یانە هەواڵیٛ دکتوٙر هەورامانی کوچی دمایینش کەرد

دکتوٙر هەورامانی کوچی دمایینش کەرد

78

دکتوٙر هەورامانی کوچی دمایینش کەرد

ئاروٙ 23/11/2018 جمعە؛ هەواڵ ئاما کە دکتر حەمەمین هەورامانی جە خەسەخانەو سلیٛمانی ئەمرەو خوایش کەردێنە، بە نامیٛ وەڵاو گەو هەورامانیوە پەرسەو خەمباری ویٛما یاونمیٛ بە قەوم کەسوکاریش و گردو خەڵکو هەورامانی، کوچی دمایی دکتور هەورامانی خەسارەتێوە گەورەش دا ئەو هەورامانی و کەسایەتییٛوی گەورەما  دەسەنە بەرشی، دکتر هەورامانی خەمەوەرو مەژەو هەورامانی داخیٛوی فریٛش نیا دڵمارە، خزمەتەکیٛش پەی مەژەو فەرهەنگو هەورامانی جە ئەژمار نمەیان، جە خوای داواکارینمیٛ یاگیٛش بەهەشتی نەبڕیاوە بوٙ .

هەرئاروٙ ماراشۆ بیاری و ئەسپەردە کریوٙ، پەرسەکەیچش هەر ئینا بیاریٛ

گردما پەی لاو خوڎای گیٛڵمیٛوە

وەڵاو گەو هەورامانی Hewraman.net

23/11/18

ژیوانامەو دکتوٙرحمەئەمین هەورامانی

دکتوٙر هەورامانی مانگەو نوٙی، ساڵەو 1938 عیسایی جە ئاڵیاواو شاردەگاو بیاریٛ  پەیڎا بیەن، بیاریٛنە وەنگای بنەڕەتیش تەمامنان،  پەی دریٛژەدای بەوانای لوان سلیٛمانی، هەر چاگە ناوەندی و دماناوەندیش سلیٛمانینە تەمانان، دماو ئانەی لوان کەرکوک ساڵێوە وەنانش و بیەن بە ماموٙساو بنەڕەتی،  بیاریٛ و هاوار و عەنەبە و هەڵەبجە و سلیٛمانی و دووکان، ماموٙسایش کەردەن، ئیجا لوان بەغدا وەنگاو (خلد) بیەن بە ماموٙسا.

دماو ئانەی لوان زانکۆ مستەنسەریەی و بەشو زوانە ئەوروپیەکانە زوانو ئینگلیزیش تەمامنان، دماتەر بیەن بە ماموٙساو وەنگاو دماناوەندی ( الشمامیە) ی جە بەغڎانە.

ئیجا بیەن بە سەرەکو بەشو هوٙرگیٛڵنای جە وەزارەتو یاوناینە، هەرپاسە سەرەکو بەشو ڕوٙشنویری ئیٛزگەی کوردی جە بەغدانە و  یاگەگیرو سەرەکو دەزگاو وەڵاوکەردەی ڕوٙشنویری کوردی بیەن.

ساڵەو 1982 یانەنیشت کریان و لوان پەی زانگاو ئەسکەندەریەی، دماو ساڵێوە ئامانۆ و چەنی زانگاو بەغڎای هامکاریش کەردەن بەشو ئەدەبیاتی کوردینە و  فارسینە، تا ساڵەو 1989ی زانگاو بەغداینە بوٙ،  هەر پەیوەندیش مەنوٙ چەنی زانگاو ئەسکەندەریەو وەڵاتو میسری، هوٙروشکنایێوە منویسوٙ بەنامیٛ (ڕیٛبازی مێژوی زمانی کوردی)  ئتر باوڕنامەو (پی ئێچ دی) پەنە بەخشان،  دمایی زانگاو سەلاهەدینی چاپ و وەڵاو کەردەنۆ.

دکتور هەورامانی  دماو ساڵەو 1974 یوە هامکاری کۆڕی زانیاری کوردیش کەردەن، پیٛسە ئەندامی یاردیدەری و  شارەزای و لێژنەو زوانی.

چنڎها واتاریش ڕوٙنامە کوردیەکانە وەڵاویٛ بینێوە، بە تایبە ڕوٙنامەو هاوکاری،  گوڤارو ڕوٙشنبیری نوێ و بەیان، گوڤارو زانکۆی و کۆڕی زانیاری و گوڤارو کاروانی.

بەزوانی عەرەبیچ جە ڕوٙنامەو التاخی و العراق ینە چندها واتارییٛش سەرو ڕوٙشنویری کوردی وەڵاو کەردیٛنێوە.

ئینەیچ بەرهەمەکیٛش بە زوانی عەرەبی و کوردی کە چاپیٛ کریاینیٛ:

  1. چۆن ئەبیتە مامۆستایەکی سەرکەوتوی زمانی ئینگلیزی
  2. فۆنەتیکی زمانی کوردی
  3. ڕۆشنبیری وەلی دێوانە
  4. زارەکانی زمانی کوردی لەتەرازوی بەراوردا
  5. لەیلیٛ و مەجنون
  6. کاکەیی
  7. زمانی ئاڤیستا
  8. فەرهەنگی زاروە و ئیدیۆمی زمانی کوردی
  9. مێژوی ڕیٛبازی زمانی کوردی
  10. ماکتب عن اللغە لەکردیە
  11. دیوانی میرزا ئەولقادری پاوەیی
  12. فەرهەنگی ئێریەن ڤاچ
  13. فەرهەنگی قوتابیان( ئینگللیزی کوردی) لەگەڵ سێ کەسی دیکەدا
  14. زاراوەکانی زمانی کوردی بۆ کۆلێجی ئەدەبیات لەگەڵ( کامل بەسیر، کوردستان، سادق بەهادین)
  15. گوڵزاری هەورامان بە هامکاری حمەرەشید ئەمین دوویٛ بەرگیٛن
  16. مێژووی هەورامان کە دوویٛ هەزار لاپەڕیٛ زیاتەرەن ساڵەو د2016 تازەتەرین چاپش بەرشیەن
  17. فیٛشتەر جە 25 کتیبیٛ چاپ کریێش هەنیٛ، تا ئاساتە کوچی دمایش کەرد هەر خەریکو نویستەی بیەن، ساڵەو پاری 2017 جە ڕوٙ زوانی ئەڎاینە، کتیبیانەکەش پیٛشکەشو زانگاو هەڵەبجەی کەرد،  وەسیەتەیچش کەردەبیٛ کە  جە بیاریٛ و باخچەو یانەکەو ویٛشەنە ئەسپەردە کریوٙ.

دکتر هەورامانی زوانو عەرەبی و فارسی و ئینگلیزیش زانان ، ئانا یاگیٛ سەرنجیٛن کە نامیٛ بڕیٛو جە بەرهەمەکاش نە نویستینەم، چون وەردەسەنە نەبیٛنیٛ

دکتوٙر هەورامانی ئاواتیٛوی بەرزش بیٛ هەکە بەرنامەشەنە بیٛ “هەشارگەو هەورامان ئەشناسای” بنیورە وەلیٛم وەربەسیٛ ئامیٛنە ڕاش و ئی وەرمشە چەنی ویٛش بەرد چیٛرو خاکی.  یاگیٛ داخیٛنە کە هیچ بەرهەمێوەش بەزوانی ئەڎایی ویٛش نەبیەن.

کەلکم جە کتیٛبو مێژووهەورامنی هورگیٛرتەن پەی نویستەی ئی ژیوانامەیە

د.ناجح گوڵپی 23/11/18

 hewraman
Load More In هەواڵیٛ

داواچیٛو بنویسە

پۆستی ئەلکترۆنیکەت بڵاو ناکرێتەوە . خانە پێویستەکان دەستنیشانکراون بە *

بابەتو دماتەری

خاتو کیانا عەبدڵاهی فەڕ مەدالیای ئاڵتونیش هوٙرگیٛرت

خاتو کیانا عەبدڵاهی فەڕ مەدالیای ئاڵتونیش هوٙرگیٛرت خاتو کیانا عەبدڵای فەڕ، کناچیٛ هەورامی…