یانە هەواڵیٛ ئایا کەشتیو حەزرەتو نوحی ئیٛرانەنە نیشتەنۆ؟

ئایا کەشتیو حەزرەتو نوحی ئیٛرانەنە نیشتەنۆ؟

106

ئایا کەشتیو حەزرەتو نوحی ئیٛرانەنە نیشتەنۆ؟

بەپاو هەواڵو تیمو تاوتوکارێ”ئەنستیتو پەیجۆرێ کتێبی پیرۆز و باستان شناسێ”BibleArchaeology,Search&Exploration Institute Base Institute”پیجۆرە ئامان کە ڕەنگا کەشتی حەزرەتو نوحی(ع)دماو ئا وەشت و وارن و لێزەمەیە جە ئێرانەنە نیشتەبۆوە.
شۆنەو ئێستەیەو ئەوەمەنێو چۆ و تەختێ چویینێ جە”تخت سُلیمان”ی یانی سەرنیشتو ئێرانی ئی بابەتە، ڕەنگێ واقعی و حەرەقەتینش نمانا و پەردە جە نهانێو تەر جە کەشتی لۆری حەزرەتو نوحی(ع)کەوت جبەر.
تاوتوکار و باستان شناسێ ئی پروژەی ماچا ڕەنگا ئی تەختە و چۆکڵێ چا کەشتیەی مەنێبا جیا و ئینە یانی شکڵ گێرتەی پەیلوای تەر جەبارەو ئی کەشتیە گەورەیە و ئەڵبەتە ئێستەیەو کەشتی نوحی جە یاگێو دورتەر جە ئارارات و بە جوغرافیا و شۆنەی جیاوزتەر.
داستانە و ڕازەو کەشتی حەزرەتو نوحی(ع)جە دلێ کتێبێ تاریخی و کۆنی فرەینە ئامان.
نوح بە ئەمرەو خوای دەس کەرۆ بە سازنای و وەشکەردەی کەشتیوی لۆری و گەورەی تا کەس ویانەو وێش و ئیماندارا و هەرپاسە کۆمەڵێ فراوان جە گرد٘جۆر جڕ و جانەوەر و گیاندارو ئا زەمانیە جە تۆفان و لێزەمەی گەورەی و سامناکی دمایینی پارێزنۆ.
جە قورئانی کەریم و تەوراتەنە ئامان کە نوحی پەیامبەر،دەسورو سازنای ئی کەشتیە جە باری تەعالای مگێرۆ و چنها ساڵێ خجلو وەشکەردەیش بۆ و سەرەڕاو سوارکەردەی ئانزانێ ئیماندارێ،خەیلێ جە گیاندارانێ جۆراوجۆریچ،پیجۆرە کە جە هەر جۆرێ،جوتێ یانی نێرینە و مایینێ ڕانمونی و سوارو کەشتیەکەیش مکەرۆ تا شۆنەو وەشت و وارن و کۆتایی تۆفانی و نیشتەی ئا لافاوە گەورەیە،قافڵەو ئانزانی و ژیوار و زیندگی و سروشتی،جە فەوتیای دوروزۆ و ڕزگار و بەرقەرار بۆ و بمانۆ و پەی هەمیشەی گنۆنە دلێ جەریانو ڕێک و پێک و ترازمەندو کایناتی بێ پەڕاوپەڕی.
هەرچن مواچیۆ کەشتی نوحێ بەرزاییەکاو کەشو ئاراراتی جە مەحاڵو ئەرمەنیاوە نیشتەنۆ، بەڵام هەڵای پەیجۆرکار و باستان شناسێ شۆنەمای تاریخی،خجلوئێستەیەو ئی کەشتیەنێ.
داستانەو حەزرەتو نوحی(ع)جە بەشو ٦تا۹ کتێبو پیرۆزو تۆراتی(پید٘ابیەی) وکتێبو موقەدەسو مەسیحیان و هەرپاسە قورئانی کەریمەنە(سوەرتێو ۱۱ تا ۷۱ی) ئامان و جە چنڎ یاگێ تەری باسش کریان.
بابەتێ کە پەنەوازەن بواچیو ئینەن کە ئی داستان و ڕوەداوە جه دەمو خەڵکو فرەو چا یاگا کە دورێ بیەنێ چی تۆفان و لافاوە گەورەیە،باسکریان و واچیان و بەڵگیٛو سەندێو ئی بابەتیە ئیسەتێ هەنێ و بەڕاسی ئینە خەیلێ سەرگێجەئاوەر و یاگێو پەرس و
قسەین،پەی نمونەی جە دەمو بومێ وڵاتو ئوسترالیا،تەمەدونێ ئامریکای پانیشتی و هەرپاسە مەردمو سورپۆسێ ئامریکای سەرنیشتی و فرەو جە یاگای تەری،ئی داستانێ ئاماینە و دەماودەم گێڵنانشاوە، ئیجا چێنە پەرسێ کرێڵی مەی وەرۆ کە چەنی مکریۆ ئا خەڵکێ کە هەزاران کیلومیترێ چی ڕوەداوەیە دورێ بیەنێ، زانابۆشا پی ماجرای؟یا ئی خەڵکێ ئەوەمەنەو ئا ڕوەداوێنێ و پسەو موسافێرێ و چەنی حەزرەتو نوحی ئەرەنیشتێ و سوارو ئا کەشتیە بیەنێ، یام دماتەرۆ ئەژنەویەنشا کە ئینەیچ پەی ئا وەختیە کە هەڵای ئانزان دەسش نەیاوان بە کاردەستی هەواڵ کیانی پسەو ئارۆی، یاگێ پەرسیەنە،ئاڎیچ چکۆ جە یاگای پسەو میان ئاوو ئوسترالیا یام دلێ جەنگەلێ وارانیەکاو ئامریکای پانیشتی و دلێ خەڵکو ساراو ئافریقای.
ئەڵبەتە بڕێ جە زانشمەندێ دیرینە و باستان شناسێ سەرو ئی پەیلوای و باوەڕیەنێ کە خەرمانەو گێرتەی لافاو و تۆفانو حەزرەتو نۆحی مەحدود و تایبە پی جوغرافیاو ئیسەتێو وەرهورزی دلێڕاسەی نەبیەن و جە واقع گرد٘و زەمینیش گێرتەنەرە و پیجۆرە تاریخ و جوغرافیایو زەمینی جەبارو ئیقلیمی و ئاوهوای بە دماو ئی لافاوە گەورێ توشو ئەرەفاڕیای بۆ و تەشک و ساختارێ جیاوازی جە ژیوار و بومی وەش بۆنە و متاومێ بواچم کە تۆفانو نوحی(ع)ئاخێزگە و سەرەتایوە تازە و نەو جە سازنای ساختاری ئیقلیمی٫ ئانزانی٫ژنێتیک٫ویر و باوەڕ٫ئایین و کەردەوەو شارستانیەتو جهانیەن و پەیلوای ویەردەی وەڵێ نوح و دماو تۆفانو نوحی بابەتێ جیدی و باوەڕپەنه کریای پەی ئانزانو ئارۆی مارۆ وەرۆ.

وەڵاوگەو هەورامانی

 hewraman
Load More In هەواڵیٛ

داواچیٛو بنویسە

پۆستی ئەلکترۆنیکەت بڵاو ناکرێتەوە . خانە پێویستەکان دەستنیشانکراون بە *

بابەتو دماتەری

خاتو کیانا عەبدڵاهی فەڕ مەدالیای ئاڵتونیش هوٙرگیٛرت

خاتو کیانا عەبدڵاهی فەڕ مەدالیای ئاڵتونیش هوٙرگیٛرت خاتو کیانا عەبدڵای فەڕ، کناچیٛ هەورامی…