛ هیچ شکیٛوە کریوٙ واچی چاپ و وەڵاوە بیەی کتیٛبوو خەرمانە گەورەی قازانجیوی هەرەقەتینا پەی گەشە و ئەوەتەنای زوانوو هەورامی و نمازوٙ هەزاران سەرچەمیٛ فەرهەنگییٛ ڕەسەنیٛ هەورامییٛ پیٛسە فرەو چیٛوەکاش بلانە چیٛروو خاکی و جە پاڵیچشەنە بوٙ بە تەوەنیٛوە نەجمە پەی هوٙرئارۮەی دیواروو فەرهەنگیش.

ئاواتەوازەنا دەسوو خامەو کاکە سوٙبحانی هەرگیزاوهەرگیز سڕی بە ویٛشەوە نەوینوٙ و دایمە لەش ساق و ویربەرز بوٙ.

ئوٙمید حەبیبی
۲۶و کەڵەهەرزوو ۹۷ی ڕوٙجیاری

 

 hewraman
Load More In پەیلوای

داواچیٛو بنویسە

پۆستی ئەلکترۆنیکەت بڵاو ناکرێتەوە . خانە پێویستەکان دەستنیشانکراون بە *

بابەتو دماتەری

مەحمود خانو دزڵییٛ و گیانو هامکاری

مەحمود خانو دزڵییٛ و گیانو هامکاری بوٙنەو یاڎو سەڎ ساڵەو ئازاڎ کەردەی سلێمانی چیٛردەسو ئین…